5. Ònye bụ ntọala nke ọgbakọ ndị Kraịst, oleekwa otú e si buo nke a n’amụma?

⁵ Pọl dere, sị: “Ọ dịghị onye ọ bụla pụrụ ịtọ ntọala ọzọ ma ọ bụghị Nke a tọworo, Nke bụ́ Jisọs Kraịst.” (1 Ndị Kọrint 3:11) Nke a abụghị nke mbụ e jiworo Jisọs tụnyere ntọala. N’ezie, Aịsaịa 28:16 buru amụma, sị: “Otú a ka Onyenwe anyị, bụ́ Jehova, sịrị, Lee, abụ m onye tọworo ntọala na Zaịọn, bụ́ otu nkume, nkume nke ọnwụnwa, nkume nkuku dị oké ọnụ ahịa nke bụ́ ntọala siri ike.” Jehova ezubewo eri oge na Ọkpara ya ga-aghọ ntọala nke ọgbakọ ndị Kraịst.—Abụ Ọma 118:22; Ndị Efesọs 2:19-22; 1 Pita 2:4-6.

6. Olee otú Pọl si tọọ ntọala kwesịrị ekwesị n’ime ndị Kọrint bụ́ ndị Kraịst?

⁶ Gịnị bụ ntọala ndị Kraịst n’otu n’otu? Dị ka Pọl si kwuo, ezi onye Kraịst enweghị ntọala ma ọ bụghị nke ahụ a tọrọ n’Okwu Chineke—Jisọs Kraịst. Pọl tọrọ ntọala dị otú ahụ n’ezie. Na Kọrint, ebe e jiri nkà ihe ọmụma kpọrọ oké ihe, ọ nwaghị iji amamihe nke ụwa dọrọ mmasị ndị mmadụ. Kama, Pọl kwusara “Kraịst, na a [kpọgburu, NW] ya,” bụ́ nke ndị mba ọzọ weere dị ka “ihe nzuzu.” (1 Ndị Kọrint 1:23) Pọl kụziri na Jisọs bụ isi sekpụ ntị ná nzube Jehova.—2 Ndị Kọrint 1:20; Ndị Kọlọsi 2:2, 3.

8. Olee otú anyị si atọ Kraịst dị ka ntọala n’ime ndị gaje ịbụ ndị na-eso ụzọ?

⁸ Mgbe anyị tọrọ Kraịst dị ka ntọala, anyị adịghị ele ya anya dị ka nwa ọhụrụ na-anọghị na nchebe nke dina n’ihe a na-etinye nri anụ ụlọ, ma ọ bụ dị ka onye ya na Jehova hà nhata n’Atọ n’Ime Otu. Ee e, echiche ndị dị otú ahụ Akwụkwọ Nsọ na-akwadoghị bụ ntọala nke ndị Kraịst adịgboroja. Kama nke ahụ, anyị na-ezi na ọ bụ nwoke kasị ukwuu nke dịworo ndụ, na ọ tọgbọrọ ndụ ya zuru okè n’ihi anyị, nakwa na ọ bụ Eze Jehova họpụtara na-achị achị n’eluigwe taa. (Ndị Rom 5:8; Mkpughe 11:15) Anyị na-agbalịkwa ịkwali ndị anyị na-amụrụ ihe ije ije ná nzọụkwụ Jisọs na iṅomi àgwà ya. (1 Pita 2:21) Anyị chọrọ ka ha bụrụ ndị ịnụ ọkụ n’obi Jisọs maka ozi ahụ, ọmịiko ya n’ebe ndị e wedara n’ala na ndị a na-emegbu emegbu nọ, ebere ya n’ebe ndị mmehie bụ́ ndị obi amamikpe ha gwepịara nọ, obi ike ya na-adịghị ada ada n’agbanyeghị ọnwụnwa, ga-akpali. N’eziokwu, Jisọs bụ ntọala dị ebube. Ma gịnị na-esochi?