1. Olee ihe jikọrọ ndị enyi gị na otú i si akpa àgwà?

Ndị mmadụ na-akpakarị àgwà ka ndị ha na ha na-akpa. Ha nwere ike ịmụta àgwà ọma ma ọ bụ àgwà ọjọọ n’aka ha, ma hà na-ahụ ihu na ihu ma hà na-akpa n’Ịntanet. Ọ bụ ya mere Baịbụl ji sị na “onye ya na ndị ma ihe na-akpa ga-ama ihe, ma ihe agaghị agaziri onye ya na ndị nzuzu [ya bụ, ndị na-ahụghị Jehova n’anya] na-emekọ ihe.” (Ilu 13:20) Ọ bụrụ na ndị enyi gị hụrụ Jehova n’anya ma na-efe ya, ha nwere ike ime ka gị na ya dịkwuo ná mma, nyekwara gị aka ịna-eme ihe dị mma. Ma, ọ bụrụ na ndị enyi anyị ahụghị Jehova n’anya, ha nwere ike ime ka anyị na ya gharazie ịdị ná mma. Ọ bụ ya mere Baịbụl ji gwa anyị ka anyị saa anya ná mmiri mgbe anyị na-emete ndị enyi. Ọ bụrụ na ndị enyi anyị hụrụ Chineke n’anya, anyị ga-amụta ihe n’aka ha, hanwa ga-amụtakwa ihe n’aka anyị. Anyị na ha ga ‘na-agba ibe anyị ume ma na-eme ka ibe anyị dị ike.’​—1 Ndị Tesalonaịka 5:11.

E nwere ọmarịcha onyinye Jehova nyere anyị mgbe o kere anyị. Onyinye ahụ bụ na o kere anyị ka anyị na-ekwu okwu. Ọ̀ na-achọ ịma ihe anyị ji onyinye a o nyere anyị na-eme? N’eziokwu, ọ na-achọ. (Gụọ Jems 1:26.) Olee otú anyị nwere ike isi mee ka ihe anyị na-ekwu na-atọ Jehova ụtọ?

1. Gịnị ka anyị kwesịrị iji onyinye ahụ na-eme?

Baịbụl gwara anyị, sị: “Na-agbanụ ibe unu ume ma na-emenụ ka ibe unu dị ike.” (1 Ndị Tesalonaịka 5:​11) Ò nwere ndị i chetara i nwere ike ịgba ume? Olee otú ị ga-esi gbaa ha ume? Mee ka obi sie ha ike na ị hụrụ ha n’anya. I nwere ike ịgwa ha ihe mere i ji hụ ha n’anya. Ò nwere amaokwu Baịbụl i chetara ị ga-eji gbaa mmadụ ume? E nwere ọtụtụ amaokwu Baịbụl i nwere ike isi na ha họrọ ndị nke ị ga-eji gbaa mmadụ ume. Chetakwa na otú i si kwuo okwu nwere ike ịgba mmadụ ume. N’ihi ya, ị na-agwa mmadụ okwu, gbalịa wetuo obi ala, jirikwa olu ọma.​—Ilu 15:1.

2. Olee ụdị okwu anyị na-ekwesịghị ịna-ekwu?

Baịbụl kwuru, sị: “Ka okwu rere ure ghara isi unu n’ọnụ pụta.” (Gụọ Ndị Efesọs 4:29.) Ihe a o kwuru pụtara na anyị ekwesịghị ịna-ekwu okwu na-adịghị mma. Anyị ekwesịghịkwa ịna-ekwu ihe nwere ike imenye mmadụ ihere ma ọ bụ gbuo mmụọ ya. Anyị ga-ezerekwa ịgba asịrị na ikwutọ mmadụ.​—Gụọ Ilu 16:28.

3. Olee ihe ga-enyere anyị aka ịna-ekwu okwu otú ga-agba ndị ọzọ ume?

Ihe ndị anyị na-akpụkarị n’ọnụ na-egosi otú anyị si ele ihe anya na ihe ndị dị anyị n’obi. (Luk 6:45) N’ihi ya, anyị kwesịrị ịgba mbọ ka anyị na-eche ihe ndị dị mma, ya bụ, ihe ndị ziri ezi, ihe ndị dị ọcha, ihe ndị na-eme ka mmadụ hụ ibe ya n’anya, na ihe ndị kwesịrị otuto. (Ndị Filipaị 4:8) Ihe ga-enyere anyị aka ịna-eche ihe ndị a bụ ịkpachara anya n’ihe ndị anyị ji eme onwe anyị obi ụtọ nakwa ụdị ndị anyị na-emete enyi. (Ilu 13:20) Ihe ọzọ ga-enyere anyị aka bụ ịna-eche ihe anyị chọrọ ikwu eche. Chee otú obi ga-adị ndị ọzọ n’ihi ihe i kwuru. Baịbụl kwuru, sị: “Okwu mmadụ kwuru n’echeghị echiche dị ka ebe e ji mma agha maa mmadụ, ma okwu ndị ma ihe na-agwọ mmadụ.”​—Ilu 12:18.

MỤTAKWUO IHE

4. Na-eche ihe ị ga-ekwu eche

Mgbe ụfọdụ, anyị na-ekwu ihe anyị na-emecha kwaara ụta. (Jems 3:2) Gụọnụ Ndị Galeshia 5:22, 23. Unu gụchaa ya, unu eleba anya n’ajụjụ ndị a:

• Ị chọọ ịna-eche ihe ị na-ekwu eche, olee nke n’ime àgwà ndị a kpọrọ aha ebe a ị ga-arịọ Jehova ka o nyere gị aka ịna-akpa? Olee otú àgwà ndị a nwere ike isi nyere gị aka?

Gụọnụ 1 Ndị Kọrịnt 15:33. Unu gụchaa ya, unu eleba anya n’ajụjụ a:

• Olee ụdị okwu mmadụ nwere ike ịna-ekwu ma ọ bụrụ na ya na ndị ọjọọ na-akpa ma ọ bụ na o ji ihe na-adịghị mma eme onwe ya obi ụtọ?

Gụọnụ Ekliziastis 3:1, 7. Unu gụchaa ya, unu eleba anya n’ajụjụ a:

• Olee mgbe mmadụ kwesịrị ịgba nkịtị ma ọ bụkwanụ mgbe o nwere ike ichere ruo oge ọzọ ka mma ọ ga-ekwu ihe ọ chọro ikwu?

5. Na-ekwu ihe dị mma gbasara ndị ọzọ

VIDIO: Na-ekwu “Okwu Dị Mma” Maka Iwuli Ndị Ọzọ Elu (4:07)

• Gịnị mere nwanna a anyị lere na vidio ji chọọ ịgbanwe ihe ndị ọ na-ekwu gbasara ndị ọzọ?

• Gịnị ka o mere nyeere ya aka ịgbanwe?

Gụọnụ Ekliziastis 7:16. Unu gụchaa ya, unu eleba anya n’ajụjụ a:

• E nwee ihe mere ka anyị chọọ ikwu ihe na-adịghị mma gbasara onye ọzọ, gịnị ka anyị kwesịrị icheta?

Gụọnụ Ekliziastis 7:21, 22. Unu gụchaa ya, unu eleba anya n’ajụjụ a:

• Olee otú amaokwu abụọ a nwere ike isi nyere gị aka ka ị ghara iwe iwe ma mmadụ kwuo ihe na-adịghị mma gbasara gị?

6. Jiri olu ọma na-agwa ndị ezinụlọ unu okwu

VIDIO: Ịhụnanya na Nkwanye Ùgwù Na-eme Ka Ezinụlọ Dịrị n’Otu (3:08)

• Olee ihe ga-enyere gị aka ịna-eji olu ọma agwa ndị ezinụlọ unu okwu?

Gụọnụ Ndị Efesọs 4:31, 32. Unu gụchaa ya, unu eleba anya n’ajụjụ a:

• Olee ụdị okwu na-eme ka udo dịrị n’ezinụlọ?

Jehova kwuru otú ihe Ọkpara ya bụ́ Jizọs dị ya. Gụọnụ Matiu 17:5. Unu gụchaa ya, unu eleba anya n’ajụjụ a:

• Olee otú i nwere ike isi na-eme ụdị ihe a Jehova mere ma ị na-agwa ndị ezinụlọ unu okwu?

NCHỊKỌTA

Ihe anyị kwuru nwere ike ịgba mmadụ ume ma ọ bụ wee ya iwe. Anyị kwesịrị ịna-echebara ihe anyị chọrọ ikwu echiche, chebakwara mgbe anyị chọrọ ikwu ya na otú anyị chọrọ isi ekwu ya echiche.

Ajụjụ ndị e ji echeta ihe a mụrụ

• Olee ụzọ ndị i nwere ike isi jiri ihe ị na-ekwu nyere ndị ọzọ aka?

• Olee ụdị okwu ị na-ekwesịghị ịna-ekwu?

• Gịnị nwere ike inyere anyị aka iji olu ọma na-agwa ndị ọzọ okwu, na-agwakwa ha ya otú ga-agba ha ume?

IHE Ị GA-ELEBAKWU ANYA

Gịnị nwere ike inyere anyị aka ịna-ekwu ihe ga-agba ndị ọzọ ume?

Nweenụ Ire Ndị Maara Ihe (8:04)

Chọpụta ihe nwere ike inyere gị aka ka ị ghara ịna-ekwu okwu ọjọọ.

“Ịkpọ Mmadụ Iyi Ọ̀ Dị Njọ nke Otú Ahụ?” (Isiokwu gbara n’Ịntanet)

Chọpụta ihe ị ga-eme ka ị ghara ịna-agba asịrị.

Gịnị Ga-enyere M Aka Ịkwụsị Ịgba Asịrị? (2:36)

E nwere otu nwoke ịkwụsị ịkpọ ndị mmadụ iyi siiri ike. Chọpụta otú Jehova si nyere ya aka ya emechaa kwụsị ya.

“M Malitere Ichesi Echiche Ike ma Ò nwere Uru Ndụ M Na-ebi Baara M” (Ụlọ Nche, Ọgọst 1, 2013)