15, 16. Olee ụdị àgwà ọ ga-abụ nwunye bụ́ Onye Kraịst kpawa ya erite di ya n’uru?

¹⁵ Olee ụdị àgwà a pụrụ iji rite di n’uru? N’ezie, ọ bụ àgwà ụmụ nwanyị Ndị Kraịst na-azụlitekarị. Pita na-ekwu, sị: “Unu ekwekwala ka ịchọ mma unu bụrụ nke ịkpa isi efu na nke iyikwasị ihe ịchọ mma ọlaedo ma ọ bụ iyi uwe elu, kama ka ọ bụrụ mmadụ zoro ezo nke obi n’uwe na-apụghị ire ure bụ́ mmụọ dị jụụ na nke dị nwayọọ, bụ́ nke bara oké uru n’anya Chineke. N’ihi na n’oge gara aga, otú ahụkwa ka ụmụ nwanyị dị nsọ ndị na-enwe olileanya na Chineke siri chọọ onwe ha mma, na-edo onwe ha n’okpuru di nke aka ha, dị ka Sera si erubere Ebreham isi, na-akpọ ya ‘onyenwe m.’ Unu aghọwokwa ụmụ ya, ma ọ bụrụhaala na unu anọgide na-eme ihe ọma, gharakwa ịtụ egwu ihe ọ bụla na-akpata oké ụjọ.”—1 Pita 3:3-6.

17. Olee otú Sera si bụrụ ezi ihe nlereanya nye ndị nwunye bụ́ Ndị Kraịst?

¹⁷ E zoro aka n’ebe Sera nọ dị ka ihe nlereanya, ọ bụkwa ihe nlereanya kwesịrị ekwesị nye ndị nwunye bụ́ Ndị Kraịst ma di ha hà bụ ndị kwere ekwe ma ọ bụ na ha abụghị. O doro anya na Sera lere Ebreham anya dị ka isi ya. Ọbụna n’obi ya, ọ kpọrọ ya “onyenwe m.” (Jenesis 18:12) Ma, nke ahụ ewedaghị ya ala. O doro anya na ọ bụ nwanyị siri ike n’ụzo ime mmụọ site n’okwukwe siri ike nke ya onwe ya nwere na Jehova. N’ezie, o so ‘n’oké ìgwè ndị àmà’ bụ́ ndị ihe nlereanya nke okwukwe ha na-akpali anyị ‘iji ntachi obi na-agba ọsọ ahụ nke e setịpụrụ n’ihu anyị.’ (Ndị Hibru 11:11; 12:1) Ọ bụghị ihe na-eweda n’ala nwunye bụ́ Onye Kraịst ịdị ka Sera.