Ò nwetụla mgbe ị jụrụ onwe gị ụdị ajụjụ ndị a? Ọ bụrụ na o nwetụla, ọ bụghị naanị gị ka ụdị ajụjụ ndị a na-echu ụra. Ọtụtụ ndị nọ n’ebe dị iche iche n’ụwa na-ajụ ajụjụ ndị a. Ma, ị̀ ga-amatali azịza ha?

A jụọ ọtụtụ ndị, ha ga-asị “ee.” Olee ihe mere ha ga-eji asị “ee”? Ọ bụ n’ihi na ha amatala ọtụtụ azịza ajụjụ ndị na-echu ha ụra na Baịbụl. Ị̀ ga-achọ ịma ihe Baịbụl na-akụzi? Ọ bụrụ na ị ga-achọ, gbalịa ka gị na Ndịàmà Jehova malite ịmụ Baịbụl.a Ha agaghị ana gị ego maka ihe unu ga-amụ.

Ma, a sị ụfọdụ ndị bịa mụọ Baịbụl, ha asị na ha ji ihe n’aka, ma ọ bụ na Baịbụl siri ike ọmụmụ, ma ọ bụkwanụ na ike Baịbụl adịghị ha. Ma, o nwere ndị na-anaghị ekwu otú ahụ. A sị ha bịa mụọ Baịbụl, ha abịa ozugbo. Lee ihe ụfọdụ n’ime ha kwuru:

• Otu nwaanyị onye Ingland aha ya bụ Gill kwuru, sị: “Ekpeela m Katọlik, kpee Anglịkan, kpee okpukpe ndị Sik, kpee nke ndị Buda, gụọkwa gbasara okpukpe na mahadum. Ma, amatalighị m azịza ajụjụ ndị m na-ajụ gbasara Chineke. Ma, otu ụbọchị, otu nwaanyị Onyeàmà Jehova bịara ozi ọma n’ụlọ m. Otú o si jiri Baịbụl zaa m ajụjụ niile m jụrụ ya mere ka m kweta ka mụ na ya mụwa Baịbụl.”

• Otu nwoke onye Bene Ripọblik aha ya bụ Koffi kwuru, sị: “Ajụrụ m pastọ anyị ọtụtụ ajụjụ ndị na-echu m ụra, ma ihe ọ zara m ejughị m afọ. Ma, mgbe m jụrụ otu Onyeàmà Jehova ajụjụ ndị ahụ, o ji naanị Baịbụl zaa m ha niile. Mgbe ọ jụrụ m ma m̀ ga-achọ ịmatakwu ihe ndị ọzọ dị na Baịbụl, ekwetara m ozugbo.”

• Otu nwoke onye Brazil aha ya bụ José sịrị: “M chọsiri ike ịma ọnọdụ ndị nwụrụ anwụ. Ekweere m na ndị nwụrụ anwụ nwere ike imesi ndị dị ndụ ike, ma achọrọ m ịma ihe Baịbụl kwuru. M bidoziri soro otu enyi m bụ́ Onyeàmà Jehova mụwa Baịbụl.”

• Otu nwaanyị onye Meksiko aha ya bụ Dennize kwuru na ya agbalịala ịgụ Baịbụl, ma o kweghị ya nghọta. Mana ọ sịrị na otu ụbọchị Ndịàmà Jehova bịara ozi ọma na nke ya, ha kọwaara ya ụfọdụ amụma ndị dị na Baịbụl, ha edoo ya anya, nakwa na o mere ka ya chọwa ịmata ihe ndị ọzọ dị na Baịbụl.

• Otu nwaanyị onye Nepal aha ya bụ Anju kwuru, sị: “Ọ na-eme m obi abụọ ma ihe banyere m ọ̀ na-emetụkwa Chineke n’obi. M gwara ya Chineke n’ekpere. N’echi ya, Ndịàmà Jehova bịara na nke m. Mgbe ha gwara m na ha ga-achọ ka mụ na ha mụwa Baịbụl, m kwetakwara.”

Ihe a niile ndị mmadụ kwuru na-echetara anyị otu ihe Jizọs kwuru na Baịbụl. Ọ sịrị: “Obi ụtọ na-adịrị ndị maara mkpa ime mmụọ ha.” (Matiu 5:3) N’eziokwu, Chineke kere anyị ka ọ na-agụ anyị agụụ ịma gbasara ya. Ọ bụkwa naanị ya ga-emeli ka anyị mata onye ọ bụ. O ji Okwu ya bụ́ Baịbụl eme ka anyị mata ya.

Oleezi otú Ndịàmà Jehova na ndị mmadụ si amụ Baịbụl? Olee uru ịmụ Baịbụl ga-abara gị? A ga-aza ajụjụ ndị a n’isiokwu na-eso nke a.

E ji ịgbasa ozi ọma mara Ndịàmà Jehova. Ma, ị̀ ma na n’ebe niile n’ụwa, anyị na ndị mmadụ na-amụ Baịbụl?

N’afọ 2014, Ndịàmà Jehova dị ihe karịrị nde mmadụ asatọ, ha bikwa n’ihe karịrị narị mba abụọ na iri anọ. Ha na ihe fọrọ ntakịrị ka ọ bụrụ nde mmadụ itoolu na narị puku mmadụ ise mụrụ Baịbụl kwa ọnwa.a E nwere ihe dị ka otu narị mba na iri anọ ọnụ ọgụgụ ndị anyị na ha na-amụ Baịbụl karịrị ndị bi na nke ọ bụla n’ime ha.

N’afọ ọ bụla, Ndịàmà Jehova na-ebipụta Baịbụl, akwụkwọ, magazin, na ihe ndị ọzọ ha ji akụziri ndị mmadụ Baịbụl. Ha na-ebipụta ihe ndị a ihe fọrọ obere ka ọ bụrụ otu ijeri na narị nde ise. Ha na-ebipụtakwa ha n’ihe dị ka narị asụsụ asaa. Otú a ha si agba mbọ ebipụta ọtụtụ akwụkwọ n’ọtụtụ asụsụ na-eme ka ọ dịrị ọtụtụ ndị mfe ịmụ Baịbụl n’asụsụ ọ bụla ha chọrọ.

AZỊZA AJỤJỤ NDỊ MMADỤ NA-AJỤKARỊ GBASARA OTÚ NDỊÀMÀ JEHOVA SI AMỤ BAỊBỤL

Olee otú unu na ndị mmadụ si amụ Baịbụl?

Anyị na-ahọrọ otu isiokwu ma leba anya n’amaokwu Baịbụl ndị kwuru gbasara isiokwu ahụ. Iji maa atụ, Baịbụl zara ajụjụ ndị dị ka: Ònye bụ Chineke? Olee ụdị onye ọ bụ? Ò nwere aha? Ebee ka o bi? Anyị na Chineke ò nwere ike ịdị ná mma? Ihe na-esiri ụfọdụ ndị ike bụ ịmata ebe azịza ajụjụ ndị a dị na Baịbụl.

Anyị na-ejikarị akwụkwọ a na-akpọ Gịnị n’Ezie Ka Bible Na-akụzi? enyere ndị mmadụ aka ịmata azịza ajụjụ ndị a na Baịbụl.b A haziri akwụkwọ a otú ọ ga-enyere ndị mmadụ aka ịghọta ihe ndị dị na Baịbụl. E dere ihe gbasara Chineke, Jizọs Kraịst, mbilite n’ọnwụ, ihe mere ndị mmadụ ji ata ahụhụ, otú e si ekpe ekpere, nakwa ọtụtụ ihe ndị ọzọ n’akwụkwọ a.

Olee ebe a na-anọ amụ ihe a, oleekwa oge a na-amụ ya?

A ga-anọ n’ebe ọ bụla dị gị mma nakwa n’oge ị chọrọ.

Awa ole ka ọmụmụ ihe a na-ewe?

Anyị na ọtụtụ ndị na-eji ihe dị ka otu awa amụ Baịbụl kwa izu. Ma, ọ bụghị iwu na ọ ga-eru otu awa. Ọ bụ mgbe ị chọrọ ka a mụruo ya ka anyị ga-amụru ya. Anyị na ụfọdụ ndị na-amụ ihe naanị nkeji iri ma ọ bụ nkeji iri na ise kwa izu.

Ego ole ka a na-akwụ maka ọmụmụ ihe a?

Anyị anaghị ana mmadụ ego maka ịmụrụ ya ihe, o nweghịkwa onye anyị na-asị kwụọ ụgwọ akwụkwọ anyị na ya ji amụ ihe. Ihe a anyị na-eme dabara n’ihe Jizọs gwara ndị na-eso ụzọ ya. Ọ gwara ha, sị: “Unu natara n’efu, na-enyenụ n’efu.”—Matiu 10:8.

Afọ ole ka ọmụmụ ihe a na-ewe?

E nweghị afọ ole a kapịrị ọnụ. Ọ bụ gịnwa ga-ekpebi mgbe ị chọrọ ka anyị na gị mụruo ya. E nwere isiokwu iri na itoolu n’akwụkwọ anyị bụ́ Gịnị n’Ezie Ka Bible Na-akụzi? Ị chọọ, i nwere ike ịmụcha isiokwu ahụ niile ma ọ bụkwanụ gị amụọ ụfọdụ n’ime ha. Anyị na gị ga-eji nwayọọ nwayọọ na-amụ isiokwu nke ọ bụla otú ọ na-agaghị enye gị nsogbu.

Ọ̀ bụ iwu na m ga-ekweta ịghọ Onyeàmà Jehova?

Mba. Anyị anaghị amanye onye ọ bụla ikweta n’ihe anyị na ya na-amụ. Ma, ọ bụrụ na mmadụ aghọta ihe Baịbụl na-akụzi, ọ ga-enyere onye ahụ aka ịma ihe o kwesịrị ime.

Olee otú m ga-esi matakwuo ihe Ndịàmà Jehova na-akụzi?

Ị gaa na www.pr418.com/ig, ị ga-ahụ ọtụtụ ihe Ndịàmà Jehova kweere nakwa ihe dị iche iche ha na-eme.

Olee otú m ga-esi agwa unu na m chọrọ ka unu bịa mụwara m Baịbụl?

• 

  Gaa na www.pr418.com/ig. I lee anya n’ala ala, ị ga-ahụ ebe e dere “Gwa Anyị Ka Anyị na Gị Mụwa Baịbụl.” Ị pịa ya, ị ga-ahụ fọm ị ga-eji gwa anyị ka anyị na gị mụwa Baịbụl.

• I nwekwara ike iji adres anyị dị na peeji nke abụọ n’Ụlọ Nche a detara anyị akwụkwọ ozi. Jiri nke kacha dị nso n’ebe i bi deta ya.

• I nwekwara ike ịgwa Onyeàmà Jehova ọ bụla ị hụrụ na ị ga-achọ ka a bịa mụwara gị Baịbụl.