Jizọs na ndị na-eso ụzọ ya anọọla abalị atọ na Betani kemgbe ha si Jeriko lọta. Ma ugbu a, n’isi ụtụtụ Mọnde, abalị iri n’ọnwa Naịsan, ha na-aga Jeruselem. N’oge ahụ, agụụ na-agụ Jizọs. N’ihi ya, mgbe ọ hụrụ osisi fig, ọ gawara n’ebe ọ dị ka ọ mara ma ọ̀ ga-aghọta mkpụrụ na ya. Osisi fig ahụ ọ̀ mịalanụ mkpụrụ?

Ọnwa Mach agwụwala mgbe ahụ. Ma mgbe osisi fig ji amị mkpụrụ bụ n’ọnwa Jun. N’agbanyeghị ya, osisi fig ahụ ruru akwụkwọ ngwa ngwa. N’ihi ya, Jizọs tụrụ anya na o kwesịla ịmị mkpụrụ, ọ bụ eziokwu na oge o ji amị mkpụrụ erubeghị. Ma, o nweghị mkpụrụ ọ bụla ọ hụrụ na ya. Akwụkwọ fig ahụ mere ka o yie ka mkpụrụ ọ̀ dị n’osisi fig ahụ. N’ihi ya, Jizọs sịrị: “Amịla mkpụrụ onye ọ bụla ga-eri ọzọ ruo mgbe ebighị ebi.” (Mak 11:14) Ozugbo Jizọs kwuchara ihe a, osisi fig ahụ bidoro kpọnwụwa. N’ụtụtụ echi ya, ọ ga-eji ihe a merenụ kụziere ndị na-eso ụzọ ya ihe.

Obere oge ihe a mechara, Jizọs na ndị na-eso ụzọ ya rutere Jeruselem. Jizọs banyere n’ụlọ nsọ, bụ́ ebe ọ bara n’ehihie ụnyaahụ ya gaa legharịa anya. Ma, ihe mere o ji banye n’ụlọ nsọ ahụ taa abụghị naanị ka o legharịa anya. O mere ụdị ihe ahụ o mere n’afọ atọ ya gara aga n’oge Ememme Ngabiga nke afọ 30. (Jọn 2:14-16) Jizọs chụpụrụ “ndị na-ere ma na-azụ ahịa n’ime ụlọ nsọ ahụ.” O kpukwara “tebụl nke ndị na-agbanwe ego na oche nke ndị na-ere nduru ihu.” (Mak 11:15) O kwedịghị ka onye ọ bụla buru ihe ma jiri ogige ụlọ nsọ ahụ mere ụzọ ọ ga-esi aga ebe ndị ọzọ na Jeruselem.

Gịnị mere Jizọs ji kata obi chụpụ ndị na-agbanwe ego na ndị na-ere anụmanụ n’ụlọ nsọ? Ọ sịrị: “Ọ̀ bụ na e deghị, sị, ‘A ga-akpọ ụlọ m ụlọ ekpere dịịrị mba niile’? Ma unu emewo ya ọgba nke ndị na-apụnara mmadụ ihe.” (Mak 11:17) Ihe mere o ji kpọọ ha ndị na-apụnara mmadụ ihe bụ na ego ole ha na-eresị ndị mmadụ anụmanụ ha ga-eji chụọ àjà karịrị akarị. Jizọs weere ihe ahụ ha na-eme ka ịpụnara mmadụ ihe ma ọ bụ izu ohi.

Mgbe ndị isi nchụàjà, ndị odeakwụkwọ, na ndị ọzọ a ma ama nụrụ ihe Jizọs mere, ha gbalịsiwere ike igbu ya. Ma, nsogbu ha bụ na ha amaghị otú ha ga-esi egbu Jizọs n’ihi na ndị mmadụ na-esogharị ya ka ọ kụziere ha ihe.

Ọ bụghị naanị ndị Juu bịara Ememme Ngabiga ahụ, ndị mba ọzọ na-ekpe okpukpe ndị Juu bịakwara. Ụfọdụ n’ime ha bụ ndị Grik. Ha gakwuuru Filip gwa ya na ha chọrọ ịhụ Jizọs. O nwere ike ịbụ otú ahụ Filip zara aha Grik mere ha ji gakwuru ya. Ọ ga-abụ na Filip amaghị ma Jizọs ọ̀ ga-achọ ka ha na ya hụ. N’ihi ya, ọ gara kọsara ya Andru, ha abụọ esorozie gaa gwa ya Jizọs. Ọ ga-abụ na Jizọs ka nọ n’ụlọ nsọ mgbe ahụ.

Jizọs ma na ọ fọrọ ụbọchị ole na ole ka ọ nwụọ. N’ihi ya, ihe ahụ abụghị oge ọ ga-eji zawa ndị mmadụ ajụjụ niile ha nwere ma ọ bụ chọwa ka a nụwa aha ya. O meere Filip na Andru ihe atụ, sị: “Oge awa eruwo ka e mee ka Nwa nke mmadụ dị ebube. N’ezie, n’ezie, ana m asị unu, ọ bụrụ na otu mkpụrụ ọka wit adaghị n’ala wee nwụọ, ọ na-abụ otu mkpụrụ ọka; ma ọ bụrụ na ọ nwụọ, ọ na-amị ọtụtụ mkpụrụ.”—Jọn 12:23, 24.

Otu mkpụrụ ọka nwere ike iyi ihe na-abachaghị uru. Ma a kụọ ya, ya ‘anwụọ,’ o nwere ike ipu, ma mechaa ghọọ okporo ọka nwere ọtụtụ mkpụrụ na ya. Ọ bụkwa otú ọ dị Jizọs. Ọ bụ nwoke zuru okè. Ma, ebe o fere Chineke ruo ọnwụ, Chineke ga-esi n’aka ya nye imeriime ndị dị ka ya na-anaghị achọ ihe ga-abara naanị onwe ha uru, ndụ ebighị ebi. Ọ bụ ya mere Jizọs ji sị: “Onye hụrụ mkpụrụ obi ya n’anya na-ebibi ya, ma onye kpọrọ mkpụrụ obi ya asị n’ụwa a ga-echebe ya maka ndụ ebighị ebi.”—Jọn 12:25.

Jizọs anaghị eche naanị banyere onwe ya. N’ihi ya, ọ sịrị: “Ọ bụrụ na onye ọ bụla ga-ejere m ozi, ya sowe m, ebe m nọ ka onye ozi m ga-anọkwa. Ọ bụrụ na onye ọ bụla ga-ejere m ozi, Nna m ga-eme ka o nwee ùgwù.” (Jọn 12:26) Ngọzi a enweghị atụ. Ndị ahụ Chineke ga-eme ka ha nwee ùgwù ga-eso Kraịst chịa n’Alaeze ya.

Mgbe Jizọs chetara otú ọ ga-esi taa ahụhụ ma nwụọ ọnwụ ike, o kwuru, sị: “Ọ dị ihe na-echegbu mkpụrụ obi m ugbu a, gịnịkwa ka m ga-ekwu? Nna, zọpụta m n’oge awa a.” Ma Jizọs chọrọ imezu uche Chineke. N’ihi ya, o kwuru, sị: “Otú o sina dị, ọ bụ nke a mere m ji bịaruo n’oge awa a.” (Jọn 12:27) Ọ chọkwara ka ihe niile bụ́ uche Chineke mezuo, nke otu n’ime ya bụ ka o jiri ndụ ya chụọ àjà.

Mgbe Jizọs nọ n’ụlọ nsọ na Mọnde, abalị iri n’ọnwa Naịsan, o kwuru gbasara ọnwụ ọ na-aga ịnwụ n’oge na-adịghị anya. Ọ nọ na-echegbu onwe ya gbasara otú ọnwụ ya ga-esi mee ka a kọchaa Chineke. N’ihi ya, ọ gwara Chineke, sị: “Nna, mee ka aha gị dị ebube.” Otu olu si n’eluigwe kwuo, sị: “Emewo m ka ọ dị ebube, m ga-emekwa ka ọ dị ebube ọzọ.”—Jọn 12:27, 28.

Olu a gbara ndị nọ nso gharịị. Ụfọdụ chere na ọ bụ égbè eluigwe gbara. Ndị ọzọ kwuru, sị: “Mmụọ ozi agwawo ya okwu.” (Jọn 12:29) Ma, ọ bụ olu Jehova ka ha nụrụ. Ihe a abụghịkwa nke mbụ ụmụ mmadụ na-anụ olu Chineke n’oge Jizọs nọ n’ụwa.

Nke mbụ bụ mgbe e mere Jizọs baptizim. N’oge ahụ, Jọn Onye Na-eme Baptizim nụrụ ka Chineke kwuru banyere Jizọs, sị: “Onye a bụ Ọkpara m, onye m hụrụ n’anya, onye ihe ya masịrị m.” Nke abụọ bụ mgbe e mechara Ememme Ngabiga nke afọ 32. N’oge ahụ, Jizọs nwoghara n’ihu Jems, Jọn, na Pita. Ha atọ nụrụ ka Chineke kwuru, sị: “Onye a bụ Ọkpara m, onye m hụrụ n’anya, onye ihe ya masịrị m; geenụ ya ntị.” (Matiu 3:17; 17:5) Ma, na nke ugboro atọ a Jehova kwuru okwu, o kwuru ya otú ọtụtụ ndị ga-anụ ya.

Jizọs sịrị: “Olu a kwuru okwu abụghị n’ihi m, kama ọ bụ n’ihi unu.” (Jọn 12:30) Olu ahụ ndị Juu nụrụ gosiri na Jizọs bụ Ọkpara Chineke n’eziokwu, ya bụ, Mesaya ahụ e kwere ná nkwa.

Ihe ọzọ bụ na otú Jizọs si bie ndụ ya mere ka a mara otú ụmụ mmadụ kwesịrị isi na-ebi ndụ. O gosikwara na Setan bụ́ Ekwensu, bụ́ onye na-achị ụwa, kwesịrị ọnwụ. Jizọs kwuru, sị: “A na-ekpe ụwa a ikpe ugbu a; ugbu a, a ga-achụpụ onye na-achị ụwa a.” Jizọs ịnwụ apụtaghị na e meriela ya, kama, ọ pụtara na o meriela. Gịnị mere nke a ji bụrụ eziokwu? O kwuru, sị: “Ma mụ onwe m, ọ bụrụ na e si n’ụwa welie m, m ga-adọta ụdị mmadụ niile n’ebe m nọ.” (Jọn 12:31, 32) Jizọs ga-esi n’ọnwụ ọ ga-anwụ n’osisi ịta ahụhụ dọta ndị mmadụ n’ebe ọ nọ ma mee ka ha nweta ndụ ebighị ebi.

Mgbe Jizọs kwuchara banyere ‘isi n’ụwa welie ya,’ ìgwè mmadụ ahụ gwara ya, sị: “Anyị nụrụ n’ime Iwu ahụ na Kraịst ga-anọgide ruo mgbe ebighị ebi; oleekwanụ otú i si na-asị na a ghaghị iweli Nwa nke mmadụ elu? Ònye ka Nwa nke mmadụ a bụ?” (Jọn 12:34) N’agbanyeghị olu Chineke ha nụrụ na ihe ndị ọzọ merenụ, ọtụtụ n’ime ha ekweghị na Jizọs bụ Nwa nke mmadụ n’eziokwu, nakwa na ọ bụ Mesaya ahụ e kwere ná nkwa.

Jizọs kwukwara ọzọ na ya bụ “ìhè.” (Jọn 8:12; 9:5) Ọ gwara ìgwè mmadụ ahụ, sị: “Ìhè ahụ ga-anọtụkwu nwa oge n’etiti unu. Na-ejegharịnụ mgbe unu nwere ìhè ahụ, ka ọchịchịrị wee ghara ikpuchi unu . . . Mgbe unu ka nwere ìhè ahụ, nweenụ okwukwe n’ìhè ahụ, ka unu wee bụrụ ụmụ nke ìhè.” (Jọn 12:35, 36) Mgbe Jizọs kwuchara ihe a, ọ gara zoo n’ihi na abalị iri n’ọnwa Naịsan abụghị oge ọ ga-anwụ. Ọ bụ n’oge Ememme Ngabiga, n’abalị iri na anọ n’ọnwa Naịsan, ka ‘a ga-eweli ya,’ ya bụ, ka a ga-akpọgide ya n’osisi ịta ahụhụ.—Ndị Galeshia 3:13.

Ọ bụrụ na anyị eleba anya n’ihe mere n’oge Jizọs na-eje ozi ya n’ụwa, anyị ga-achọpụta na okwukwe ndị Juu na-enweghị na Jizọs mezuru amụma dị na Baịbụl. Aịzaya buru amụma na a ga-anyachi ndị mmadụ anya, meekwa ka obi ha kpọọ nkụ nke na ha agaghị echegharị, a gwọọ ha. (Aịzaya 6:10; Jọn 12:40) N’eziokwu, ọtụtụ ndị Juu ekwetaghị n’ihe ndị gosiri na Jizọs bụ Onye Nnapụta ahụ e kwere ná nkwa, bụ́ onye ha ga-esi n’aka ya nweta ndụ ebighị ebi.

Nikọdimọs, Josef onye Arimatia, na ọtụtụ ndị ọzọ na-achị achị “nwere okwukwe n’ezie” na Jizọs. Ma, hà ga-emenụ ihe ndị gosiri na ha nwere okwukwe, ka egwu ịchụpụ ha n’ụlọ nzukọ, ma ọ bụ ‘ịhụ otuto mmadụ n’anya,’ ọ̀ ga-eme ka ha ghara ime ihe ndị gosiri na ha nwere okwukwe?—Jọn 12:42, 43.

Jizọs kwuru otu n’ime ihe inwe okwukwe na ya pụtara. Ọ sịrị: “Onye nwere okwukwe n’ebe m nọ nwere okwukwe, ọ bụghị naanị n’ebe m nọ, kamakwa n’ebe onye zitere m nọ; onye na-ahụ m na-ahụkwa onye zitere m.” Ihe Chineke gwara Jizọs kụzie, bụ́kwanụ ihe Jizọs nọgidere na-akụzi, dị ezigbo mkpa nke na Jizọs sịrị: “Onye na-eleda m anya, nke na-adịghịkwa anabata ihe m na-ekwu, nwere onye ga-ekpe ya ikpe. Ọ bụ okwu m kwuru ga-ekpe ya ikpe n’ụbọchị ikpeazụ.”—Jọn 12:44, 45, 48.

Jizọs mechiziri okwu ya, sị: “Ihe m kwuru esighị n’echiche m, kama ọ bụ Nna m bụ́ onye zitere m nyere m iwu ihe m ga-akọ na ihe m ga-ekwu. Amakwaara m na iwu ya pụtara ndụ ebighị ebi.” (Jọn 12:49, 50) Jizọs ma na n’oge na-adịghị anya, ọ ga-eji ndụ ya chụọ àjà maka ndị nwere okwukwe na ya.—Ndị Rom 5:8, 9.