‘Ọchịchọ Maka Paradaịs’

N’afọ gara aga, alaka ụlọ ọrụ Ndịàmà Jehova dị na Papua New Guinea natara otu akwụkwọ ozi sitere n’aka otu onye na-agụ Teta! bụ́ onye bi na Lae, Morobe Province. Ọ kọwara, sị:

“Aghaghị m ikwenyesi ike na emere m mkpebi dị mma afọ ise gara aga (mgbe m nọ na Port Moresby) ịgụ magazin Teta!, bụ́ nke nzukọ unu na-ebipụta. Agụwo m mbipụta ya ọ bụla kemgbe 1997. Magazin Teta! juru n’ụlọ m.

“Amụtawo m ihe dị ukwuu. Ụtọ asụsụ m adịwo mma karị, ìgwè okwu m, ihe ọmụma m n’ozuzu ya, na nghọta m banyere Onye Okike amụbawo nke ukwuu. Abụrụkwuola m onye na-anagide ihe, onye na-echebara ndị ọzọ echiche, onye na-etinye uche n’ihe, azụlitewokwa m nkwanye ùgwù ka ukwuu n’ebe ákụ́kụ́ na ụmụ anụmanụ nọ. Ana m atụ aro ka ọtụtụ ndị na-agụ Teta! nakwa mbipụta unu ndị ọzọ.”

Onye detara akwụkwọ ozi ahụ kwubiri, sị: “Ekweere m na ọ bụrụ na mmadụ nile nọ n’ụwa aghọọ Ndịàmà Jehova, ọchịchọ anyị maka Paradaịs ga-emezu ozugbo. Jidenụ nke unu ji n’ọrụ ọma unu.”

Akwụkwọ dị iche iche nke Ndịàmà Jehova na-arụtụ aka ná nkwa Bible kwere na a ga-eji ụwa ọhụrụ nke Alaeze Chineke ga-eweta dochie anya usoro ihe dị ugbu a. Akwụkwọ bụ́ Ihe Ọmụma nke Na-eduba ná Ndụ Ebighị Ebi na-arụtụ aka n’Alaeze ahụ dị ka ihe ngwọta nye nsogbu nke ihe a kpọrọ mmadụ.

Ọ bụrụ na ọ ga-amasị gị inweta otu akwụkwọ a dị peeji 192 iji tụlee ya n’onwe gị, biko kpọtụrụ Ndịàmà Jehova nọ n’ógbè gị. Ọ bụrụ na ị ga-enwe mmasị ka mmadụ kpọtụrụ gị, biko dejupụta akụkụ a pụrụ ịdọkapụta adọkapụta dị na peeji a ma zite ya n’adres e dere na ya ma ọ bụ n’adres nke kwesịrị ekwesị e depụtara na peeji nke 5 na magazin a.

□ Biko kpọtụrụnụ m iji duziere m ọmụmụ Bible ebe obibi n’efu.