Ihe Mere Ọtụtụ Ndị Anaghịzi Akwụwa Aka Ọtọ

Otu nwoke bi n’Amerịka, aha ya bụ Stephen, kwuru, sị: “Ịkwụwa aka ọtọ bụ omenala ndị mgbe ochie. Onye kpọchiekwanụ ntị na-eme ya taa, ọ gaghị ahụ tụrụ rachaa.”

IHE a onye a kwuru ọ̀ bụ eziokwu? Nke bụ́ eziokwu bụ na ọtụtụ mgbe, ndị mmadụ gwuo ibe ha wayo, ego abata ha aka. Ọ bụ ya mere ndị nke na-agbalị ịkwụwa aka ọtọ ji na-eche na àgwà ọma ha enweghị isi. Ihe ndị anyị ga-ekwu okwu ha ugbu a so n’ihe mere ndị mmadụ anaghịzi akwụwa aka ọtọ.

Ego Na-adọ Ha Akpịrị. O nweghị onye ihe ọma na-adịghị mma. N’ihi ya, o nwere ike isiri mmadụ ike ịkwụwa aka ọtọ ma ọ hụ na ime otú ahụ ga-anapụ ya ego chọrọ ịbata ya aka.

● Otu nwoke aha ya bụ Franz kwuru, sị: “N’ụlọ ọrụ anyị, ọ bụ mụnwa na-ekpebi ndị a ga-enye ọrụ ngo. Ndị mmadụ na-achọkarị inye m aka azụ ka m nye ha ọrụ. Ị manụ na ego a na-ataghị ahụhụ kpata na-atọ ọtụtụ ndị ụtọ.”

Ha Chọrọ Ka Akpa Ha Ju. Kemgbe afọ ole na ole ugbu a, ụbọchị ọjọọ na-akpa ụlọ ọrụ dị iche iche aka. Ha na-agbalịkwa ka ha jiri ngwá ọrụ ọgbara ọhụrụ ndị a na-arụpụta ugbu a na-arụ ọrụ. O nweghịkwa ụlọ ọrụ chọrọ ka ibe ya ka ya mma. Ndị e were n’ọrụ nweziri ike na-eche na ọ bụrụ na ha enyeghị ndị mmadụ aka azụ, o nweghị otú ha ga-esi eme ka akpa ụlọ ọrụ ha ju otú ahụ ndị nwe ya na ndị isi ha si chọọ.

● Otu akwụkwọ akụkọ a na-ebipụta n’Amerịka kọrọ gbasara nwoke ndị uwe ojii jidere maka aka azụ ọ na-enye ndị mmadụ iji nwetara ụlọ ọrụ ha ọrụ ngo. Aha nwoke ahụ bụ Reinhard Siekaczek. Mgbe a gbara ya ajụjụ ọnụ, o kwuru, sị: “Anyị chere na ụlọ ọrụ anyị agaghị na-enweta ọrụ ma ọ bụrụ na anyị anaghị enye aka azụ.”

Ndị Ọzọ Na-agwa Ha Mewe Otú Ahụ. Mgbe ụfọdụ, onye ya na mmadụ na-arụ ọrụ nwere ike gwa ya ka ọ na-aghọ ndị ọzọ aghụghọ. Ndị ahịa mmadụ nwekwara ike gwa ya ka o mewe otú ahụ. E nwedịrị ike mee mmadụ ihe ga-eme ka ọ ghọwa aghụghọ otú ndị ọzọ na-aghọ.

● O nwere otu nwoke bi na Saụt Afrịka, aha ya bụ Johan. Nwoke a kwuru, sị: “O nwere ụbọchị manịja ụlọ ọrụ na-enyehi m ọrụ nne gwara m na ya ga-anara m ọrụ o nyere m ma ọ bụrụ na mụ enyeghị ya òkè nke ya. Ihe ọ na-ekwu bụ: M chọọ ka ha na-enye m ọrụ, m ga-enyerịrị ya aka azụ.”

O Si n’Omenala Ha. N’ebe ụfọdụ, mmadụ na-enye onye o si n’aka ya nweta ọrụ onyinye. N’ụdị ebe ahụ, ihe na-ekpebi otú a ga-esi ele onyinye ahụ anya bụ ihe onye nyere ya bu n’obi nye ya na otú onyinye ahụ hà. N’ọtụtụ mba, ndị ọrụ gọọmenti anaghị akwụwa aka ọtọ. Ha na-achọ ka mmadụ buru ụzọ nye ha ego tupu ha emeere ya ihe ha kwesịrị imere ya. O nwee ihe ọma ọ bụla ha meere mmadụ, ha achọọ ka onye ahụ kwụọ ha ụgwọ ya.

● Otu nwoke bi na Kolumbia, aha ya bụ William, kwuru, sị: “O siri ike ịma ihe dị iche n’ego mmiri oyi na aka azụ.”

Ọ Bụ Otú Ndị Ebe Ha Si Eme. Inye aka azụ na-akacha arị ibe ya elu n’ebe ndị mmadụ na-ahụghị tụrụ rachaa ma ọ bụ ná mba ebe ọ na-esiri ndị mmadụ ike ime ihe iwu obodo kwuru. N’obodo ndị ahụ, a na-ele ndị na-akwụwa aka ọtọ anya ka ndị ịkpa afọ ezinụlọ ha nyịrị.

● Ná mba Kọngo Kinshasa, otu nwoke aha ya bụ Tomasi kwuru, sị: “A na-ewere onye ghọgburu mmadụ ka ezigbo mmadụ ma ọ bụrụhaala na e jideghị ya.”

Ihe Mere Ịkwụwa Aka Ọtọ Ji Laa

N’agbanyeghị ihe mere ọtụtụ ndị mmadụ anaghịzi akwụwa aka ọtọ, nke bụ́ eziokwu bụ na o mebiela ọtụtụ ihe. Mgbe a gbara ndị manịja iri bi n’Ọstrelia ajụjụ ọnụ, mmadụ itoolu n’ime ha kwetara na inye aka azụ dị njọ, kama na o nweghị otú a ga-esi kwụsị ya. Ha kwukwara na ha ga-eme ihe ọ bụla iji hụ na ha nwetaara ụlọ ọrụ ha ọrụ na ezigbo uru.

Ndị na-ana aka azụ na ndị na-enye aka azụ na-asị na ha na-akwụwa aka ọtọ. Gịnị mere ọnụ ji aka ha ikwu otú ahụ? Otu akwụkwọ kwuru, sị: “Ha na-aghọ onwe ha aghụghọ, na-ekwu na ha na-akwụwa aka ọtọ.” Ihe ha na-eme bụ: Ọ bụrụ na ha achọghị ka obi ha maa ha ikpe maka wayo ha chọrọ igwu mmadụ ma ọ bụkwanụ maka aka azụ ha chọrọ ịnara ya, ha etee okwu ha mmanụ.

Dị ka ihe atụ, mmadụ chọọ ka onye ọzọ nye ya aka azụ, ya asị ya: “Gbapụrụ m ihe” ma ọ bụkwanụ “Tie m aka n’obi.” Mmadụ nwekwara ike gwuo mmadụ ibe ya wayo, ya mechaa ya agwa onwe ya na ya hụrụ ụzọ.

Ndị ọzọ na-eme ha gwuo mmadụ wayo ma ọ bụ nara aka azụ, ha kwuwe gbasara ya, ha ekwuo ya ka à ga-asị na ọ bụ ihe ọma. O nwere otu nwoke na-arụ n’ụlọ ọrụ na-ahụ gbasara ego. Aha ya bụ Tom. O kwuru, sị: “Ọ bụrụ na mmadụ na-egwu ndị ọzọ wayo ma é nwebeghị onye jidere ya, ndị ọzọ na-ewere ya ka onye na-akwụwa aka ọtọ.” Otu nwoke bụ́bu ọchụnta ego, aha ya bụ David, kwuru, sị: “Mmadụ gwuo wayo, e jide ya, ndị mmadụ na-ewere ya ka onye ọjọọ. Ma, onye nke a na-ejidebeghị bụ ezigbo mmadụ. A na-asị na onye ọ bụla a na-ejidebeghị bụ onye hụrụ ụzọ.”

Ọtụtụ ndị na-ekwudị na ụwa ga-ara mmadụ ahụ́ ma ọ na-akwụwa aka ọtọ. Otu nwoke bụ́ aka ochie n’achụmnta ego kwuru, sị: “Ihe jiri ndị mmadụ n’olu, ha emee ihe ọ bụla ruru ha aka iji nweta ihe ha chọrọ.” Ma, ọ̀ dịnụ mma ime otú ahụ? Ọ bụrụ na ndị mmadụ anaghị akwụwa aka ọtọ ma na-ekwu na ha na-akwụwa aka ọtọ, í cheghị na ha “na-aghọgbu onwe ha”? (Jems 1:22) Ị gụọ isiokwu na-esonụ, ị ga-ahụ uru mmadụ ịkwụwa aka ọtọ bara.

[Ihe odide gbatụrụ okpotokpo dị na peeji nke 5]

“Ọ bụrụ na mmadụ na-egwu ndị ọzọ wayo ma é nwebeghị onye jidere ya, ndị ọzọ na-ewere ya ka onye na-akwụwa aka ọtọ”

[Foto dị na peeji nke 5]

Ọtụtụ ndị na-ekwu na ụwa ga-ara mmadụ ahụ́ ma ọ na-akwụwa aka ọtọ