HỊHỊ LALA ANGỊNYỊ NYA ỊKỊRAYỊSỊ

A Kaa Yẹ Apyobwuna Bwu Ụpwụ Ọlẹ Kọ Ri, Examining the Scriptures Daily?

ỊBayịbụụ ọwawa bala ọ-kụ ẹhị yẹ ẹla ọlụpwụ ọlẹ kọ ri Examining the Scriptures Daily, ri ịngịhyẹ ọlẹ ká kaa họ ahyẹẹnụ ọnyị myị́ ọnyị wuu, nyọka tụ ju iJihova chwẹẹ? Kori kaa họ ịnyị ka aalẹ, a ka jẹ́-ẹ hwọọ nọ nya ụpa nya ang ọlẹ ká ka kpa họ ụka myị́ ụka? Angịnyị lụmẹ-lụmẹ kaa kụ ẹhị yẹ ụpwụ ọwẹ la ọmwụ ọdada nya ahyẹẹnụ. Chajị, kị ka juwa kụ irya ju ẹla ọọwa ụka kị juwa họ ụkụrwọ nyaa la ahyẹẹnụ ọọwa. (Joch 1:8; Eje 119:97) Ányị a tị ka bwu ye apyobwuna gụ ọwọwa bwu Ụpwụ Ịgọgọ nya ahyẹẹnụ ọwawa? Wa ịBayịbụụ ọọwa nyọka jẹ́ iwe-ahụrụ ọlẹ kọ dagaga jwọọ. Ká maga ka kụ irya nya ịBayịbụụ ọlẹ kọ da itiwe nya ehile ọlẹpwụ nya ang ọjẹ́jẹ ọwẹ wụlẹ. Chajị, ká ka jẹ́-ẹ kpa itiwe nya ehile ọọwa họ ụkụrwọ ọ-ọhịhị nyang. Ụka ká Omyi Ẹla nya Ohe Oluhye a chị wu eje ọchịchị nyang, ọ ka kpang ụgbẹyị nya ọhịhị bala ọ-ka ju apyobwuna hang yẹẹyẹẹ.—Eje 119:105.

Ala ịBẹtẹlụ wuu chị odehe ọnụ kaa kụ ẹhị yẹ ụpwụ nya Examining the Scriptures Daily, ọwẹ ụka nya ang oriri nya ụtụrụ nyaa. Ẹ-ẹpwụ nya ẹka ịkpangjẹ, ị kaa ya ẹla ịịwa ju ẹpwụ nya JW Broadcasting^® e-ekpeleji nya ẹga ọlẹ kọ ri PROGRAMS AND EVENTS. Ụka oyina a tị wụla ookpokpo lẹpwụ nyaa lee gụ ọọwa yẹ ku ẹkpẹ? Ọhẹka ịhyẹ lẹpwụ nyaa a ri ang ọlẹ ka wẹẹ tịtọ kpangga lẹ. Ọ-chụ pwokwita, anyị ẹla u-uhye nya iLotu à tị́ ka bwu gu eje ọchịchị nyang?

YẸ IFIM ỌLẸ KỌ RI A MYỊ KÁ ODEHE ỌLẸ A HÁNG LỤMẸ KA (1JỌN 2:15), KA WẸ ỊTỌ ẸLA ILEJI ỊLẸ:

Itiwe nya ehile ịlẹpwụ nya ịBayịbụụ oyina à tị́ ri egbeju nya ang ọjẹ́jẹ nya ụtụrụ ọlẹ kị ya ẹla wẹẹ u-uhye nyamwụ?
Ányị oja nya ịLọtụ ọwẹ à tị mẹjẹ akama ọlẹ kọ juwa ẹ-ẹga nya ọháha ọlala ha odehe ọlẹ lee ang ịlẹpwụ nyamwụ? —Ọmwụ 13:12; 14:12; 19:3, 12, 13, 24-26
Ányị ahị tị́ ka mẹjẹ nyori ahị la ọháha ẹ-ẹga nya iJihova, ma, ẹ-ẹga nya odehe lee ang ịlẹpwụ nyamwụ ka?

Ifoto ịlẹ kị gba: Ọọnahị wẹẹ kụ irya ju ang ọjẹ́jẹ nya ụtụrụ la ahyẹẹnụ ọwẹ wuu. 1. Ụka kọ wẹẹ wa ụpwụ, ọ wẹẹ kụ irya jaabwọ ká alegu-ẹrụ ya ụbwọ chị ịLọtụ bala ugbiyegu nyamwụ kọ wẹẹ gbaa kpehe bwu ịSọdọm. 2. Ụka kọ wẹẹ ri ang oriri nya ẹnụ ọ-ọlụkụrwọ, ọ kịnyaa la ọ-ka kụ irya ju ang ọlẹ kọ jẹ́ lụtụrụ. 3. Ụ-ụwa ẹ-ẹpwa la obyi, ọ kịnyaa la ọ-ka kụ irya kpori-kpori ju ang ọlẹ kọ jẹ́ lụtụrụ ụka kọ wẹẹ mwụ ịwụrụ. — Ányị m tị́ ka mẹjẹ ẹ-ẹpwụ nya ahyẹẹnụ wuu nyori Omyi Ẹla nya iJihova ju apyobwuna ham?