HỊHỊ LALA ANGỊNYỊ NYA ỊKỊRAYỊSỊ
Dụmwọ-dụmwọ Chajị Ká ka Kpa Ọnọọkịla Pyebile Ka
Alẹ, oja kaa pwụ ẹga nya uku-uku nya angịnyị hyaa bwula apwụ nya oja, irediyo, ụrụrụ ị-la akpa bala intanẹtị. Angịlẹ kị kaa gbịgba ha “Ohe Oluhye nya ẹlịlẹhị,” á kaa kpa oja nya ọnọọkịla pyebile la ọ-jẹ́ ẹla ọlẹ kọ juwa wuu ene ka lẹka. (Eje 31:5, NW; Ehe 23:1) Oja nya ọnọọkịla ịlẹ kị kaa bwu ẹga nya ọngọhẹ ka ẹga nya angịkịla kaa kpa ẹla ọtụka-ọtụka. Ụka ká tịtọ nyọka jẹ myị̀myị̀ kori ká oja à ri ẹlịlẹhị, tịlọng wo:
‘O-bwu ẹga nya ọngọlẹ kam ka jẹ́-ẹ dahịhile?’ Ọngọlẹ kọ wẹẹ ja oja ọwẹ á ka jẹ ẹla ọlẹpwụ nyamwụ wuu ka myị́. Ụka ká angịnyị a ja angịkịla oja, ọyẹda kaa juwa ẹ-ẹpwụ nya oja ọọwa pyii lẹ. Lẹ, kpahị ju ụka ka jẹ́ myị̀myị̀ ẹga ká oja ọọwa bwu kpangga ka. Chajị nyọlẹ ká angịlẹ kị la iwe-ahụrụ ọ-ọjịra-jịra ri angịlẹ kị kaa ju ẹla o-bwu ẹga nyaa ihi lẹ, ị ka dụmwọ-dụmwọ chajị kị ka ya ẹla ọlẹ kị jẹ́ myị̀myị̀ ka jẹ angịnyị ka.
‘O-ri oja ọlẹ kọ ka bịrị ẹnyị nya ọngọkịla?’ Kori ká oja ọọwa à ri ọ-ka bịrị ẹnyị nya ọngọkịla lee ebwo nya angịnyị aalẹ, ọ-ka há kori kahị ja angịkịla oja ọọwa ka.—Etu 18:8; Filip 4:8
‘M̀ ka jẹ́-ẹ dahịhile oja ọwẹ?’ Dụmwọ-dụmwọ ẹ-ẹga nya oja ịlẹ á kaa wo bala ẹla ịlẹ kị họ ta angịnyị.
YẸ IFIM ỌLẸ KỌ RI, ÁNYỊ A TỊ́ KA BWU CHEJI BA HI ỌNGỊNYỊ Ọ-KPA KỤ?, KANỤ WẸ ỊTỌ ẸLA ILEJI ỊLẸ:
Jaabwọ ká ụpwụ nya Etu 12:18 ya, ịyẹ omyi ẹla nyahị à tị́ ka jẹ́-ẹ họ myị́?
Ányị ụpwụ nya Ala iFilipayị 2:4 à tị́ ka dahị ụbwọ nyọka ya ẹla ba o-oyi ụka kahị juwa ya ẹla chajị nya angịkịla?
Ịyẹ ahị tị ka họ ụka ká ẹla uhye nya angịkịla à ri ọ-ka bịrị ẹnyị nyaa?
Ene kahị ka dọmwụ nyọka ya ẹla u-uhye nya angịkịla, ịtọ ẹla iyina ahị tị ka tịlọhị?