Anụ Anyị Anjwo​—Anụ Ya Ẹla Ọla Ọkịlẹtụ Nyanụ Ji Adanụ Bala Ịnanụ

Ịyẹ tị́ du ká ka ya ju adang bala ịnang ẹla ọla irya nyang? (Etu 23:26) Chajị iJihova ya ụkụrwọ nyọka kpahị jung bala ọ-ka gbeng haa. (Eje 127:3, 4) Ọ-ka lujwo haa nyọka dang ụbwọ myị́ kori ká yẹ ẹla ịlẹ kị ri ịbaba nyang bala akama nyang kpịbaa hyaa. Ịnyịnyị, ẹla ọjẹ́jẹ ọlẹ kị la ọ-ọhịhị nyaa wuu ka nyẹng. Ọtịpyọ nyọka ya ẹla ịla irya nyang ịhyẹ tilọng? Ụ-ụka myị́ ụka wuu ka, ma kpahị ju chajị ká ka pịrị adang bala ịnang ju kaka myị ju ẹla ọnọọkịla ka.​—Etu 3:32.

Ányị a tị́ ka bwu ya ẹla ta adang bala ịnang? Maga ka chụ ụka ọlẹ kọ ka pwoku hang balaa. Kori ká ọọwa a lujwo hang, à ka da ẹla ọla irya nyang ịhyẹ ju ụpwụ haa myị́. Ma, kori kị tị chụ nyọka ya ẹla u-uhye nya ịngịhyẹ ọlẹ kọ hang ka bee? Kpịtịya nyori ị tịtọ nyọka dang ụbwọ ịnyị. Yẹ adang bala ịnang lala aligu nyang ịlẹ kị kaa chẹkpẹ jung, a-aluji nyang ka. Ẹta-ẹdịyẹ ọlẹ ká wẹẹ hu nyọka ya ẹla gbagbịla bwu ọkịlẹtụ nyang ji adang bala ịnang anyị, ka ju apyobwuna hang ẹ-ẹpwụ nya ọhịhị nyang wuu tụ́ ọhịhị ọla odehe onyeewe!​—Etu 4:10-12.

YẸ IFIM ỌLẸ KỌ RI OJA NYA ỌHỊHỊ NYAM ỤKA KAM RI ONJWO​—ÁNYỊ M TỊ KA BWU YA ẸLA TA ADAM BALA ỊNAM? KANỤ WẸ ỊTỌ ẸLA ILEJI ỊLẸ:

• 

  Ịịyẹ Esther bala Partik à tị́ wẹ ka jẹ́ u-uhye nyịlaa?

• 

  Ẹlịyẹ a tị́ ka jẹ́ bwu ọgụ-ẹpẹtẹ nya iJisọsị?

• 

  Ányị adang bala ịnang à tị́ mẹjẹ nyori ị kpahị jung?

• 

  Itiwe nya ehile ọlẹpwụ nya ịBayịbụụ oyina à tị́ ka dang ụbwọ nyọka jẹ́-ẹ ya ẹla ta adang bala ịnang?