Kpa Ụpwụ nya Chị Ọkẹkẹnị Gboyi Myị́ Oyi! Ju Ọmyịmyị Nyang Ọngịrị ẹ-Ẹga nya IJihova Bala IJisọsị

Nyọka họ ẹla kpụ Ohe Oluhye ịpyọ, o-ri opyii ká angịlẹ kahị kaa mẹ ịBayịbụụ jẹ ka la ọmyịmyị ọnyọọngịrị (Hib 11:6) Ahị ka jẹ́-ẹ daa ụbwọ bwula ọ-kpa ụpwụ nya Chị Ọkẹkẹnị Gboyi Myị́ Oyi! mẹ ang jaa. Ụpwụ ọwẹ, la ẹhị nya ẹla ịkpọnchị bwu ụpwụ ịgọgọ, ọ da ẹla wụlẹ gbagbịla, ọ la ịtọ ẹla ịkpọnchị, ọ la ifim ịlẹ kị ka guhi ọ-ọkịlẹtụ bala arụrụ ịhụ́hị-hụ́hị. Bwula ọ-daa ụbwọ nyọka la abwẹla nya Angịnyị nya ịKịrayịsị bala ọ-ka ri igu ọlam-ọlam bala Ohe Oluhye, ahị wẹẹ nwụ́ ube la ang-abwọ ịlẹ kị ka be bwu ẹpwụ nya ila myị.​—1Kọr 3:12-15.

Angịhyẹ kaa kụ irya nyori, ị́ ka jẹ́-ẹ ri oligu nya Ohe Oluhye, Ọngọlẹ kị jẹ́-ẹ yẹ lẹhị myị ka lẹ ka. Lẹ, ahị baba nyọka daa ụbwọ chajị kị ka wẹ kaka jẹ́ iJihova bala ọ-la ahị ọdahile ẹ-ẹga nyamwụ.

YẸ IFIM ỌLẸ KỌ RI KPA ỤPWỤ NYA “CHỊ ỌKẸKẸNỊ GBOYI MYỊ́ OYI!” NWỤ́ ỌMYỊMYỊ Ẹ-ẸGA NYA IJIHOVA, KANỤ WẸ ỊTỌ ẸLA ILEJI ỊLẸ:

• Ányị ahị tị́ họ kahị jẹ́ nyori ọọnahị ọnyang ọwẹ nwụlanọ yẹẹyẹẹ gbe ang ọjẹ́jẹ?

• Ányị ọ tị́ bwu kpa ịtọ ẹla ị-dọọ u-uhye ịkịla da ọngọlẹ kọ wẹẹ mẹ ang jẹ ụbwọ nyọka gba irya nyamwụ kpehe u-uhye ụpwụ nya Ayịsaya 41:10, 13?

• Ányị ifim bala ịgba nya ịBayịbụụ ịwẹ a tị́ bwu gu ọngọlẹ kọ wẹẹ mẹ ang jẹ ọ-ọkịlẹtụ?

Angịnyị lụmẹ-lụmẹ á jẹ́ ang ọlẹ ká ọ-ra kpehe ri ka lee ị yọọ lala āhị ọgụgụ wuu ọlẹ ká Ohe Oluhye ya haa ka. (Gal 2:20) Lẹẹlẹ, ahị ka maga pyii kahị ka daa ụbwọ nyọka nwụ́ ọmyịmyị ẹ-ẹga nya iya ọkịlaakịla nya iJisọsị.

YẸ IFIM ỌLẸ KỌ RI KPA ỤPWỤ NYA “CHỊ ỌKẸKẸNỊ GBOYI MYỊ́ OYI!” NWỤ́ ỌMYỊMYỊ Ẹ-ẸGA NYA IJISỌSỊ, KANỤ WẸ ỊTỌ ẸLA ILEJI ỊLẸ:

• Ányị ahị tị́ họ kahị jẹ́ nyori ọọnahị ọlẹng ọwẹ nwụlanọ gbe ang ọjẹ́jẹ?

• Ányị ọọnahị ọwẹ a tị́ bwu kpa ẹga ọlẹ kọ ri “Jẹ́ Ang Ịlẹ Dọọ u-Uhye” da ọngọlẹ kọ wẹẹ mẹ ang jẹ ụbwọ?

• Ịyẹ tị́ du ká abwọ ọrịrị baba yẹẹyẹẹ ha ọngọlẹ ka wẹẹ mẹ ang jẹ?