HỊHỊ LALA ANGỊNYỊ NYA ỊKỊRAYỊSỊ
Ju Ọmyịmyị Nyang Ọngịrị u-Uhye nya Omyi Ẹla nya Ohe
Omyi Ẹla nya Ohe ka jẹ́-ẹ yẹ ọhịhị nyahị da. (Hib 4:12) Ma, nyọka ye ewu ọ-chị ke, ụgbẹyị ọ-kpakpa bala ọ-nwụ rịrị bwu ẹpwụ nyamwụ, ahị baba nyọka myị bwu ẹpwụ ọkịlẹtụ nyahị nyori ịBayịbụụ ri “ẹla nya ịlẹhị ọlẹ kọ bwu ọnụ nya Ohe oluhye.” (1Tẹs 2:13) Ányị ahị tị́ ka bwu ju ọmyịmyị nyahị ọngịrị u-uhye nya ịBayịbụụ?
Wa ụpa nya ịBayịbụụ ọhẹ ẹnụ myị́ ẹnụ. Ụka ka ja wọọ, mwahị nya ang-ẹjẹẹ ọlẹ á ka yụbwọ chị nyori iJihova à ri Ọngọ la ịBayịbụụ lẹ. Ọ-chụ pwokwita, kpẹhị chịng ka yẹ irya ojuju ịlẹpwụ nya ụpwụ nya Etu bala abwọlẹ ká ẹla ọjẹ́jẹ ịlẹpwụ nyamwụ ju apyobwuna hahị alẹ—Etu 13:20; 14:30.
Dọmwụ nya ịBayịbụụ ọjẹ́jẹ. Maga ká jẹ́ ang-ẹjẹẹ ịlẹ kị mẹjẹ nyori Ohe à kpa angịnyị ehe bwula olegu ịgọgọ nyamwụ da ịBayịbụụ lẹ. Ẹ-ẹpwụ nya Research Guide for Jehovah’s Witnesses, mwahị e-ekpeleji nya egbeju nya ẹla ọlẹ kọ ri “The Bible” ká ka ẹga ọlẹ kọ ri “Inspired by God”. A ka jẹ́-ẹ ju ọmyịmyị nyang ọngịrị ịnyịnyị nyori ẹla ọlẹpwụ nya ịBayịbụụ á yẹda ka bwula ọ-kụ ẹhị yẹ ang ịlẹ kị juwa ịị Appendix A3 nya New World Translation.
YẸ IFIM ỌLẸ ỌLẸ KỌ RI ANG ODUDU KAHỊ MYỊ . . . LA OMYI ẸLA NYA OHE, KANỤ WẸ ỊTỌ ẸLA ILEJI ỊLẸ:
Ányị ụpwụ ọlẹ kị da ba ugulọ u-ube ịgọgọ ọla Karnak ụ-ụwa Ijipiti à tị́ mẹjẹ nyori Omyi Ẹla nya Ohe Oluhye ri ẹlịlẹhị?
Ányị ahị tị́ họ kahị jẹ́ nyori ẹla ọlẹpwụ nya ịBayịbụụ á yẹda ka?
Nyọlẹ ká ịBayịbụụ be daalẹ, ányị ọ tị́ mẹjẹ nyori o-ri Omyi Ẹla nya Ohe Oluhye?—Wa Ayịsaya 40:8