Job Te Ụbọ A O?

Uz tịịnmịnị ama mị, kẹnị owei Jehovah karịtimi mị. Wó ẹrẹmị Job. Ómịnị pẹrẹkụrọmọ bá biin awọụama kpọ zii wẹrịmị. Job bolou-ebi kịmị, ómịnị baratụa akị ụya otu, yei fịịdẹ ereama bá daụ mọ yin mọ fịịdẹ awọụbo kpọ pịrịtimi. Job kịrịịye mịẹtimi duonị, kẹnị ụya kpọ ụ laagha fa?

Satan ụ ditimi bara Job mọ nimigha wẹrịmị. Jehovah gbaa Satan pịrịmị: ‘Ine odubo-owei Job ị́ mọ ẹrịdẹ? Kiriogbosẹ wó tọrụ fa. Ómịnị ine gbaaye pei bá kịrịịye kị mịẹmịnị.’ Satan parụmị: ‘Ị́mịnị ụ kekere bá tarịama akị ụ pịrịmịnị kị duonị, Job iné gbaaye peimịnị. Ị́mịnị nama-ama mọ ogbo-ama mọ kọn ụ pịrịmịnị. Yebosẹ kọnsiindaba ómịnị ba ị́ karịgha fa.’ Jehovah gbaamị: ‘Ị́mịnị Job dadii a paaemi, anịa ụ báa kụmọ.’ Tetuu kị duonị, Jehovah Satan bụọmọ wẹrị Job dadii ma o? Job dadiye bọọ korogha fa bara Jehovah mọ nimiwẹrịmị.

Satan bẹbẹ akpotuama kọn Job dadiimị. Bọlọụ yemị ómịnị Sabean tịịnmịnị otu fịrịmọ mú Job ivinbo mọ ịkịtịkịtịbo mọ furumị. Bịsẹ ye bụọdẹmị, fẹnị Job anịnabosẹ ịyọụnmọ siinmị. Chaldean-otu kpọ bá wó konubiri-indokubo furumị. Bịsẹ namabo ditimi odubo-otubosẹ kpọ ámịnị mọ báasiinmị. Barịị yemị, seidẹịnmị. Job awọụbo gbelewẹrị fịyaị fị pọwẹịtimi warịmị koro asẹẹ pou báasiinmị. Bịsẹ yemị Job dọọn kụrọmọmị, Bịsẹ bara kị paa kpọ Job mọkpọ Jehovah karịmị.

Satan mọkpọ Job ụyamọ dọụmịnị duonị, Job angọsẹ mịẹ ẹnọụn-ẹnọụn mị. Job dọọn naa kụrọmọmị. Mị ụyabo ụ paamọmịnị tuu Job mọ nimigha. Mọabịkpọ Job mọkpọ Jehovah karịmị. Ọkpọnanaowei paayebosẹ ẹrịmị, Job ụ mịẹ pọwẹịmọmị.

Satan mọkpọ tara kịmị fịrịmọ Job dadii yọ amúmị. Ámịnị gbaa ụ pịrịmị: ‘Ị́mịnị lẹẹ seimịẹ wẹrịemi kị duonị, Ọkpọnanaowei iné ụyamọmịnị.’ Job gbaamị: ‘Ịmịnị kẹnị sei kpọ mịẹgha.’ Anịa Jehovah kị wó ụyamọmịnị bara ómịnị mọ iroromị, anịduonị Jehovah akị ụ mịẹmịnị bara mị kịrịịgha bara Job mọ gbaamị.

Kẹnị asịyaịpesi-owei, anị ẹrẹtimi egberi peitimimị. Elihu kị wó ẹrẹ. Ómịnị gbaa á pịrịmị: ‘Ánị gbaamịnị egberimị kịrịịgha. Jehovah bịsẹbara fa. Ómịnị benebene seiye mịẹgha fa. Ómịnị paamịnị yebosẹ ẹrịmịnị bá baratụa akị ụyafị-mịnị otu pịrịmịnị.’

Jehovah gbaa Job pịrịmị: ‘Ịmịnị agọnọ mọ kiri mọ tẹmẹ ifiemị, ị́mịnị te yọ ka timi ma o? Tetuu kị duonị, Ịmịnị kịrịịye mịẹgha bara ị́ mọ gbaa ma? Ị́mịnị yebo paamịnị tuu kpọ nimigha bara kị ẹrẹmịnị.’ Job mịẹkiridẹ bara nimimị, anịduonị ómịnị gbaamị: ‘Ịmịnị mịẹkirimị. Ịmịnị iné emibara naadẹ wẹrịmị, anịa mị tịẹkiri mị, ịmịnị ebibara ị́ nimidẹ. Ị́mịnị laa mịẹgha fa ye fa. Ị mịẹkirimị.’

Job ụ laa dadiyebosẹ dẹịnmọ siindẹ mị, Jehovah Job angọ mịẹkụrọmọmị, bá wó nanawẹrị yebo dẹịn yeama ka kị ụ pịrịmị. Job pọwẹịpọwẹị inyenrintimi alaa ifie kị laamị. Jehovah dọụbara mịẹmụ yọmị kụrọ Job pịrị kpọ Job Jehovah dọụbara kị mịẹ duonị, Jehovah tarịama akị ụ pịrịmị. Jehovah karịmụ yọmị kụrọ ị́ pịrị kpọ, ị́mịnị kpọ laa Job dimịẹ wẹrị Jehovah karị mịnị?