Jehovah Jeremiah Fịrịmọ Egberigbaamị

Jehovah, Jeremiah akị Judah ibe bọọ bụrụ-owei a tụamị. Jehovah Jeremiah fịrịmọ mú berifaanye akị kịmịbo pịrịmị, bá ámịnị anị mịẹmịnị seibo kpọ a barasin bara kpọ gbaamị. Jeremiah gbaamị: ‘Jehovah, Ịmịnị mọkpọ kala-tọbọụ. Ịmịnị akị á mọ mọ́ ẹrẹmụ bara nimigha.’ Jehovah gbaa ụ pịrịmị: ‘Malafakụmọ. Ịmịnị iné gbaamụ egberi, gbaa ị́ pịrịmịnị. Bá baratụa ị́ pịrịmịnị.’

Jehovah Jeremiah fịrịmọ okosu-otubo bẹnịmọwẹrị, ungu famụ-pei bá gbaa á pịrịmị: ‘Mị ungu famụ-pei bara ka kị Jerusalem kpọ gbeingọgọlọmịnị.’ Jeremiah, Jehovah gbaa bara mịẹ ifiemị, okosu-otubo boloukọn kụrọmọmị. Ịkịankụn-owei Pashhur Jeremiah famụsin bá tịn kọn mịẹwẹrịemi ye kọn ụ kaịmị. Jeremiah angọ-waịgha timi baịmị. Pashhur barịị pekei ka Jeremiah paamọmị. Jeremiah gbaamị: ‘Ị dẹịndẹ. Ịmịnị bá egberigbaagha fa.’ Jeremiah kọkọ egberigbaa fịrị tịẹmọ ma o? Ómịnị fịrị tịẹmọgha. Jeremiah yebị kẹrị iroro ifiemị, ụ gbaamị: ‘Jehovah akị ị fịrịmọ ịsọmụ-egberi mị fẹnị bara ka kị ine adụdụ iyọụnmọmịnị. Ịmịnị egberigbaa fịrị tịẹmọgha fa.’ Anịduonị Jeremiah egberigbaa ibe otubo pịrịmị.

Kụraịama bụọmị, Judah ibe bị waị aya pẹrẹ nanamị. Jeremiah gbaatimi egberimị, ịkịankụn-otubo mọ bá ikpe bụrụ-otubo mọ dịsẹgha duonị, ámịnị gbaa ala-otubo (chiefs) pịrịmị: ‘Mị kịmị baa kị agbẹị-emi.’ Jeremiah gbaa á pịrịmị: ‘Ámịnị ị baa daba, ámịnị seiye mịẹgha kịmị kị baadẹ. Ịmịnị ine bẹtịbị egberi gbaagha, Jehovah ị fịrịmọ egberi kị, ịmịnị mọ gbaamịnị.’ Ala-otubo Jeremiah gbaaye naa ifiemị, ámịnị gbaamị: ‘Mị kịmị fịịmọ agbẹịgha.’

Jeremiah egberigbaa fịrị tịẹmọgha duonị, ala-otubo boloukọn kụrọmọmị. Pẹrẹ mị Jeremiah baa bara ámịnị mọ gbaamị. Ámịnị á dịsẹdẹ barasẹ akị Jeremiah mịẹ bara pẹrẹ bị mọ gbaa á pịrịmị. Ámịnị Jeremiah baa dọụtimi duonị, ámịnị ụ kọn olomú kụrọmọ emi kpẹdẹkpẹdẹ ogugu a gbeintụamị. Anịduonị Jeremiah atọụ anịghakpọ atọkọ bolou duo dibi-sụọmị.

Ebed-melech pẹrẹ warịma fịrịwẹnịtimi opu-owei, ómịnị gbaa pẹrẹ pịrịmị: ‘Ala-otubo, Jeremiah akị ogugu bolou a gbeintụadẹ! Ụ kọn paamọghaba ómịnị fịịmịnị.’ Pẹrẹ mị Ebed-melech fịrịmọ 30 oweiama akịwẹrị mú ogugu duo Jeremiah kpụn-paamọmị. Jeremiah kẹnịye kpọ bụọmọ wó egberigbaa fịrị tịẹmọgha. Wo kpọ Jeremiah dimịẹ a paaemi.