TOLUMỌYE 59
Jehovah Dọụbara Mịẹ Nia Owei-awọụama
Nebuchadnezzar Judah bọọ timi ala-otubo (chiefs) akị Babylon a mú ifiemị, ómịnị á kọn pẹrẹ warị bọọ fịrịwẹnịtimi opu-owei Ashpenaz bara ka tụamị. Nebuchadnezzar Ashpenaz bịịwẹrị bịsẹ kịmịbo bolou bọọ angọ kụrọemi otu mọ bá kịlịkịlị-emi otu mọ sẹlẹmị. Ámịnị tara kụraị akị asịyaịpesibo tolumọmịnị. Tolumọyebo baratụa á pịrịwẹrị Babylon bọọ yelaa kịmịama a paamịnị. Mị awọụbo Babylon otu fietimi Akkadian bẹẹlị bị fiemụ bara, gẹẹmụ bara bá goomụ bara tolumọmịnị. Pẹrẹ mọ bá wó kịmịbo mọ fịmịnị fịyaịbo kị ámịnị kpọ mọ fịmịnị. Daniel, Hananiah, Mishael, bá Azariah kị bịsẹ nia awọụ ẹrẹbo. Ashpenaz Babylon ẹrẹama akị á pịrịmị, ómịnị: Belteshazzar, Shadrach, Meshach, bá Abednego ka kị á tịịnmị. Nebuchadnezzar akị á pịrịmụ tolumọyebo á mịẹ Jehovah a barasinmịnị a o?
Bei nia kịmịbo Jehovah dọụbara kị mịẹmụ bara gbinipẹlẹmị. Jehovah Oloko mị, pẹrẹ fịyaịbo zụayaị yalịyalịgha bara kị gbaa wẹrịemi. Anịduonị, ámịnị fịyaịbo fị agbẹịgha bara nimiwẹrịmị. Ámịnị gbaa Ashpenaz pịrịmị: ‘Sisei wo penimọwẹrị pẹrẹ fịyaịbo fịkụmọ.’ Ashpenaz gbaa á pịrịmị: ‘Ámịnị mị fịyaịbo fịghatimi, pẹrẹ mị ámịnị bụọtụasei-emi bara ẹrịdaba ómịnị ị baamịnị!’
Daniel mịẹmụ bara nimimị. Ómịnị gbaa á dimịnị owei pịrịmị: ‘Sisei akị fịyaị tụọfịmịnị tuoama mọ beni mọ akị wo pịrị fịtimi oia dein baị. Oia deinbo bụọdaba wo mọ bá pẹrẹ fịyaịbo fịmịnị awọụbo mọ akị kẹnị tọnmọ dii.’ Á dimịnị oweimị ánị gbaa egberi peimị.
Oia deinbo bụọmị, Daniel mọ wó tara ikie-otubo mọ dii-ebi kụrọmọ kọọ awọụbo dẹịnmị. Ámịnị Jehovah dọụbara mịẹ yọ duonị, Jehovah bolouịmbẹlẹ á pịrịmị. Bụnụgha-dawaị-ama mọ bá dawaị-ama a sụọtuu nimimụ kịlịkịlị-nimiye Jehovah mọ akị Daniel pịrịmị.
Ámịnị á tolumọsin ifiemị, Ashpenaz awọụbo akị Nebuchadnezzar yarịmị. Pẹrẹ bị awọụbo mọ ẹrẹ ifiemị, Daniel, Hananiah, Mishael, bá Azariah mọ ye-nimi bá kịlịkịlị kọọ awọụbosẹ dẹịn-emi bara ómịnị mọ dọụ ẹrịmị. Ómịnị bei nia awọụbo akị wó warị bọọ fịrịwẹnịmị. Pẹrẹ mị biin ifieama mú á laawẹrị yelaa tolumọbịbị-ama akịtimi mị. Jehovah kịlịkịlị-nimiye akị á pịrị duonị, ámịnị kịlịkịlị akị tolumọbịbị kọn pẹrẹ pịrịtimi otubo mọ bá magic mịẹtimi otubo mọ dẹịnmị.
Daniel, Hananiah, Mishael, bá Azariah, zịnị ama k’emi kị gbaa kpọ, ámịnị Jehovah odubo-otuama bara ukiemị. Ị́ daụ mọ yin mọ kị ị́ mọ kẹnịyọ a fa kị gbaa kpọ, ị́mịnị mọkpọ Jehovah dọụbara kị mịẹ agbẹị-emi bara ukiemịnị a o?
“Ị́mịnị asịyaị-pesi kị gbaa kpọ, kịmị bụọmọ ị́ penimọ kụmọ. Anịa, iné ẹrẹmịnị bara, inyenrinmịnị bara, tarị mịẹdịamịnị bara, peibolou mịẹdịamịnị bara, bá fịafịa inyenrinbụọ mịẹdịamịnị baramị, ebi mịẹdịaye ka paa peibolou tụa otubo pịrị.”—1 Timothy 4:12