TOLUMỌYE 61
Ámịnị Ánị Tịbịbo Oboimọgha
Pẹrẹ Nebuchadnezzar dawaị-tọrụ a tẹmẹtịẹmọ-wẹrịemi ye ẹrịwẹrị zụa ifie bụọmị, ómịnị gold akị kịmị-tọbọụ mọ lei-emi ye tẹmẹtịẹmọmị. Ómịnị wó tẹmẹ yebị akị Dura ogun bọọ tịẹmọmị. Ómịnị bịsẹ yọma bụrụ-otubo mọ bá yelaa-fịrị wẹnịmịnị otubo mọ bẹnịmọmị. Shadrach, Meshach, bá Abednego kpọ sụọemi. Pẹrẹ mị gbaa á pịrịmị: ‘Ámịnị egbelegbelebo, ẹkpẹtẹbo (harps) bá bagpipebo fiepọụn naadaba oboi tẹmẹwẹrịemi ye pịrị! Tịbị-oboimọgha ụbọsẹ akị fẹnịbụrọ ka gbeintụamịnị.’ Mị tara Hebrew-otubo tịbị-oboimọ akị Nebuchadnezzar tẹmẹtịẹmọye pịrị mịnị a o, anịghakpọ Jehovah bẹtịbị kị karịmịnị a?
Pẹrẹ mị á bịịwẹrị duma farịmị. Duma farị ifiemị, kịmịsẹ tịbị-oboimọ bịsẹ tẹmẹtịẹmọ-wẹrịemi ye karịmị. Anịa Shadrach, Meshach, bá Abednego mọ bẹtịbị kị tịbị-oboimọgha. Zụa otu Shadrach, Meshach, bá Abednego mọ tịbị-oboimọgha bara ẹrịwẹrị gbaa pẹrẹ pịrịmị: ‘Tara Hebrew-otubo iné tẹmẹtịẹmọ-wẹrịemi ye karịgha.’ Nebuchadnezzar kịmị fịrịmọ á tịịnbowẹrị gbaa á pịrịmị: ‘Ịmịnị mọkpọ zịnị fomuun akị á pịrịwẹrị tẹmẹtịẹmọ-wẹrịemi ye karịmịnị. Ámịnị mọkpọ ụ karịghasẹ, ịmịnị á kọn fẹnịbụrọ bọọ gbeintụa mịnị. Á zụọmụ kịmị fa.’ Ámịnị ụ parụmị: ‘Wo Ọkpọnanaowei wo zụọbụọmọmịnị. Wo Ọkpọnanaowei wo zụọgha kpọ, omịnị iné tẹmẹwẹrịemi ye karịgha fa O pẹrẹ.’
Nebuchadnezzar boloukọn kụrọmọ duonị, ómịnị gbaa wó kịmịbo pịrịmị: ‘Sọnọma ifie akị fẹnịbụrọ mịẹ kẹrịkụrọmọ dẹịn!’ Bá gbaa wó soldier-otubo pịrịmị: ‘Bei kịmịbo fịnadá á kọn fẹnịbụrọ bọọ gbeintụa!’ Fẹnịbụrọ bị afẹrẹ kụrọmọtimi duonị, soldier-otubo mú fẹnịbụrọ mọ naịn ifiemị, fẹnị mị ásẹẹ ịyọụnmọmị. Tara Hebrew-otubo fẹnịbụrọ bọọ korosụọmị. Nebuchadnezzar fẹnịbụrọ ditụa ifiemị, ómịnị tara oweiama ẹrịmụ bara dii a, nia oweiama kị fẹnịbụrọma wẹnịyọrọ timi ụ pịrị ẹrịmị. Anịduonị, ómịnị fịrịwẹnị ụ pịrịmịnị otubo biimị: ‘Omịnị tara oweiama kị gbeinmọ fẹnịbụrọ bọọ tụa kị tọn? Ịmịnị fẹnịbụrọ bọọ nia kịmị kị ẹrịmịnị, kẹnị ụbọ angel-owei mọ kị lei-emi!’
Nebuchadnezzar mú fẹnịbụrọ mọ naịnwẹrị wó okolo bị uwoumọwẹrị gbaamị: ‘Seriidein Ọkpọnanaowei odubo-otuama, paabo!’ Shadrach, Meshach, bá Abednego fẹnịbụrọ duo paabo ifiemị, kịmịsẹ angọbọụmị. Ánị angọ, tịbị-dumoun, bá bịdẹbo mọ ịyọụngha, owún kpọ ánị angọbo á fọrọgha.
Nebuchadnezzar gbaamị: ‘Shadrach, Meshach, bá Abednego mọ Ọkpọnanaowei mị, kọkọ kụrọ nanaemi. Wó tọrụ fa. Ómịnị wó angel-owei fịrịmọ á zụọbụọmọdẹ.’
Ị́mịnị kpọ mị tara Hebrew-otubo dimịẹwẹrị, ifiebosẹ Jehovah mọ palịtimi mụ bara gbinipẹlẹdẹ a o?
“Paabara paabara iné Ọkpọnanaowei Jehovah kị karị, bá beinmọ beinmọ bara yalịyalị fịrị wẹnị akị ụ bẹtịbị kị pịrị.” —Matthew 4:10