Angel Gabriel Mary Warị A Múmị

Mary, Elizabeth yin bịna-araụ tọbọụ. Mary Galilee bọọ Nazareth ama ka inyenrintimi mị. Joseph bá ye-kaị fịrị kị wẹnịtimi mị. Mary, Joseph mọ zọzọ nanamụ bara gbaa-pẹlẹdẹ wẹrịmị. Elizabeth ofurotimi sondia agọnọwei laa ifiemị, angel Gabriel Mary paamọwẹrị gbaa a pịrịmị: ‘Mary doo. Jehovah bolouịmbẹlẹ ị́ pịrịmịnị.’ Mary, Gabriel gbaa ye bọọ sụọtuunimigha. Anịduonị ómịnị gbaa a pịrịmị: ‘Ị́mịnị ofurowẹrị owei-tọbọụ ziimịnị. Jesus ka kị tọbọụ tịịn. Ómịnị Pẹrẹ ka paa mịnị. Wó Daabụọ mị timi bẹseri bẹseri kị laamịnị.’

Anịa Mary gbaa ụ pịrịmị: ‘Ịmịnị naa owei kpọ nimigha. Ịmịnị tebara kị mịẹtimi tọbọụ zii mịnị a o?’ Gabriel gbaa á pịrịmị: ‘Jehovah mịẹ a paagha ye fa. Yalịyalị tẹmẹ ị́ beinwẹrị ị́mịnị owei-tọbọụ ziimịnị. Iné bịna-araụ Elizabeth kpọ ofurodẹ.’ Mary gbaa angel-owei pịrịmị: ‘Ịmịnị Jehovah odubo-araụ. Pebidá iné gbaa bara kị paa ị pịrị.’

Bịsẹ yọ bụọmị, Mary Elizabeth diiyọ a múmị. Elizabeth kẹnị ogun-agọnọ emi ama ka inyenrintimi mị. Mary Elizabeth kule ifiemị, Elizabeth biribolou bọọ emi tọbọụ mị desimị. Yalịyalị tẹmẹ Elizabeth beinwẹrị amịnị gbaa Mary pịrịmị: ‘Mary, Jehovah tarịama akị ị́ pịrịdẹ. Ine Nanaowei yinma ine warị bọọ bo yọmị opu fomuun.’ Mary gbaa a pịrịmị: ‘Ịmịnị ine adụdụsẹ akị Jehovah tokonimị.’ Mary Elizabeth mọ timi tara agọnọwei baịwẹrị waị Nazareth a múmị.

Mary ofurodẹ bara Joseph mọ nimi ifiemị, ómịnị bá Mary nana dọụgha. Anịa kẹnị angel-owei dawaị-tọrụ a Joseph paamọwẹrị gbaa ụ pịrịmị: ‘A nanamụ yọmị esiinkụmọ. Amịnị naa kẹnị sei ye kpọ mịẹgha.’ Anịduonị, Joseph Mary nanawẹrị a kọn wó warị a múmị.