Ámịnị Kẹnịye Kpọ Bụọmọwẹrị Á Tịẹmọgha

Kẹnị okile-owei ereinbosẹ karịwarị gatema timi ye biitimi mị. Kẹnị ereinbiri, Peter mọ John mọ karịwarị duo sụọtimi ụ pịrị ẹrịmị. Ómịnị gbaa á pịrịmị: ‘Sisei ye akị ị pịrị.’ Peter gbaa ụ pịrịmị: ‘Ebi akị sịlị dẹịn-emi ye kị ị mọ kọn ị́ pịrị dọụmịnị. Jesus Christ ẹrẹ duonị, seriitịẹdá wẹnị!’ Peter baratụa kịmị pịrị seriitịẹwẹrị, bịsẹ owei paakị wẹnịmị! Peter mịẹ tamamaaye mị, biin kịmịama mịẹ pọwẹị kụrọmọmị. Anịduonị biin kịmịama peibolou akị Christ a tụamị.

Anịa yemị, ịkịankụn-otubo mọ Sadducee-otubo mọ mịẹ boloukọnmị. Anịduonị ámịnị fịrịmọpaa-otubo akị ụgụla-warị a múwẹrị á biimị: ‘Te ụbọ kị mị kịmị zụọ ebimọ kụrọ akị á pịrị ma o?’ Peter gbaa á pịrịmị: ‘Jesus Christ ánị baa owei kị, kụrọ kọn wo pịrịmị.’ Karịbụọ tịbị-otubo gịa á pịrịmị: ‘Bá Jesus egberisẹ gbaa kụmọ!’ Fịrịmọpaa-otubo gbaa á pịrịmị: ‘Omịnị pẹlẹgha bara Jesus egberibo gbaa mịnị. Omịnị pẹlẹgha fa.’

Peter mọ John mọ ụgụla-warị duo paa ifiemị, ámịnị mú kọọ fịrịmọpaa-otubo laawẹrị paaye bị gbaa á pịrịmị. Bá á mọ mọ́ kẹnịsụọmọ tẹẹbịbị mịẹmị. Ámịnị Jehovah baratụa-pịrịye biimị. Á gbaamị: ‘Sisei baratụa wo pịrịdá ye-esiinkụmọ, anịkị omịnị laa ifiebosẹ iné fịrị wẹnị a paadẹ.’ Jehovah wó yalịyalị tẹmẹ mị akị á pịrịmị. Anịduonị, ámịnị pẹlẹgha bara egberigbaa bá dọọn-ama kpọ zụọmị. Biin kịmịama kị peibolou akị Christ a tụamị. Sadducee-otubo fịọnkẹrị anịghakpọ tọrụdọọn duonị, ámịnị fịrịmọpaa-otubo kọn ikoliwarị a kaịmị. Ámịnị ikoliwarị bọọ emi ifiebị, Jehovah dein bọọ kẹnị angel-owei fịrịmọ ikoliwarị ogigebo finiwẹrị gbaa fịrịmọpaa-otubo pịrịmị: ‘Waị karịwarị ma mú kịmịbo tolumọ.’

Pekei laa ifiebị, kịmịotu mú gbaa Sanhedrin bọọ timi ụgụlasụọtimi karịbụọ tịbị-otubo pịrịmị: ‘Ikoliwarị ogigebo kaị-emi, anịa, ánị kaịwẹrị kịmịbo ba fa! Ámịnị karịwarị ka timi kịmịbo tolumọmịnị!’ Ámịnị waịmú fịrịmọpaa-otubo kẹrị-akị Sanhedrin bọọ bomị. Tịbị ịkịankụn-owei mị gbaa fịrịmọpaa-otubo pịrịmị: ‘Benebene bá Jesus egberisẹ gbaa kụmọ bara omịnị mọ gbaa á pịrị wẹrịmị!’ Peter gbaa ụ pịrịmị: “Omịnị Ọkpọnanaowei gbaaye kị mịẹ mịnị, kịmị-awọụ gbaaye mịẹgha fa.”

Karịbụọ tịbị-otubo bolou kọn kụrọmọmị. Anịduonị, ámịnị fịrịmọpaa-otubo baa dọụmị. Anịa kẹnị Pharisee-owei seriitịẹwẹrị gbaa á pịrịmị: ‘Angọdii! Ọkpọnanaowei bei kịmịbo mọ emi kpọ paaemi. Ámịnị gbẹsị Ọkpọnanaowei kị kẹrịsụụ dọụmịnị a?’ Gamaliel kị bịsẹ Pharisee-owei ẹrẹ mị. Ámịnị Gamaliel gbaaye peimị. Anịa ámịnị ogu-ama akị fịrịmọpaa-otubo famọmị. Bá benebene egberigbaa kụmọ bara kpọ gbaa á pịrịwẹrị á bụọmọ múmị. Ámịnị fịrịmọpaa-otubo ụyamọmị kị gbaa kpọ, ámịnị egberigbaa fịrị tịẹmọgha. Ámịnị ye-esiingha bara boloukụrọtimi karịwarị mọ bá warị duo mú warị laa egberigbaamị. Ámịnị egberigbaa fịrị tịẹmọgha.