Governing Body Duoboemi Letter

Wo Tarị Wẹrịemi Bịnaotuama:

Omịnị Jehovah kị karịmịnị otuama duonị, omịnị Bible tarịemi. Bible bị gerede bara ka kị paabụọdẹ yeama gbaawẹrịemi bara wo mọ biberin wẹrịemi. Bible mị baratụa wo pịrịwẹrị ebi-akpọ inyenrinmịnị bá Jehovah wo tarịwẹrịemi bara kpọ mịẹdịa wẹrịemi. (Psalm 119:105; Luke 1:3; 1 John 4:19) Zịnị otuama kpọ Bible bọọ emi gesiibo nimi kị omịnị mọ dọụemi. Anịduonị, “Bible Duo Tolumọ Akị A Paaemi Yeama” fun mị, wo mọ mịẹpaamọ yọmị wo bolouịmbẹlẹmọ kamị. Sisei, wo bụọmọdá fun mị emibara bọọ dọlọ gbaa ị́ dịa.

Omịnị kala-awọụama ka kị ịkịọụ a tụawẹrị, mị fun gẹẹmị. Mọabịkpọ, mị fun mị baratụa akị kịmịpaadẹ otuama kpọ pịrịwẹrị Bible tolumọ a paaemi. Bible bị gẹẹ kịmịsẹ kị pịrịwẹrịemi duonị, tamanaịnyọ kpọ fa baramị, wosẹ mị fun bọọ emi yebo duo arere nanamịnị. Fun bọọ emi tolumọyebo wo mịẹ pọwẹịmọmịnị.

Mị fun mị kịmịawọụ bo paabara kpọ gbaawẹrịemi. Bible kị duo bịsẹ yebosẹ gẹẹwẹrịemi. Bible bọọ paayebo mịẹgaan bá bọụbọụ dọụmịnị duonị, fun mịẹ otubo yebo paabara kị dii kẹnị-kẹnị gẹẹwẹrịemi.

Mị fun mị, Bible bọọ paayebo akị dụụ bara bẹtịbị gbaagha. Akị fun gẹẹwẹrịemi egberi ụngbọụbo mọ, bá fotobo mọ, Bible bọọ paayebo kọkọ paabara mị, mịẹgaan wo pịrịmịnị. Bá Bible bọọ gbaawẹrịemi kịmịbo mịẹbara kpọ mịẹgaan paamọ wẹrịemi.

Bei fun bị, Bible bị kịmịotu egberiama kị gẹẹwẹrịemi fun bara mịẹgaan paamọ wẹrịemi—Jehovah dọụbara mịẹ otuama mọ bá Jehovah dọụbara mịẹgha otuama kpọ. Bá baratụa wo pịrịwẹrị ánị mịẹdịayebo duo yeama tolumọ akịmịnị. (Romans 15:4; 1 Corinthians 10:6) Fun mị akị 14 anga kị dịẹmọ wẹrịemi. Dịẹmọ wẹrịemi angabosẹ, bọlọụ anga bị, omịnị bịsẹ anga bọọ tolumọ akịmụ yebo akị kịlọbara gbaawẹrịemi.

Ị́mịnị daụ anịghakpọ yin aba, ị́mịnị kẹnị tolumọye akị iné tọbọụ mọ goo bá fotobo kpọ akị tụa ẹrẹtei a paaemi. Ị́ mọ iné tọbọụ mọ bịsẹ yọ bọọ emi Bible yọbo kpọ goo a paaemi. Baratụa akị iné tọbọụ pịrịwẹrị Bible bọọ wó goo yebo mọ, bá fun bọọ emi yebo mọ kẹnịsụọmọemi baramị dọụ ẹrị. Bịsẹ kpekẹnị baramị akị baratụa kịmịpaadẹ kịmị pịrịwẹrị, Bible bọọ emi egberibo a sụọtuunimi a paaemi.

Bei fun bị, baratụa akị gesii nimi dọụmịnị otubosẹ pịrịwẹrị, Bible bọọ emi gesii nimiwẹrị akị ánị ụndụ bọọ tụa inyenrinmụ ukiemọye wo mọ nanawẹrịemi. Baratụa akị kala-awọụama mọ bá okosuotu-ama kpọ pịrịmịnị. Bịsẹ bara paadaba, ásẹẹ kẹnịsụọmọtimi Ọkpọnanaowei karị a paadẹ.