Ye Esiingha Bara Timi Ọkpọ Kunumọ Erein Koru

Alaghatimi Jehovah bá mị akpọ dii eninigha fa. Ikpé karịbụọ seri siin, kẹnịsụọmọdẹ ibemọ Ọkpọnanaowei kịmịmọ baa dọụ mịnị, má Jehovah Armageddon akị sei mịẹ mịnị otubo baa siin mịnị. Christtuuduo-otu bolouịmbẹlẹtimi bei yelaa yebo paa mụ ifie koru mịnị.

Anịa, Opu akpotu bo paamụ barasẹ wó mọ nimisiingha. Gbaa maba, sụụ bị te erein kọọ paa mịnị a o? Daabụọ-otu tetuu kị duonị karịbụọ otu kẹrị sụụ mịnị a o? Ibebo mọkpọ te yeama kị mịẹ mịnị a o? Má te ifie kọọ dụụ mịnị a o? Armageddon sụụ bị, Jehovah tebara ka kị sei otubosẹ baa siin mịnị a o?

Omịnị ye esiingha má boloukụrọtimi mụ yọ duonị, bei bọlọụ gbelemọ yọmị, Bible wó nimi agbẹị emi yemọ gbaa wó pịrị wẹrị emị. Gbaa maba, bei yebo wó mọ nimi wẹrị emi: omịnị “kunumọ ereinmọ” kọọ emi. (2Ti 3:1) Gesii karịbụọ kekere mụ yọ duonị, Jehovah ibe-otumọ, karịbụọmọ kẹrị sụụ mịnị ereinmọ “mịẹ kẹsị mịnị.” (Mt 24:22) Jehovah wó kịmịbo zụọbụọ mịnị. (2Pe 2:9) Jehovah akị sei mịẹ mịnị otubo baa má akị wó kịmịbo zụọbụọ mụ ụbọ bị gesii má kụrọ nana wẹrị emi bara wó mọ nimi wẹrị emi.—Re 19:11, 15, 16.

Bọlọụ bọọ paa mịnị yebo duonị biin kịmị “ye esiintimi fụmụ mịnị.” Anịa, Jehovah bụọdẹ ifie bọọ wó kịmịbo zụọ mị bá omịnị bọlọụ paa mụ bara gbaa wó pịrị dẹ. Bei yebo kẹrị iroro mịnị yọbị baratụa wó pịrị wẹrị “serii-tịẹ má [wó] tịbịbo serimọ” nimi amọ wó zụọbụọmọ erein mị naịn dẹ.—Lu 21:26, 28.