Ọkpọnanaowei Agọnọ Mọ Kiriogbo Mọ Tẹmẹmị

Ọkpọnanaowei Jehovah kị wó tẹmẹmị. Jehovah kị yebosẹ tẹmẹmị, ómịnị kị wo tọrụ ẹrịgha yebo mọ bá ẹrị wẹrịemi yebosẹ tẹmẹmị. Jehovah biin angel-otuama tẹmẹdẹ kị wo tọrụ ẹrị wẹrịemi yebo tẹmẹmị. Ị́ kpọ angel-otubo nimi wẹrịemi? Jehovah wó emibara ka kị angel-otubo tẹmẹwẹrịemi. Anịduonị, omịnị laa Ọkpọnanaowei ẹrịgha, bá angel-otubo kpọ ẹrịgha. Jehovah bọlọụ tẹmẹ angel-owei mị, baratụa ụ pịrị owei ka paamị. Jehovah agụra anịghakpọ ịkịkaịbo, planẹtịbo mọ bá zịnị yebo mọ tẹmẹ ifie mị, bịsẹ angel-owei mị baratụa ụ pịrịmị. Wo inyenrinmịnị kiriogbo kpọ, kẹnị planẹtị.

Jehovah kiriogbo tẹmẹ akị namabo mọ bá kịmịawọụbo mọ pịrịmị. Ómịnị ụraụ tẹmẹwẹrị kiriogbo mịẹ gaanmị. Ómịnị ogunbo mọ, abadịbo mọ, bá tọrụbenibo kpọ tẹmẹmị.

Bịsẹ yọ bụọmị, Jehovah mọkpọ teeki tẹmẹ ma o? Jehovah gbaamị: ‘Ịmịnị tuobo mọ, gboroyebo mọ, bá tịn-ama kpọ tẹmẹ mịnị.’ Anịduonị, akị fịyaị-tụọfị mụ tuoama, bẹbẹpaa tịn-beinyaịama, bá flowerbo mọ koro sọụmị. Anị bụọdẹ mị, Jehovah nama paabosẹ tẹmẹmị​—fiin-mịnị yaị, oki-mịnị yaị, okiri-mịnị yaị, bá kpụịn-mịnị yaịbosẹ tẹmẹmị. Ómịnị kala namabo kpọ tẹmẹmị, gbaamaba, bou-eke tẹmẹmị. Bá bịla anịghakpọ opu-obori tọrụ-tọrụ opu namabo kpọ tẹmẹmị. Te nama kị ị́ dịsẹ dẹịn ma o?

Bịsẹyọ bụọdẹ mị, Jehovah gbaa bọlọụ angel-owei pịrịmị: “Bodá wo kịmị-tọbọụ tẹmẹ.” Kịmị-tọbọụ, namabo mọ leigha fa. Kịmịawọụ laa yeama kpọ mịẹpaamọ mịnị. Ámịnị ẹrẹ, dẹrị bá tẹẹbịbị kpọ mịẹmịnị. Ámịnị kiriogbo mọ namabo mọ kekeremịnị. Jehovah bọlọụ tẹmẹ owei mị ị́ mọ nimi wẹrịemi? Wo mú barịị yọ bọọ dọụ ẹrị.