Ọkpọnanaowei Bọlọụ Owei Mọ Ere Mọ Tẹmẹmị

Jehovah Eden bọọ fanụ-kiri mịẹpaamọmị. Biin odede-ama, tịn-ama, bá nama-ama mọ bịsẹ fanụ-kiri bọọ timimị. Jehovah atọụ anịghakpọ atọkọ akị bọlọụ owei tẹmẹmị, anị Adam. Jehovah Adam tẹmẹsiin bị, ómịnị embasara wó nini-opolo bọọ tụamị. Jehovah bịsẹ bara mịẹsiin ifiebị, paa yebị ị́ mọ nimimị? Owei mị ụndụ nanamị! Jehovah Eden fanụ-kiri tọlọmọ mụ fịrị mọ bá ẹrẹ akị namabosẹ tịịnmụ fịrị mọ akị Adam pịrịmị.

Jehovah kẹnị yelaa oloko tụa Adam pịrịmị. Ụ gbaamị: ‘Tịn-beinyaịbosẹ ị́ mọ fị a paaemi, anịa kẹnị bẹtịbị kị fịkụmọ. Bịsẹ tịn-beinyaịbo ị́ mọ fị daba, ị́mịnị fịị mịnị.’

Jehovah mọkpọ gbaamị: ‘Ịmịnị baratụa Adam pịrịmụ kịmị tẹmẹ mịnị.’ Jehovah Adam mịẹ olomu-sịyaịn bụnụwẹrị Adam angasara-ungboubo a kẹnị kọn ere-araụ tẹmẹ Adam pịrịmị. Eve kị bịsẹ erema ẹrẹ. Kiriogbosẹ Adam mọ Eve mọ kị bọlọụ ziituumị. Adam wó erema ẹrị ifiemị, wó angọ mị tebara ka kị ụ mịẹ ma o? Adam pọwẹị kụrọmọ duonị, ụ gbaamị: ‘Jehovah ine angasara-ungbou duo mịẹpaamọ ye dii! Ahh! Ine tọrụtọrụ kịmị paadẹ.’

Kiriogbo bọọ awọụ-ama zii beinmọ bara Jehovah mọ gbaa Adam mọ Eve mọ pịrịmị. Adam mọ Eve mọ gbelei wẹrị kiriogbosẹ mịẹ akị paradise anịghakpọ Eden fanụ-kiri timi bara paa kị Jehovah mọ dọụ wẹrịmị. Anịa bịsẹ bara paagha. Tetuu a o? Omịnị barịị egberitịbịma bịsẹ yọ tolumọ mịnị.