Abraham Mọ Sarah Mọ Ọkpọnanaowei Gbaaye Peimị

Ur ama bị Babel mọ naịntimimị, bịsẹ ama bọọ timi otubo Jehovah karịgha ámịnị oru-ama kị karịtimimị. Anịa kẹnị kịmị Jehovah bẹtịbị kị karịtimimị. Bịsẹ owei ẹrẹ mị Abraham.

Jehovah gbaa akị Abraham pịrịmị: ‘Iné ama mọ bá iné bịnaotubo mọ a barasiin dá Ịmịnị kọn ị́ dịamụ ogboma mú.’ Ọkpọnanaowei gbaa ụ pịrịmị: ‘Ị́mịnị opu ibe ka paa mịnị, ị́mịnị duonị, Ịmịnị ebiye-ama mịẹ akị kiriogbo bọọ biin otu pịrị mịnị.’

Jehovah ụ fịrịmọ mútimi yọmị Abraham mọ nimigha, mọabịkpọ, ómịnị eti akị Jehovah a tụamị. Anịduonị, Abraham, wó taa Sarah, wó daụ Terah, bá wó bịnaowei tọbọụ Lot mọ anị yebo sibewẹrị Jehovah gbaa á pịrị yọ bọọ múmị.

Timi kẹnị ifie laamị, Abraham mọ wó warị-otubo mọ mú Jehovah gbaawẹrị ogbo laamị. Bịsẹ ifiebị Abraham 75 kụraị baịdẹ wẹrịmị. Bịsẹ ogbo ẹrẹbị Canaan. Ọkpọnanaowei bịsẹ yọ bọọ gbaa Abraham pịrịmị: ‘Ị́ mị ẹrị wẹrịemi ogbosẹ, Ịmịnị mọ kọn iné awọụbo pịrị mịnị.’ Anịa, bịsẹ ifiebị, Abraham mọ Sarah mọ okosudẹ bá naa tọbọụ kpọ ziigha wẹrịmị. Jehovah tebara ka kị wó kikoromọdẹ yemị mịẹbeinmọ mịnị a o?