Jehovah Kụrọ Akị Samson Pịrịmị

Biin Israel-otuama waị oruama karị duonị, Jehovah Philistine-otubo bụọmọ wẹrị Israel-otubo ụyamọmị. Anịa zụa Israel-otuama mọkpọ Jehovah tarịwẹrịmị. Kẹnị ụbọ Manoah kị wó ẹrẹ. Manoah mọ wó taa mọ kẹnị tọbọụ kpọ ziigha. Kẹnị baị erein Jehovah wó angel-owei fịrịmọ mú Manoah taa laamị. Angel-owei mị gbaa a pịrịmị: ‘Ị́mịnị owei-tọbọụ ziimịnị. Ómịnị Philistine-otu bara duo Israel zụọbụọmọ mịnị. Ómịnị Nazirite ka paamịnị.’ Ị́mịnị kpọ Nazirite-otubo nimi wẹrịemi? Ámịnị bẹbẹẹ fịrị kị wẹnị Jehovah pịrịtimimị. Nazirite-otubo ánị tịbị-dumoubo kaịgha anịghakpọ kpabụgha.

Timi kẹnị ifie laamị, Manoah owei-tọbọụ ziimị, Samson ka kị tọbọụ tịịnmị. Samson sọụdụbadẹmị, Jehovah kụrọ akị Samson pịrịmị. Samson bara-bara ka kị adaka baamị. Kẹnị ifie Samson bẹtịbị 30 Philistine-otuama baamị. Philistine-otubo ụ golu kụrọmọmị, anịduonị, ámịnị ụ baamụ ụwọụama dọụmị. Kẹnị dein Samson Gaza a bụnụemi ifiemị, Philistine-otubo Gaza gate bọọ mú Samson korutimi pekei laadá ụ baa dọụmị. Anịa Samson deinbiri bọọ serii Gaza gate bọọ mú, warị akpakpa duo gate gbọụn paamọmị. Ómịnị gate kọn wó apele bọọ sibewẹrị mú Hebron mọ naịn-emi ogun-agọnọ laamị!

Bịsẹ yọ bụọdẹmị, Philstine-otubo mú Delilah Samson nana dọụmịnị araụma laawẹrị gbaamị: ‘Ị́mịnị Samson kụrọ nanawẹrịemi tuu nimiwẹrị gbaa wo pịrịdaba, omịnị silver ogịzịama akị ị́ pịrịmịnị. Omịnị ụ kẹrị ikoliwarị a kaị dọụmịnị.’ Delilah sịlịbo akị dọụemi duonị, amịnị Samson kụrọ nanawẹrịemi tuu dọụpaamọ á pịrịmụ bara gbaamị. Samson wó kụrọemi tuu gbaa Delilah pịrị dọụghatimimị. Delilah wó a bụụdọọntimi Samson wó kụrọ nanawẹrịemi tuu gbaa a pịrịmị. Samson gbaa a pịrịmị: ‘Ịmịnị Nazirite duonị, paasẹ naa ine dumoubo kaịgha anịghakpọ kpabụgha.’ ‘Ine tịbị-dumoubo kaị anịghakpọ kpabụ daba ịmịnị bá kụrọ nanagha fa.’ Samson wó kụrọ nanawẹrịemi tuu gbaa Delilah pịrị yọmị, ómịnị mịẹkiri bara ị́ mọ tọn a?

Delilah ifie famọgha bara ka mú gbaa Philistine-otubo pịrịmị: ‘Ịmịnị wó kụrọemi tuu nimidẹ!’ Delilah Samson mịẹ anị atẹnẹ bọọ bụnụwẹrị kịmị fịrịmọ wó tịbị-dumoubo kaịmị. Delilah Luloumị: ‘Samson, Philistine-otubo bodẹ!’ Samson kirinaawẹrị bụnụyọ duo serii ifiemị, wó kụrọ bá fa. Philistine-otubo ụ kẹrị, wó tọrụbo mịẹ baanmọ, bá ụ kọn ikoliwarị a kaịmị.

Philistine-otubo Dagon tịịnmịnị oru karịtimimị. Anịa kẹnị erein biin Philistine-otuama Dagon oru-warị bọọ bẹnịịwẹrị luloumị: ‘Wo oru mị, Samson akị wo bara-bolou a tụadẹ! Samson paamọbo! Wo dọlọ ụ mịẹdẹrị.’ Ámịnị ụ kọn maa pillar ovuru a tịẹmọwẹrị ụ mịẹdẹrịmị. Samson tẹẹ Jehovah pịrịmị: ‘O Jehovah, sisei waị kụrọ kọn ị pịrị.’ Mị ifiemị, Samson tịbị-dumoubo waị sọụdẹ. Samson wó kụrọsẹ akị oru-warị kẹrịtịẹmowẹrị pillarbo dịnẹmọ ifiemị, warị mị koro bolou bọọ emi otubosẹ baasiinmị, Samson kpọ sụọ fịịmị.