Sụụ-olotu Mọ Kala Ịyọrọ-tọbọụma Mọ

Syria ibe mị Israel mọ naịngha, anịa Israel duo paaemi ịyọrọ-tọbọụ Syria ibema timi mị. Syria sụụ-otubo kị a kọn Israel duo serimị. Bịsẹ ịyọrọ-tọbọụma odubo-gban sụụbọlọụ-daaowei Naaman taa kị pịrịtimi mị. A mọ mọ́ kẹnịyọemi otubo Jehovah karịgha kị gbaa kpọ, bịsẹ kala ịyọrọ-tọbọụma Jehovah kị karịmị.

Pinaki-dọọn Naaman kẹrịmị, anịduonị wó angọ mị ifiebosẹ ụ dọọntimi mị. Kala ịyọrọ-tọbọụma baratụa Naaman pịrị dọụmị. Anịduonị, amịnị gbaa Naaman taa pịrịmị: ‘Ị́ yei angọ zụọ ebimọ mụ ụbọ ịmịnị mọ nimiwẹrịemi. Jehovah bụrụ-owei Israel ibe bọọ emi, wó ẹrẹ bị Elisha. Ómịnị laa ị́ yei angọ zụọ ebimọmịnị.’

Naaman taa ịyọrọ-tọbọụma gbaa a pịrị yebị, gbaa Naaman pịrịmị. Ómịnị wó angọ zụọ ebimọ dọụtimi duonị, ómịnị Israel bọọ Elisha warị a múmị. Naaman dọụtimi bara bị, Elisha wó akị opu-kịmị bara kẹrị-akị. Anịa Elisha wó odubo-owei kị fịrịmọ mú Naaman laawẹrị gbaa Naaman pịrịmị: ‘Mú Jordan Tọrụ bọọ sọnọma ifie a iné angọ sụụrụ. Bịsẹbara ị́ mọ mịẹdaba iné angọ mị ebimịnị.’

Yemị Naaman tọnwẹrị bara paagha. Anịduonị, ómịnị gbaamị: ‘Bei bụrụ-owei mị tẹẹ wó Ọkpọnanaowei yarịwẹrị wó barabo akị ị fọụnwẹrị ị zụọ ebimọ mụ kị ịmịnị mọ tọnwẹrịmị. Anịa ómịnị ị fịrịmọ Israel tọrụ ka múmị. Tetuu kị duonị, ịmịnị Syria bọọ emi tọrụbo a mú a paagha o?’ Syria bọọ emi tọrụbo ebidẹịn-emi. Naaman boloukọnwẹrị Elisha warị duo seriimị.

Naaman odubo-otubo baratụa ụ pịrịwẹrị ebibara yebị iroro-pẹlẹmị. Ámịnị gbaa ụ pịrịmị: ‘Ị́mịnị mịẹdá iné angọ-zụọ ebimọ mụ yesẹ mịẹgha fa? Bei bụrụ-owei gbaamịnị ye mịẹmụ yọmị dọlọ kpọ kụrọgha. Wó gbaa bara mịẹdaba sei ma?’ Naaman wó odubo-otubo gbaaye peiwẹrị, mú Jordan Tọrụma sọnọma ifie bilemị. Naaman sọnọma karamọ ifie bọọ beni bọọ bilewẹrị paabobị, wó angọ bị ebimị. Ómịnị pọwẹị kụrọmọmị, anịduonị, ómịnị waịmú Elisha kulemị. Naaman gbaa ụ pịrịmị: ‘Jehovah kị gesii Ọkpọnanaowei bara ị mọ nimidẹ.’ Naaman angọ bị ebiwẹrị waịbo ifiemị, yebị tebara ka kị Israel ịyọrọ-tọbọụma gbele bara kị ị́ mọ tọn ma o?