Jehovah Sụụ-otuama

Syria ibe daa-owei, Ben-hadad, ifiebosẹ Israel-otubo mọ sụụtimi mị. Anịa bụrụ-owei Elisha ifiebosẹ berifaanye akị Israel ibe daa-owei pịrịtimi duonị, ibe daa-owei bị laa baịntẹịtimi mị. Anịduonị, Ben-hadad Elisha kẹrị-akị mụ iroro tọnmị. Ben-hadad Elisha Dothan ama bọọ emi bara naa ifiebị, ómịnị wó soldier-otubo fịrịmọ mú Elisha kẹrị-akịmị.

Syria soldier-otubo dein ka mú Dothan laamị. Barịị pekeimị, Elisha odubo-owei bị, biin soldier-otu ama tụa-yọrọwẹrịemi bara ẹrịmị. Anịduonị, ómịnị malafa kụrọmọwẹrị gịamị: ‘Elisha, teeki wo mọ mịẹmịnị a o?’ Elisha gbaa ụ pịrịmị: ‘Wo mọ emi otubo biin akị á mọ mọ́ emi otubo dẹịn-emi.’ Bịsẹ tịẹkirimị, Jehovah Elisha odubo-owei mịẹwẹrị wó angel-otubo ama bọọ emi ogun-agọnọbosẹ a bẹnị-emi bara ẹrịmị.

Syria soldier-otubo Elisha kẹrị-akị dọụ ifiemị, ómịnị tẹẹmị: ‘Jehovah, sisei ánị tọrụbo mịẹ baanmọ.’ Soldier-otubo mọkpọ yọ-ẹrịtimi mị, anịa ámịnị bá anị emi yọ nimigha. Elisha gbaa soldier-otubo pịrịmị: ‘Ámịnị zịnị ama k’emi. Ine tuuduo, ịmịnị á dọụmịnị kịmị kọn á dịamịnị.’ Ámịnị Elisha a tuuduo mú Samaria laamị. Israel pẹrẹ bị bịsẹ yọ ka inyenrintimi mị.

Syria-otubo ámịnị Samaria kị laadẹ bara nimi ifiebị, ámịnị ba zịnị mịẹmụ bara fa. Israel pẹrẹ bị Elisha biimị: ‘Ásẹẹ Ị mọ baasin a?’ Elisha mị fomuun mị akị á mịẹ-akịmụ bara ị́ mọ tọn ma? Elisha bịsẹ bara mịẹgha. Elisha gbaamị: ‘Á baa kụmọ. Fịyaị akị á pịrịdá á bụọmọ mú.’ Pẹrẹ bị biin fịyaị-ama akị á pịrị fịwẹrị á bụọmọ waị ánị ama bọọ múmị.