Jehoiada Boloukụrọemi Bara Mịẹdịamị

Jezebel kẹnị ere-tọbọụ ziiwẹrịmị, anị ẹrẹ mị Athaliah, amịnị kpọ a yin bara ka kị bolousei timi mị. Athaliah Judah ibe pẹrẹ kị nanawẹrịmị. Athaliah yei fịị ifiemị, anị tọbọụ kị ibe daamị. Athaliah tọbọụ fịị ifiemị, Athaliah angọ akị Judah ibe daa-araụ a tụamị. Kịmị pẹrẹ-kasị duo a kọnsiin dọụgha duonị, amịnị pẹrẹ a sụọ agbẹị timi otubosẹ baasiinmị. Athaliah anị taụ-awọụbo kpọ baamị. Anịduonị, kịmịsẹ Athaliah esiintimi mị.

Tịbị Ịkịankụn-owei Jehoiada mọ bá wó taa mọ, Athaliah mịẹtimi yemị, ebigha bara nimi mị. Anịduonị, ámịnị Athaliah taụ-awọụbo a kẹnị owei akị sọwẹịmị. Athaliah ánị mịẹtimi ye nimidaba á baa kpọ paaemi bara ámịnị mọ nimiwẹrịmị kị gbaa kpọ, ámịnị bịsẹ tọbọụ kọn sọwẹịmị. Bịsẹ tọbọụ ẹrẹmị Jehoash. Ómịnị karịwarị ka timi dụbamị.

Jehoash sọnọma kụraị baị ifiemị, Jehoiada yọlee-tịbị otubo mọ Levite-otubo mọ bẹnịmọwẹrị gbaa á pịrịmị: ‘Karịwarị bọọ emi ogigebosẹ lee, kẹnị ụbọ kpọ bụọmọ sụọ kụmọ.’ Bịsẹ bara mịẹdẹ ifiemị, Jehoiada Jehoash akị Judah ibe pẹrẹ a tụawẹrị pẹrẹbo terimịnị tuunmị akị ụ terimị. Judah-otubo ánị okolobo serimọwẹrị gbaamị: ‘Pẹrẹ sụọtimi ụndụ!’

Queen Athaliah kịmịbo gịọọmịnị bara naawẹrị karịwarị ma múmị. Amịnị pẹrẹ bị ẹrị ifiemị, gịamị: “Gbaa kị gbaapẹlẹ wẹrịemi! Gbaa kị gbaapẹlẹ wẹrịemi!” Bịsẹ bara paadẹ ifiemị yọlee-tịbị otubo paakị Athaliah kọn mú baamị. Teeki Athaliah mịẹkoromọdẹ sei yebosẹ paamọmịnị a o?

Jehoiada baratụa akị ibe bọọ emi otubo pịrịwẹrị Jehovah mọ avụọ fịmị. Ámịnị avụọ fị ifiemị, ámịnị Jehovah bẹtịbị kị karịmụ bara gbaa Jehovah pịrịmị. Jehoiada kịmịotu fịrịmọ Baal karịwarị mọ bá tẹmẹtịẹmọ wẹrị orubosẹ kpọ famụ seimọsinmị. Jehoiada ịkịan-kụn otubo mọ bá Levite-otubo mọ fịrịmọ karịwarị bọọ fịrị wẹnịmị. Anịduonị, ibe bọọ emi otubo waị laa karịwarị bọọ Jehovah karịmị. Yalịyalịgha kịmị bụọmọ karịwarị bọọ sụọ dọụgha duonị, ómịnị gate leemịnị otubo fịrịmọ karịwarị leemị. Bịsẹ yọ bụọ ifiemị, Jehoiada mọ yọlee-tịbị otubo mọ Jehoash kọn pẹrẹwarị bọọ múmị. Ámịnị bịsẹ yọ bọọ ụ kọn pẹrẹ-kasị bọọ tịtẹmọ ifiemị, Judah kịmịbo bolouịmbẹlẹmị. Ámịnị Athaliah bara duo tẹị bá Baal karịbụọ kpọ duo tẹịwẹrị waị fomuun nanawẹrị Jehovah karịmị. Jehoiada boloukụrọ yọmị, baratụa biin otu pịrị bara mị ị́ mọ ẹrị ma?