Josiah Ọkpọnanaowei Olokobo Tarịmị

Josiah nigina kụraị ka timi Judah ibe pẹrẹ a sụọmị. Bịsẹ ifiebị, ibe otubo magic mịẹ bá oruama kpọ karịtimi mị. Josiah oi-sondia (16) kụraị-fịnị baị ifiemị, ómịnị Jehovah karị agbẹị-emi bara nimidá agbẹị bara akị Jehovah karị dọụmị. Josiah siia (20) kụraị baị ifiemị, ómịnị ama bọọ emi orubo mọ bá oru tanabosẹ kpọ faamọ-seimọ siinmị. Josiah sii-sondia (26) kụraị-fịnị baị ifiemị, ómịnị waị Jehovah karịwarị tọlọmọ mụ iroro tọnmị.

Tịbị ịkịankụn-owei, Hilkiah, karịwarị bọọ Jehovah Olokobo gẹẹwẹrị funkpoo bị ẹrịmị—kaanghaba Moses gẹẹwẹrị funkpoo kị ómịnị mọ ẹrịmị. Shaphan kị pẹrẹ fungẹẹ-owei bị, ómịnị olokobo gẹẹwẹrịemi funkpoo kọn bowẹrị, Olokobo goo paamọ mị. Josiah oloko fun bọọ gẹẹwẹrịemi yebo peimịnịmị, wó kịmịbo Jehovah diseimọtimi biin kụraịama baịdẹ bara ómịnị mọ nimimị. Pẹrẹ Josiah gbaa Hilkiah pịrịmị: ‘Jehovah bolouịmbẹlẹ wo pịrịgha. Mú ụ mọ mọ́ ẹrẹ. Jehovah wo mịẹ agbẹị-emi ye gbaa wo pịrịmịnị.’ Jehovah bụrụ-ere Huldah duotolu a gbaa á pịrịmị: ‘Judah kịmịbo ị gbeinmọ koromọdẹ. Anịa, Josiah angọ-iyerimọ ị pịrịdẹ duonị, Josiah ifie bụọdaba ụyamọ ye á laamịnị.’

Pẹrẹ Josiah ịsọmụ egberi naa ifiemị, ómịnị karịwarị bọọ Judah ibe otubosẹ bẹnịmọwẹrị Jehovah Olokobo goo paamọ ibesẹ pịrịmị. Josiah mọ bá ibe otubo mọ ánị adụdụsẹ akị Jehovah dọụbara mịẹmụ bara gbaamị.

Judah ibe bị Asababẹịn Oge mịẹghatimi biin kụraịama baịdẹ. Anịa kụraịbosẹ ka Asababẹịn-oge mịẹ agbẹị-emi bara Josiah mọ nimi ifiemị, ómịnị gbaa ibe otubo pịrịmị: ‘Omịnị Asababẹịn Oge mịẹ Jehovah pịrịmịnị.’ Josiah biin ịkịan-ama kụn Jehovah pịrịmụ bara tọnpẹlẹmị. Anịduonị ómịnị akị ịkịan-kụnmụ yebo bẹnịmọmị bá karịwarị bọọ duma tuun mọ kịmịama kpọ sẹlẹmị. Ibesẹ Asababẹịn Oge teimị, bá sọnọma erein akị Vudogha anịghakpọ fugugha Bread Oge kpọ teimị. Samuel ifie duobosẹ, ámịnị naa bịsẹ timitimi Asababẹịn Oge teigha-wẹrịmị. Josiah kọkọ Ọkpọnanaowei Olokobo tarịmị. Jehovah tolumọ nimimịnị yọmị ị́ kpọ dịsẹ-emi a o?