Ezra Ọkpọnanaowei Olokobo Akị Kịmịbo Tolumọmị

Israel-otubo biin yaị waị Jerusalem a múmị 70 timitimi kụraịama bụọdẹ. Anịa zụa kịmịama mọkpọ Persia ibe bọọ bẹbẹyọ-ama inyenrintimi mị. Ezra kpọ bịsẹ otubo a kẹnị ụbọ, ómịnị ịkịankụn-owei, ómịnị Jehovah Olokobo akị kịmịbo tolumọmị. Jerusalem bọọ timi otubo Jehovah Olokobo kokogha bara ómịnị mọ nimi mị. Anịduonị, ómịnị mú baratụa á pịrị dọụmị. Artaxerxes Persia Pẹrẹ bị gbaa ụ pịrịmị: ‘Ị́mịnị wó Olokobo akị kịmịotu tolumọ mụ kị duonị, Ọkpọnanaowei kịlịkịlị-nimiye akị ị́ pịrịmị. In’a tuuduo mú mụ ụbọsẹ akị iné angọtụamọ dá mú.’ Ezra waị Jerusalem a mú dọụtimi otubo bẹnịmọwẹrị, Jehovah á kekerewẹrị mú Jerusalem duosụọ bara ámịnị mọ tẹẹmị. Ámịnị tẹẹsin ifiemị, ámịnị paakị koro wẹnị Jerusalem a múmị.

Nia agọnọwei bụọmị, ámịnị mú Jerusalem laamị. Bịsẹ yọ bọọ timi okosuotubo gbaa Ezra pịrịmị: ‘Israel-otubo Jehovah diseimọwẹrị oru karịmịnị ereama kị nanadẹ.’ Ezra teeki mịẹ ma o? Ómịnị kịmịbo tọrụyọ bọọ okoiwẹrị tẹẹmị. Ụ gbaamị: ‘Jehovah, ị́mịnị biin yeama kị mịẹ wo pịrịdẹ, anịa omịnị iné dọụgha yeama mịẹdẹ.’ Bịsẹbara paadẹmị, kịmịbo boloudeimị. Anịa ámịnị mọkpọ kịrịịgha yeama mịẹtimi mị. Anịduonị, Ezra okosu-otuama mọ ụgụlapẹlẹ-otuama mọ sẹlẹwẹrị egberi ditụamị. Tara agọnọwei bụọmị, ámịnị Jehovah karịgha otubosẹ fịrịmọ ama duoserimị.

Oi-maa kụrai-fịnị bụọdẹ. Bịsẹ ifiemị, ámịnị waị Jerusalem akpakpabo kẹrịdẹ wẹrịmị. Ezra kịmịsẹ bẹnịmọwẹrị Ọkpọnanaowei Olokobo goo paamọ á pịrịmị. Ezra fun fini ifiemị kịmịsẹ seriitịẹmị. Ómịnị Jehovah tokoni ifiemị, kịmịsẹ ánị barabo serimọwẹrị ámịnị Oloko gbaa bara mịẹmụ bara gbaamị. Ezra olokobo goo bá tuugbaamị. Kịmịsẹ ebibara ụ peipẹlẹmị. Ásẹẹ Jehovah dọụgha bara mịẹdẹ bara biberinmị, anịduonị ásẹẹ yọụmị. Barịị erein mị, Ezra olokobo a waị zịnị yaị goo á pịrịmị. Alaaghatimi ámịnị Ịtọbọịye Warịkẹrị Oge (Festival Of Booths) teimụ bara á mọ dọụ ẹrịmị. Bịsẹ tịẹkirimị, ámịnị akị oge teimụ yebo bẹnịmọmị.

Ámịnị kọn oge tei sọnọma ereinbosẹ ebibara fịyaịama sou duonị, ámịnị pọwẹị kụrọmọmị bá ebibara Jehovah tokonimị. Joshua ifie bụọsẹ, ámịnị naa mị bara tọrụ Ịtọbọịye Warịkẹrị Oge teigha. Oge bụọdẹ mị kịmịsẹ bẹnịịwẹrị tẹẹmị: ‘Jehovah, ị́mịnị omoni-bolou duo wo zụọtẹịmọmị, ogbo-abadị bọọ wo gbalịmị, bá mị ebi ogbo kpọ akị wo pịrịmị. Anịa omịnị barịị barịị ị́ diseimọmị. Ị́mịnị bụrụ-otu fịrịmọ berifanye kọn wo pịrịmị, anịa omịnị mọkpọ peigha. Mọabịkpọ ị́mịnị etipou bara kọn wo mọ inyenrinmị. Ị́mịnị kikoromọ akị Abraham pịrịwẹrị ye mịẹbeinmọmị. Mị tịẹkiri mị, omịnị iné dọụbara mịẹmụ bara gbaa ị́ pịrịmịnị.’ Anịduonị, ámịnị ánị gbaadẹ yebị gẹẹ koromọmị. Okosuotubo mọ, Levite-otubo mọ, bá ịkịankụn otubo mọ kpọ barapoumị.