Jesus Beni Agọnọ A Wẹnịmị

Jesus dọọntimi otuama zụọ, fịịdẹ otuama tịịnseri bá afọrụ mọ osuo mọ kpọ kẹrịmọmị. Jesus ogun-agọnọ bọọ tẹẹbịbị mịẹsin ifiemị, ómịnị kẹnị kụrọ kimé Galilee Abadị bọọ paamịnị bara ẹrịmị. Fịrịmọpaa-otubo ánị yọụ-timi arụ kẹrịmọmụ yọmị kụrọ a pịrịmị. Anịduonị, Jesus ogun-agọnọ duo korobowẹrị beni agọnọ duo wẹnị arụ dọụ múmị. Kịmị beni agọnọ duo wẹnị bomịnị bara fịrịmọpaa-otubo mọ ẹrị ifiemị, ámịnị malafa kụrọmọmị. Anịa Jesus gbaa á pịrịmị: ‘Ịmịnị kị bomịnị. Malafakụmọ.’

Peter gbaamị: ‘Nanaowei, kọkọ ị́mịnị kị bomịnịaba, ị bịịdá wẹnị bo ị́ laa.’ Jesus gbaa Peter pịrịmị: ‘Wẹnị bo ị laa.’ Anịduonị, bịsẹ opu kimé paamịnị bị, Peter arụ duo korowẹrị beni agọnọ duo wẹnị Jesus dọụ múmị. Anịa, Peter wẹnị mú Jesus mọ naịnmịnị bị, ómịnị kimé dii ifiebị, malafa kụrọmọmị. Anịduonị, ómịnị dọlọ-dọlọ bile iyerimịnị bara akị angọ a nimi ifiemị, Peter wó okolo mị uwoumọwẹrị gbaamị: ‘Nanaowei, ị zụọbụọmọ!’ Jesus wó bara kẹrịwẹrị gbaamị: ‘Tetuu kị duonị, ị́mịnị malafamịnị a o? Iné peibolou bị te yọ k’emi a?’

Jesus mọ Peter mọ arụ bọọ lei ifiemị, kimé bị kirimọkirimọ pẹlẹmị. Bịsẹ yemị, tebara ka kị fịrịmọpaa-otubo gbele bara kị ị́ mọ tọn ma o? Ámịnị gbaamị: “Ị́mịnị kọkọ Ọkpọnanaowei Tọbọụ.”

Jesus mị ifie bẹtịbị a kimé kẹrịpẹlẹmọgha. Kẹnị ifie, Jesus mọ fịrịmọpaa-otubo mọ Galilee abadị bọọ yọụ zịnị anga mútimi ifiemị, Jesus arụ-ofaan bọọ mú bụnụmị. Ómịnị bụnụtimi bị, kẹnị kụrọ kimé paamị. Adawaịn-ama anịghakpọ adọọn-ama paa kụrọmọwẹrị beni arụ duo sụọmị. Fịrịmọpaa-otubo Jesus tịịn-seriwẹrị gịa kụrọmọmị: ‘Tolumọ-owei, omịnị fịịmụ naịndẹ! Sisei wo barịị!’ Jesus seriitịẹwẹrị gbaa abadị pịrịmị: “Kpereintimi!” Kirimọkirimọ kimé pẹlẹmị. Abadị kpọ bo dọọ kị paamị. Jesus fịrịmọpaa-otubo biimị: ‘Ánị peibolou bị teyọ k’emi a?’ Ámịnị gbaa zọzọ pịrịmị: “Kimé mọ abadị mọ kpọ wó gbaa bara kị mịẹmịnị.” Fịrịmọpaa-otubo, ánị etisẹ akị Jesus a tụa wẹrịemisẹ, ámịnị ye-esiinmọ agbẹịgha bara nimi mị.