Bible Bị Ọkpọnanaowei Fun

Bible mị Jehovah akị wó pịrị wẹrị emi ebidẹịn dịẹpịrịye—66 kala funama kị Bible bọọ emi. Anịa ị́mịnị iroro a paa emi: ‘Bible bị tebara kị mịẹ timi bo wó laa ma? Te ụbọ kị Bible nana wẹrị emi a o?’ Bei biibịbịbo parụ mụ yọmị, wó wẹrị Bible bo wó laa bara bị diitụa.

1. Kịmị awọụama kị Bible gẹẹ wẹrị emi aba, tetuu kị duonị Bible bị Ọkpọnanaowei fun gbaa a paa emi a o?

Kịmị a maa sii kị 1,600 kụraịama akị 1513 B.C.E. duo mú 98 C.E kụraị ovuru akị Bible gẹẹ mị. Bible gẹẹ otumọ bẹbẹ yọama kị duo bo mị. Mọabịkpọ, Bible bolou bọọ anị gẹẹ egberimọsẹ kẹnịsụọmọ emi. Tetuu kị duonị bịsẹ bara paa ma o? Tuubị Ọkpọnanaowei kị Bible nana wẹrị emi. (1 Thessalonians 2:13 goo.) Bible gẹẹ otumọ anị iroro yeama gẹẹ koromọgha. “Ọkpọnanaowei kị wo yalịyalị tẹmẹ akị baratụa bei kịmịmọ pịrị Bible gẹẹ mị.”a (2 Peter 1:21) Ọkpọnanaowei wo yalịyalị tẹmẹ ka kị kịmịmọ mịẹ wo egberimọ gẹẹ koromọ mị.—2 Timothy 3:16.

2. Te otu kị laa Bible duo arere nana a paa emi a o?

“Ibemọsẹ, ziitumọsẹ, bẹẹlịmọṣe má kịmịmọsẹ” Bible bolou bọọ emi ebi egberimọ duo arere nana a paa emi. (Revelation 14:6 goo.) Bible mị akị biin bẹẹlịama gẹẹ zịnị funbosẹ dẹịn bara kị Ọkpọnanaowei mọ dọụ mị. Anịa bei tịẹkiri mị, Bible bị akị biin bẹẹlịama ghọ gẹẹ dẹ duonị, biin kịmịama kị Bible nana wẹrị goo mịnị. Kịmị-otu bẹbẹ yọama ka inyenrin má bẹbẹ bẹẹlịama kị fie mịnị kị gbaa kpọ amịnị laa Bible goo a paa emi.

3. Jehovah tebara ka kị Bible kekere ma o?

Bọlọụ ifie bị kụrọkagha yeama ka kị Bible gẹẹ wẹrị mị, gbaamaba leather mọ papyrus mọ. Anịa, Bible tarị emi kịmịama bara akị waị Bible gẹẹ mị. Daabụọ anịghakpọ karịbụọ tịbị-otuama Bible bụọmọ wẹrị zịnị-otu laa dọụgha timi kị gbaa kpọ, zụa-otu anị ụndụbo akị akpotu a tụa wẹrị Bible kekere mị. Anị mịẹdịa amọ Jehovah kẹnịye kpọ bụọmọ wẹrị omịnị wó mọ mọ ẹrẹ mụ yọ tịẹmọgha. Bible gbaa mị: “Ọkpọnanaowei egberi mị ụndụtimi bẹseri bẹseri laa mịnị.”—Isaiah 40:8.

EBIBARA TUUDỌỤ

4. Omịnị Bible bolou duo Bible nana ụbọ nimi a paa emi

VIDIO farị. Má 2 Timothy 3:16 goo dá, kirianga bọọ emi biibịbịmọ paraị.

VIDIO: Te Ụbọ Kị Bible Nana Wẹrị Emi A O?—Dọlọyọ (2:48)

• Kịmị awọụ-ama kị Bible gẹẹ wẹrị emi aba, tetuu kị duonị Bible bị akị Ọkpọnanaowei fun tịịn wẹrị emi a o?

• Ọkpọnanaowei wo iroro yemọ akị kịmị awọụ pịrị gẹẹ yọbị pei a sei emi a?

5. Bible biin yeama kị daatịẹmọ dẹ

VIDIO: Amịnị Bible Diidụbamọ Mị—Dọlọyọ (William Tyndale) (6:17)

• Kịmịama angọ paamọ ụyafị má fịị wẹrị Bible pịrị bo ị́ laa yọbị, ị́ mịẹ Bible goo dịsẹ dẹịn agbẹị a? Tetuu a?

Psalm 119:97 Goo dá, mị biibịbị kẹrị ẹrẹtei:

• Teeki biin kịmịama mịẹ Bible akị zịnị bẹẹlịama a gẹẹ kịmịsẹ pịrị mụ duonị anị ụndụbo akị akpotu a tụa ma o?

6. Bible kịmịsẹ kị nana agbẹị emi fun

Bible kị akpọyọrọịsẹ biin dẹịn bẹẹlịama a gẹẹ bá kịmịama nana dẹịn emi fun. Acts 10:34, 35 goo dá, mị biibịbịmọ kẹrị ẹrẹtei:

• Ọkpọnanaowei tetuu kị duonị Bible akị biin bẹẹlịama a gẹẹ bá biin kịmịama Bible nana dọụ emi a o?

• Bible gbelemọ yọbị teeki ị́ dịsẹ dẹịn emi a o?

KỊLỌỌBARA

Bible bị Ọkpọnanaowei egberi, má kịmịsẹ Bible nana kị ụ mọ dọụ emi.

Waị diitụa

• Ọkpọnanaowei tebara ka kị wo yalịyalị tẹmẹ bị akị kịmịama pịrị wẹrị Bible gẹẹ ma o?

• Kịmị awọụ laa Bible kekere, Bible bo kịmịsẹ laa, bá waị akị bẹẹlịama gẹẹ dẹ yọmị tebara ka kị ịné tọrụkẹrị ma o?

• Ọkpọnanaowei ị́ mọ mó ẹrẹ dọụ mịnị kị duonị bei yemọsẹ mịẹ yọmị tebara ka kị ị́ gbele ma o?

DIITỤA

Bible bo paa bara bị—bọlọụ manuscriptmọ duo bo bei tịẹkiri Biblemọ laa bara bị goo.

“How the Bible Came to Us” (Awake!, November 2007)

Bible bị ụ seimọ dọụ timi tara yeama dẹịnmọ bara bị akị bei watchtower bọọ goo.

“The Bible—A Story of Survival” (The Watchtower No. 4 2016)

Kịmịama angọ akị akpotu a tụa wẹrị laa Bible akị zịnị bẹẹlịama a gẹẹ bara dọụ erị.

Amịnị Bible Diidụbamọ mị (14:26)

Bible akị biin bẹẹlịama gẹẹ dẹkị gbaa kpọ. Ị́ tebara kị mịẹ timi Ọkpọnanaowei egberi mị mọkpọ naa deigha bara nimi ma o?

“Has the Bible Been Changed or Tampered With?” (Web article)