TOLUMỌYE 20
Jehovah Ụ Karị Mịnị Kịmịbo Akị Kẹnị Bẹnịmọ Wẹrị Emi Bara Bị
Jehovah agbẹị bara ka kị ye mịẹ mịnị Ọkpọnanaowei. (1 Corinthians 14:33) Anị duonị gesii bara akị ụ karị mịnị kịmịbo kpọ agbẹị bara ka kị ye mịẹ mịnị. Ọkpọnanaowei itu bị tebara ka kị ye mịẹ mịnị a o? Wó kpọ teeki mịẹ dẹkị itu bị laa kụrọtimi mịnị a o?
1. Te ụbọ kị karịitu bị daa mịnị a o?
“Jesus Christ kị itu daa wẹrị emi.” (Ephesians 5:23) Jehovah, ọgọnọ kị duo wo kịmịbo mịẹ mịnị yebosẹ kẹrịmọ mịnị. Jesus “peibolou nana kịlịkịlị odubo-owei bị” sẹlẹ mị—biingha má kaasụọdẹ itu kosuotuama, anị Governing Body mị. (Matthew 24:45-47 goo.) Bọlọụ kụraị sọnran-sii bị, Jerusalem bọọ timi fịrịmọpaa-otubo mọ má itu-kosuotu mọ kị Ọkpọnanaowei fịrị wẹnị agbẹị emi bara gbaatimi mị, bịsẹ kpékẹnị bara mị, bei tịẹkiri Governing Body kị Ọkpọnanaowei karị agbẹị emi bara gbaa akị ọkpọyọrẹị bọọ emi itubosẹ pịrị mịnị. (Acts 15:2) Bei bịnaotubo Jehovah ogbo tịbị-otuamagha. Amịnị ọngọ iyerimọ wẹrị Jehovah mọ Jesus mọ má Bible gbaa bara kị dii wẹrị wẹnị mịnị.
2. Itu-kosuotu itu bọọ nana wẹrị emi fịrị bị?
Itu-kosuotu, anị kasụọdẹ bịnaowei-otuama, amịnị Bible kị duo bịnaotubo kụrọmọ bá a tolumọ mịnị. Amịnị sịlị akị a gbẹgha fịrị kị wẹnị mịnị. Mọabịkpọ, amịnị “angọsẹ kị paamọ wẹrị Ọkpọnanaowei karị mịnị; amịnị angọ kị tụa bei firi wẹnị mịnị, agọnọ benigha.” (1 Peter 5:1, 2) Zụa bịnaotu itu-kosuotubo gbelemọ fịrị wẹnị mịnị, alaghatimi, amịnị kpọ bo itu-kosuotuama a paa mịnị.
Governing Body kị teree diiowei sẹlẹ mịnị. Bei bịnaotubo kị itubo dii wẹrị kụrọmọye pịrị bá mịẹ agbẹị ye gbaa mịnị. Teree diiowei kị Bible gbaa yọ diitụa wẹrị, bịsẹ bara dii wẹnị mịnị bịna-otu akị itu-kosukịmị anịghakpọ a gbelemọ fịrị wẹnị kịmị sẹlẹ mịnị.—1 Timothy 3:1-10, 12; Titus 1:5-9.
3. Jehovah Iseriotubosẹ te mịẹmọ agbẹị ye kị nana wẹrị emi a o?
Itu bọọ emi bịnaotubo, kịmịsẹ ọngọ tụa kingdom hall bọọ mịẹ mịnị yebo mịẹ, bá egberi gbaa fịrị bọọ iné laa mịẹ mụ yọ mịẹ mịnị ifiesẹ “Jehovah ẹrẹ́ dụbamọ mịnị.”—Psalm 148:12, 13 goo.
EBIBARA TUUDỌỤ
Jesus akị kịmịotu daa mịnị bara, itu-kosuotu Jesus daa mịẹ mịnị bara, bá wó laa ebibara akị Jesus mọ itu-kosuotubo mọ wẹnị gbelei a paa emi bara dọụ ẹrị.
4. Jesus ebibara ka kị kịmịotu daa mịnị
Jesus wó tịịn mịnị. Matthew 11:28-30 goo dá, bei biibịbị kẹrị ẹrẹtei:
Omịnị tebara ka kị Jesus wó daa mịnị bara diimọ agbẹị emi a o?
Itu-kosuotu tebara ka kị Jesus daa mịẹ mịnị a o? VIDIO farị.
Bible itu-kosuotu anị fịrị wẹnị mú bara gbaa gaan wẹrị emi.
Isaiah 32:2, bá 1 Peter 5:1-3 goo dá, bei biibịbịmọ kẹrị ẹrẹtei:
Itu-kosuotu Jesus daa mịẹ wẹrị, ọngọtụa, kịmịama mịẹ bolouịmbẹlẹmọ mịnị bara mị tebara ka kị ị́ gbele ma o?
Itu-kosuotubo mọkpọ tebara ka kị Jesus daa mịẹ mịnị a o?
5. Itu-kosuotu anị inyenrinbụọmọ ka kị tolumọye pịrị mịnị
Itu-kosuotu tebara ka kị anị fịrị diimọ kị Jesus mọ dọụ wẹrị emi a o? VIDIO farị.
Itu-kosuotu akị itu kẹrịmọ mịnị barasẹ Jesus mọ mịẹ koromọ a pịrị dẹ. Matthew 23:8-12 goo dá, bei biibịbị kẹrị ẹrẹtei:
Ị́mịnị karịbụọtịbị-otu diimọ wẹrị emi bara mọ bá Bible itu-kosuotu timi agbẹị emi bara gbaa wẹrị emi bara mọ teeki iné angọ a sụọ dẹịn ma o?
Itu-kosuotu anị ọngọbo mọ má anị warị mọ mịẹ tẹmẹanga bọọ tịẹ-kụrọ mịnị
Itu-kosuotu itu bọọ emi kịmịbosẹ kị kekere mịnị
Itu-kosuotu ifiebosẹ egberi gbaa yọ ghọ mú mịnị
Amịnị kịmị tolumọ fịrị wẹnị mịnị. Má zini fịrịama kpọ wẹnị mịnị, gbaamaba yọ tọlọmọ
6. Omịnị laa itu-kosuotubo mọ wẹnị gbelei mịnị
Bible omịnị itu-kosuotumọ wẹnị gbelei agbẹị emi tuu gbaa wẹrị emi. Hebrews 13:17 goo dá, bei biibịbịmọ kẹrị ẹrẹtei:
Tetuu kị duonị Bible omịnị ifiemọsẹ gbaa bara dii wẹnị bá ọngọ iyerimo itu-kosuotu pịrị bara gbaa bị, agbẹị emi a? Ị́mịnị tebara ka kị bei yebi diimọ wẹrị emi a o?
Luke 16:10 goo dá, bei biibịbịmọ kẹrị ẹrẹtei:
Tetuu kị duonị omịnị dụba kagha ye kpọ itu-kosuotu gbaa bara kị dii wẹnị agbẹị a o?
ZỤA KỊMỊAMA GBAA MỊNỊ: “Ị́mịnị karịbụọ a sụọgha kpọ seigha.”
Itu mọ gbelei Ọkpọnanaowei karị yọmị tetuu kị duonị ebi emi bara kị ị́ mọ tọn ma o?
KỊLỌỌBARA
Jesus kị itu daa mịnị. Itu-kosuotu Jesus gbaa bara kị dii wẹnị mịnị anị duonị amịnị wó kụrọmọ bá wó tolumọ mịnị, omịnị ebibara akị a mọ mọ́ wẹnị gbelei.
Waị diitụa
Te ụbọ kị Ọkpọnanaowei karị mịnị itu daa mịnị a o?
Itu-kosuotu tebara ka kị baratụa itu pịrị mịnị a o?
Jehovah karị mịnị kịmịsẹ te wẹnị agbẹị fịrị kị nana wẹrị emi a o?
DIITỤA
Governing Body mọ má itu-kosuotubo mọ bịnaotubo tarị kụrọ wẹrị emi bara dọụ ẹrị.
Wó Fịrị Tịẹmọ Wẹrị Emi Yọ Ghọ Inyenrin Mịnị Bịnaotubo Kụrọmọ Mịnị (4:22)
Teree diiotu wẹnị mịnị fịrị fịrị dọụ ẹrị.
Ereotu itu bọọ wẹnị mịnị fịrị goo ẹrị.
“Do Jehovah’s Witnesses Have Women Ministers?” (The Watchtower, September 1, 2012)
Itu-kosuotu angọ tụa bịnaotubo kụrọmọ mịnị bara dọụ ẹrị.
“Christian Elders—‘Fellow Workers for Our Joy’” (The Watchtower, January 15, 2013)