TOLUMỌYE 54
“Peibolou Nana Kịlịkịlị Odubo-Owei” Wẹnị Mịnị Fịrịbo
Itu mị Jesus kị tịbịowei. (Ephesians 5:23) Jesus bei tịẹkiri mị, agọnọ ka timi mị kiriogbo bọọ “peibolou nana kịlịkịlị odubo-owei” kọn wo tuuduo-otubo daawẹnị mịnị. (Matthew 24:45 goo.) Jesus kị bei “odubo-owei” sẹlẹ mị bá iroro tọn pẹlẹ kụrọ kpọ akị ụ pịrị mị. Bịsẹ bara kị gbaa kpọ, mị odubo-owei bi Christ gbaa bara kị mịẹ mịnị, bá fịrịwẹnị Christ bịnaotubo pịrị mịnị. Te ụbọ kị bei odubo-owei mị a o? Mị odubo-owei mị tebara ka kị wó kekere mịnị a o?
1. Te ụbọ kị “peibolou nana kịlịkịlị odubo-owei” a o?
Jehovah ifiemọsẹ kẹnị kịmị anịghakpọ kala kịmị-ekpudu kọn ụ karị mịnị kịmịbo daawẹnị mịnị. (Malachi 2:7; Hebrews 1:1) Jesus fiidẹ bi, fịrịmọpaa-otumọ bá Jerusalem bọọ emi kosuotubo kị bọlọụ daá mị. (Acts 15:2) Bịsẹ kpékẹnị bara kị, mị ifie kpọ, kala itu-kosuotu ekpudu kị Jehovah mọ kọn ụ karị mịnị kịmịbo daawẹnị mịnị. Jehovah Iseriotubo bei kịmị ekpudu mị akị—Governing Body kị tịịn mịnị—bei kịmị ekpudu kị tẹmẹ-anga fịyaịbo mịẹ paamọ mịnị bá egberigbaa fịrị kpọ a bọlọụ daa mịnị. Mị kala kịmị ekpudu kị “[Jesus] sẹlẹdẹ peibolou nana kịlịkịlị odubo-owei bi.” (Matthew 24:45a) Governing Body bọọ emi kịmịbosẹ yalịyalị tẹmẹ pịrị sẹlẹdẹ Christtuuduo-otuama, amịni fịị daba, agọnọ a mú Christ mọ daámụ ukiemọye nanawẹrị emi.
2. Tẹmẹ anga fịyaịbo nẹ peibolou nana kịlịkịlị odubo-owei mịẹ paamọ mịnị yaịbo tebara kị emi a o?
Jesus gbaa amọ bei peibolou nana kịlịkịlị odubo-owei mị “agbẹị ifie kọọ fịyaị akị a [timitimi Christtuuduo-otu] pịrị mịnị.” (Matthew 24:45b) Kịmị fịyaị fịị daba laa angọ kụrọ bá kpa dọọngha bara mị, tẹmẹ anga fịyaịbo—anị Ọkpọnanaowei egberibo—baratụa wó pịrị wẹrị Jehovah mọ kpẹkpẹrẹẹtimi bá peibolou nanawẹrị Jesus akị wó pịrịdẹ fịrị wẹnị mịnị. (1 Timothy 4:6) Omịnị wó yetolumọyo, kalaete bẹnị, opubẹnịị, Bible gbelemọ funbo mọ, bá vidio bo mọ kị duo tẹmẹ anga fịyaịbo nana mịnị. Bei yebosẹ baratụa wó pịrị wẹrị Ọkpọnanaowei dọụyebo a sụọtuu nimi mịnị, bá Ọkpọnanaowei mọ naịn dẹịn mịnị.
EBIBARA TUUDỌỤ
Omịnị “peibolou nana kịlịkịlị odubo-owei”—Governing Body nana agbẹị emi tuu dii.
Governing Body tẹmẹ-anga fịyaị mịẹ, mịẹmụ ye gbaa, bá baratụapịrịye kọn Jehovah Iseriotubosẹ pịrị mịnị
3. Jehovah kịmịbọ zọzọ kị naá wẹnị mịnị
Jesus Governing Body fịrịmọ wẹrị, Jehovah Iseriotu wẹnị mịnị fịrị bị kekere mịnị. Bọlọụ Christtuuduo-otu ifie kpọ bịsẹ bara kị mịẹtimi mị. VIDIO farị.
Wẹrị 1 Corinthians 14:33, 40 goo dá, bei biibịbị kẹrị ẹrẹtei:
Bei gooyọbo tebara ka kị, Jehovah wo Iseriotumọ galaba galaba bara akị ye mịẹmụ yọ dọụgha bara mịẹdịa ma o?
4. Kịlịkịlị odubowei kị egberigbaa fịrị bị kẹrịmọ mịnị
Bọlọụ Christtuuduo-otubo ifie bi, egberigbaa fịrị kị yelaa dẹịn mị. Acts 8:14, 25 goo, dá bei biibịbịbo kẹrị ẹrẹtei:
Bọlọụ Christtuuduo-otu ifie mị, te otu ki egberigbaa fịrị bị wẹnịmụ bara gbaatimi ma o?
Peter mọ John mọ tebara ka kị Christ fịrịmọpaa-otubo gbaa a pịrị egberi kẹrị akị ma o?
Governing Body wẹnị mịnị fịrịbosẹ, egberigbaa fịrị kị yelaa dẹịn emi. VIDIO farị.
Jesus egberigbaa fịrị mị yelaa emi bara gbaa mị. Mark 13:10 goo, da mị biibịbịbo kẹrị ẹrẹtei:
Tetuu kị duonị egberigbaa fịrị mị yelaa akị Governing Body pịrị emi a o?
Tetuu kị duonị “peibolou nana kịlịkịlị odubo-owei” kị akpọyọrẹịsẹ, egberigbaa fịrị wẹnịmụ bara gbaa agbẹị emi a o?
5. Kịlịkịlị odubo-owei kị mịẹmụ bara gbaa mịnị
Governing Body kị mịẹmụ bara gbaa akị Christttuuduo-otubosẹ pịrị mịnị. Governing Body tebara ka kị laa mịẹmu bara tọn paamọ mịnị a o? Bọlọụ Christtuuduo-otu governing body mị, mịẹtimi bara dii. Acts 15:1, 2 goo da, bei biibịbịbo kẹrị ẹrẹtei:
Te zọzọ nagha yọ kị bọlọụ Christtuuduo-otu ovuru bọọ paa ma o?
Paul, Barnabas, bá zịnịotu mọ, te otu kị laa wẹrị mị zọzọ nagha ye kẹrị tịẹmọ ma o?
Acts 15:12-18, 23-29 goo dá, bei biibịbị kẹrị ẹrẹtei:
Christtuuduo-otumọ ifie bị, governing body iroro tọn dọụ mịnị ifiesẹ, tebara ka kị Jehovah baratụapịrịye dọụtimi ma o?—Gooyọ 12, 15, má 28 dii.
Acts 15:30, 31 má 16:4, 5 goo dá, bei biibịbịmọ kẹrị ẹrẹtei:
Bọlọụ Christtuuduo-otubo, governing body mịẹmụye gbaa a pịrị daba, amịnị tebara kị mịẹ ma?
Gbaaye pei duonị, Jehovah te tarịama ka kị a pịrị ma o?
Wẹrị 2 Timothy 3:16 má James 1:5 goo dá, bei biibịbị kẹrị ẹrẹtei:
Governing Body bei tịẹkiri mị iroro tọnpẹlẹ dọụ mịnị aba, te ụbọ kị duo baratụapịrịye bii mịnị a o?
ZỤA KỊMỊAMA GBAA MỊNỊ: “Ị́mịnị Governing Body kị pei mịnị aba, ị́mịnị kịmịawọụ ka tuuduo mịnị.”
Tetuu kị duonị, Jesus kị Governing Body daá mịnị bara ị́ mọ pei ma o?
KỊLỌỌBARA
Christ, Governing Body kị sẹlẹ akị “peibolou nana kịlịkịlị odubo-owei” a paa de. Amịnị kị fịrị kẹrịmọ bá tẹmẹ-anga fịyaị kọn akpọma emi Christtuuduo-otubosẹ pịrị mịnị.
Waị diitụa
Te ụbọ kị “peibolou nana kịlịkịlị odubo-owei” sẹlẹ ma?
Governing Body tebara ka kị wó kekere mịnị a?
Governing Body kị “peibolou nana kịlịkịlị odubo-owei” bara ị́ kpọ mọ pei wẹrị emi a?
DIITỤA
Governing Body zọzọ naa wẹrị fịrịwẹnị mịnị bara dii.
“What Is the Governing Body of Jehovah’s Witnesses?” (Web article)
Governing Body mịẹ dẹkị kịrịị tolumọ yeama kọn wó pịrị mịnị bara dii.
Governing Body otubo tebara ka kị Jesus a pịrị wẹrị emi fịrị diimọ wẹrị emi a o?
Yetolumọyọ mọ opubẹnịị mọ a mú tolumọ mịnị yebo tebara ka kị Jehovah Governing Body kẹrịmọ mịnị bara mịẹdịa ma o?