Itukosuotu Baratụa Itu Duo Kọnsiindẹ Otubo Pịrịmụ Barabị

1-2. (a) Jehovah tebara ka kị boloudei dọụgha otubo dimọmịnị a o? (b) Sei mịẹmịnị otubo teeki mịẹmụ ukiemọye kị Jehovah mọ nana wẹrịemi a o?

JEHOVAH kịmịawọụ inyenrinbụọbosẹ kị kẹrịakịmịnị bara mịẹgha; Ómịnị sei golu-emi. (Ps. 5:​4-6) Omịnị ifiebosẹ Bible bọọ gẹẹtụa wẹrịemi olokobo dii wẹnị kị Jehovah mọ dọụmịnị. Omịnị yalịyalịgha duonị, omịnị laa ebibara akị wo gbaa yebosẹ mịẹgha fa bara Jehovah mọ nimi wẹrịemi. (Ps. 130:​3, 4) Mọabịkpọ ‘Ọkpọnanaowei esiingha otubo Ọkpọnanaowei akị kịmịawọụ pịrịdẹ fomuunbị akị gbaịnmọ wẹrị buzegha bara sei yeama mịẹmịnị.’ Jehovah benbene bịsẹ mịẹmịnị yebo dịsẹgha. (Jude 4) Anịduonị “Ọkpọnanaowei esiingha otubo” Armageddon sụụ bọọ fịịmụ bara Bible mọ gbaa wẹrịemi.—2Pet. 3:7; Rev. 16:16.

² Anịa, kẹnị ụbọ kpọ fịị Jehovah mọ dọụgha. Mị Lewarị fun bọọ wo tolumọ bụọmọdẹ egberitịbịbo, Jehovah “kịmịsẹ boloudei kị dọụmịnị” bara mịẹgaandẹ. (2Pet. 3:9) Itukosuotubo Jehovah etipou inyenrinbụọ dimịẹwẹrị, baratụa sei mịẹmịnị otubo pịrịwẹrị boloudeiwẹrị waịbo Jehovah mọ naịnmịnị. Anịa, sei mịẹmịnị otubosẹ itukosuotubo baratụapịrịye kẹrịakịgha. (Isa. 6:9) Zụayaị mọkpọ bịsẹ sei kị mịẹ bọlọụ a múmịnị. Itukosuotubo barịị barịị baratụa a pịrị kpọ, ámịnị boloudeigha. Bịsẹ bara paadaba itukosuotubo teeki mịẹmịnị a o?

“BOLOUSEI KỊMỊ BỊ AKỊ ÁNỊ OVURU DUO KỌNSIIN”

3. (a) Tebara ka kị boloudei dọụgha ụbọ mịẹ kị Bible mọ gbaa ma o? (b) Tetuu kị duonị sei mịẹmịnị oweibị, bẹtịbị kị itu duo serimụ yọ sẹlẹ angọ pịrị bara wo mọ gbaa a paaemi a o?

³ Sei mịẹmịnị kịmị boloudeighaba, Itukosuotubo 1Corinthians 5:13: bọọ gbaa wẹrịemi egberi kị dimịẹmịnị: “Bolousei kịmị bị akị ánị ovuru duo kọnsiin.” Boloudeigha sei mịẹ ụbọ kị ụ paamọ yebi sẹlẹ angọ pịrị wẹrịemi; ómịnịa wó gborowẹrị ye kị soumịnị. (Gal. 6:7) Tetuu kị duonị omịnị bịsẹ bara gbaa a paaemi a o? Bịsẹ ụbọmị itukosuotubo barịị barịị baratụa ụ pịrịwẹrị boloudeimụ yọbị kẹrịakịgha. (2Ki. 17:​12-15) Wó inyenrinbụọmị ómịnị Jehovah gbaamịnị egberibo peigha bara kị mịẹdịamịnị.—Deut. 30:​19, 20.

4. Tetuu kị duonị, itubị boloudei dọụgha ụbọ kọnsiindaba, mịẹnimimọye mịẹmịnị a o?

⁴ Boloudei dọụgha kịmịbị akị itu duo kọnsiindaba bịsẹ ụbọbị ba Jehovah Iseri-ụbọgha bara gbaa itusẹ pịrịmịnị.b Ụbọ mịẹ bụze dọụmịnị kị duonị, bịsẹ mịẹnimimọye mịẹ ma? Bịsẹ baragha. Anịa Bible gbaa bara dimịẹmụ yọ kị duonị, bịsẹ mịẹnimimọye mịẹmịnị. Bible gbaa bara didaba, bịsẹ kịmị mọ “ye mịẹ gbelei kụmọ” bá ụbọ mọ “fịyaị kpọ fị kụmọ” kị gbaamị. (1Cor. 5:​9-11) ) Jehovah ebituu kị nanawẹrị bịsẹ bara gbaa wo pịrịmị. Fịrịmọpaaowei Paul gẹẹmị: “Kala yeast kị ebebu kobudẹ flour mịẹ vudomịnị.” (1Cor. 5:6) Boloudei dọụgha ụbọmị, kọn itu bọọ wẹrịdaba, itu bọọ timi Jehovah dọụbara mịẹmịnị otubo, ámịnị Jehovah dọụbara mịẹgha kpọ seigha bara iroro a paaemi.—Prov. 13:20; 1Cor. 15:33.

5. Omịnị tebara ka kị itu duo kọnsiindẹ ubọ diimọ agbẹị-emi a o, bá tetuu a?

⁵ Omịnị tebara ka kị itu duo kọnsiindẹ ụbọ diimọ agbẹị-emi a o? Bịsẹ kịmị mị ba ukiemọye nanagha bara omịnị mọ kọn ụ diimọ kụmọ, ómịnị fa-emi anịna bara k’emi. Anịna ụwọụ bụọdaba waịbo a paaemi. Bịsẹ fadẹ anịna kpọ angọdịẹpaamọ Jehovah pịrị bara omịnị mọ ukie. Anịa kịmị mịẹ bolouịmbẹlẹmọgha yọbị, tịẹkịrịmị ómịnị angọdịẹpaamọ Jehovah pịrị ifiebị, wó gbaa wẹrị yebo mịẹ beinmọgha. Bịsẹ yọ kị ụ mịẹ akpotu bolou a sụọdẹ (Ezek. 18:31) Mọabịkpọ, Jehovah mọkpọ dieneni mịẹdịamịnị duonị, bịsẹ kịmịbị waịbo a paaemi ukiemọye wo mọ nana wẹrịemi. Itu-kosuotu tebara ka kị bei ukiemọye mịẹpaamọ itu duo kọnsiindẹ kịmịbo pịrị a paaemi a o?

ITUKOSUOTU BARATỤA ITU DUO KỌNSIINDẸ OTU PỊRỊMỊNỊ BARAMỊ

6. Itukosuotu tebara ka kị baratụa itu bọọ kọnsiindẹ otu pịrị a paaemi a o?

⁶ Itu bọọ kịmị kọnsiindaba, itukosuotubo baratụa bịsẹ ụbọ pịrịwẹrị waịbo Jehovah karị kụmọ kị gbaamịnị a? Bịsẹ baragha! Itukosuotubo itu duo ụbọ kọnsiinmụ bara gbaa ụbọ pịrịmịnị ifiemị, ụbọmị, mịẹdẹ kị waịbo Jehovah Iseri-ụbọ a paamụ bara kpọ gbaa ụ pịrịmịnị. Anịa itukosotubo mọkpọ zịnị ye mịẹmịnị. Ụbọbị bọụ wẹrịemi aba, zụa agọnọwei-ama bụọdaba ámịnị mọkpọ waị ụ mọ mọ gbeleiwẹrị wó boloudeide bara nimi dọụmịnị bara gbaa ụbọ pịrịmịnị. Ụbọmị biberin wẹrịemi aba, zụa agọnọwei-ama bụọdaba, itukosuotubo waị mú ụbọ laawẹrị waị Jehovah dọụbo bara akị ụ kụrọmọmịnị. Ụbọbị bịsẹ ifiebị mọkpọ naa boloudeigha aba, itukosuotubo waị zịnị ifie mịẹpaamọwẹrị waị mú ụbọ kụrọmọmịnị.

7. Itu duo kịmị kọnsiindaba, itukosuotubo tebara ka kị Jehovah dieneni nana inyenrinbụọ dimịẹ a paaemi a o? (Jeremiah 3:12)

⁷ Itukosuotubo Jehovah dieneni nana inyenrinbụọ kị dimịẹwẹrị bịsẹ akị itu duo kọnsiindẹ ụbọ mọ inyenrinmịnị. Gbaamaba Jehovah korutimi Israel-otubo boloudeidẹ kị baratụa á pịrịmụ bara mịẹgha. Anịa ámịnị naa ánị sei inyenrinbụọbo deighatimi Jehovah wó bụrụ-otubo fịrịmọ mú baratụa a pịrịmị. Bei lewari fun bọọ maamụkaramọ egberitịbịmị, Jehovah gbaa Hosea pịrịmị, ụ taa mọkpọ sei mịẹmịnị kị gbaa kpọ, ómịnị wai mú á mọ mọ́ zọzọnaa. Jehovah Hosea mịẹye ka kị wó nana wẹrịemi dieneni mịẹgaan paamọmị. (Hos. 3:1; Mal. 3:7) Itukosuotubo kpọ Jehovah mịẹ bara kị dimịẹwẹrị baratụa sei mịẹmịnị ụbọ pịrịwẹrị waị itu bọọ bomụ yọmị á dịsẹ-emi, anịduonị bịsẹ ụbọbị waị itu bọọ bomụ yọbị ámịnị mọ mịẹ kụrọmọ ụ pịrịgha fa.—Jeremiah 3:12 goo.

8. Jesus tụa kabụbị tebara ka kị Jehovah dieneni nana wẹrịemi bara mịẹdịa ma o? (Luke 15:7)

⁸ Bei lewari funbị, maamukaramọ egberitịbịmị Jesus daụ warị duo serii tọbọụ kabụbị tụamị, wo wẹrị waị bịsẹ kabụ ditụa. Daụbị wo tọbọụ bị ẹrị ifiemị omịnị ”‏baịn mú ụ gbẹịnmọ wẹrị wo ọtụtụmị.” (Luke 15:20) Daụbị tọbọụmị ụ tẹẹdẹ kị tọbọụ kẹrịakị bara mịẹgha, daụ kị baịn mú tọbọụ laamị. Tarị nana wẹrịemi daụ bịsẹ bara kị mịẹmịnị. Anị Jehovah mịẹmịnị baramị, itukosuotubo kpọ angọtụa Jehovah dimịẹwẹrị bịsẹ bara kị mịẹmịnị. Wẹnị faadẹ anịnamị “waịbo kị ámịnị mọ dọụmịnị.” (Luke 15:​22-24, 32) Bịsẹ ụbọ boloudei wẹrị waị itu bọọ bodaba agọnọ mị bolouịmbẹlẹmịnị, kiriogbo kpọ bolouịmbẹlẹmịnị!—Luke 15:7 goo.

9. Sei mịẹmịnị otubo teeki mịẹ kị Jehovah mọ dọụ wẹrịemi a o?

⁹ Bei egberitịbị bị, Jehovah boloudei dọụgha otubo akị itu bọọ wẹrị dọụgha bara kọn wo tolumọdẹ. Mọabịkpọ, Jehovah baratụa á pịrịwẹrị waị itu bọọ bo kị dọụmịnị. Hosea 14:4 bị, Jehovah akị boloudeidẹ otubo dimọ wẹrịemi bara gbaa wẹrịemi. Yọbị gbaamị: “Ịmịnị ánị peibolou nanagha inyenrinbụọ kọnsiinmịnị. Ịmịnị adụdụ duo á tarịmịnị, anịduonị ịmịnị bá boloukọn á pịrịgha fa.” Jehovah bei gbaa egberibị baratụa itukosuotu pịrịwẹrị angọtụa, sei mịẹdẹ ụbọ boloudeimịnị baramị leleipẹlẹ wẹrị baratụa ụbọ pịrị agbei-emi. Mị Bible yọmị, mọkpọ Jehovah a barasindẹ otubo kụrọmọwẹrị saramọ waị Jehovah dọụ bo agbẹị-emi.

10-11. Itukosuotu tebara ka kị baratụa itu bọọ kọnseri wẹrị biin kụraịama baịdẹ kịmịama pịrịmịnị a o?

¹⁰ Itukosuotubo tebara ka kị baratụa itu duo kọnsiinwẹrị biin kụraịama baịdẹ otubo pịrị a paaemi a o? Kaanghaba bịsẹ otubo ba anị mịẹwẹrị itu duo á kọnsiin seibo kpọ mịẹgha? Zụa otuama ba ánị mịẹwẹrị sei kpọ ukiegha. Itu duo ụbọ kọnsiinwẹrị biin kụraịama bụọdẹ kị gbaa kpọ, itukosuotu bei kịmịbo dọụwẹrị baratụa á pịrịmịnị. Itukosuotubo bịsẹ otu warịbo amúdaba, á mọ mọ́ tẹẹbịbị mịẹ, bá waị ituma bomụ akị á kụrọmọ. Tamanaịnyọ fa baramị itu bọọ ụbọ kọnsiinwẹrị biin kụraịama bụọdẹ duonị, ụbọbị tẹmẹ-anga bọọ suusụọdẹ. Ụbọmị waị itu bọọ bomụ dịsẹ nana wẹrịemi aba, naa waị ụbọ tịịn itu bọọ bogha kị gbaa kpọ, itukosuotubo ituma kịmị mọ gbaa pẹlẹwẹrị mú ụbọ mọ Bible tolumọ. Itukosuotubo bẹtịbị kị ụbọ mọ Bible tolumọmụ kịmị sẹlẹmịnị.

¹¹ Jehovah dieneni nana bara dimịẹmịnị duonị, itukosuotubo angọtụawẹrị baratụa biin kịmịama pịrịwẹrị waị itu bọọ bomịnị. Sei mịẹtimi kịmị sei a barasiin wẹrị boloudeidaba, ifie faamọgha bara waị ụbọ tịịn itu bọọ bo.—2Cor. 2:​6-8.

12. (a) Itukosuotubo kịmị tịịn waị itu bọọ bomịnị aba, te ifieama kị ebibara yebị ditụa agbẹị-emi a o? (b) Tetuu kị duonị omịnị zụa kịmịama benebene Jehovah dieneni laa akịgha fa bara iroro agbẹịgha a o? (Footnote kpọ dii.)

¹² Itukosuotubo zụa ifieama ebibara yebị ditụadẹ kị waị ụbọ tịịn itu bọọ bo agbẹị-emi. Gbaamaba ụbọbị kalatọbọụ sọnlọ, anịghakpọgesii gbaseimọ bá aritụawẹrị taa anịghakpọ yei a barasiindẹ ụbọ ka paaemi aba, itukosuotubo ụbọbị kọkọ boloudeidẹ bara nimipẹlẹdẹ kị waị ụbọ tịịn ituma bo. (Mal. 2:14; 2Tim. 3:6) Itukosuotubo ebibara itu kekere. Mọabịkpọ, kịmị gerede bara boloudeiwẹrị wó mịẹtimi seibo a barasindaba, Jehovah waị bịsẹ ụbọ kẹrịakịmịnị baramị wo mọ nimi agbẹị-emi. Bịsẹ kịmịbị kụrọsei kị mịẹ kịmịotu a bụọ wẹrịemi kpọ Jehovah dieneni mị ba ụbọ laagha fa bara itukosuotubo mọ gbaa kụmọ. Benebene gbaa kụmọc—1Pet. 2:10.

ITU MỊẸMỤYE

13. Omịnị te bẹbẹ bara ka kị zezemọye laaemi ụbọ mọ, bá itu duo kọnsiindẹ ụbọ mọ inyenrin agbẹị-emi a o?

¹³ Wo tolumọ bụọmọdẹ egberitịbịmị, kịmị zezemọdẹ mịẹnimimọye gbaa itu pịrịdaba, bịsẹ ụbọbị boloudeidẹ duonị, omịnị mọkpọ ụbọ mọ yemịẹ gbelei a paaemi bara ka kị wo tolumọmị. (1Tim. 5:20) Ụbọbị mọkpọ wo bịna ụbọ, anịduonị omịnị ifiebosẹ ụbọ kụrọmọwẹrị wó mịẹ seima barasinmịnị. (Heb. 10:​24, 25) Anịa, zezemọ wẹrịemi ụbọ mọ itu duo kọnsiindẹ ụbọ mọ bẹbẹ paaemi. Omịnị itu duo ‘kọnsiindẹ ụbọ mọ yemịẹ gbeleigha fa’ bá ‘ụ mọ mó fịyaị kpọ fịgha fa.’—1Cor. 5:11.

14. Itu duo kịmị kọnsiindaba, wosẹ tebara ka kị wo ye-iroro-agbamị akị ụbọ mọ inyenrinmụ bara tọnpẹlẹ angọ pịrị a paaemi a o? (Foto kpọ dii.)

¹⁴ Omịnị 1Corinthians 5:11 bọọ tolumọyemị, omịnị itu duo kọnsiindẹ ụbọ tịịn yetolumọyọ a bo anịghakpọ ụbọbị yetolumọyọ a bodaba ụbọ kule kụmọ bara kị gbaamịnị a o? Bịsẹ bara gbaagha. Gbẹsịmị, omịnị ụbọ mọ zoru gbeleigha fa. Anịa, ụbọbị wo warị kịmị anịghakpọ wo ikie-ụbọ ka paaemi aba Christtuuduo-kịmị wó ye-iroro ịkịọụ kị diwẹrị ụbọ tịịn yetolumọ a bomụ yọ tọnpẹlẹ angọ pịrịmịnị. Bịsẹ ụbọmị yetolumọyọ a bodaba, omịnị teeki mịẹ agbẹị-emi a o? Bụọdẹ ifiemị, omịnị bịsẹ bara kịmịbo kulegha timimị. Anịa wo kịmịsẹ wo Bible bọọ tolumodẹ yebo kị diwẹrị wo mịẹmụye tọnpẹlẹ angọ pịrịmịnị. Zụa otu bolouịmbẹlẹ bara ụbọ kule kpọ paaemi. Anịa, omịnị ụbọ mọ yemịẹ gbelei bá ẹrẹteitimi alaa kụmọ.

15. Bible bị 2John 9-11 te paa kịmịama kị gbaa wẹrịemi a o? (“John Mọ Paul Mọ kpekẹnị Sei Ka Tuugbaamịnị A?” ekpedi dii.)

¹⁵ Zụa otu bii kpọ paaemi, ‘Bible bị omịnị ụbọ kuledaba, ụbọ mọ wó seibo mịẹmịnị bara kị gbaa wẹrịemi kị tọn?’ (2John 9-11 goo.) Bei Bible yọbị, itu duo kọnsiinwẹrị gesii gbaseimọmịnị kịmịbo mọ bá ịkịsatụa sei inyenrinbụọ wasamọmịnị otubo kị gbaamịnị. (Rev. 2:20) Anịduonị angọtụa gesii gbaseimọ bá ịkịsatụa sei inyenrinbụọ wasamọmịnị kịmịsẹ, itukosuotu mú bịsẹ ụbọ laagha fa. Anịa, ụbọ waịbomụ ukiemọye omịnị mọ nana wẹrịemi. Bịsẹ bara kị gbaa kpọ, ụbọ naa deighasẹ omịnị ụbọ kulegha fa bá ụ tịịn yetolumọyọ kpọ a bogha fa.

JEHOVAH DIENENI NANA INYENRINBỤỌ DIMỊẸ

16-17. (a) Sei mịẹmịnị otu teeki mịẹ kị Jehovah mọ dọụ wẹrịemi a o? (Ezekiel 18:32) (b) Itukosuotubo baratụa sei mịẹdẹ kịmị pịrịmịnị ifiesẹ, ámịnị tebara ka kị Jehovah mọ gbelei fịrịwẹnịmịnị bara mịẹdịa a paaemi a o?

¹⁶ Mị sọnran egberitịbịbo te ka kị wo tolumọdẹ a o? Kẹnị ụbọ kpọ fịị Jehovah mọ dọụgha! (Ezekiel 18:32 goo.) Sei mịẹmịnị otubosẹ boloudeidá waị ụ dọụ bo kị Jehovah mọ dọụmịnị. (2Cor. 5:20) Anịkịduonị bụrụ-otubo ifiesẹ, Jehovah wó a barasiindẹ otubo mọ bá zịnị sei mịẹmịnị otubo mọ boloudeidá waị ụ dọụ bo bara gbaamịnị. Itukosuotubo Jehovah mọ kẹnịwẹnịmọdá sei mịẹmịnị otubo kụrọmọwẹrị waị Jehovah dọụ bo mụ fomuun nana wẹrịemi.—Rom. 2:4; 1Cor. 3:9.

¹⁷ Sei mịẹmịnị kịmị boloudeidaba Jehovah mọ angel-otubo mọ bolouịmbẹlẹmịnị! Jehovah anịnabo kẹnị kị waị itu bọọ bo kpọ, wo agọnọ Daụ Jehovah, bolouịmbẹlẹ kụrọmọmịnị. Omịnị pẹlẹgha bara Jehovah dieneni mọ bá wo laa agbẹịgha fomuun kọn wo pịrịmịnị bara mọ kẹrị irorodaba, baratụa wo pịrịwẹrị wo akị Jehovah a nana wẹrịemi tarị mịẹ kụrọmọ dẹịnmịnị.—Luke 1:78.