“Egberi Kẹrị Mịẹmịnị Kịmịama Ka Paa”

1-2. Teeki Jehovah karịmịnị kịmịbọ mịẹ pọwẹị nanamịnị a o? (James 1:​22-25)

JEHOVAH mọ wó Tọbọụ mọ omịnị ifiebosẹ bolouịmbẹlẹ timi kị dọụmịnị. Psalm 119:2 gẹẹ owei mị bara kị gbaa mị: “Bolouịmbẹlẹ wó ukiemọyebo dii wẹnịmịnị otubo mọ, bá ánị adụdụbosẹ akị wo dọụmịnị otubo mọ laa.” Jesus kpọ gbaa mị: “pọwẹị Ọkpọnanaowei egberi naá bá mịẹmịnị otubo laa!”—Luke 11:28.

² Omịnị Jehovah karịmịnị duonị, bolouịmbẹlẹmịnị kịmịama ka paaemi. Tetuu a o? Biin tuama k’emi, kẹnị yelaa tuu anị omịnị ifiebosẹ Ọkpọnanaowei egberi goo bá wo goodẹ yebo akị tụa inyenrinmịnị.—James 1:​22-25 goo.

3. Omịnị Bible duo goodẹ yebo akị tụa inyenrinmịnị yọmị tebara ka kị baratụa wo pịrịmịnị a o?

³ Omịnị “egberi kẹrị mịẹmịnị” otu a paa daba, biin arereama kị wo laamịnị. Gbaamaba, omịnị wo goomịnị yebo akị tụa inyenrin daba, Jehovah mịẹ pọwẹị nana mịnị. Omịnị Jehovah mịẹ pọwẹịmọ daba, wo kpọ pọwẹị nanadẹ. (Eccl. 12:13) Omịnị Ọkpọnanaowei egberi duo tolumọmịnị yebo akị tụa inyenrin daba, wo warịbolou kpọ kịmịsẹ pọwẹị nana mịnị bá itu bolou kpọ ebi ikieotuama nana dẹịn mịnị. Bịsẹ yọ kị bụọmọ kpọ, Jehovah olokobo dii wẹnịgha otubo laamịnị bụụdọọnyebo ba wo laagha fa. Bịsẹ bara akị ị́ paamọdẹ kpọ paaemi. Wo kpọ Pẹrẹowei David gbaa egberi biberin wẹrịemi. David duma tuuntimi ifiebị, ómịnị Jehovah oloko mọ, bá ụgụla pẹlẹmịnị bara mọ akị tụa duma tuun mị, kunumọ bị David gbaa mị: “Bei yebo dii wẹnịmịnị yọmị, opu arere k’emi.”—Ps. 19:​7-11.

4. Tetuu kị duonị Bible duo gọọdẹ yebo mịẹmu yọmị zụa ifieama kụrọemi a o?

⁴ Gesii bara mị, omịnị Ọkpọnanaowei egberi goo ba kọn tụa inyenrinmụ yọmị ifiebosẹ bọụbọụgha. Omịnị biin fịrịama kị nanawẹrị wẹnịmịnị kị gbaa kpọ ifie mịẹpaamọ wẹrị Ọkpọnanaowei egberi tolumọ angọ pịrị agbẹị-emi, bịsẹ bara mịẹdaba, omịnị ebibara Jehovah dọụ wẹrịemi yebo a sụọtuu nimi mịnị. Wo wẹrị baratụa wo pịrịwẹrị ifiebosẹ Ọkpọnanaowei egberi goomụ yeama ditụa. Omịnị mọkpọ baratụa wo pịrịwẹrị olomu bara wo goomịnị yebo kẹrị iroromụ yeama kẹrị ẹrẹteimịnị, bá tolumọ yebo akị tụa inyenrinmọ bara kpọ ditụa mịnị.

IFIE MỊẸPAAMỌ WẸRỊ ỌKPỌNANAOWEI EGBERI GOO

5. te yeama kị wo nana wẹrịemi ifiebi bị akị mịnị a o?

⁵ Biin Jehovah Iseriotuama ifiebosẹ fịrị kị wẹnịmịnị. Omịnị ifie mịẹpaamọ wẹrị biin tẹmẹ-anga fịrịama kị wẹnịmịnị. Anịa, wo biin otu, wo angọbo mọ bá wo warịbolou mọ gbalịmụ yọ duonị zịnị fịrịama kpọ wẹnịmịnị. (1Tim. 5:8) Biin otu ba baratụa dọọn anịghakpọ okosudẹ otu kpọ pịrịmịnị. Omịnị ebibara wo angọbo dimọ yọ kpọ ifie dọụ wẹrịemi. Bịsẹ fịrịbo kị bụọmọ kpọ, itu bọọ wẹnịmụ fịrịama emi, angọtụa egberigbaa fịrị wẹnịmụ yọ kpọ emi. Mị biin fịrịbosẹ emịaba, ị́mịnị tebara ka kị ifie mịẹpaamọ wẹrị Ọkpọnanaowei egberi goo, kẹrị iroro, bá akị tụa inyenrin a paaemi a o?

6. Ị́ kpọ tebara ka kị Bible goomu yọbị yelaaemi bara mịẹdịa mịnị a o? (Foto kpọ dii.)

⁶ “Yelaa dẹịn yebo” kịẹn daba, Bible goomụ yọ kpọ sụọemi. Anịduonị omịnị ifie mịẹpaamọ wẹrị Bible goomụ yọbị akị yelaa ye kị dimọ agbẹị-emi. (Phil. 1:10) Psalm funbị bọlọụ goo yọbị wo mọ didaba, pọwẹị nanamụ kịmị gbelemọ yọbị, mọ kị gbaa mị: “Ómịnị Jehovah oloko tarị wẹrịemi, bá dein mọ erein mọ ẹrẹ angọ pịrịmịnị bara ka kị bei olokobo goomịnị.” (Ps. 1:​1, 2) Gbaamịnị yọsẹ, omịnị ifie mịẹpaamọ wẹrị Ọkpọnanaowei egberi goo. Te ifie kị Bible goomụ yọbị ebi dẹịn-emi a o? Kịmịsẹ bẹbẹ bara kị bei biibịbị parụ mịnị. Anịa yelaa dẹịn-emi yesẹ, omịnị pẹlẹgha bara ifie mịẹpaamọ wẹrị Bible goo angọ pịrị. Victor tịịnmịnị bịnaowei gbaa amọ: “Ịmịnị pekei ifie kị ine Bible gooye mịẹmịnị. Pekei laa daba kpa serimụ yobị ị́ dịsẹgha kị gbaa kpọ, pekei mị yobosẹ mọkpọ dọọ k’emi. Ine ịkịọụ mị dọọ kị timi goomịnị.” Ị́ kpọ pekei ifie ka Bible goomịnị a? Angọ bii, ‘Bible goomụ yọmị te ifie kị ebi ị pịrị dẹịn-emị a o?’

INE GOO YEBO KẸRỊ IRORO

7-8. Teeki wo mịẹ wẹrị laa Bible goo yọ duo paamịnị ebibo nanagha kpọ paaemi a o? Ye akị tọnmọdịa.

⁷ Gesii bara mị, biin ifieama omịnị wo goomịnị yebo kẹrị irorogha ifieama paamịnị. Ị́ kpọ zụa ifieama ye goo wẹrị alaghatimi iné gooye barafa ifieama paadẹ a? Bịsẹ yemị wosẹ kị paamọmịnị. Bịsẹ yemị wo Bible gooye kpọ gbele a paaemi. Kaanghaba omịnị ereinmị wo laa goosinmọ Bible yọama tọnpẹlẹ angọ pịrịdẹ. Anị kọkọ ebi iroro. Omịnị mịẹmụyeama tọn angọ pịrị bá tọnbara kị dimịẹ agbẹị-emi. (1Cor. 9:26) Anịa, Bible goomụ yọbị ebi fịrị, anị bọlọụ anga bị. Ị́mịnị Ọkpọnanaowei egberi duo arere nana dọụmịnịsẹ zịnị wẹnịmọ fịrị emi.

⁸ Wo wẹrị bei tọnmọdịaye dii: Beni kị gborodẹ yebo mịẹ ụndụ nanamịnị. Anịa osuo barịị barịị koro dụbamọ daba, ba ebigha. Kiri bị bosubụọdẹ duonị osuo beni bị ba ebibara kiri duosọụgha fa. Anịduonị, gborodẹ yebo ba ebibara sọụgha fa. Osuo koro dụba bụọghasẹ beni mị mú kiri bolou laawẹrị gborodẹ yebo mịẹ sọụmọ mịnị. Bịsẹ bara kị, omịnị kpọ Bible goomịnị ifiesẹ izoukụmọ, omịnị ebibara wo goomịnị yebo kẹrị iroro a paaemi bara ka kị goo, bá ukiewẹrị akị tụa inyenrin a paaemi bara ka kị goo.—Jas. 1:24.

9. Omịnị izoumọ izoumọ bara ka kị Bible goomịnị aba, teekị wo mọ mịẹ mịnị a o?

⁹ Ị́mịnị Bible goomịnị bị zụa ifieama izoumịnị bara ị́ mọ dọụ ẹrị daba, teeki ị́ mọ mịẹ mịnị a o? Ba izoukụmọ. Anịkị ị́mịnị goosiin daba, ebibara waị iné goomịnị yebo kẹrị iroro a paadẹ. Bịsẹ bara mịẹmụ yọbị kụrọbụọgha fa. Iné goomịnị yebo kẹrị iroromụ yọ duonị, ị́mịnị iné Bible goomịnị ifie mịẹ dụbamọ a paaemi. Ị́mịnị mọkpọ zịnịye mịẹ a paaemi. Biingha Bible yọama kị goo, anịkị ị́mịnị ifie nanawẹrị waị iné goomịnị yebo ditụadẹ. Bọlọụ anga bọọ tịịnwẹrị bịnaowei bị, Victor gbaa mị, “Ịmịnị ine Bible gooye mịẹ dụbamọgha, kẹnị tịbịyọ bẹtịbị kị goomịnị,” Victor mọkpọ gbaa mị, “Ịmịnị pekei kị Bible goomịnị duonị, ịmịnị bịsẹ ereinsẹ laa ine goodẹ Bible yọ kẹrị iroromịnị.” Ị́ mọ mọ́ agbẹị-emi ifie ị́ mọ sẹlẹ daba, ebibara goomịnị yebo asụọtuu nimimụ yọ duonị izougha bara ka kị goo.—Ps. 119:97; “Kẹrị Iroro Agbẹị-emi Biibịbịama Ekpedi dii.”

10. Iné tolumọmịnị yebo akị tụa inyenrinmụ bara bị tọnmọdịa. (1Thessalonians 5:​17, 18)

¹⁰ Ị́mịnị pekei, buburu, ifie dọlọ, anighakpọ dụba ifie ka kị Bible goomịnị kị gbaa kpọ, goodá ebibara iné goomịnị yebo akị tụa inyenrinmụ bara kẹrị iroro. Kẹnịyọ ị́ mọ goosiin daba, angọ bii, ‘Ịmịnị tebara ka kị bei tịẹkiri bị anịghakpọ bei bọlọụ bọọ bei goodẹ yebo tụa inyenrin mịnị a o?’ Gbaamaba, iné Bible gooyọ bị 1Thessalonians 5:​17, 18. (Goo.) Bei maá gooyọbo ị́ mọ goosiin daba, ị́mịnị pẹlẹwẹrị iné tẹẹbịbị mịẹmịnị ifiebo mọ bá tẹẹbịbịbo olomu-emi bara mọ kẹrị iroro a paaemi. Mọkpọ ị́ mịẹ pọwẹịmịnị yebo kẹrị iroro. Kaanghaba ị́mịnị Jehovah kulemụ tara yeama tọnpẹlẹ angọ pịrị a paaemi. Ị́mịnị ifie dọlọ ka kị iné goo yebo dịtụa kpọ, bịsẹ yọmị baratụa ị́ pịrịwẹrị Ọkpọnanaowei egberibo asụọtuu nimi bá akị tụa inyenrin a paaemi. Ị́mịnị barịị barịị bịsẹ bara mịẹdaba, ị́mịnị bo Ọkpọnanaowei mọ naịndẹịn mịnị! Bịsẹ bara mị, iné Ọkpọnanaowei egberi kẹrị mịẹmịnị yọ kpọ ebi bọlọụ dẹịnmịnị. Anịa, ị́mịnị ba biin fịrịama kị nanawẹrị wẹnịmịnị aba tebara kị ị́ mọ mịẹ mịnị a o?

MỊẸMỤYEAMA TỌN ANGỌ PỊRỊ

11. Tetuu kị duonị zụa ifieama, yebị dụba ị́ dẹịn-emi bara ị́ mọ tọn kpọ paaemi a o? Mịẹdịaye akị tụa gbaa.

¹¹ Ị́mịnị Bible goo ba akị tụa inyenrinmụ yọbị, zụa ifieama kụrọ ị́ pịrị kpọ paaemi. Wẹrị iroro dii, kaanghaba, kẹnịbaị iné goo Bịble yọbị, kẹnịanga kpọ sụọkụmọ egberitịbị kị gbaa wẹrịemi. (Jas. 2:​1-8) Ị́mịnị zịnị otumọ inyenrinmịnị bara mịẹ ebimọ dọụmịnị. Anịduonị ị́mịnị iné ụndụ bọọ zụa deiyọ-ama mịẹmụ bara tọnpẹlẹ mị. Ị́ kule agbẹị-emi! Anịa timi bo barịị erein mị ị́mịnị zịnị yọ goomị, bịsẹ gooyọ mị, angọdii bara akị ẹrẹmụ yọbị yelaaemi bara kị gbaa wẹrịemi. (Jas. 3:​1-12) Ị́mịnị zụa ifieama agbẹịgha egberiama ẹrẹmịnị bara ị́ mọ dọụ ẹrịmị. Anịduonị ị́mịnị kịmịotu mọ ẹrẹmịnị ifiesẹ, kịmị kụrọmọ egberiama kị ẹrẹmụ bara gbinipẹlẹ mị. Barịị baị bị, iné Bible goo yọbị, akpọ mọ ikie kẹrịkụmọ egberi kị ị́ mọ goodẹ. (Jas. 4:​4-12) Iné goomịnị fun, peimịnị duma bá dimịnị vidiobo angọ dii agbẹị-emi bara ị́ mọ dọụ ẹrịdẹ. Nẹịn karamọ erein mị, mị gbaa yebosẹ mịẹmụ yọmị kụrọemi bara ị́ mọ iroro kpọ paaemi.

12. Ị́mịnị Bible goomịnị bị, iné ụndụ bọọ dei agbẹị-emi yọama ẹrịdaba, tetuu kị duonị ị́mịnị dẹịṇsụọ agbẹịgha o? (Footnote kpọ dii.)

¹² Biin deiyọ-ama kị ị́ mọ mịẹmụ bara kị paa kpọ, dẹịnsụọkụmọ. Bei deiyọbo ị́ mọ mịẹmịnị bị ị́mịnị ebi adụdụ nana wẹrịemi bara kị mịẹdịamịnị. Angọ iyerimọ inyenrinbụọ nana wẹrịemi kịmị Bible goomịnị ifiesẹ, wó ụndụ bọọ dei agbẹị-emi yebo ka kị adụdụ bọọ tụawẹrị Bible goomịnị.a Ukie, “aya inyenrinbụọ” nanamụ yọbị dọlọ dọlọ kị mịẹmịnị. (Col. 3:10; “is being made new” study note kpọ dii) Teekị baratụa ị́ pịrịwẹrị ifiebosẹ Ọkpọnanaowei dọụbara mịẹmịnị kịmị a paamịnị a o?

13. Ị́mịnị tebara ka kị agbẹị-emi mịẹmụyeama tọn angọ pịrị a paaemi a o? (Foto kpọ dii.)

¹³ Iné goo yebosẹ akị kẹnị ifie ka tụa inyenrinmụ yọ dii a, bọlọụ kẹnị anịghakpọ maámụ mịẹ dii. (Prov. 11:2) Wẹrị iné mịẹ dọụmịnị yebo akị fun a gẹẹtụadá, iné bọlọụ mịẹmụ kẹnị anịghakpọ maámụ sẹlẹ, kọọ yebo kọn zịnị ifie ghọ mịẹmụ bara tọnpẹlẹ. Te ye kị ị́ mọ mịẹ duomịnị a?

14. Ị́mịnị bọlọụ te mịẹmụyeama kị mịẹ mịnị a o?

¹⁴ Ị́mịnị bọlọụ bọụ ị́ pịrị dẹịn-emi ye kị mịẹmịnị. Anịghakpọ iné bọlọụ dẹịnmọ agbẹịdẹịn yekị ị́ mọ mịẹ kpọ paaemi. Iné mịẹmụye ị́ mọ nimi daba, wo funmọ akị ye asọụtuu dọụ. Ị́mịnị laa Watch Tower Publications Index anịghakpọ Research Guide for Jehovah’s Witnesses duo sụọtuu dọụ a paaemi. Jehovah baratụapịrịye bii “mịẹmụ dịsẹnanayọ mọ, mịẹmụ kụrọ mọ” bii. (Phil. 2:13) Angotụa dá iné tolumọdẹ yebọ akị tụa inyenrin. Ị́mịnị bọlọụye mịẹ beinmọ daba, ị́mịnị zịnịye mịẹmụ dịsẹnana kụrọmọ kpọ paaemi. Gesii mị, Jehovah karịmịnị kịmị nana agbẹị-emi inyenrinbụọbo, ị́ laa angọtụa kẹnị mịẹ ebimọdaba, zịnịye mịẹmụ yọmị bọụbọụ kị paamịnị.

ỌKPỌNANAOWEI EGBERI BỤỌMỌ “INÉ ANGỌ MA FỊRỊWẸNỊ”

15. Jehovah kịmịbo tebara ka kị biin Bible goomịnị otuama mọ bẹbẹ paaemi a o? (1Thessalonians 2:13)

¹⁵ Zụaotu biin ifieama ka kị Bible goodẹ. Anịa ámịnị kọkọ Bible gbaa egberibo peimịnị a o? Ámịnị Bible gbaa egberibo akị tụa inyenrin wẹrị dei yọama mịẹdẹ a o? Benebene ámịnị naa mịẹgha. Jehovah kịmịbo bịsẹ bara fa! Bọlọụ Christuuduo-otubo bara, omịnị kpọ Bible bị “gesii bara bị, Ọkpọnanaowei egberi” bara ka kị ụ dimọ wẹrịemi.” Anịduonị, Ọkpọnanaowei egberi mị wo angọbo fịrị wẹnịmịnị bara wo mọ mịẹdịa mịnị.—1Thessalonians 2:13 goo.

16. Teekị baratụa wo pịrịwẹrị egberi naawẹrị naa bara kị dimịẹmịnị kịmịama a paamịnị a o?

¹⁶ Ọkpọnanaowei egberi goo ba akị tụa inyenrinmụ yọbị ifiebosẹ bọụbọụgha. Ifie mịẹpaamọ goomụ yọ kpọ kụrọemi. Ị́mịnị izoumọ izoumọ bara ka kị goo wẹrị sụọtuu nimigha bara mịẹ kpọ paaemi. Anịghakpọ wo dei agbẹị-emi yebo biin-emi duonị wo mịẹ suusụọ kpọ paaemi. Paabara paabara, Jehovah baratụa wẹrịemi ifiesẹ, omịnị laa wo bụụdọọnyebo dẹịnmọ mịnị. Pebịdá wosẹ Jehovah baratụạpịrịyẹ kẹrịakịdá, egberi naá wẹrị baramịnị kịmịama a paakụmọ, anịa kẹrị mịẹmịnị kịmịama ka paa. Tamanaịyọ fagha bara mị, omịnị ifiebosẹ Ọkpọnanaowei egberi goo bá akị tụa inyenrinmịnị ifiesẹ, wo ụndụbo pọwẹị nana dẹịnmịnị.—Jas. 1:25.