Ị́ Kpọ Berifaanye Bị Kẹrịakịmịnị A O?

1. Alaghatimi te ụgụla kị sụọmịnị a o?

OMỊNỊ bei akpọma kụrọ deiyọama paamịnị ifie k’emi! Alaghatimi, Jesus ụgụlapẹlẹ kiriogbo ma inyenrinmịnị kịmịbosẹ pịrịmịnị. Bịsẹ ifiebị naịn daba paamọ yeama Jesus mọ gbaatimi ifiebị, omịnị zụa “lelei-ama” gbaa wó tuuduo-otubo pịrị mị. Bịsẹ leleibo paa daba, Jesus bodẹ bá “akpọ kunumọ ifie” kpọ laadẹ bara kị mịẹdịamịnị. (Matt. 24:3) Bei bụrụ-egberi bị Matthew chapter 24 mọ 25 bá Mark chapter 13 mọ Luke chapter 21 mọ k’emi.

2. Omịnị teeki kẹrị ẹrẹtei dọụmịnị a o, bịsẹ yọmị tebara ka kị baratụa wo pịrị mịnị a o?

² Jesus baratụa wo pịrịwẹrị angọ tọlọmọ dọụmịnị kị duonị bei kabụbo tụamị, kabụbo berifaanye ka paa wo pịrịemi. Bei kabụbo anịnabo mọ oboribo mọ, kịlịkịlị bá ayẹbẹ owei-nimigha erebo mọ, bá talentbo kabụ kpọ. Iné inyenrinbụọ kị diwẹrị ụgụlapẹlẹ ị́ pịrịmịnị bara kị kabụbo mọ gbaa wo pịrị mị. Kabụbo wo mọ ditụa mịnị bị, omịnị kabụbo duo tolumọ akịmụ yebo mọ bá akị tụa inyenrinmụ bara mọ kẹrị ẹrẹtei mịnị. Wo bọlọụ kẹrị ẹrẹtei mịnị yebị anị anịnabo mọ oboribo mọ kabụ bị.

ANỊNABO MỌ BÁ OBORIBO MỌ

3. Jesus te ifie ka ụgụlapẹlẹ kịmịotu pịrị mịnị a o?

³ Anịnabo mọ bá oboribo mọ kabụ bị gbaatimi ifiebị, Jesus mịẹgaan paamọmị, kịmịama akị ebiegberi kẹrịakị bara mọ, bá ámịnị baratụa akị agọnọ amúmụ otubo pịrị bara mọ kị dịwẹrị ụgụlapẹlẹ á pịrị mịnị. (Matt. 25:​31-46) “Opu akpotu,” paatimi bo armageddon mọ naịndaba, Jesus bịsẹ ifie kị bei ụgụlapẹlẹ fịrị wẹnị mịnị. (Matt. 24:21) Anịna gbalị kịmị, anịnabo akị oboribo duo pumọmịnị bara kị, Jesus kpọ baratụa wó bịnaotu pịrị otubo mọ bá baratụa á pịrịgha otubo mọ pumọmịnị.

4. Isaiah 11:​3, 4 gbaa bara didaba tetuu kị duonị Jesus kịrịị bara ka kị ụgụlapelẹmu eti wo mọ nana wẹriemi a o? (Bọlọụ akpakpa dii.)

⁴ Bible gbaa amọ Jehovah kị Jesus kọn ụgụla pẹlẹowei atụa wẹrịemi, anịduonị, Jesus kịrịị bara ka kị ụgụla-pẹlẹmịnị. (Isaiah 11:​3, 4 goo.) Jesus ebibara kịmịotu mịẹmịnị yebo mọ, iroromịnị yebo mọ, bá gbaamịnị egberibo mọ dimịnị, bá akị wó agọnọ amúmụ bịnaotubo mọ inyenrinmịnị bara kpọ dimịnị. (Matt. 12:​36, 37; 25:40) Jesus baratụa wó agọnọ amúmụ otubo pịrịmịnị otubosẹ nimi wẹrịemi.a Egberigbaa fịrị wẹnịmịnị yọ kpọ kẹnị yelaa ụwọụ nẹ akị baratụa Jesus bịnaotubo pịrịmịnị ụwọụ. Ụgụlapẹlẹ ifie laa daba, baratụa Jesus bịnaotubo pịrị otubo kọn “kịrịịye mịẹ” kịmịama kị tịịn mịnị, ámịnị kịrịogbo bọọ “bẹseri bẹseri ụndụ” nana mịnị. (Matt. 25:46; Rev. 7:​16, 17) Bei tarịbo kọkọ timi Jehovah a barasịngha otubosẹ korumịnị! Opu akpotu paamịnị ifie mọ, bá opu akpotu bụọdẹ kpọ, ámịnị mọkpọ ánị peiboloubo kẹrịkụrọmọ wẹrịemi aba, ánị ẹrẹbo “ụndụ fun” bọọ timi bẹseri bẹseri laa mịnị—Rev. 20:15.

5. Aninabo mọ oboribo mọ kabubị te ka kị wo tolumọ ma o, bá te otu kị gbele dẹịn-emi a o?

⁵ Peibolou nana bá ifiebosẹ gbaaye peimịnị kịmị ka paa. Jesus tụa kabụ mị, anịnabo mọ bá oboribo mọ kabụ mị, kọkọ mị kiri bọọ inyenrinmọ ukiemọye nana wẹrịemi kịmịbo kị gbele dẹịn-emi. Ámịnị baratụa agọnọ amúmụ otubo pịrịmịnị yọ betịbị ka kị peibolou nana wẹrịemi bara mịẹdịagha, amịnị mokpọ Jesus sẹlẹdẹ peibolou nana kịlịkịlị odubo-owei gbaa bara kị dimịẹmịnị. (Matt. 24:45) Agọnọ amúmụ ukiemọye nana wẹrịemi otubo kpọ mị berifaanye pei agbẹị-emi. Tetuu a? Tuubị, Jesus ánị mịẹmịnị yebo mọ, iroromịnị yebo mọ, bá gbaamịnị egberibo kpọ ditụamịnị. Ámịnị kpọ peibolou nana wẹrịemi bara mịẹdịa mịnị. Jesus mọkpọ agọnọ amúmụ otubo gbelemọ yobị, maá kabụama tụamị. Bịsẹ maá kabụbo Matthew chapter 25 kpọ emi. Wo wẹrị kịlịkịlị bá ayẹbẹ owei-nimigha erebo kabụ ditụa.

KỊLỊKỊLỊ BÁ AYẸBẸ OWEI-NIMIGHA EREBO

6. Sọnran owei-nimigha erebo tebara ka kị kịlịkịlị inyenrinbụọ mịẹdịa ma o? (Matthew 25:​6-10)

⁶ Owei-nimigha erebo kabụ mị, Jesus oia owei-nimigha ereama mú ayoro-yei laa bara gbaa mị. (Matt. 25:​1-4) ámịnị ayoro-yei mọ mú wó ere nana uge teimụ bara kị iroro wẹrịmị. Jesus sọrọn akị “kịlịkịlị” bá sọrọn akị “ayẹbẹ” kị tịịnmị. Kịlịkịlị owei-nimigha erebo angọ tọlọmọ bá letimi mị. Ayoro-yei mị dein kọọ bo kpọ ámịnị timi ụ korumụ bara aki angọ tọlọmọ mị. Anduonị, ámịnị tụkpa-ama akị tụa bomị. Ayoro-yei mị kịalị bogha kpọ paaemi duonị, ámịnị akị tụkpabo atụamụ pulou kpọ sibemị. Ámịnị tụkpabo bụọmọ viinghamụ bara ka kị angọ tọlọmọ mị. (Matthew 25:​6-10 goo.) Ayoro-yei bo ifiemị, kịlịkịlị owei-nimigha erebo wó a tuuduo erenana uge duo sụọmị. Bịsẹ bara kị, sẹlẹdẹ otubo kpọ, angọ tọlọmọ wẹrị korutimi Christ bomụ ifie laa daba, ámịnị laa Jesus mọ agọnọ daabụọ ma sụọ mịnị.b (Rev. 7:​1-3) Ayẹbẹ owei-nimigha erebo baa?

7. Teeki ayẹbẹ owei-nimigha erebo paamọ ma o, bá tetuu a o?

⁷ Ámịnị kịlịkịlị owei-nimigha erebo bara mịẹgha, ámịnị angọ tọlọmọgha timi ayoro-yei bo ifie laami. Ánị tụkpa bo kpọ viinmụ yọ kị laadẹ, ámịnị zịnị pulou kpọ sibegha. Ayoro-yei bo naịndẹ bara ámọ naá bị, ámịnị bịsẹ ifie kị pulou fẹịyọ amúmị. Ámịnị waị bogha timi ayoro-yei mị bo yọ laamị. Bịsẹ ifiemị, “ango tọlọmọ wẹrị owei-nimigha erebo ayoro-yei mọ uge duosụọ mị, bá ogụgo kpọ ámọ kaị mị.” (Matt. 25:10) Ayebe owei-nimigha erebo waị bowẹrị uge duosụọ dọụmịnị ifiebị, ayoro-yei gbaa á pịrị mị: “Ịmịnị á nimigha.” (Matt. 25:​11, 12) Bei ayẹbẹ owei-nimigha erebo angọ tọlọmọwẹrị ayoro-yei korugha. Agonọ amúmụ otubo teeki ka kị mị kabụ duo tolumọ akị a paaemi a o?

8-9. Owei-nimigha erebo kabụmị te ka kị agọnọ amúmụ otubo tolumọ ma o? (Foto kpọ dii.)

⁸ Ifiebosẹ angọ tọlọmọ bá kirinatimi. sẹlẹ akịdẹ otubo maá ikpudu k’emi bara Jesus mọ gbaagha—kẹnị ikpudu angọ tọlọmọwẹrị kunumọ erein koru daba, kọọ ikpudu ba angọ tolọmọgha fa bara gbaagha. Anịa, sẹlẹ akịdẹ otubo peibolou nana bara angọ tọlọmọgha timi kunumọ ifie laa daba á paamọmụ yebo kị gbaamịnị. Ámịnị angọ tọlọmọgha ifiesẹ, ánị gbẹẹ mị ba á laagha fa. (John 14:​3, 4) Bei kọkọ kụrọ egberi! Omịnị agọnọ amúmụ ukiemọye anịghakpọ kiri bọọ inyenrinmụ ukiemọye kị nana wẹrịemi kpọ, pebida wosẹ bei owei-nimigha erebo kabụ duobo wo laaemi berifaanye kẹrịaki. Wosẹ kirinatimi bá inetimi tuu laamụ bara akị angọ tọlọmọ.—Matt. 24:13.

⁹ Angọ tọlọmọ bá kirinatimimụ yọmị yelaaemi duonị owei nimigha erebo kabụ gbaasiin dẹmị, Jesus zịnị kabụ gbaamị, anị talent kabụmị. Bịsẹ kabụmị angọtụa fịrịwẹnịmụ yọmị yelaaemị bara kị gbaa wẹrịemi.

TALENT BỊ

10. Maa odubo-otubo tebara ka kị peibolou nana wẹrịemi bara mịẹdịa ma o? (Matthew 25:​19-23)

¹⁰ Talent kabụmị, maa odubo otuama ánị nanaowei gbaa bara kị mịẹmị, anịa kẹnị odubo-owei gbaa bara mịẹgha bara Jesus mọ gbaamị. (Matt. 25:​14-18) Maa odubo-otubo angọtụawẹrị ánị nanaowei sịlịbo mịẹ biinmọ dẹịnmị, anịkị duonị ánị nanaowei bị peibolou nana odubo-otuama kọn á tịịnmị. Ánị nanaowei bị yọụpaa dọụmịnị ifiebị, ómịnị Talent-ama akị á pịrịmị—anị kọkọ biin sịlịama. Bei maa peibolou nana odubo-otubo angọtụa fịrị wẹnịmịnị duonị, ánị nanaowei waịbo ifiebị, ámịnị zịnị sịlịama wẹnị paamọdẹ, bei wẹnị paamọdẹ sịlịbo didaba, akị á pịrịwẹrị silibo mọ gbasị k’emi. Ánị nanaowei mị á kulemị—ámịnị kpọ bo “[ánị] nanaowei nana wẹrịemi pọwẹị nana” mị. (Matthew 25:​19-23 goo.) Taarụkaramọ odubo-owei ba? Ómịnị wó nanaowei kọn ụ pịrị sịlị mị kọn te ye kị mịẹ ma o?

11. Teeki “fịrịwẹnị dọụgha” odubo-owei paamọ ma o, bá tetuu a o?

¹¹ Kẹnị talent ka kị taarụkaramọ odubo-owei pịrịmị, anịa ómịnị “fịrịwẹnị dọụgha.” Fịrịwẹnị dá zịnị sịlịama nanamụ yọ kị duonị bịsẹ talent bị akị ụ pịrịmị. Anịa bei odubo-owei mị bịsẹ bara mịẹgha, ómịnị sịlị mị kọn kiri ka dibitụamị. Anịduonị wó nanaowei bị waibo ifiebị, omịnị bịsẹ kẹnị talent bẹtịbị ka kị bo wo nanaowei pịrịmị. Odubo-owei bị ịkịọụ sei-emi. Omịnị mịẹkiridẹ duonị wo nanaowei tẹẹmụ bara dii a, ómịnị “ye tọrụkẹrịgha kịmị” ka kị wo nanaowei tịịnmị. Nanaowei bị bolouịmbẹlẹ bei odubo-owei pịrịgha bá ụ pịrịwẹrị talent kpọ akị wo bara duo akịmị. Nanaowei bị warị duo ụ duopaamọ mị.—Matt. 25:​24, 26-30.

12. Maa peibolou nana odubo-otubo te otu ka tịbịtịẹmọ wẹrịemi a o?

¹² Maa peibolou nana odubo-otubo akị peibolou kẹrịkụrọmọ wẹrịemi agọnọ amúmụ otubo ka tịbịtịẹmọ wẹrịemi. Jesus kị ánị nanaowei bị, ómịnị á tịịnwẹrị ámịnị kpọ bo, “[ánị] nanaowei nana wẹrịemi pọwẹị nana” mịnị. Ámịnị agọnọ ámú ánị gbẹẹ bị akị mịnị. ámịnị kị bọlọụ fịyọduo-waịseribomụ otubo. (Matt. 25:​21, 23; Rev. 20:5b) Anịa bei fịrịwẹnị dọụgha odubo-owei paamọ yebi berifaanye kọọ paa sẹlẹ wẹrịemi otubosẹ pịrị wẹrịemi. Tebara a o?

13-14. Talentbo kabụbị te ka kị agọnọ amúmụ otubo tolumọ wẹrịemi a o? (Foto kpọ dii.)

¹³ Angọtụa fịrị wẹnịmịnị kịmị ka paa. Talent kabụ mọ, owei-nimigha erebo kabụ mọ, Jesus sẹlẹ wẹrịemi otubo suu kimiama a paa mịnị bara gbaagha. Ánịa ámịnị angotụa wẹrị fịrị wẹnịghaba paamọ yebo kị Jesus mọ gbaamịnị. Ámịnị angọtụa fịrị wẹnịgha ifiesẹ “[ámịnị], ánị nana wẹrịemi tịịnbịbị mọ bá á sẹlẹ akị wẹrịemi yọ mọ kẹrịkụrọmọ,” dọụgha kịmịama a paadẹ, anịduonị bá á bụọmọ agọnọ Daabụọ kpọ duosụọgha fa.—2Pet. 1:10.

¹⁴ Jesus, owei-nimigha erebo kabụ mọ bá talent kabụ mọ akị yelaa tolumọye mịẹpaamọ agọnọ ámúmụ otubo pịrị wẹrịemi, amịnị ifiebosẹ ango tọlọmọ, letimi bá angọtụa fịrịwẹnị kị dọụ wẹrịemi. Anịa Jesus zịnị berifaanye akị agọnọ amúmụ otu pịrị wẹrịemi! Jesus Matthew 24:​40, 41 bọọ gbaa wẹrịemi egberi bị agọnọ amúmụ otubo egberi kị gbaa wẹrịemi, kunumọ ụgụlapẹlẹ á pịrịmụ egberi kị gbaa wẹrịemi.

TE ỤBỌ KỊ “AKỊ MỊNỊ” A O?

15-16. Matthew 24:​40, 41 tebara ka kị sele wẹrịemi otubo ifiebosẹ letimi agbẹị-emi bara mịẹgaan ma o?

¹⁵ Jesus kunumọ ụgụlapẹlẹ akị agọnọ amúmụ otubo pịrịmụ egberi bị gbaa siindẹ kị tara kabụbo tụamị. Bịsẹ kunumọ ụgụla kị gesii agọnọ amúmụ otubo mịẹgaan paamọ mịnị. Jesus bịsẹ egberi gbaatimi ifiebị, maa owei otuama bou a timi fịrị wẹnịmịnị, ba maa ereama ye sanmịnị yọ a timi ye sanmịnị bara Jesus mọ gbaa mị. Bei egberi bị wo mọ didaba, owei otubo kpeikẹnị fịrị kị wẹnịtimimị, erebo kpọ kpeikẹnị fịrị kị wẹnịtimimị, bịsẹ bara kị paa kpọ, Jesus gbaa amọ kẹnị ụbọ “akị mịnị, kẹnị ụbọ akịgha fa.” (Matthew 24:​40, 41 goo.) Bịsẹ yọ bụọmọ bị omịnị gbaa wó tuuduo-otubo pịrị mị: “Ánị Nanaowei bị bomụ ifie ámo nimigha duonị ifiebosẹ letimi.” (Matt. 24:42) Jesus owei-nimigha erebo kabụ gbaatimi ifie kpọ mị kpẹkẹnị letimi egberi kị gbaa mị. (Matt. 25:13) Anịduonị maa egberibo kẹnịsụọmọ-emi bara kị paaemi. Gesii peibolou nana wẹrịemi agọnọ amúmụ otubo kị “akị mịnị,” Jesus bịsẹ otubo ka kị agọnọ Daabụọ bọọ tụa mịnị.

¹⁶ Ifiebosẹ lemịnị kịmịama ka paa. Agọnọ amúmụ ukiemọye nana wẹrịemi kịmị tẹmẹ-anga ma kirinagha ifiesẹ, “sele wẹrịemi otubo” akịmụ ifie laa daba, bịsẹ ụbọmị akịgha fa. (Matt. 24:31) Jesus gbaa yebị Jehovah karịmịnị otubosẹ kị gbele-emi, wosẹ Jesus berifaanye kẹrịakị dá ifiebosẹ letimi bá wo peiboloubo kpọ kẹrịkụrọmọ.

17. Tetuu kị duonị Jehovah ágọnọ amúmụ otu selemịnị ifiemị bụụdọọnye paa wo pịrị agbẹigha o?

¹⁷ Omịnị Jehovah nimidẹ, Jehovah ifiebosẹ kịrịyẹ kị mịẹmịnị bara kpọ wo mọ nimi wẹrịemi. Anịduonị Jehovah mị kụraị ovurubo kị kịmịama sẹlẹ kpọ, yebị akị bụụndọọnye mịẹkụmọ.c Omịnị Jesus tọnmọdịaye bị ukie wẹrịemi, buburu bị ifie bọ 5:00pm ovuru laade kị tịịnwẹrị bo kiribou bọọ fịrịwẹnị otubo paamọ yebị wo mọ ukie wẹrịemi. (Matt. 20:​1-16) Buburu bọọ fịrịwẹnị otubo mọ bá pekei duobosẹ fịrị wẹnịmịnị otubo mọ kpeikẹnị gbẹẹ kị nanamị. Bịsẹ kpeikẹnị bara kị, Jehovah bei madein ka kịmị sẹlẹ, anịghakpọ ụbọ sẹlẹwẹrị aladẹ kị gbaa kpọ, peibolou nana timi dụụ laa otubo kị agọnọ amú mịnị.

BERIFAANYEBO KẸRỊAKỊ

18-19. Te tolumọyeama mọ bá te berifaanyeama mọ kị wo mọ ditụadẹ a o?

¹⁸ Omịnị teekị tolumọdẹ a o? Anịnabo mọ oboribo mọ kabụmị baratụa kiriogbo ma inyenrintimi bẹseri bẹseri laamụ ukiemọye nana wẹrịemi otubo pịrịdẹ, bei tịẹkiri mọ bá opu akpotu bomụ ifie kpọ, ámịnị peibolou nana bá ifiebosẹ gbaaye peimịnị kịmị ka paa agbẹị-emi. Mị bọlọụ mị Jesus ụgụlapẹlẹ peibolou nana wẹrịemi otubo pịrị mịnị, bá ámịnị kọkọ “fagha fagha ụndụ” nana agbẹị-emi bara kpọ gbaa á pịrị mịnị—Matt. 25:46.

¹⁹ Berifaanye kọn agọnọ amúmụ otu pịrị wẹrịemi maa kabụama wo mọ ditụadẹ. Kịlịkịlị bá ayẹbẹ owei-nimigha erebo kabụ mị, sọnrọn kịlịkịlị-emi. Ámịnị ayoro-yei mị bomụ ifie kị nimigha kpọ ámịmnị Ifiebosẹ angọ tọlọmọ bá kirinatimi ụ korumị. Anịa ayẹbe erebo angọ tọlọmọgha, anịduonị ayoro-yei mị á bụọmọ erenana uge duosụọgha. Wo kpọ Jesus mị sei akpọ kọnsiinmụ ifiemị nimigha kị gbaa kpọ, ifiebosẹ angọ tọlọmọwẹrị korutimi. Bịsẹ yọ bụọmọdẹ bị Talent kabubị maa peibolou nana odubo-otubo angọtụa fịrị wẹnịmịnị kịmị a paa bara wo mọ ẹrịmị. Ámịnị angọtụa fịrịwẹnị ánị nanaowei pịrịwẹrị ụ mịẹ pọwẹị mị. Anịa nanaowei bị suu odubo-oweibị duopaamọmị. Te tolumọye kị wo laaemi a o? Pebidá wosẹ angotụa Jehovah fịrị wẹnịtimi dụụ laa. Kunumọbị, sẹlẹ wẹrịemi otubo ifiebosẹ letimi agbẹị-emi bara kpọ wo mọ tolumọmị, ámịnị letimi daba, Jesus ásẹẹ akị agọnọ áṃumịnị. Ámịnị pọwẹịtimi Jesus bo á bẹnịmọ agọnọ amúmụ ifie kị koru mịnị. Armageddon sụụ bụọ daba, anịna-tọbọụ erenana oge laa mịnị, bịsẹ ifiebị, ámịnị bo Jesus ayọrọ a paa mịnị.—2Thess. 2:1; Rev. 19:9.

20. Jehovah teeki mịẹ akị wó berifaanyebo kẹrịakịmịnị otubo pịrị mịnị a?

²⁰ Jesus ụgụlapẹlẹmụ ifiemị bo naịnfadẹ, anịa omịnị malafakụmọ. Omịnị wo peibolou kẹrịkụrọmọ wẹrịemi ifiesẹ wo agọnọ Daụ bị “kịmịtọbọụ kụrọ dẹịn-emi kụrọ” kọn wo pịrịwẹrị omịnị “laa . . . kịmịtọbọụ Yaị bọlọụ bọ tịẹ mịnị.” (2Cor. 4:7; Luke 21:36) Agọnọ amúmụ ukiemọye anịghakpọ kiriogbo kọọ inyenrintimi bẹseri bẹseri laamụ ukiemọye kị wo mọ nana wẹrịemi, wosẹ Jesus kabụbo duo arere nana mịnị. Bá Jehovah, wo laamụ agbẹịgha ebi akị wo dịamịnị yọ duonị, ómịnị wo ẹrẹbo kọn fagha fagha ụndụ fun ma gẹẹtụa mịnị.—Dan. 12:1; Rev. 3:5.