Ye Akị Kịmị Pịrịmịnị Yọbị Ị́ Mịẹ Pọwẹị Nana Dẹịn Mịnị

1-2. Tetuu kị duonị Jehovah omịnị ye dịẹpaamọ kịmị pịrị daba powẹị nana dẹịnmụ bara akị wo tẹmẹ ma o?

JEHOVAH kịmịtọbọụ tẹmẹ ifiebị, wosẹ ye akị kịmị pịrịmịnị yọ duo pọwẹị nana dẹịnmụ bara ka kị wo tẹmẹ mị. (Acts 20:35) Anịa, kịmị ye akị wo pịrị daba omịnị pọwẹị nanagha fa bara kị gbaa mịnị a? Bịsẹ baragha. Wosẹ nimi wẹrịemi bara bị, kịmị ye akị wo pịrị daba wo mịẹ pọwẹị nanamịnị. Bịsẹ bara kị gbaa kpọ omịnị ye akị kịmị pịrị daba pọwẹị nana dẹịnmịnị. Jehovah bịsẹ bara bị akị wo tẹmẹ yọbị ebi ka kị wo mịẹ wẹrịemi. Tetuu a o?

² Jehovah bịsẹ bara bị akị wo tẹme yọbị baratụa wo pịrịwẹrị omịnị wo pọwẹị mịẹ dụbamọ dẹịn a paaemi. Omịnị laa zịnị ụwọụama dọụpaamọ wẹrị ye kọn kịmịotu pịrị, bá bịsẹ bolou duo pọwẹị nanadẹịn a paaemi. Jehovah bịsẹ bara kọn wo tẹmẹ yọmị kọkọ iné angọ duosụọgha?—Ps. 139:14.

3. Tetuu kị duonị Jehovah akị “pọwẹịmịnị Ọkpọnanaowei” tịịn agbẹị-emi a o?

³ Bible kị gbaa wo pịrị wẹrịemi, omịnị ye kọn kịmị pịrị daba omịnị pọwẹị nana deịn mịnị. Anịduonị Bible Jehovah kọn “powẹịmịnị Ọkpọnanaowei” tịịn yọmị, wo mịẹ tamamagha. (1Tim. 1:11) Jehovah kị bọlọụ ye akị kịmị pịrị owei, bá ye akị kịmị pịrị Jehovah laaemi ụbọ benebene fa. Paul gbaa bara k’emi, Jehovah kị duonị “omịnị ụndụ nanawẹrị wẹnịmịnị bá inyenrin kpọ inyenrinmịnị.” (Acts 17:28) Kọkọ gbaamaba “ebi yebosẹ bá karaị-emi yebosẹ” Jehovah kị duobo-emi.—Jas. 1:17.

4. Teeki baratụa wo pịrịwẹrị pọwẹị nana kụrọmọ mịnị a o?

⁴ Wosẹ ye akị kịmị pịrịmịnị yọ duo paamịnị pọwẹị mị nana dẹịn dọụmịnị aba, omịnị Jehovah barafinimọ inyenrin dimịẹ. (Eph. 5:1) Bei egberitịbị mị omịnị Jehovah ye akị kịmị pịrịmịnị ebi mịẹdịaye ditụa mịnị. Bá kịmịotu wo mịẹmịnị yebo tọrụkẹrịyọ nanaghaba, wo mịẹ agbẹị-emi bara kpọ wo mọ ditụa mịnị. Bịsẹ yọmị baratụa wọ pịrịwẹrị ye akị kịmị pịrịmịnị yọ duo paamịnị powẹị mị kekere bá mịẹ dụbamọ dẹịn a paa mịnị.

JEHOVAH BARAFINIMỌ INYENRINBỤỌ DIMỊẸ

5. Jehovah te mẹnịanga yeama kị mịẹ wo pịrịmịnị a o?

⁵ Jehovah te ụwọụama ka kị barafinimọ inyenrinbụọ mịẹ wo dịamịnị a o? Zụa ụwọụama kẹrị iroro dii. Jehovah Mẹnịanga yeama akị wo pịrịmịnị. Omịnị biin yeama kị nanagha kpọ, Jehovah wo dọụmịnị yebo kọn wo pịrịmịnị. Gbaamaba, Jehovah fịyaị, tụamọ bịdẹ, bá wo timimụ warị mịẹpaamọ wo pịrịmịnị. (Ps. 4:8; Matt. 6:​31-33; 1Tim. 6:​6-8) Jehovah bei yebo mịẹ wo pịrị agbẹị-emi bara nimi wẹrịemi yọ bẹtịbị kị ụ dịnẹmọwẹrị mịẹ wo pịrịmịnị bara fa. Anịa teeki kọkọ Jehovah dịnẹmọwẹrị bei yebo mịẹ wo pịrịmịnị a o?

6. Omịnị te ka kị Matthew 6:​25, 26 duo tolumọ akị ma o?

⁶ Tarị kị Jehovah dịnẹmọwẹrị wo mẹnịanga yebo mịẹ wo pịrịmịnị. Matthew 6:​25, 26. (Goo.) wo mọ didaba, Jesus tẹmẹ wẹrịemi yeama akị mịẹdịaye pịrịmị. Agọnọ ofonibo gbelemọ yọmị Jesus gbaa mị: “Ámịnị kiri gborogha, fịyaị kpọ gha bá fịyai kọn ye-gbaịn warị kpọ atụagha.” Anịa wẹrị Jesus gbaa egberi dii: “Iné Agọnọ Daụ kị asẹẹ gbalịmịnị.” Bịsẹ bara gbaa siindẹ bị Jesus biibịbị bii mị: “Ámịnị yelaa á dẹịngha?” Jesus teeki gbaamịnị a o? Jehovah tọrụyọ mị, ụ karịmịnị otubo yelaa akị namabo dẹịn-emi. Anịduonị Jehovah namabo kekeremịnị aba, ómịnị wo kekeremụ eti wo mọ nana wẹrịemi! Jehovah tarị nana wẹrịemi Daụ duonị, tarị kị ụ dịnẹmọwẹrị ụ karịmịnị otubosẹ kekeremịnị.—Ps. 145:16; Matt. 6:32.

7. Omịnị tebara ka kị Jehovah barafịnịmọ inyenrinbụọ dịmịẹ a paaemi a o? (Foto kpo dii.)

⁷ Wo kpọ Jehovah bara tarị kị wo dịnẹmọwẹrị mẹnịanga yeama dịẹpaamọ zịnịotu pịrịmịnị. Gbaamaba, iné tẹmẹ-anga bịna-ụbọ nẹ baratụapịrịye dọụmịnị ụbọ ị́ mọ nimi wẹrịemi a o? Jehovah iné duotolu mị baratụa zịnị ụbọ pịrị a paaemi. Vurudu akpotu paa daba Jehovah Iseriotubo ifiebosẹ barafinimọ inyenrinbụọ mịẹdịamịnị. Gbaamaba, COVID-19 dọọn bo ifiemị, bịnaotubo fịyaị, bịdẹ bá zịnị yeama dịẹpaamọ baratụapịrịye dọụ wẹrịemi bịnaotubo pịrịmị. Biin otuama sịlị otuoye mịẹ akị akpọyọrẹị egberigbaa fịrị pịrịmịnị. Bei otuoyebo kị duo baratụa vurudu akpotu gbeledẹ bịnaotubo pịrịmịnị. Bei bịnaotubo Hebrews 13:16 gbaa bara kị dimịẹmịnị, bịsẹ yọbị gbaa amọ: “Ebi mịẹmụ yọ mọ bá ye dịẹpaamọ zịnịotu pịrịmụ yọ mọ barafakụmọ, bei kụnmịnị ịkịanbo Jehovah mịẹ pọwẹịmọmịnị.”

8. Omịnị tebara ka kị Jehovah kụrọ duo arere nanamịni a o? (Philippians 2:13)

⁸ Jehovah kụrọ pịrịmịnị. Jehovah pọwẹịtimi ifiebosẹ wó nana wẹrịemi kụrọ dịẹpaamọ ụ karịmịnị otubo pịrịmịnị. (Philippians 2:13 goo.) Dadiye anịghakpọ kụrọ bụụdọọnye ị́ paamọwẹrị, ị́mịnị kpọ kụrọ nanamụ bara akị Jehovah bara bọọ bidẹ wẹrị ma? Kaanghaba pekei duo inyenrintimi buburu laamụ kụrọ kpọ ị́ mọ akị Jehovah bara a bidẹ wẹrị mị. Anịa Jehovah bịsẹ tẹẹbịbị parụ ifiebị, kaanghaba ị́mịnị kpọ fịrịmọpaaowei Paul gbaa bara kị gbaa wẹrịemi: “Ye duo mú ye laasẹ, ịmịnị kụrọ akị ị́ pịrịmịnị owei duotolu ka kụrọ nanamị.”—Phil. 4:13.

9. Omịnị tebara ka kị Jehovah wó kụrọ mị akị fịrịwẹnị bara dimịẹ a paaemi o? (Foto kpo dii.)

⁹ Omịnị angọ yalịyalị kịmịama kị gbaa kpọ, omịnị laa Jehovah barafinimọ wẹrị wo kụrọ dịẹpaamọmịnị bara dimịẹ a paaemi. Omịnị laa kụrọ akị zịnị kịmị pirigha kị gbaa kpọ, omịnị laa wo kụrọ mị kọn baratụa á pịrị a paaemi. Gbaamaba omịnị laa baratụa okosudẹ bịnaotuama pịrịwẹrị ánị warị kwọ anịghakpọ mú ye fẹị á pịrị a paaemi. Mịẹ ka paaemi aba, omịnị laa angọ paamọwẹrị mú Kingdom Hall tọlọmọ kpọ paaemi. Omịnị bei yebo mịẹ daba, omịnị wo nana wẹrịemi kụrọ ka kị baratụa zịnị bịnaotuama pịrịmịnị.

10. Omịnị tebara ka kị wo ẹrẹmịnị egberibo kọn zịnịotu barịị a paaemi a o?

¹⁰ Ukie, wo ẹrẹbịbịbọ kpọ kụrọ nana wẹrịemi. Anịduonị kulebịbị anịghakpọ kụrọmọye dọụ wẹrịemi kịmị ị́ mọ nimi wẹrịemi a? ị́mịnị laa ụbọ barịị a paaemi bara ị́ mọ tọn mị? Kaanghaba, ị́mịnị mú ụbọ laa, anighakpọ phonu akị ụbọ tịịn a paaemi. Bịsẹ yọ bụọmọ kpọ ị́mịnị fun gẹẹ anịghakpọ email bá phonu duo ye gẹẹ ụbọ pịrị kpọ paaemi. Biin yeama ẹrẹmụ bara iroro kụmọ. Zụa ifieama bịsẹ biingha ẹrẹbịbịbo kị ụbọ kụrọmọwẹrị Jehovah karị bọlọụ amú a paaemi.—Prov. 12:25; Eph. 4:29.

11. Jehovah wó kịlịkịlị-nimiye akị tebara kị mịẹmịnị a o?

¹¹ Jehovah kịlịkịlị nimiye pịrịmịnị. James gẹẹ amọ: “Kịlịkịlị nimiye nanagha kịmị emiaba, pebidá bịsẹ ụbọmị Ọkpọnanaowei bii, Ọkpọnanaowei barafinimọ wẹrị bịsẹ ụbọ pịrị mịnị, ómịnị bịsẹ ụbọ mịẹ bụzegha fa.” (Jas. 1:5; ftn.) James gbaa bara didaba, Jehovah wó kịlịkịlị nimiye bị akị angọ a gbaịngha. Ómịnị dịẹpaamọ kịmịsẹ kị pịrịmịnị. ukie, Jehovah kịlịkịlị nimiye akị kịmị pịrị daba, Jehovah “ụbọ mịẹ buzegha fa.” Jehovah duo bomịnị tolumọyebo kị baratụa wo pịrị mịnị, bịsẹ bara kị gbaa kpọ Jehovah wo mịẹ bụzemụ bara akị wo tolumọgha. Wo mịẹ bụzemụ yọ dii a, Jehovah dọụ wẹrịemi barasẹ, omịnị ifiebosẹ nimiye akị wó bara duo bii.—Prov. 2:​1-6.

12. Omịnị te fomuun-ama kị nanawẹrị wo kịlịkịlị-nimiye dịẹpaamọ zịnịotu pịrị a paaemi a o?

¹² Omịnị kpọ Jehovah dimịẹwẹrị wo kịlịkịlị-nimiye dịẹpaamọ kịmịotu pịrị a paaemi a o? (Ps. 32:8) Jehovah kịmịbo ánị tolumọdẹ yebo gbaa kịmịotu pịrịmụ biin fomuun-ama kị nana wẹrịemi. Gbaamaba, ifiebosẹ omịnị egberi gbaamụ bara kọn kịmịotu tolumọmịnị. Itu-kosuotubo etipoutimi baratụa akị zịnị benibiledẹ bịnaowei-ama mọ bá baratụa itu-kosuotubo pịrịmịnị kịmịbo mọ pịrịwẹrị itu bọọ ánị wẹnịmịnị fịrịbo wẹnị ebimọ dẹịnmịnị. Bá warị kẹrị fịrị wẹnịmịnị bịnaotubo baratụa naá ebibara fịrị wẹnịmịnị bara nimigha bịnaotubọ pịrịwẹrị Jehovah ogbo bọọ warịama kẹrịmịnị.

13. Zịnịotu tolumọmịnị ifiebị, omịnị tebara ka kị Jehovah dịmịẹ a paaemi a o?

¹³ Jehovah ogbo mịẹpaamọdẹ funwarịbo a timi kịmịotu tolumọmịnị otubo kpọ Jehovah dịẹpaamọ kịmịotu pịrịmịnị kịlịkịlị-nimiye kị dimịẹ mịnị. Ukie, Jehovah barafinimọ bara ka kị wó kịlịkịlị-nimiye pịrịmịnị. Bịsẹ bara kị, omịnị kpọ barafinimọ bara ka kị wo nimidẹ yebo mọ bá wo paamọdẹ yebo mọ gbaa zịnịotu pịrị mịnị. Omịnị ụbọmị nịmị wo dẹịn a paaemi malafamịnị duonị yebosẹ gbaa ụ pịrịgha bara mịẹkụmọ. Bịsẹ yọ kị bụọmọ kpọ, zụaotu gbaamịnị: ‘Kịmị ị tolumọgha! Anịduonị Ómịnị kpọ bẹtịbị tolumọ angọ pịrị.’ Omịnị bịsẹpaa iroroye nanakụmọ, Jehovah karịmịnị otubo benebene bịsẹpaa inyenrinbụọ nanakụmọ. Anịa, omịnị pọwẹịtimi wo nimi wẹrịemi yebo bẹtịbị gbaa á pịrịgha “wo angọbo” kpọ paamọwẹrị ebibara á tolumọmịnị. (1Thess. 2:8) Wo dọụ wẹriemi barasẹ, “ámịnị kpọ, fịrị nimi ebimọ wẹrị bo zịnị otuama tolumo kịmịama ka paa.” (2Tim. 2:​1, 2) Wosẹ wo nimiye dịẹpaamọmịnị aba, wosẹ kịlịkịlị dẹịn mịnị bá pọwẹị kpọ nanadẹịn mịnị.

ỤBỌ BỊ TỌRỤKẸRỊYỌ MỊẸDỊAGHABA

14. Omịnị ebimịẹ kịmịotu pịrị daba biin kịmịama tebara kị mịẹmịnị a o?

¹⁴ Omịnị ebimịẹ wo bịnaotubo pịrị daba, ámịnị biin ifieama tọrụkẹrịyọ mịẹdịamịnị. Ámịnị kulebịbị fun gẹẹ anịghakpọ zịnị ụwọụama aki tọrụkẹrịyọ mịẹdịamịnị. (Col. 3:15) Ámịnị tọrụkẹrịyọ mịẹdịamịnị yọmị wo nana wẹrịemi pọwẹị mịẹ dụbadẹịn mịnị.

15. Zụaotu tọrụkẹrịyọ mịẹdịa ifiesẹ, omịnị teeki ukie agbẹị-emi a o?

¹⁵ Gesii mị, zụa ifieama biin-otu tọrụkẹrịyọ mịẹdịagha. Zụa ifieama, omịnị wo ifie, wo kụrọ anịghakpọ wo nanayeama kọn á pịrịmịni, bịsẹyọ bọụdẹsẹ bịsẹ ụbọmị ị́mịnị mịẹ ụ pịrị yebo tọrụkẹrịgha bara ị́ mọ iroro kpọ paaemi. Bịsẹ bara paadaba, teekị baratụa ị́ pịrịwẹrị iné nana wẹrịemi pọwẹị kekeremịnị a o? Wo egberitịbị kẹrị ukie, Acts 20:35. Wo pọwẹị mị kịmịotu tọrụkẹrịyo duo bogha. Kịmịotu tọrụkẹrịyọ mịẹdịagha kpọ, omịnị mọkpọ pọwẹịtimi ye akị kịmị pịrị a paaemi. Tebara a o? Zụa ụwọụama wo mọ ditụa.

16. Omịnị ebimịẹ kịmịotu pịrịmịnị ifiesẹ, teeki ukie agbẹị-emi a o?

¹⁶ Jehovah dimịẹmụ yọkị kọn bọlọụda. Jehovah ebimịẹ kịmịsẹ kị pịrịmịnị, tọrụkẹrịyọ mịẹdịamịnị otubo mọ, mịẹdịagha otubọ mọ. (Matt. 5:​43-48) Ye akị kịmị pịrịmịnị ifiesẹ, “ụbọmị kẹnịye kpọ waịmọ ị́ pịrịgha fa bara ka kị ịkịọụ a wẹrị.“ Jehovah gbaa amọ, wosẹ bịsẹ bara mịẹdịa daba, “dụba gbẹẹ” kị wo laa mịnị. (Luke 6:35) “Kẹnịye” gbaa egberi mị, torukẹriyọ kpọ sụọemi. Anịa zịnị tọrụkẹrịyọ kị mịẹdịagha kpọ, omịnị pọwẹị pọwẹịtimi baratụa zịnịotu pịrị ḅa ebimịẹmịnị yọmị, Jehovah wo gbẹẹmịnị.—Prov. 19:17; 2Cor. 9:7.

17. Te yelaadẹịn tuu kị wo dịnẹmọ wẹrị ye akị kịmị pịrịmịnị a o? (Luke 14:​12-14)

¹⁷ Jesus Luke 14:​12-14. (Goo) gbaa bara bị baratụa wo pịrịwẹrị ebibara Jehovah dimịẹ mịnị. Laa baratụa wo pịrịmụ kịmịama tịịn wo warịma bo fịyaị fị bá zịnị ụwọụama kpọ akị baratụa á pịrịmụ yọmị seigha. Anịa, kịmịotu waị wo gbẹẹmụ ukiemọye kị wo dịnẹmọ wẹrị ebimịẹ á pịrịmịnị bara wo mọ akị wo ụndụ bọọ dọụ ẹrị daba, tebara kị ị mọ mịẹmịnị a o? Jesus gbaaye mịẹ. Omịnị ebimịẹ akị laa waị wo gbẹẹghamụ kịmịama pịrịgha paaemi. Omịnị Jehovah kị dimịẹmịnị duonị pọwẹị nana mịnị. Jehovah dimịẹmịnị yọbị wo mọ kẹrị iroro daba, baratụa wo pịrịwẹrị kịmịotu kị wọ mịẹmịnị yebo tọrụkẹrịyọ mịẹdịagha kpọ, omịnị pọwẹị nana mịnị.

18. Teeki baratụa wo pịrịwẹrị ifie mịẹpaamọ wẹrị zịnịotu barịmịnị a o?

¹⁸ Sei bara akị kịmịotu dimọ kụmọ. (1Cor. 13:7) Zịnịotu tọrụkẹrịyọ mịẹdịagha ifiesẹ, omịnị angọ bii a paaemi: ‘Ámịnị kọkọ tọrụkẹrịgha, anịghakpọ bara kị bara ma?’ Kaanghaba ámịnị tọrụkẹrịyọ mịẹdịagha yọmị, zịnị tuuama timi kpọ paaemi. Zụaotu tọrụkẹrịyọ nana wẹrịemi anịa mịẹdịamụ yọkị kụrọemi. Kaanghaba bụọdẹ ifiemị ámịnị kị kịmịotu barịtimi duonị, anịa bei tịẹkiri bị baratụapịrịyẹ kẹrịakịmụ yọmị á mịẹ bụzemịnị. Paa bara paa bara, omịnị kọkọ wo bịnaotubo tarị wẹrịemi ifiesẹ, omịnị sei bara kọn á digha fa. Sei bara kọn á dimọ bara dii a, omịnị pọwẹị pọwẹịtimi ifiebosẹ baratụa á pịrị mịnị.—Eph. 4:2.

19-20. Ebimịẹ zịnịotu pịrịmịnị ifiesẹ tetuu kị duonị etipou inyenrinbụọ yelaaemi a o (Foto kpo dii.)

¹⁹ Etipou. Barafinimọ inyenrinbụọ gbelemọ yọmị, kịlịkịlị Pẹrẹowei Solomon gbaamị: “iné breadị kọn benima koromọ, Biin dein-ama bụọ daba ị́mịnị waị breadịmị ẹrẹ mịnị.” (Eccl. 11:1) Bei Bible yọmị mịẹdịa amọ “biin dein-ama bụọdẹ kị” zụaotu tọrụkẹrịyọ mịẹdịa mịnị. Kẹnị bịnaraụ paamụye wo mọ dii.

²⁰ Biin kụraịama bụọdẹ ifie, kẹnị itu diiowei taa fun gẹẹ akị kẹnị aya benibele bịnaraụ pịrịwẹrị á kụrọmọ mị, ámịnị tịẹkụrọ tịmị Jehovah karịmu bara ka kị á kụrọmọmị. Ningina kụraị bụọdẹmị, bịsẹ bịnaraụma waị gẹẹ á pịrị mị, á gbaamị: “Ị́mịnị nimigha bara bei bụọdẹ kụraịbosẹ baratụa ị pịrịtimi mọ laade, anịkị duonị ịmịnị bei fun gẹẹ akị ị́ yarịmịnị, ị́ kpọ nimi kị ị mọ dọụmịnị.” Ámịnị bọlọụ gbaamọ mị: “[Iné funmị] ị mịẹ zọzọ mị, Bible yọmị ịnẹ adụdụ gbelemị, ịmịnị benebene baragha fa.”a Ámịnị á laa bụụdọọnyebo zụa gbaadẹ bị, bịnaraụma mọkpọ gbaamị: “Zụa ifieama ịmịnị gesii duo serimụ iroro-yeama nana mị. Anịa iné gẹẹ bo Bible yọbị baratụa ị pịrị duonị, . . . ịmịnị benebene Jehovah a barasingha fa.” Ámịnị mọkpọ gbaamị: “Bei ningina kụraibosẹ, ine adụdụ gbele kụrọmọ iné gẹẹ fun mọ bá Bible yọ mọ dẹịnye fa.” Itu diiowei tama kọkọ pọwẹị nanamụ bara wo nimi wẹrịemi. “Biin dein-ama” kị bụọdẹ kị bịsẹ bara paamị! Omịnị kpọ ebimịẹ kịmị pịrịwẹrị alaa ifie kị laa kpọ, ụbọ mị tọrụkẹrịyọ mịẹ wo dịa a paaemi.

21. Tetuu kị duonị ị́ kpọ Jehovah barafinimọ inyenrinbụọ dịmịẹmụ bara gbinipẹlẹdẹ a o?

²¹ Wo gbaa bụọmọdẹ bara mị, Jehovah bẹbẹ bara ka kị wo tẹmẹ wẹrịemị. Kịmị ye dịẹpaamọ wo pịrị daba, wo mịẹ pọwẹị nanamịnị, anịa omịnị barafinimọ kịmị barịị daba wo pọwẹịmị dụba dẹịn mịnị. Omịnị baratụa wo bịnaotubọ pịrịmịnị yọbị wo mịẹ pọwẹị nanamịnị. Bá ámịnị tọrụkẹrịyọ mịẹdịa daba wo mịẹ pọwẹị dẹịnmịnị. Ụbọmị, tọrụkẹrịyọ mịẹdịa, bá mịẹdịagha kị gbaa kpọ, omịnị kịrịye kị mịẹmịnị yọbị wo mịẹ pọwẹị nanamịnị. Ị́mịnị ye akị kịmị pịrịde ifiesẹ, ukịe “Jehovah bịsẹ bara dẹịn yeama akị ị́ pịrịmụ kụrọ nana wẹrịemi.” (2Chron. 25:9) Omịnị kọn kịmịotu pịrịmịnị yebo dụba akị Jehovah kọn wo pịrịmịnị yebo dẹịnmịnị ifie fa! Jehovah kị wo gbẹẹmụ owei a paa daba, bịsẹ pọwẹị dẹịn ye benebene fa. Anịduonị wosẹ wẹrị, wo barafinimọ agọnọ Daụ dimịẹmụ bara gbinipẹlẹ.