Tebara Ka Kị Tamanaịnyọ Dẹịnmọ A Paaemi A O?

1-2. (a) Te tamanaịnyọ kị Jehovah karịmịnị kịmịama laa kpo paaemi a o? (b) Bei egberitịbịmị omịnị teeki tolumomịnị a o?

KỊMỊ duo mú kịmị laasẹ tamanaịnyọa nanamịnị ifieama paamịnị. Gbaamaba, kẹnị asịyaịpesi bịnaowei kaanghaba Jehovah ụ tarịgha bara iroro kpọ paaemi. Bịsẹ yọ duonị ómịnị benibile dọụgha. Wẹrị zịnị tọnmọdịaye kẹrị iroro, kẹnị kịmị paadẹ bịnaowei ebi fịrịwẹnịmụ yọ tịẹmọwẹrị Daabụọ ebiegberi gbaamọ yọ ka kị bọloụdámị, ánịa mị tịẹkirimị wo wariboloubị bo sịlị bụụdọọnye nanadẹ, bịsẹ yọmị ụ dịnẹmọwẹrị wo ịkịọụ dei dọụmịnị. Mọkpọ zịnị tọnmọdịaye dii. Kẹnị owadẹ bịnaraụ, bá kụrọ kpọ nanagha, anịduonị ámịnị ba ánị bọlọụ Jehovah karịtimi bara kọn ụ karịgha duonị ámịnị ba pọwẹịgha. Ị́ kpọ bei biibịbịbo kọn angọ bidẹ wẹrịmị: ‘Jehovah kọkọ ine erịmịnị a? Ine barasinwẹrị Jehovah karịmịnị yebo kọkọ wo tọrụyọma yelaaemi? Jehovah mọkpọ ine akị fịrịwenị a paaemi a o?’

² Omịnị mị biibịbịbo parụbịbị nanaghasẹ tamanaịnyo nanamịnị. Bei egberitịbịmị omịnị (1) Jehovah wo tarịgha bara irorodaba, (2) Wo tọn bụọmọdẹ irorobo kọkọ kịlịkịlị-emi tamanaịnyọ ị́ mọ nanadaba (3) Omịnị Jehovah tọrụyọma ye a paagha bara irorodaba Bible duo baratụa wo pịrịmu yeama wo mọ ditụamịnị.

TAMANAỊNYỌ NANADABA BARATỤA WO PỊRỊMỊNỊ YEBO

3. Wo a bụụdọọnmịnị biibịbịama wo mọ nanawẹrịemi aba, teeki baratụa wo pịrịmịnị a o?

³ Wo a buudọọnmịnị biibịbịama wo mọ nana wẹrịemi aba, kẹnị ye nẹ baratụa wo pịrịwẹrị wo tamanaịnyọ dẹịnmọmụ yemị, omịnị Bible kị duo parụbịbịbo dọụ. Bịsẹ bara wo mọ mịẹdaba, omịnị Jehovah mọ naịn dẹịnmịnị bá wo peibolou kpọ kụrọ dẹịnmịnị”—1Cor. 16:13.

4. Omịnị tebara ka kị “ebibara yebosẹ dii pẹlẹ” a paaemi a o? (1Thessalonians 5:21)

⁴ Wẹri 1Thessalonians 5:21 (goo.) Bible gbaa wo pịrị wẹrịemi barasẹ omịnị “ebibara yebosẹ dii pẹlẹ.” Omịnị tebara ka kị bịsẹ bara mịẹmịnị a o? Omịnị Bible kọn wo pei wẹrịemi yebo ditụa, yebo kọkọ gesii-emi bara ditụa. Gbaamaba, asịyaịpesịbị Jehovah ụ tarịgha bara wo ịkịọụma sụọdaba, teeki wo mọ mịẹmịnị a o? Wo ịkịọụ bọọ sụọ yebị kọkọ kirii-emi bara kị ụ mọ tọn agbẹị-emi a o? Bịsẹ baragha, omịnị “ebibara yebosẹ dii pẹlẹ” agbẹị-emi, Jehovah kọn ụ dimọ wẹrịemi bara ka ki angọ dii agbẹị-emi.

5. Omịnị tebara ka kị Jehovah wo biibịbịbọ parụ barabị naamịnị a o?

⁵ Omịnị Bible goomịnị ifiesẹ, Jehovah wo mọ mọ́ ẹrẹmịnị. Anịa omịnị biibịbị nana wẹrịemi aba, Jehovah duobo parụbịbị wo mọ nana dọụmịnịsẹ omịnị angọtụa yeama mịẹmịnị. Omịnị bịsẹ biibịbị gbelemọ Bible yọama goomịnị, bá Jehovah ogbo mịẹpaamọdẹ yebo akị Bible tụamọ ebibara tuudọụ. (Prov. 2:​3-6) omịnị tee Jehovah yarịmịnị, baratụa wo pịrịdá parubịbịbo akị Bible duo nana bara kpọ kọn Jehovah bii. Bịsẹ bara mịẹdaba, omịnị baratụa wo pịrịmu Bible tolumọye dọụ paamọdá goo. Bịble boloubị peibolou nana kịmịama nẹ wo iroromịnị bara irorotimi otuama mịẹbara tolumọ angọ pịrị.

6. Wo yetolumọyọbo tebara ka kị baratụa wo pịrịwẹrị wo tamanaịnyọbo dẹịmọmịnị a o ?

⁶ Jehovah wo yetolumọyobo kpọ duo wo mọ mọ́ ẹrẹmịnị. Omịnị ifiebosẹ yetolumọyọ amúmịnị bị, zụa ifeama ẹrẹbịbị anịghakpọ kịmị parụbịbị wo gbele kụrọmọ a paaemi, wo a bụụdọọntimi biibịbịbo parụ a paaemi. (Prov. 27:17) Wo wẹrị zụa kịmị mịẹ tamanaịnmịnị yeama wo mọ kẹrị ẹrẹtei.

JEHOVAH Ị́ TARỊGHA IROROYE Ị́ MỌ NANAMỊNỊ ABA

7. Zụa kịmịama te biibịbị kị bii a paaemi a o?

⁷ ‘Jehovah kọkọ ine ẹrịmịnị a o?’ Ị́ kpọ bịsẹ bara irorodẹ wẹrịmị. Ị́mịnị kọkọ Jehovah tọrụyọ bọọ ye a paagha bara iroromịnị aba, ebebụ akpọsẹ tẹmẹowei mọ ikie-kẹrịmụ yọmị laa paagha fa bara ị́ mọ iroro kpọ paaemi. Kaanghaba Pẹrẹowei David kpọ bịsẹ iroroye nanamị. Anịkị duonị omịnị biimị: “O Jehovah, ị́mịni ye a paagha otu kị diimịnị, ịmịnị tọrụtụa ye kpọ a paagha kịmịtọbọụ kpọ dimịnị a o?” (Ps. 144:3) Ị́mịnị teyo kị duo parụbịbị nanamịnị a o?

8. Omịnị 1Samuel 16:​6, 7, 10-12, didaba, kịmịawọụ gbelemọ yọmị, Jehovah teeki ditụamịnị a o?

⁸ Omịnị Bible didaba, Jehovah kịmịotu pịrị diseimọmịnị outbo dịmịnị barabị gaan k’emi. Gbaamaba, Jehovah Samuel firịmọ Jesse warịma mú Jesse awọụbo kẹnị ụbọ sẹlẹwẹrị akị Pẹrẹ tụa dọụtimi ifiebị, Jesse wó ningina awoubo, sọnọma kị tịịn paamomị, David tịịngha, ụ kịrị zaụ dein-emi.b Anịa Jehovah David kị sẹlẹmi. (1Samuel 16:​6, 7, 10-12 goo.) Jehovah David adụdụbị emibara ẹrịmị—David kọkọ ụ tarịemi bara Jehovah mọ ẹrịmị.

9. Tetuu kị duonị Jehovah ị́ tarịemi eti ị́ mọ nana agbẹị-emi a o? (Foto kpọ dii.)

⁹ Jehovah kọkọ iné erịmịnị bara mịẹdịadẹ ụwọụbo kẹrị iroro. Ómịnị baratụa ị pịrịmụ tolumọyeama kọn ị́ pịrịmịnị. (Ps. 32:8) Jehovah tọrụtụa ị́ dimịnị bá ebibara ị́ nimi wẹrịemi kị duonị laa bịsẹ tolumọyebo kọn ị́ pịrị a paaemi. (Ps. 139:1) Bịsẹ tolumọyebo ị́ mọ akị tụa inyenrin bá arerebo ẹrịdaba, Jehovah kọkọ ị tarịemi eti ị́ mọ nana dẹịnmịnị. (1Chron. 28:9; Acts 17:​26, 27) Jehovah kọkọ iné angọtụamịnị yo mọ bá iné nana wẹrịemi ebi inyenrinbụọbo kpọ ẹrịmịnị, anịduonị ómịnị ị́ mọ mọ́ palịị kị dọụmịnị. (Jer. 17:10) Jehovah dọụmịnị yọmị, ị́mịnị wo tịịnbịbị kẹrịakịdá bo wo ikie-ụbọ a paa.—1John 4:19.

INÉ TỌN BỤỌMỌDẸ IROROBO KỌKỌ KỊLỊKỊLỊ-EMI TAMANAỊNYỌ Ị́ MỌ NANADABA

10. Wo tọn bụọmọdẹ irorobo wo mọ kẹrị irorodaba te biibịbịama kị wo mọ bii kpọ paaemi a o?

¹⁰ Bo kẹnị ifie ladaba, zụa kịmịama ánị tọn bụọmọdẹ irorobo kaanghaba kịlịkịlịgha bara kpọ iroromịnị. Ámịnị ebi fịrị bá sịlị nanamụ timi fomuun-ama ka barasinwẹrị beinmọ beinmọ Jehovah ogboma fịrịama wẹnịmịnị. Ámịnị biin kụraịama ka kị fịrịwẹnị Jehovah ogbo pịrịdẹ. Anịa bụọdẹ ifiebị á mọ mọ́ kẹnịyọ a fịrịwẹnị anịghakpọ fọụyọụtimi otubo sịlị nanadẹ bara ámọ ẹrị kpọ paaemi. Bịsẹ bara paadaba, ámịnị angọ bịị kpọ paaemi: ‘Jehovah fịrị duonị mị yebo ị mọ abarasin yomị, ịmịnị kọkọ ebidẹịn iroro kị tọn angọ pịrịmị? Anịghakpọ zụa ebi yeama iné bara duo pẹlẹ tẹịdẹ a?’

11. Psalm 73 gẹẹ oweibị te bụụdọọnye kị nana ma o?

¹¹ Ị́ kpọ bịsẹ iroroyebo nanamịnị aba Psalm 73 gẹẹowei kẹrị iroro. Ụ dii baramị, zụa kịmịama ye kpọ á gbeleigha, pọwẹị pọwẹị kị timi inyenrinmịnị bara kị paaemi. (Ps. 73:​3-5, 12) Wó á dii ifiebị, Wo Jehovah karịmịnị yọbị afẹn fịrị bara kị ụ mọ iroromị. Yebị ụ mọ irorodẹ ifiesẹ wo a buudọọnmị bá wo mịẹ suusụọmị. (Ps. 73:​13, 14) Omịnị tebara kị mịẹ ma o?

12. Psalm 73:​16-18 didaba, Psalm fun gẹẹ oweibị tebara ka kị wo bụụdọọn yọ kẹrịmọ-tịẹmọ ma o?

¹² Psalm 73:​16-18 goo. Psalm fun gẹẹ oweibị Jehovah karịwarị bọọ mú yọbị ụ mịẹ dọọ nanamị. Ómịnị laa ebibara akị ye-iroromị. Zụa kịmịama pọwẹịmịnị kị gbaa kpọ ámịnị ukiemọye nanagha bara ụ mọ leleimị. Wó wẹnịmị fịrịbị afẹn fagha bara ụ mọ nimi yọmị ụ mịẹ dọọ nanamị. Bịsẹ yọbị ụ mịẹ pẹlẹgha bara Jehovah karịmụ yọ gbinipẹlẹ kụrọmọmị.—Ps. 73:​23-28.

13. Iné tọn bụọmọdẹ irorobo ị mịẹ tamanaịnyọ nanamịnị aba, ị́mịnị tebara ka kị dọọ nanamịnị a o? (Foto kpọ dii.)

¹³ Ị́ kpọ Bible duo dọọ nana a paaemi. Tebara a o? Wẹrị Jehovah kọn ị pịrịdẹ yelaa yebo mọ, bá kọn ị́ pịrịmụ ebi yebo mọ akị akpọ kịmịbo nana wẹrịemi yebo tọnmọ dii, ámịnị Jehovah kọn ị pịrịdẹ taribo nanagha. Biin kịmịama ámịnị ukiemọye fagha duonị, ebi fịrị wẹnị bá nanaye nanamụ yọ kị yelaa á pịrị dẹịn-emi. Anịa Jehovah ukiemọye kọn ị́ pịrịdẹ, bịịn tariama kị bọlọụma timi ị korumịnị (Ps. 145:16) Wẹrị ba iroro dii: ị́mịnị zụa yeama a barasinwẹrị Jehovah karịgha wẹrị a, iné ụndụbị paamọtimi bara ị mọ nimi wẹrịemi a o? Gbesịmị: Jehovah mọ zịnịotu mo tarị yo kị duonị iroroama tọnmịnị kịmịsẹ ebidẹịn yeama kị nanamịnị

Ị́MỊNỊ JEHOVAH TỌRỤ BỌỌ YELAAGHA BARA IRORODABA

14. Zụa otu tebara k’emi a o, anịduonị ámịnị te biibịbị kị bii kpọ paaemi a o?

¹⁴ Zụa Jehovah karịmịnị otuama owadẹ, zụa otu dọọn kị pịrị ụyamọmịnị, zụa otu ba ịgaemi. Anịduonị ámịnị yelaa Jehovah pịrịgha bara tọn kpọ paaemi. Bịsẹ yọmị a mịẹwẹrị zụa ifieama bii kpọ paaemi, ‘Ịmịnị mọkpọ Jehovah tọrụ bọọ yelaaemi a o?’

15. Psalm 71 gẹẹ oweibị te eti kị nana ma o?

¹⁵ Psalm 71 gẹẹ owei kpọ bịsẹ iroroye nanamị. Anịduonị ómịnị tẹẹ Jehovah pịrịmị: “Ine angọ ba kụrọgha ifie ladaba, ị́ gbeinkoromọ kụmọ.” (Ps. 71:​9, 18) Bịsẹ bara kị paa kpọ Psalm 71 gẹẹ oweibị nimi wẹrịemi, omịnị Jehovah abarasingha ifiesẹ, Jehovah baratụa ụ pịrịmịnị. Kụnụmọbị Psalm 71 gẹẹ oweibị bo nimi-mị, adudusẹ akị Jehovah karịmịnị kịmịbo, angọ kị kụrọgha kpọ, Jehovah tọrụyọ bọọ yelaaemi.—Ps. 37:​23-25.

16. Okosudẹ otubo te ụwọụama ka kị yelaa Jehovah pịrịemi a o? (Psalm 92:​12-15)

¹⁶ Okosudẹ otubo, Jehovah kọn á dii wẹriemi bara ka kị angọ dii. Ámịnị ba angọ kụrọgha kị gbaa kpọ Jehovah baratụa á pịrịwẹrị tẹmẹ-anga bọọ bọlọụ bụọmịnị. (Psalm 92:​12-15 goo.) Anịduonị ị́ ba laa mịẹgha fa yebo kẹrị iroromụ yọ dii a, ị́ laa mịẹmụ yebo kị kẹrị iroro. Gbaamaba, ị́mịnị iné ebi mịẹdịaye mọ bá zịnịotu a dịsẹ nana yọ mọ kọn zịnịotu kụrọ a paaemi. Ị́mịnị laa Jehovah bei biin kụraịbosẹ baratụa ị́ pịrịdẹ bara mọ iné nana wẹrịemi ukiemọye mọ gbaa zịnịotu pịrị a paaemi. Bịsẹ yo bụọmọ kpọ, ị́mịnị laa tẹẹ zịnịotu pịrị a paaemi, iné tẹẹbịbịbọ yelaa fa k’emi. (1Pet. 3:12) Wo emibara emi bara, wosẹ laa ye kọn Jehovah mọ wo bịnaotubo mọ pịrị a paaemi.

17. Tetuu kị duonị omịnị wo angọ kọn zịnịotu tọnmọ agbẹịgha o?

¹⁷ ị́mịnị ba iné dọụbara akị fịriwẹnị Jehovah pịrịgha yobị ị́ mịẹ pọwẹịgha kpọ paaemi, anịa iné tịẹkiri wẹnịmịnị fịrịbo Jehovah tọrụkẹrị-emi bara nimi. Ị́mịnị iné angọ kọn zịnịotu tọnmọ dọụmịnị kpọ paaemi. Anịa bịsẹ bara mịẹkụmọ! Tetuu a o? Jehovah ị́ kọn zịnị kịmị tọnmọgha. (Gal. 6:4) Wẹrị dii, Mary biin sịlịama kọn fei wẹrịemi fụrụpaaye ka kị Jesus pịrịmị. (John 12:​3-5) Anịa yei fịdẹ erema sịlị dolọ ka kị karịwarịbị otuoye mịẹmị. (Luke 21:​1-4) Bịsẹ bara kị gbaa kpọ Jesus ánị maa kịmị mịẹ yebo didụbamọmị. Jehovah kpọ omịnị ụ kẹrịkụrọmọ, bá ụ tarị wẹrịemi kị duonị mịẹmịnị yesẹ didụbamọ wẹrịemi.

18. Teeki baratụa wo pịrịwẹrị tamanaịnyọ dẹịnmọmịnị a o? (“Bible Baratụa Ị Pịrịwẹri Tamanaịnmịnị Yọ Dẹịnmọmịnị” ekpedi kpọ dii)

¹⁸ Wosẹ zụa ifieama tamanaịnyọ nanamịnị. Anịa wo ẹrịdẹ baramị Bible kị baratụa wo pịrịwẹrị laa bịsẹ yọ dẹịnmọmịnị. Anịduonị angọtụa ine tamanaịn nanamịnị ịkọkịbo dẹinmọdá eti nana. Jehovah iné emibara nimi wẹrịemi. Ụ karịmụ yọ duonị iné tọndẹ irorobo mọ iné kụndẹ ịkịanbọ mọ Jehovah mọ ẹrịmịnị, Jehovah kọkọ ị́ gbẹẹmịnị. Jehovah, ụ karịmịnị otubosẹ tarị wẹriemi bá tọrụtụa á dimịnị.