EGBERITỊBỊ 45
DUMA 138 Beauty in Gray-Headedness
Peibolou Nana Otubo Gbaa Kunumọ Egberibo Duo Yetolumọ Akị
“Kịlịkịlị-nimiye okosuotubo mọ k’emi bara, ị́ mọ nimigha o? bá inyenrintimi alamịnị yọbị kịmị mịẹ ye a sụọtuunimiye nanamịnị bara ị́ mọ nimigha?”—JOB 12:12.
TOLUMỌ DỌỤMỊNỊ YEBO
Omịnị Jehovah dọụbara mịẹdaba bei tịẹkiribị tarịama wo laamịnị bá bei bọlọụ kpọ fagha fagha ụndụ wo laamịnị.
1. Tetuu kị duonị, omịnị okosuotuama duo ye tolumọ akị a paaemi a o?
OMỊNỊ wo ụndụ bọọ yelaa iroroama tọn angọ pịrị dọụmịnị ifiesẹ, gesii tolumọye dọụ wẹrịemi. Itukosuotubo mọ bá zịnị kasụọdẹ bịna otuama mọ bịsẹ timitimi ebi tolumọyeama akị wo pịrị a paaemi. Ánị kụraịbo wo kụraịbo dẹịn-emi kị gbaa kpọ, ifiebosẹ ánị gbaamịnị egberibo kọn oruseri egberiama dimọ kụmọ. Jehovah omịnị okosuotu duo biin yeama tolumọ akị kị dọụ wẹrịemi. Ámịnị bei akpọ bọọ inyenrintimi alaa wo dẹịndẹ duonị, biin yeama ẹrịdẹ, anịduonị, ye a sụọtuu-nimi bá kịlịkịlị nimiye kpọ nanadẹ.—Job 12:12.
2. Bei egberitịbịbị omịnị teeki tolumọ dọụmịnị a o?
2 Bible ifiebị, Jehovah, peibolou kẹrịkụrọmọ wẹrị okosuotubo kọn wó kịmịbo tolumọ bá á kụrọmọtimimị. Wo wẹrị, Moses, David, bá fịrịmọpaa-owei John mọ ditụa. Bei kịmịbo bẹbẹ ifieama kọọ inyenrinmị, bá bẹbẹ yeama kị á paamọmị. Anịa, ámịnị bo ánị fịịmụ ifie mọ naịndẹmị, ámịnị kịlịkịlị tolumọyeama akị, naa owagha kịmịbo pịrịmị. Bei peibolou nana okosuotubosẹ Jehovah dọụbara mịẹtimi tuulaamụ yọkị yelaadẹịn-emi bara gbaamị. Bei tịẹkirimị Jehovah ánị gbaa kịlịkịlị tolumọyebosẹ akị Bible bọọ gẹẹ koromọwẹrị wo tolumọmịnị. Okosuotu bá naa okosugha otu kpọ laa bei kịlịkịlị tolumọyebo duo kụrọmọye nana a paaemi. (Rom. 15:4; 2Tim. 3:16) Bei egberitịbị bị, bei tara peibolou nana okosuotubo, ánị fịịmụ ifie mọ naị ifie bọọ gbaayebo mọ bá ánị gbaayebo wo kụrọmọmụ barabị omịnị mọ kẹrị ẹrẹteimịnị.
“Ị́MỊNỊ INYENRINTIMI ALAA IFIE KỊ LAA MỊNỊ”
3. Moses te fịrịama kị wẹnị ma o?
3 Moses angọtụawẹrị wó ụndụsẹ kọn Jehovah dọụbara kị mịẹmị. Moses bụrụ fịrịwẹnị, ụgụlapẹlẹ fịrịwẹnị, fun-ama gẹẹ, bá kịmịotu daaowei kpọ a paamị. Moses ụ paamọyebo duo biin yeama kị tolumọ akịmị! Israel-otubo Egypt ibe duo paabotimi ifie kpọ Moses kị ánị bọlọụdaamị, bá Jehovah tamama yebo mịẹtimi ifie kpọ Moses tọrụmọ tọrụmọ ka kị yebo ẹrịmi. Jehovah Moses ka kị Bible bọọ emi bọlọụ sọnran funbo mọ bá Psalm 90 mọ gẹẹmị, kaanghaba ómịnị kị Psalm 91 kpọ gẹẹ wẹrịemi. Ómịnị kị kaanghaba Job fun kpọ gẹẹ wẹrịemi.
4. Moses te otu kị kụrọmọ ma o, bá tetuu a?
4 Moses 120 kụraịama kị baị wẹrị fịịmị. Moses fịịmụ ifie mọ naịndẹmị, ómịnị Israel-otubo tịịn bẹnịmọwẹrị á paamọyebo mọ ánị ẹrịdẹ yebo mọ akị ánị ukiemọmị. Israel-otubo zụa asịyaịpesi a timi ifie ka Jehovah mịẹ tamamayebo mọ bá Ómịnị Egypt-otu bara duo á zụọbụọmọ bara mọ ẹrịmị. (Ex. 7:3, 4) Jehovah Kwekwe Abadịmị akị maa-anga dịẹmọ wẹrị á pịrị wẹnịbẹịn bá Pharaoh mọ wó sụụ-otubo mọ baásiin bara kpọ ámịnị mọ ẹrịmị. (Ex. 14:29-31) Jehovah ogbo abadị bọọ á kekeree bara kpọ ámịnị mọ ẹrịmị. (Deut. 8:3, 4) Ámịnị alaghatimi Kikoromọ Wẹrịemi Ogbo duosụọmịnị. Anịa Moses fịịmụ ifie mọ naịndẹ duonị, ómịnị bịsẹ fomuunbị akị á kụrọmọmị.a
5. Deuteronomy 30:19, 20 bọọ Moses gbaa egberibo, te kụrọmọye ka kị Israel otubo pịrị ma o?
5 Moses te yeama kị gbaa ma o? (Deuteronomy 30:19, 20 goo.) Moses bọlọụma timi Israel-otubo ebi yebo kọn ánị ukiemọmị. Jehovah baratụa á pịrị wẹrịemisẹ, Israel-otubo bei kikoromọ wẹrịemi ogbo bọọ inyenrintimi alamịnị. Ogbo kpọ ebikụrọmọ fa, bá fịyaị kpọ ebibara kị ogbo bọọ sọụtimimị. Moses ogbo timimụ bara kpọ gbaa á pịrịmị! Ụ gbaamị: “Ánị kẹrịgha wẹrị ebi bá dụba ama-ama kị timimịnị, ánị mịẹtụagha ebi yeama kị warịbo kpọ a timimịnị, ánị sougha wẹrị beni-oguguama kpọ timimịnị, bá ánị gborogha olive tịịn-ama mọ vine kiri-ama mọ kpọ timimịnị.”—Deut. 6:10, 11.
6. Tetuu kị duonị Jehovah zịnị ibeama bụọmọwẹrị Israel ibe dẹịnmọ ma o?
6 Moses berifaanye kpọ kọn Israel-otubo pịrịmị. Ámịnị Jehovah kikoromọ wẹrịemi ebi ogbo bọọ inyenrintimi alaa dọụmịnị ifiesẹ, ámịnị Jehovah olokobo kẹrị wẹnịmịnị. Moses gbaa á pịrịmị, “ụndụ kị sẹlẹ akị,” Jehovah gbaa bara diwẹnị bá ụ mọ mọ́ “kpẹkpẹrẹ timi.” Anịa, Israel-otubo bei egberibo gbein koromọwẹrị Jehovah dọụgha yeama kị mịẹmị. Anịduonị Jehovah Assyria-otubo mọ bá Babylon-otubo mọ bụọmọ wẹrị á dẹịnmọmị, bá á kẹrịakịmị.—2Ki. 17:6-8, 13, 14; 2Chron. 36:15-17, 20.
7. Omịnị Moses gbaa egberibo duo teeki tolumọ akị ma o? (Foto kpọ dii.)
7 Te tolumọye kị wo laaemi a o? Gbaa bara diwẹnịmịnị yọmị ụndụ akị kịmị pịrịmịnị. Omịnị kpọ Israel-otubo bara alaghatimi Jehovah kikoromọ wẹrịemi ayakpọ duosụọmịnị. Alaghatimi kiriogbosẹ waị paradise a paamịnị. (Isa. 35:1; Luke 23:43) Satan mọ wó seitẹmẹbo mọ kpọ ba timigha fa. (Rev. 20:2, 3) Ikpe karịbụọ kpọ ba kịmịotu lẹlẹmọwẹrị Jehovah dọụghaye mịẹgha fa. (Rev. 17:16) Akpọ daakụrọbo kpọ ba kịmịawọụ penimọgha fa. (Rev. 19:19, 20) Gbaa bara diwẹnịgha kịmị benebene paradise a sụọgha fa. (Ps. 37:10, 11) Kịmịsẹ Jehovah gbaa bara kị diwẹnịmịnị, bịsẹ baramị dọọ bá kẹnịwẹnịmọ kpọ mịẹpaamọmịnị. Anịduonị, bịsẹ ogbo bọọ inyenrinmịnị kịmịbosẹ tarị bá eti akị zọzọ a nanamịnị. (Isa. 11:9) Omịnị timi bịsẹ ịmbẹlẹ ifie kị korumịnị! Omịnị Jehovah gbaa bara diwẹnịdaba, zụa kụraịama bẹtịbị ka kị paradise a timigha fa, anịa inyenrintimi bẹseri bẹseri kị laamịnị.— Ps. 37:29; John 3:16.
Omịnị Jehovah gbaa bara dimịẹdaba, omịnị paradise kọọ inyenrintimi bẹseri bẹseri laamịnị (Gooyọ 7 dii)
8. Fagha fagha ụndụ ukiemọyemị, tebara ka kị baratụa zịnị ibe a egberigbaatimi aladẹ bịnaowei pịrị ma o? (Jude 20, 21)
8 Omịnị Jehovah kikoromọ wẹrịemi fagha fagha ụndụmị akị ịkịọu a tụa inyenrinmịnị ifiesẹ, paaye-paaye, bá paabara-paabara, wosẹ Jehovah gbaa bara kị diwẹnịmịnị. (Jude 20, 21 goo.) Bei kikoromọyemị, baratụa wo pịrịwẹrị wo suusụọmịnị yọbo kpọ dẹịnmọmịnị. Zịnị ibe duobo Africa ibe bọọ egberigbaatimi aladẹ bịnaowei suusụọyọ nanamị, ómịnị mọ kị gbaamị: “Bei suusụọ yobị ị́ mịẹ akị paradise duosụọgha fa bara ị mọ nimi ifiebị, ịmịnị ine adụdụsẹ akị tẹẹbịbị mịẹmị, Jehovah ine tẹẹbịbị parụmị wó baratụa yọ duonị ịmịnị laa dẹịnmọmị.”
“INÉ ỤNDỤ MỊ PỤỌSỊ-PỤỌSỊ KỊ PAAMỊNỊ”
9. Te bụụdọọnyeama kị David paamọ ma o?
9 Pẹrẹowei David Jehovah kịmịbo daá bá Jehovah dọụye kpọ mịẹmị. Ómịnị duma tuun, fun gẹẹ, Suu-olotu, bá bụrụfịrị kpọ wẹnịmị. Biin bụụdọọnyeama kị ụ laamị. Pẹrẹowei Saul ụ baa dọụmị, anịduonị kẹnịyọ a timi a paagha. David bo Pẹrẹ a sụọdẹmị, wó tọbọụ Absalom wó pẹrẹ-kasịbị akị dọụtimi duonị, David bá koro baịnmị. Bei paayebo mọ bá wó bẹtịbị mịẹkiri yeama k’emi kpọ, David Jehovah karịmụ yọmị dẹịnsụọgha, ómịnị wó adụdụsẹ akị Jehovah karịtimi tuulaami. Anịkị duonị omịnị Bible didaba, Jehovah David akị “[Wó] adụdụ mịẹ pọwẹịmọ owei” kị tịịnmị. David gbaa egberibo omịnị mọ pei agbẹị-emi!—Acts 13:22; 1Ki. 15:5.
10. Tetuu kị duonị David zụa egberiama gbaa Solomon pịrịḍe kị Solomon pẹrẹ a sụọ ma o?
10 David bụọdaba Solomon kị pẹrẹ-kasị bọọ tịtẹmịnị, wo wẹrị David gbaa wó tọbọụ Solomon pịrị egberi ditụa. Jehovah Solomon sẹlẹwẹrị, karịwarị kẹrị akị Jehovah tokonimị, bá yalịyalị karịbụọ kpọ mịẹbọlọụ a múmị. (1Chron. 22:5) Bịsẹ yebo mịẹmụ yọmị, bụụdọọnyeama Solomon paamọmịnị. Anịa David te yeama kị gbaa Solomon pịrị mịnị a o? Wo wẹrị David gbaa egberibo ditụa.
11. Omịnị 1Kings 2:2, 3 bọọ gẹẹ wẹrịemi yebo didaba, David te kụrọmọye ka kị Solomon pịrị ma, Solomon gbaa bara diwẹnị ifiemị, tebara kị paa ma o? (Foto kpọ dii.)
11 David teeki gbaa ma o? (1Kings 2:2, 3 goo.) Solomon Jehovah gbaa bara diwẹnịdaba, wó ụndụ mị pụọsị-pụọsị kị paamịnị bara David mọ gbaa Solomon pịrịmị. Solomon ụndụ mị biin kụraịama pụọsị-pụọsị kị paamị. (1Chron. 29:23-25) Solomon kẹnị ebikụrọmọ karịwarị kẹrị Jehovah pịrị, Bible bọọ zụa fun-ama gẹẹ bá wó ẹrẹ egberi ụngbọbo kpọ Bible bọọ zụa yọama emi. Biin kịmịama kị Solomon nana yebo mọ bá wó kịlịkịlị-nimiye mọ naamị. (1Ki. 4:34) Anịa Solomon Jehovah gbaa bara diwẹnịgha ifiesẹ wó ụndụmị pụọsị-pụọsị gha fa bara David mọ gbaa wẹrịmị. Solomon bo okosudẹ ifiemị, ómịnị zịnị oruama kị karịmị. Anịduonị, Jehovah wó tarịbo akị Solomon bara duo kọnsiinmị, anịduonị Solomon ba kịlịkịlị-nimiye nana wẹrị ebibara akị Israel-otubo daágha.—1Ki. 11:9, 10; 12:4.
David gbaa Solomon pịrị kunumọ egberibị mịẹ gaan amọ, omịnị Jehovah peidaba, Ómịnị baratụa wo pịrịwẹrị kịlịkịlị iroroama tọn angọ pịrịmịnị (Gooyọ11-12 dii)b
12. David gbaa egberibo te ka kị wo tolumọ ma o?
12 Teeki wo mọ tolumọ akị ma o? Gbaa bara diwẹnịmịnị yọmị tarịama akị wo pịrịmịnị. (Ps. 1:1-3) Jehovah Solomon mịẹ oroupaa bá nanayeama kọn ụ pịrịmị, Jehovah bịsẹ yebo ka kị wo kpọ pịrịmụ bara gbaagha. Anịa omịnị Ọkpọnanaowei gbaaye peidaba, ómịnị wo kekeremịnị bá kịlịkịlị-nimiye kọn wo pịrịwẹrị ebi iroroama tọnmịnị. (Prov. 2:6, 7; Jas. 1:5) Jehovah kọn wo tolumọdẹ yebo baratụa wo pịrịwẹrị fịrị, opu sukulu, angọmịẹ ganagana yeama bá sịlị gbelemọ yọmị ebi iroroama tọn angọ pịrị a paaemi. Omịnị Jehovah gbaa egberibo diwẹnịdaba, omịnị ifiebosẹ Jehovah mọ ebitịẹkiri ka timimịnị, bá fagha-fagha ụndụ kpọ nanamịnị. (Prov. 2:10, 11) Omịnị ebi ikieotuama nanamịnị, bá wo warịbolou kpọ pọwẹị nanamịnị.
13. Teeki baratụa Carmen pịrịwẹrị pọwẹị nana ma o?
13 Carmen, Mozambique emi ere, ámịnị opu funwarị a múdaba, ánị ụndụmị pụọsị-pụọsịmụ bara kị tọnwẹrịmị. Amịnị opu school amúwẹrị architecture (warị plan drawmịnị bara) kị tolumọmị. Amịnị mọ kị gẹẹmị, “ine tolumọtimi yemị ị dịsẹ kụrọmọmị. Anịa ịmịnị ifie nanawẹrị zịnị ye mịẹgha. Ịmịnị 7:30 a.m. duomú 6:00 p.m laasẹ school yọ ka emi. Ifie nanawẹrị yetolumọyọ a múmụ yọ kpọ kụrọ ị pịrịmị, anịduonị, ịmịnị tẹmẹanga bọọ suusụọmị. Ịmịnị Jehovah gbaa wẹrịemi bara diwẹnịgha bara kị iroromị.” (Matt. 6:24) Amịnị tẹẹbịbị mịẹ bá wo funbo kọn tuudọụmị. Amịnị mọkpọ gbaamị: “Itukosuotubo mọ bá ị yin mọ tolumọ bẹbẹ-ama kọn ị pịrị ifiebị, ịmịnị opu school a barasinwẹrị beinmọ beinmọ ụwọụpẹlẹ fịrịwẹnịmụ bara tọn angọ pịrịmị. Bịsẹ tọnpẹlẹ yemị, baratụa ị pịrịwẹrị ebiye sẹlẹ angọ pịrịmị, bá ị mịẹ pọwẹị kpọ nanamị.”
14. Moses mọ David mọ te yelaa egberi kị gbaa ma o?
14 Moses mọ David mọ Jehovah tarị bá wó gbaa egberi peimụ yọ kpọ yelaa emibara nimimị. Anịduonị, ánị fịịmụ ifie mọ naịndẹmị, ámịnị zịnịotu kpọ peibolou akị Jehovah a tụa bá Jehovah gbaa bara dimịemụ bara kọn á kụrọmọmị. Jehovah a barasindẹ otubo ba wó ikieotuama a paagha fa bá Jehovah kikoromọdẹ tarịbo kpọ laa akịgha fa bara kpọ ámịnị mọ gbaamị. Ánị gbaa yemị yelaa wo kpọ pịrịemi. Moses mọ David mọ ifie bụọdẹ kpọ, zịnị Jehovah odubowei peibolou akị Ọkpọnanaowei a tụamọ yọbị yelaaemi bara gbaamị.
“MỊ PỌWẸỊ DẸỊN-EMI PỌWẸỊ FA”
15. Fịrịmọpaaowei John ụndụtimi te yeama kị ẹrị ma o?
15 Fịrịmọpaa-owei John Jesus Christ mọ naịn kị timimị. (Matt. 10:2; John 19:26) Jesus kiriogbo bọọ egberigbaa fịrị wẹnịtimi ifiesẹ John ụ mọ mọ́ emi, Jesus tamamaa yeama mịẹ ifie, bá wó ụyafịtimi ifie kpọ John ụ mọ mọ́ timimị. Jesus á mọ baa ifie mọ bá Jesus waị fịịyọ duoseribo ifie kpọ ẹrịmị. Biingha peibolou nana kịmịama dọlọ dọlọ mịetimi bo biinwẹrị ebiegberi “gbaa kịmịotu-emi yọbosẹ laa” ifie kpọ ómịnị mọ ẹrịmị—Col. 1:23.
16. John gẹẹ funbo arere mịẹ te kịmịama kị pịrị ma o?
16 John okosudẹ ifiemị, Ọkpọnanaowei revelation fun gẹẹmụ fomuun akị ụ pịrịmị. (Rev. 1:1) Jesus egberigbaa fịrị gbelemọ nia funbo John kpọ kẹnị gẹẹmị. Ómịnị zịnị tara fun-ama kpọ gẹẹmị. Ómịnị wó tarụkaramọ fun gẹẹ peibolou nana Christtuuduo-owei Gaius kị pịrịmị, anị John tarị wẹrịemi tẹmẹanga tọbọụ. (3John 1) Bịsẹ ifiemị, John biin tẹmẹanga awọụama kị nanawẹrịmị. Mị peibolou nanaowei gẹẹ funbo arere mịẹpaamọ Jesus tuuduo-otubo pịrịmị, bá arere mịẹpaamọ wo kpọ pịrịmịnị.
17. Omịnị 3John 4 gbaa bara didaba, teeki kịmị mịẹ pọwẹị nana kụrọmọmịnị a o?
17 John teeki gẹẹ ma o? (3John 4 goo.) Ọkpọnanaowei gbaa bara mịẹmịnị yọmị pọwẹị kọn kịmị pịrịmịnị bara John mọ gẹẹmị. Ómịnị tarụkaramọ fun gẹẹ ifiemị, zụaotu ikpe tolumọ yeama mọ bá dịẹdịẹ inyenrinbụọ mọ mịẹpaamọmị. Anịa, zụaotu “gesii katimi wẹnịmịnị,” ámịnị Jehovah gbaa egberibo pei “bá wó olokobo kị diwẹnịmị.” (2John 4, 6) Bei peibolou nana otubo John mọ Jehovah mọ mịẹ pọwẹị nanamị.—Prov. 27:11.
18. Omịnị te ka kị John gẹẹ egberibo duo tolumọ akị a paaemi a o?
18 Omịnị teeki tolumọ akị ma o? Peibolou nana yọmị pọwẹị mịẹ paamọmịnị. (1John 5:3) Gbaamaba, omịnị kọkọ Jehovah mịẹ pọwẹị nanamịnị bara wo mọ nimi yọmị wọ kpọ mịẹ pọwẹịmịnị. Omịnị dadiyebo dẹịnmọwẹrị wo dọụbara mịẹmịnị yọmị wó mịẹ pọwẹị nanamịnị. (Prov. 23:15) Angel otubo kpọ pọwẹị nanamịnị. (Luke 15:10) Wo bịnaotubo dadiyeama asụọ bá kịmịama pịrị ụyamọmịnị kị gbaa kpọ ámịnị mokpọ ánị peibolou kẹrị kụrọmọmịnị yọbị, wosẹ mịẹ pọwẹị nanamịnị. (2Thess. 1:4) Omịnị Jehovah mọ kpẹkpẹrẹẹtimi dụụ laadaba, Jehovah Satan sei akpọ gbein gọgọlọ daba, omịnị Jehovah dọụbara diwẹnị timi tuulaa yọbị wo mịẹ pọwẹị nana kụrọmọmịnị.
19. Gesii bị kọn kịmịotu tolumọ fịrị gbelemọ yobị bịnaraụ Rachel teeki gbaa ma o? (Foto kpọ dii.)
19 Omịnị ebiegberi gbaa zịnịotu pịrịmịnị yọbị wo mịẹ pọweịmịnị. Rachel, Dominican Republic ka inyenrinmịnị bịnaraụ gbaamị, Ọkpọnanaowei emibara kọn kịmịotu tolumọmịnị yọbị dụba fomuun kị wo laaemi. Ámịnị baratụa kịmịama pịrịwẹrị bo Jehovah karịdẹ, bịsẹ otubo gbelemọ yọbị, á gbaamị: “Ine Bible akị tolumọdẹ otubo Jehovah tarị, eti akị wó atụa bá wó mịẹ pọwẹị nanamịnị yọbị ị mọ ẹrịmịnị ifiesẹ, ị mịẹ pọwẹịmịnị, bẹbẹ kọn gbaa kpọ paagha. Bịsẹ pọwẹịmị dụba ine angọtụa á tolumọ yọ kpọ dẹịn-emi.”
Omịnị zinịotu tolumọwẹrị bo Jehovah tarị bá wó gbaa bara mịẹmịnị yọmị wo mịẹ pọwẹị nanamịnị (Gooyọ 19)
PEIBOLOU NANA OTUBO GBAA KUNUMỌ EGBERIBO DUO ARERENANA
20. Te ụwọụama kị omịnị Moses, David, bá John mọ lei-emi a o?
20 Moses, David, bá John mọ inyenrintimi ifie mọ wo ifie mọ bẹbẹ paaemi. Anịa zụa lei-emi yeama emi. Ámịnị Ọkpọnanaowei kị karịmị, omịnị kpọ Ọkpọnanaowei kị karịmịnị. Ánị mịẹ baramị, omịnị kpọ tẹẹ Jehovah kị pịrịmịnị, eti kọn wo atụa wẹrịemi, bá wó tolumọyebo kị diwẹnịmịnị. Jehovah tarịama á pịrị baramị, omịnị kpọ wó gbaa bara diwẹnịdaba Jehovah tarịama kọn wo pịrịmụ eti wo mọ nana wẹrịemi.
21. Bei bọlọụbị te tarịama kị Moses, David, bá John mọ gbaa egberibo peimịnị otubo laamịnị a o?
21 Pebida wosẹ peibolou nana otubo gbaa kunumọ egberibo peidá Jehovah olokobo diwẹnị. Omịnị bịsẹ bara mịẹdaba wo mịẹmịnị yebosẹ pụosị-pụọsị kị paa wo pịrịmịnị, bá omịnị inyenrintimi “alaa ifie kị laamịnị!” (Deut. 30:20) Bịsẹ ifie laadaba, mịnị ifiebosẹ pọweịtimi wo tarị nana agọnọ Daụ karịmịnị. Jehovah wó kikoromọ yebosẹ mịẹ beinmọdaba, ebi akị wo tọnmịnị bara dẹịnmịnị, omịnị laa bẹbẹ kọn gbaagha fa.—Eph. 3:20.
DUMA 129 We Will Keep Enduring
a Biin Israel otu Jehovah Kwekwe Abadi bọọ mịẹ tamama yemị ẹrịmị anịa ámịnị ụndụtimi Kikoromọ wẹrịemi Ogbo duo sụọgha. (Num. 14:22, 23) Sia kụraị anịghakpọ sia kụraị dẹịnwẹrị ẹrẹtụadẹ oweibosẹ ogbo abadị bọọ fịịmụ bara kị Jehovah mọ gbaamị. (Num. 14:29) Anịa, Joshua, Caleb, biin kala awọụama bá Levi zuutu mọ Jordan Tọrụ bẹịnwẹrị Canaan duosụọmị.—Deut. 1:24-40.
b FOTOBO EMIBARAM: Kọnọanga: David zụa kịlịkịlị egberiama gbaa Solomon pịrịmịnị. Amabara: Beinmọ beinmọ ụwọụpẹlẹ fịrị wẹnịmịnị school emi bịnaotu, Jehovah ogbo mịẹpaamọdẹ tẹmẹanga fịyaịama fịmịnị.