Benibilemụ Yọbị Ifie Famọ Kụmọ

1. Te ebi tuuama kị duonị ị́mịnị benibile agbẹị-emi a o?

Ị́ KPỌ Jehovah, ebi yebosẹ kọn ị́ pịrị bá ụndụ kpọ kọn ị́ pịrị owei bị tarị wẹrịemi a? Ị́mịnị ụ tarị wẹrịemi bara mịẹdịa dọụmịnị a? Ebidẹịn ụwọụ mị anị ị́mịnị angọdịẹpaamọ ụ pịrị bá beni a benibilemụ yọbị. Mịẹdaba ị́mịnị bo Jehovah warịbolou kịmị ka paadẹ. Jehovah bo ị́ Daụ bá iné Ikieowei ka paa wẹrị ị́ tolumọ bá ị́ kekeremịnị. (Ps. 73:24; Isa. 43:​1, 2) Ị́mịnị angọdịẹpaamọ wẹrị benibile daba ị́mịnị laa fagha fagha ụndụ kpọ nanamịnị.—1Pet. 3:21.

2. Omịnị bei egberitịbịmị teeki tolumọ dọụmịnị a o?

² Ye iné benibilemụ yọ tịẹmọ wẹrịemi a? Bịsẹ bara aba, ị́mịnị bẹtịbị fa. Biin kịmịama kị ánị iroromịnị yebo mọ inyenrinbụọbo mọ dei yọama mịẹwẹrị benibiledẹ. Bịsẹ otubo bei tịẹkiribị pọwẹị pọwẹịtimi Jehovah karịmịnị. Ị́mịnị teeki ka kị bọlọụ kụraị sọnransii Christtuuduo-otubo benibileye duo tolumọ akị ma o? Wo wẹrị á paamọ bụụdọọnyebo mọ bá ánị mịẹdịa yebo duo tolumọ akịmụ yebo dịtụa.

SAMARIA-OTUBO BENIBILEMỊ

3. Zụa Samaria-otu teeki mịẹ dẹkị benibilemịnị a o?

³ Jesus ifiebị Samarịa-otubo Shechem mọ Samaria mọ amabo ka timimị, anị Judea tuburu anga ka timi ama-ama, ámịnị ánị bẹtịbị karịbụọ nana wẹrịmị. Ámịnị ebibara Ọkpọnanaowei Egberi nimi dẹkị benibile agbẹị-emi. Samaria-otubo Genesis duomú Deuteronomy bẹtịbị kị Ọkpọnanaowei fun bara kị akị wẹrịemi, kaanghaba Joshua fun kpọ sụọemi. Deuteronomy 18:​18, 19 gbaabara bị, ámịnị Messiah bomịnị bara pei wẹrịemi. (John 4:25) Anịa mịẹdẹkị ámịnị benibilemịnị bị, Jesus kị bịsẹ kikoromọ wẹrịemi Messiah bara ámịnị mọ biberin agbẹị-emi. “Biin Samaria-otu” bịsẹbara kị mịẹmị. (John 4:39) Zụa-otu ba Jew-otubo mọ Samaria-otubo mọ zọzọ tarịgha inyenrinbụọ dẹịnmọ dẹkị benibilemịnị.—Luke 9:​52-54.

4. Acts 8:​5, 6, 14 gbaa bara didaba, zụa Samaria-otu tebara ka kị Philip gbaa egberi kẹrịakị ma o?

⁴ Teeki baratụa Samaria-otubo pịrị wẹrị benibile ma o? Egberigbaa-owei Philip “Christ gbelemọ,” egberigbaa á pịrị ifiebị zụa Samaria-otu “Ọkpọnanaowei egberi kẹrịakịmị.” (Acts 8:​5, 6, 14 goo.) Philip Jew owei kị gbaa kpọ, ámịnị ụ peimị. Kaanghaba ámịnị Genesis duomú Deuteronomy fun mị Ọkpọnanaowei kẹnị anga kpọ sụọgha bara gbaa wẹrịemi Bible yọbo kẹrị kụrọmọ wẹrịemi kị duonị bịsẹ bara mịẹmị. (Deut. 10:​17-19) Zịnị ifie Philip, “Jesus gbelemọ egberi” gbaa á pịrị timi ifiebị, ámịnị beritịẹmọ Philip peimị, tuubị Ọkpọnanaowei kị baratụa Philip pịrịmịnị bara ámịnị mọ ẹrịmị. Philip biin tamamaa yeama kị mịẹmị, gbaamaba dọọnmịnị otu zụọ bá seitẹmẹbo kpọ duoserimị.—Acts 8:7.

5. Samaria-otubo mịẹ yebị te ka kị ị́ tolumọ ma o?

⁵ Samaria-otubo Jew-otubo golu bá ebibara ye a sụọtuu nimigha yọ bụọmọ wẹrị ánị tẹmẹanga bọlọụ bụọmụ yọ tịẹmọ kpọ paatimimị. Anịa ámịnị bịsẹ bara mịẹgha. Samaria-otubo Philip gesii ka kị á tolumọmịnị bara kọn angọ a nimi ifiemị, ámịnị ifie famọgha bara benibilemị. Bible gbaa amọ: “Philip Ọkpọnanaowei Daabụọ mọ bá Jesus Christ gbelemọ ebiegberi gbaa á pịrị ifiebị, owei-otubo mo ere-otubo mọ ụ peiwẹrị benibilemị.” (Acts 8:12) Ị́mịnị kpọ Bible bị gesii bá Jehovah Iseriotubo kpọ zọzọ golugha bara gesii tarị mịẹdịamịnị bara biberin wẹrịemi a? (John 13:35) Bịsẹ bara aba benibilemụ yọbị ifie famọ kụmọ, Jehovah tarịama kọn ị́ pịrịmịnị.

6. Ruben mịẹdịa yebị tebara ka kị baratụa ị́ pịrị a paaemi a o?

⁶ Ruben, Germany k’emi, ómịnị Jehovah Iseriotu kị pịrị zii wẹrịemi. Bịsẹ bara kị gbaa kpọ, ómịnị asịyaịpesi a timi ifiemị, ómịnị Jehovah kọkọ inyenrinmịnị yọbị tamanaịnyọ nanamị. Ómịnị tebara ka kị bịsẹ yọ dẹịnmọ ma o? Ómịnị ebibara nimiye nanagha bara kọn angọ a nimimị, anịduonị ómịnị mịẹmụye tọnpẹlẹmị. Ụ gbaamị: “Ị́mịnị ine bẹtịbị Bible tolumọye mịẹmịnị ifiebị, Ịmịnị gesii bị nimi dọụmị. Ịmịnị barii barịị kịmịtọbọụ dei kị dei timi bo paamị egberitịbị tolumọmị.” Ruben Is There a Creator Who Cares About You? fun kpọ goomị. Bịsẹ fun bị ebibara ka baratụa Ruben pịrịmị. Ómịnị gbaa angọ pịrịmị: ‘Jehovah kọkọ inyenrinmịnị.’ Ómịnị Jehovah Iseriotu fịrị-tịbịyọ ma mú ifiebị, wo akpọyọrẹị bịna warịsẹ kẹnị sụọmọemi bara Ruben mọ ẹrị ifiebị wó angọ duo sụọmị. Ruben waị Germany a bo ifiebị, Ómịnị 17 kụraị ka timi benibilemị.“Gesii nimiye” tamanaịnyọ dẹịnmọ a paaemi. Ị́mịnị kpọ iné tolumọmịnị yebo tamanaịnyọ nana wẹrịemiaba, wo funbo duo tuudọụ. (Eph. 4:​13, 14) Jehovah otubo akpọyọrẹịsẹ kẹnị sụọmọ bá tarị mịẹdịamịnị bara ị́ mọ naa bá ị́mịnị iné itu kpọ bịsẹ yọbị ẹrịmịnị yọbị, baratụa ị́ pịrịwẹrị iné akị Jehovah ogbo ma nana wẹrịemi tarị mịẹ sọụ bọlọụ a mú dẹịnmịnị.

SAUL TARSUS OWEI BENIBILEMỊ

7. Saul te iroroye kị dei agbẹị-emi a o?

⁷ Wo wẹrị Saul Tarsus owei mịẹdịa ye kpọ kẹrị iroro. Ómịnị ebibara Jew-otu oloko kpọ nimi wẹrịemi bá orou kị paatimi kịmị. (Gal. 1:​13, 14; Phil. 3:5) Biin Jew-otuama Christtuuduo-otubo ekpe kịmịama bara ka kị á dimọwẹrị ifiebị, Saul kpọ sụọ ánị ụyamọ timimị. Bịsẹ ifiebị ómịnị Ọkpọnanaowei dọụbara kị mịẹmịnị bara kị iroro timimị. (Acts 8:3; 9:​1, 2; 26:​9-11) Saul ụya bolou a sụọmụ bara kọn angọtọlọmọ dẹkị, laa peibolou akị Jesus a tụawẹrị benibile a paaemi.

8. (a) Teeki baratụa Saul pịrịwẹrị benibile ma? (b) Acts 22:​12-16 didaba, Ananias tebara ka kị baratụa Saul pịrị ma o? (Foto kpọ dii.)

⁸ Teeki baratụa Saul pịrịwẹrị benibile ma o? Jesus agọnọ duo Saul mọ ẹrẹ ifiemị, Saul tọrụbo ba yọ ẹrịgha. (Acts 9:​3-9) Ómịnị taradein akị mọụnkoru bá ụ paamọ ye kpọ kẹrị iroromị. Jesus kị Messiah bá wó tuuduo-otubo kị kọkọ gesii karịbụọ ma emi bara Saul mọ biberinmị. Kaanghaba Saul, omịnị kpọ sụọ Stephen baa bara kẹrị ukie ifiebị ụ mịẹ eneni kẹrị kpọ paaemi! (Acts 22:20) Taradeinbo bụọbị, Ananias tịịnmịnị owei mú Saul laawẹrị wó tọrụbo fini, bá ifie famọgha bara benibile bara akị ụ kụrọmọmị. (Acts 22:​12-16 goo.) Saul angọ-iyerimọ bịsẹ kụrọmọye kẹrịakị wẹrị benibilemị.—Acts 9:​17, 18.

9. Ị́mịnị te ka kị Saul duo tolumọ akị a paaemi a o?

⁹ Omịnị Saul duo tolumọ akịmụ yeama emi. Saul angọ-serimọ inyerinbụọ bá kịmịtọbọụ esiin yọ bụọmọ wẹrị wó benibileyọ tịemọ kpọ paatimimị. Anịa ómịnị bịsẹ bara mịẹgha. Saul angọ-iyerimọ bara wó ụndụ deiwẹrị Jesus tuuduo-owei a paamị. (Acts 26:​14, 19) Saul a pịrị ụyamọmụ bara kị nimi wẹrịemi kpọ, ómịnị Jesus tuuduo kịmị a paamọ bara gbinipẹlẹmị. (Acts 9:​15, 16; 20:​22, 23) Saul benibile siindẹmị, ómịnị Jehovah ka sẹsẹrẹ wẹrị ụ laamịnị dadiyebo inemị. (2Cor. 4:​7-10) Benibile wẹrị Jehovah Iseri-kịmị a paamụ yọbị biin dadiyeama ị́ laamịnị, bịsẹ bara kị gbaa kpọ ị́mịnị bẹtịbị fa. Jehovah mọ Jesus mọ ifiebosẹ baratụa ị́ pịrịmịnị—Phil. 4:13.

10. Anna mịẹdịa yebị te ka kị ị́ tolumọ ma o?

¹⁰ Anna Eastern Europe bị Kurd warị-bolou kị duo paaemi. Á yin benibile siindẹmị, á daụ barapou duonị Anna isena kụraị ka timi koro Bible tolumọmị. Anịa, ánị bịnaotubo nẹ á mọ mọ́ kẹnị warịemi otubo, Anna Jehovah Iseriotu mọ Bible tolumọmịnị bara nimi ifiebị, ámịnị ánị ụyamọmị. Iné opu-daụ otu emi karịbụọ a barasin wẹrị zịnị karịbụọ a múmịnị yọbị ámịnị mọ kọn kịmị mịẹ bụzeye kị dimọ wẹrịemi. Anna oia maakụraị fini laamị, amịnị benibile dọụmịnị bara gbaa á daụ pịrịmị. Ánịa á daụ kịmị ka á penimọ anịghakpọ amịnị kị bẹtịbị benibile dọụmịnị bara kọn a biimị. Amịnị gbaa ụ pịrịmị, “Ịmịnị Jehovah tarị wẹrịemi.” Anna daụ á bụọmọ benibilemị. Anna benibile siindẹmị, bịsẹ otubo á dẹrị bá ánị ụyamọmị. Ánị okosu daụ gbaa á pịrịmị, “Ị́mịnị Jehovah Iseri-ụbọ ka paamọ yọ diya, amawẹnị anịghakpọ sei diriama boumụ yọbị ebidẹịn mọ timimị.” Anna tebara kị mịẹ ma o? Á gbaamị, “Jehovah, bá ị daụ mọ yin mọ kpọ baratụa ị pịrịwẹrị tịẹkụrọmị.” Anna ánị ụndụmị Jehovah baratụa á pịrịdẹ ifiebo gẹẹ koromọmị. Anna Jehovah mịẹ á pịrịdẹ yebo barafa dọụgha duonị, amịnị barii barii bịsẹ gẹẹ koromọdẹ yebo goomị. Ị́mịnị kịmịama pịrị ụyamọmịnị malafamịnị aba, Jehovah baratụa ị́ pịrịmịnị eti nana.—Heb. 13:6.

CORNELIUS BENIBILEMỊ

11. Teeki Cornelius benibilemụyọ tịẹmọ kpọ paatimi ma o?

¹¹ Cornelius mịẹdịaye kpọ Bible bolou bọọemi. Ómịnị Rome sụụowei, ómịnị 100 laaemi sụụ otuama kị daatimimị. (Acts 10:​1, ftn.) Anịduonị, ama mọ bá Rome sụụ-otubo ovuru kpọ ómịnị opu kịmị ka paatimimị. Ómịnị “dieneni nana bara yeama dịẹpaamọ ingo-otuama pịrịtimimị.” (Acts 10:2) Jehovah fịrịmọpaa-oweị Peter fịrịmọ ebiegberi gbaa ụ pịrịmị. Anịa Cornelius ifie famọgha bara ebiegberi kẹrịakị wẹrị benibile ma o?

12. Teeki baratụa Cornelius pịrịwẹrị benibile ma o?

¹² Teeki baratụa Cornelius pịrịwẹrị benibile ma o? Bible gbaa amọ Cornelius “mọ wó warị-bolou mọ Ọkpọnanaowei esiinmị.” Bá ómịnị pẹlẹgha bara ka kị tẹẹbịbị mịẹ Ọkpọnanaowei pịrịtimimị. (Acts 10:2) Peter ebiegberi gbaa Cornelius mọ wó warị-bolou mọ pịrị ifiebị, ámịnị egberi kẹrịakị wẹrị ifie famọgha bara benibilemị. (Acts 10:​47, 48) Tamanaịnyọ kpọ fa barabị Cornelius dei agbẹị-emi yeama dei wẹrị wó warị-bolou mọ Jehovah karịmị.—Josh. 24:15; Acts 10:​24, 33.

13. Cornelius mịẹdịa yebị te ka ki ị́ tolumọ ma o?

¹³ Cornelius kpọ Saul bara opu kịmị a paaemi yọ bụọmọ wẹrị wó benibilemụ yọ tịẹmọ kpọ paatimimị. Anịa ómịnị bịsẹ bara mịẹgha. Ị́mịnị iné ụndụbị opu deiyọama mịẹwẹrị benibile a paaemi a? Bịsẹ bara aba, Jehovah ị́ barịmịnị. Ị́mịnị Bible tolumọyebo akị iné ụndụ ma tụa inyenrin wẹrị wó dọụbara mịẹ dọụmịnịsẹ Jehovah tarịama kọn ị́ pịrịmịnị.

14. Tsuyoshi mịẹdịa yebị te ka kị ị́ tolumọ ma o?

¹⁴ Tsuyoshi, Japan owei, ómịnị benibilemụ yọ duonị ụ wẹnịmịnị fịrịbị deiyọama mịẹmị. Flower-ama tịẹmọmụ bara akị kịmịotu tolumọtimi school ómịnị kị maamụ karamọ tịbịowei a timimị. Tịbịoweibị laa dụwẹịyọ a múgha ifiesẹ, Tsuyoshi kị Buddhist dụwẹịyọ bọọ múwẹrị flowerbo tịemọ bá zịnị dụwẹị yeama mịẹtimimị. Anịa, ómịnị bo fịịdẹ-otubo gbelemọ gesii tolumọ nimibị, fịrịbị wó benibilemụyọ tịẹmọ a paaemi bara ụ mọ nimimị. Anịduonị ómịnị ba bịsẹ Buddhist dụwẹịyọbo mịẹmịnị yebo mịẹgha fa bara gbinipẹlẹmị. (2Cor. 6:​15, 16) Tsuyoshi mú fịrị tịbịowei mọ egberi kẹrị ẹrẹteimị. Teeki paama o? Tsuyoshi sụọ bịsẹ dụwẹịyobo a múgha kị gbaa kpọ, ámịnị ụ kọn fịrị duo serigha. Ómịnị Bible tolumọ timi kẹnị kụraị bụọbị benibilemị.a Ị́mịnị Jehovah karịmụ yọ duonị iné wẹnịmịnị fịrị kị dei kpọ Jehovah baratụa ị́mọ iné warị-bolou mọ pịrịmịnị bara nimi.—Ps. 127:2; Matt. 6:33.

CORINTH-OTUBO BENIBILEMỊ

15. Te bụụdọọnyeama kị Corinth-otubo benibilemụ yọ tịemọ kpọ paatimi ma o?

¹⁵ Oruseri ifiemị Corinth-otubo mẹnịanga yeama tarị bá lịkaị-lịkaị inyenrinbụọama nanawẹrịmị. Biin kịmịama Jehovah dọụgha yeama kị mịẹtimimị. Anịduonị, bịsẹyọ ma inyenrinmịnị kịmịbo ebiegberi kẹrịakịmụ yọbị kụrọemi. Mọabịkpọ, Paul Jesus gbelemọ ebiegberimị akị ama bọọ gbaamị, “biin Corinth-otuama ebiegberi kẹrịakị wẹrị benibilemị.” (Acts 18:​7-11) Anịa Jesus bụnụgha dawaị duo gbaa Paul dịamị: “Ịmịnị biin kịmịama kọn mị ama bọọ nana wẹrịemị.” Anịduonị Paul pẹlẹgha bara kẹnị kụraị-mọ-ikise mọ akị bịsẹyọ bọọ egberi gbaamị.

16. Teeki baratụa zụa Corinth-otuama pịrịwẹrị ánị bụụdọọnyebo datịẹmọ wẹrị benibile ma o? (2Corinthians 10:​4, 5)

¹⁶ Teeki baratụa Corinth-otubo pịrịwẹrị benibile ma o? (2Corinthians 10:​4, 5 goo.) Ọkpọnanaowei egberi mọ bá wó yalịyalị tẹmẹ mọ kị baratụa á pịrịwẹrị ánị ụndụbo opu deiyọama mịẹmị. (Heb. 4:12) Corinth bị, Christ gbelemọ ebiegberi kẹrịakị otubo zụa-otu sei kụrọmọ inyenrinbụọama nanawẹrịmị, gbaamaba wuru boukẹrị, furu, bá owei mọ owei mọ kpọ zọzọ anga timimị, anịa ámịnị bịsẹ yebosẹ a barasinmị.—1Cor. 6:​9-11.b

17. Corinth-otubo mịẹdịayẹmị te ka kị ị́ tolumọ ma o?

¹⁷ Zụa Corinth-otuama, kụrọ sei inyenrinbụọama kị nanawẹrị kpọ ámịnị bịsẹ sei inyenrinbụọbo deimụ yọbị kụrọbụọ-emi bara irorogha. Ámịnị fagha fagha ụndụ ụwọụ duo wẹnịmụ yọ duonị angọtụa deiyọama mịẹmị. (Matt. 7:​13, 14) Benibilemụ yọ duonị ị́mịnị kpọ sei inyerinbụọama mọ andamịnị a? Benebene dẹịnsụọ kụmọ! Tẹẹ Jehovah yarịdá ómịnị wó yalịyalị tẹmẹbị akị baratụa ị́ pịrịwẹrị seimịẹ dịsẹyọ dẹịnmọ.

18. Monika mịedịayemị te ka kị ị́ tolumọ ma o?—John 3:34.

¹⁸ Monika, Georgia ibe ka emi, amịnị benibilemụyọ duonị angọtụa yalịgha ẹrẹbịbịama mọ bá agbẹịgha angọ kaimain yeama mọ a barasinmị. Á gbaamị: “Ine zaụtimi ifiemị, ịmịnị tẹẹbịbị kị duo kụrọ nanatimimị. Ịmịnị kịrịịye mịẹ dọụmịnị bara Jehovah mọ nimi wẹrịemi, anịduonị ómịnị ifiebosẹ baratụa ị piṛịmịnị bá ị tolumọmịnị.” Monika 16 years ka timi benibilemị. Ị́ kpọ ebibara Jehovah karịmụ yọ duonị zụa barasin agbẹị-emi inyerinbụọama nana wẹrịemi a? Pẹlẹgha bara Jehovah bara kụrọ bii. Jehovah wó yalịyalị tẹmẹ kọn baratụa ị́ pịrịmịnị.—John 3:34.

INÉ PEIBOLOU BỊ KỤRỌ YEAMA DẸỊNMỌMỊNỊ

19. Teeki baratụa ị́ pịrị wẹrị ogun bara emi bụụdọọnyeama dẹịnmọ a paa emi a o? (Foto kpọ dii.)

¹⁹ Iné benibilemụ yọbị ị́mịnị kụrọ bụụdọọnyeama kị nana wẹrịemi kpọ, Jehovah ị́ tarịemi bá ị́mịnị bo wó warịbolou kịmị a paamọ yọ dọụ wẹrịemi bara nimi. Bọlọụ kụraị sọnransibị Jesus gbaa wó tuuoduo-otubo pịrịmị: “Ánị peibolou bị mustard grain bara k’emi kpọ, ámịnị gbaa akị bei ogun pịrị, ‘Bei yọ duo serii anịyọ ma mú kị gbaa kpọ,’ ogun bị múmịnị, kẹnịye kpọ kụrọ á pịrịgha fa.” (Matt. 17:20) Bei egberi naa otubo naa Jesus mọ wẹnịtimi alagha duonị, ámịnị mọkpọ ánị peiboloubo mịe kụrọmọmụ yọ dọụ wẹrịemi. Anịa Jesus á kụrọmọmị, ámịnị kụrọ peibolou nanadaba, Jehovah baratụa á pịrịwẹrị ogun bara emi bụụdọọnyama kpọ dẹịnmọmịnị. Jehovah bịsẹ kpekẹnị bara kọn baratụa ị́ kpọ pịrịmịnị!

20. Bei egberitịbịbị Bọlọụ kụraị sọnransii Christtuuduo-otubo mọ bá wo ifie Christtuuduo-otubo mọ mịẹdịa yebo tebara ka kị ị́ kụrọmọdẹ a o?

²⁰ Benibilemụ yọbị ị́ tịẹmọ a paaemi bụụdọọnyeama ị́ mọ dọụ ẹrịdaba, a kọnsinmụ yọbị ifie famọ kụmọ. Bọlọụ kụraị sọnransii Christtuuduo-otubo mọ bá wo ifie Christtuuduo-otubo mọ mịẹdịa yebo duo kụrọmọye nana. Pebidá ánị mịẹdịa yebo ị́ kụrọmọ wẹrị angọdịẹpaamọ Jehovah pịrịdá benibile. Bei kị ebidẹịn tọn angọ pịrịmụ iroro!