“Ánị Karịmụ Ụbọ . . . Sẹlẹ Angọ Pịrị”

1. Gesii pọwẹị nanamụ yọbị, omịnị teeki mịẹmịnị a, bá tetuu a o? (Isaiah 48:​17, 18)

WO AGỌNỌ Daụ Jehovah wo tarị kụrọmọ wẹrịemi, bei tịẹkiri mọ bá bei bọlọụ kpọ omịnị pọweịtimi kị ómịnị mọ dọụmịnị. (Eccl. 3:​12, 13) Jehovah omịnị laa biin yeama mịẹmụ bara ka kị wo tẹmẹ wẹrịemi, anịa omịnị bẹtịbị angọ daa bá sei mọ ebi mọ oloko tụa angọ pịrịmụ kụrọ kọn wo pịrịgha. (Eccl. 8:9; Jer. 10:23) Omịnị wó gbaabara dimịẹ bá ụ karị-daba, gesii pọwẹị nanamụ bara nimi wẹrịemi.—Isaiah 48:​17, 18 goo.

2. Satan wo mịẹ teeki pei dọụtimi ma, Jehovah ba te parụbịbị kị mịẹ paamọ ma?

² Omịnị Jehovah fa kpọ laa pọwẹị nana, bá angọ daa a paaemi bara iroro kị Satan mọ dọụmịnị. (Gen. 3:​4, 5) Bịsẹ ikpe egberi parụmụ yọ duonị Jehovah ifie dọlọ akị kịmịawọụ pịrịwẹrị angọ daamịnị. Kịmịawọụ angọ daamịnị bolou duo paamịnị akpotubo wo mọ ẹrịmịnị. Anịa Bible mị, Jehovah karịmịnị yọ duo pọwẹị nana kịmịama gbaa wo pịrị wẹrịemi. Bọlọụ ụbọ bị anị Jesus Christ. Omịnị Jesus Jehovah karịmụyọ sẹlẹ angọ pịrị tuu mọ, wosẹ Jehovah kị karị agbẹị-emi tuu mọ bá omịnị Jehovah karịmịnịyọ sẹlẹ angọ pịrị tuuama kpọ wo mọ ditụamịnị.

JESUS, JEHOVAH KARỊMỤYỌ SẸLẸ ANGỌ PỊRỊ TUUMỊ

3. Satan te ka kị Jesus pịrị ma o, Jesus ba teeki mịẹ ma?

³ Jesus kiriogbo bọọ timi ifiemị, wó karịmụ ụbọ sẹlẹ angọ pịrịmụ fomuun nanamị. Jesus benibile siindẹmị, alaghatimi Satan Jesus kẹnị ifie ka kị ụ karị kpọ, akpọ bọọ emi daabụọbosẹ kọn ụ pịrịmịnị bara gbaamị. Jesus ụ parụmị: “Ine tọrụyọ duo serii, Satan! Gẹẹ koromọ wẹrịemi: ‘Jehovah iné Ọkpọnanaowei bẹtịbị kị karị, bá yalịyalị odubo gbaan wó bẹtịbị kị pịrị.’” (Matt. 4:​8-10) Jesus tetuu kị duonị Jehovah karịmụyọ sẹlẹ angọ pịrị ma o? Zụa tuuama wo wẹrị mọ ditua.

4-5. Jesus tetuu kị duonị Jehovah karịmụyọ sẹlẹ angọ pịrị ma o?

⁴ Jesus, Jehovah tarị wẹrịemi kị duonị ụ karịmụyọ sẹlẹ angọ pịrịmị, Jesus kọkọ olomu tarị akị wó Daụ a nana wẹrịemi. (John 14:31) Bịsẹyọ bụọmọ kpọ, Jesus Jehovah kị karị agbẹị-emi bara nimi wẹrịemi kị duonị ụ karịmị. (John 8:​28, 29; Rev. 4:11) Gbaamaba, Jehovah kị ụndụ pịrịmịnị, bara finimọ bá eti akị tụa agbẹị-emi owei. (Ps. 33:4; 36:9; Jas. 1:17) Jehovah ifiebosẹ gesii kị gbaa Jesus pịrịmị bá wó nana wẹrịemi yebosẹ kọn ụ pịrịmị. (John 1:14) Anịa Satan, bịsẹbara fa, ómịnị kị fịị mịẹpaamọmị. Ómịnị ikpe, mẹnẹmọtu-tụa bá angọ ebi bẹtịbị kị dọụmịnị. (John 8:44) Jesus bei yebosẹ nimiyọ duonị, benebene Satan dimịẹwẹrị tịbịkụrọ Jehovah pịrịmụ iroro tọngha.—Phil. 2:​5-8.

⁵ Jesus Jehovah karị zịnị tuu emi, anị ómịnị Jehovah karịyọ duo paamụ ebi yebo kẹrị iroromị. (Heb. 12:2) Ómịnị wó peibolou kẹrị-kụrọmọtimi tuu laadaba, ómịnị wó Daụ Jehovah ẹrẹ mịẹ yalịyalịmịnị bá Satan mịẹdẹ sei yebosẹ waịmụ mịẹ ebimọmịnị.

OMỊNỊ JEHOVAH KARỊ AGBẸỊ-EMI TUUMỊ

6-7. Tetuu kị duonị biin kịmịama Jehovah karịgha a o, anịa omịnị tetuu kị duonị ụ karị agbẹị-emi a?

⁶ Bei tịẹkiribị biin kịmịama Jehovah ebi inyenrinbụọbo nimigha bá wó mịẹ á pịrịdẹ ebi yebo kpọ nimigha duonị, ámịnị ụ karịgha. Fịrịmọpaa-owei Paul Athens bọọ egberigbaa pịrị kịmịbo kpọ bịsẹbara kị timimị.—Acts 17:​19, 20, 30, 34.

⁷ Paul gbaa akị ụ peimịnị otubo pịrịmị, gesii Ọkpọnanaowei kị “ụndụ, emba bá zịnị yeama akị kịmịsẹ pịrịmị.” Ómịnị mọkpọ gbaamị: “Ómịnị kị duonị wosẹ laa ụndụ nanawẹrị inyenrinmịnị.” Ọkpọnanaowei kị yebosẹ tẹmẹmị, ómịnị “kẹnị kịmị kị duo kịmịsẹ tẹmẹmị,” anịduonị wosẹ ómịnị kị karị agbẹị-emi.—Acts 17:​25, 26, 28.

8. Jehovah benebene teeki mịẹgha fa o? Tuugbaa.

⁸ Jehovah kị yebosẹ tẹmẹmị bá akpọsẹ a dụbadẹịn owei, anịduonị ómịnị wo penimọ ụ karị a paatimimị. Anịa, Jehovah benebene bịsẹbara mịẹgha. Ómịnị kọkọ inyenrinmịnị bá wo tarị kụrọmọ wẹrịemi bara mịẹgaan paamọdẹ. Ómịnị biin kịmịama bo wó ikie-otuama paa kị dọụ wẹrịemi. (1Tim. 2:​3, 4) Anịduonị, ómịnị wo tolumọ wẹrị, bei bọlọụ ma wó mịẹmụ ebi yebo mọ bá á mịẹ beinmọmụ bara mọ gbaa kịmịotu pịrịmịnị. (Matt. 10:​11-13; 28:​19, 20) Bịsẹyọ bụọmọ kpọ, ómịnị itu-ama mịẹpaamọ wẹrị omịnị bịsẹ yọ bọọ timi ụ karị bá tarị nana wẹrịemi itu-kosuotuama kpọ duo baratụa-pịrịye nanamịnị.—Acts 20:28.

9. Jehovah tebara ka kị tarị nana wẹrịemi bara mịẹdịa ma o?

⁹ Jehovah tarị mịe akị ụ karịgha otubo dịamịnị baramị wo angọ duo sụọmị. Wẹrị iroro dii: Akpọ paasẹ, biin kịmịama Jehovah karịmụyọ dii a, ánị bẹtịbị dọụyọ kị mịẹmịnị. Bịsẹbara kị gbaa kpọ, Jehovah ánị ụndụbo dọụ wẹrịemi yebo mịẹ á pịrịmịnị. (Matt. 5:​44, 45; Acts 14:​16, 17) Ómịnị á bụọmọ awọụama zii, fịrị wẹnị, ikie-otu bá pọwẹị kpọ nanamịnị. (Ps. 127:3; Eccl. 2:24) Bei yebosẹ wo agọnọ Daụ bị kịmị-awọụbosẹ kị tarịemi bara kị mịẹdịamịnị. (Ex. 34:6) Wo wẹrị omịnị Jehovah karịmụyọ sẹlẹ angọ pịrị tuubo mọ bá ụ karịmịnịyọ duo wo laamịnị tarịbo mọ ditụa.

OMỊNỊ JEHOVAH KARỊMỤYỌ SẸLẸ ANGỌ PỊRỊ TUUBO

10. (a) Te yelaa tuu kị duonị omịnị Jehovah karịmịnị a? (Matthew 22:37) (b) Omịnị Jehovah etipou inyenrinbụọ duo te arereama kị nanadẹ a o? (Psalm 103:​13, 14)

¹⁰ Wo kpọ Jesus bara, olomu bara Jehovah tarị wẹrịemi kị duonị ụ karịmịnị. (Matthew 22:37 goo.) Omịnị Jehovah inyenrinbụọbo tolumọ nimibị wo mịẹ ụ mọ mọ́ naịn-dẹịnmịnị. Gbaamaba, Jehovah etipou inyenrinbụọ mịẹ wo dịamịnị. Israel-otubo Jehovah gbaaye peigha ifiemị, Jehovah á tẹẹmị: “Sisei, ánị mịẹ seibo a barasindá ị dọụbo.” (Jer. 18:11) Jehovah omịnị yalịgha bá atọụ bara nimi wẹrịemi. (Psalm 103:​13, 14 goo.) Jehovah etipou inyenrinbụọ mọ bá wó zịnị ebi inyenrinbụọbo mọ ị́mọ kẹrị-iroromịnị yọmị, ị́ dịnẹmọ wẹrị ụ karịtimi bẹseri bẹseri laa a fa o?

11. Te tuuama kị duonị omịnị wo agọnọ Daụ Jehovah karịmụyọ sẹlẹ angọ pịrị ma o?

¹¹ Omịnị Jehovah karị agbẹị-emi bara nimi wẹrịemi yọ kpọ wo dịnẹmọ wẹrị ụ karịmịnị. (Matt. 4:10) Bịsẹyọ kị bụọmọ kpọ, omịnị Jehovah karịtimi tuu laadẹ ifiesẹ Satan ikpe owei bara mịẹgaan paamọmịnị bá Jehovah wo Daụ adụdụ kpọ mịẹ pọwẹịmọmịnị. Bei tịẹkiribị omịnị Jehovah karịmụyọ sẹlẹ angọ pịrịdaba, omịnị laa ụ karịtimi bẹseri bẹseri laamịnị!—John 17:3.

12-13. Omịnị Jane mọ Pam mọ duo teeki tolumọ akị ma o?

¹² Wo zaụ-emi ifiesẹ, omịnị olomu bara akị Jehovah tarị daba, bịsẹ tarị bị wo mọ timi owa ifie laa kpọ paaemi. Wo wẹrị Jane mọ Pam mọ paamọye ditụa.a Ámịnị bịnaotuama, ámịnị 10 bá 11 years a timi ifie ka koro Bible tolumọmị. Á daụ mọ yin mọ otubo Jane mọ Pam mọ ifiebosẹ á mọ mó church a múmịnịsẹ, á bụọmọ Jehovah Iseriotu mọ Bible tolumọmịnị bara gbaa á pịrịmị. Jane gbaamị, “Jehovah Iseriotubo Bible duo ị tolumọ yebo,” “baratụa ị pịrịwẹrị ine pesiotubo mọ kụrọdiri bou, bá likaịlikaị zọzọ anga inyenrinbụọ mịẹmụyọ datịẹmọmị.”

¹³ Jane mọ Pam mọ 18 years bụọdẹ ifiemị, ánị maa kịmị bo egberigbaa-otu a paamị. Tuu ifie laamị, ámịnị ụwọụpẹlẹ fịrị kpọ wẹnị bá ánị owadẹ daụ mọ yin mọ otubo kpọ diimị. Paabụọdẹ yebo kẹrị-iroro ifiemị, Jane gbaamị: “Ịmịnị Jehovah kọkọ wó ikie-otubo kekeremịnị bara tolumọdẹ, kọkọ 2Timothy 2:19 gbaa barabị, ‘Jehovah ụ karịmịnị otubo nimi wẹrịemi.’” Anịduonị tamanaịnyọ kpọ fa barabị Jehovah ụ tarị bá ụ karịmụyọ sẹlẹ angọ pịrịdẹ kịmịbosẹ kekeremịnị!

14. Wo ẹrẹmịnị egberibo mọ bá wo inyenrinbụọbo mọ tebara ka kị Jehovah ebi gbaa paamọmịnị a o? (Foto kpọ dii.)

¹⁴ Omịnị kpọ Jehovah ẹrẹ gbaịnmọdẹ ikpe egberibo kịrịịgha bara gbaa paamọ dọụmịnị. Wẹrị bei tọnmọdịaye dii: Ị́mịnị kẹnị ikie-owei nana wẹrịemi, ómịnị ebimịẹdịa, bara finimọ bá kịmị bụọmọmịnị. Kẹnị erein laabị, kịmịama bei ikie-oweibị bolousei bá aritụamịnị bara gbaa ị́ pịrịdaba, tebara kị ị́mọ mịẹmịnị a o? Ị́mịnị wó ebi kị gbaamịnị. Bịsẹ kpekẹnị bara kị, Satan mọ bá wó anga ma emi kịmịbo mọ ikpe egberiama gbaawẹrị Jehovah ẹrẹ seimọmịnị, anịa omịnị angọtụa wẹrị Jehovah ebi kị gbaamịnị. (Ps. 34:1; Isa. 43:10) Omịnị bịsẹbara mịẹdaba, omịnị kọkọ wo ẹrẹmịnị egberibo mọ bá wo inyenrinbụọbo mọ akị beinmọ beinmọ bara Jehovah karịmịnị bara kị mịẹdịamịnị.

15. Fịrịmọpaa-owei Paul wó ụndụ bị zụa deiyọ-ama mịẹ ifiebị te arereama kị nana ma o? (Philippians 3:​7, 8)

¹⁵ Omịnị beinmọ beinmọ bara akị Jehovah karịmụyọ duonị wo mịẹmụ yebo zụayaị deimịnị. Gbaamaba, fịrịmọpaa-owei Paul wó amabị orupaamụ yọ gbeinmọ-koromọ wẹrị Christtuuduo-owei a paa, bá Jehovah karịmị. (Gal. 1:14) Bịsẹyọ duonị, ómịnị pọwẹị pọwẹị ụndụ kị nanamị bá Jesus Christ mọ agọnọ á mú daamụ fomuun kpọ nanamị. Ómịnị Jehovah karịyọ sẹlẹ angọ pịrị yọbị benebene mịẹkiridẹ bara irorogha, omịnị kpọ benebene bịsẹbara irorogha fa.—Philippians 3:​7, 8 goo.

16. Julia paamọ yebị te ka kị wo tolumo ma o? (Foto kpọ dii.)

¹⁶ Omịnị wo ụndụbo Jehovah karịmụyọ ka kị bọlọụdá-daba, bei tịẹkiri mọ bá bọlọụ mọ arereama wo laamịnị. Wo wẹrị Julia tịịn-mịnị bịnaraụ paamọye dii. Anịkị amịnị bo gesii nimimị, Julia zaụ timisẹ church yọ bọọ numu tuun ikpudu ka timimị. Amịnị ebibara numu tuunmịnị duonị, kẹnị numu tuunmịnị ere bo Julia kọn wẹrị á tolumọmụ bara gbaamị. Julia bẹbẹ yọama mú numu tuunmịnị duonị amịnị bo orupaa wẹrị kịmịama á nimimị. Amịnị kẹnị opu numu school a mútimi ifie kị, ámọ mó kẹnị school a mútimi ụbọ Ọkpọnanaowei ẹrẹbị Jehovah bara gbaa á pịrịmị. Alaghabị, Julia wiki boloubị maa ifie ka kị Bible tolumọmị. Kunumọmị, amịnị numu tuun fịrị wẹnịmụ yọ gbeinmọ-koromọ wẹrị Jehovah karịmụyọ kị sẹlẹ angọ pịrịmị. Anịa bịsẹ mịẹ yebị bọụbọụ á pịrịgha. Á gbaamị “Biin kịmịama gbaa ị pịrịmị, ịmịnị ayẹbẹ yekị mịẹmịnị,” ámịnị mọkpọ gbaamị, “anịa ịmịnị ine ụndụ kọn beinmọ beinmọ bara Jehovah karịmụ bara kị gbinipẹlẹmị.” 30 years bụọdẹkị amịnị bei iroro tọnmị, anịa bei tịẹkirimị teeki paa á pịrịdẹ a o? Á gbaamị “ine ịkịọụ bị dọọ nanadẹ, bá bei bọlọụbị Jehovah ine adụdụ dịsẹmịnị yebosẹ mịẹ ị pịrịmịnị eti ịmọ nana wẹrịemi.”—Ps. 145:16.

PẸLẸGHA BARA JEHOVAH KARỊ

17. Wo emi ifiebị tebara ka kị Jehovah karịmịnị otubo mọ bá naa ụ karịgha otubo mọ gbele-emi a o?

¹⁷ Akpọmị alaghatimi famịnị. Fịrịmọpaa-owei Paul gbaamị: “Dọlọ ifie ‘kị kọọdẹ,’ anịa ‘bomịnị oweimị alaghatimi bomịnị. Ifie famọgha fa.’” (Heb. 10:37) Bei gbaa egberibị tebara ka kị wo gbele-emi a o? Kịmịawọụ, Jehovah karịmụyọ sẹlẹ angọ pịrịmụ ifiebị ba dụbagha. (1Cor. 7:29) Omịnị Jehovah karịmụyọ kị sẹlẹ angọ pịrịdaba, ụya-ama wo laamụ bara wo mọ nimi wẹrịemi, anịa omịnị “dọlọ ifie ka kị inemịnị.”

18. Jehovah mọ Jesus mọ te ka kị wo bara bọọ dọụ wẹrịemi a o?

¹⁸ Jesus kịmịama bo wó tuuduo-otuama apaa mọ bara gbaamị, anịa ámịnị mọkpọ pẹlẹgha bara wó a tuuduo bara kpọ kọn á kụrọmọmị. (Matt. 16:24) Anịduonị omịnị biin kụraị-ama ka kị Jehovah karịdẹ kpọ, pebidá omịnị dẹịnsụọ kụmọ. Omịnị ifiebosẹ Jehovah karịmụ yọbị wẹnị fịrị nana wẹrịemi. Bọụbọụgha kị gbaa kpọ, omịnị pẹlẹgha ifiesẹ, bei tịẹkiri kpọ biin tarịama wo laamịnị!—Ps. 35:27.

19. Gene paamọ yebị te ka kị wo tolumọ ma o?

¹⁹ Zụa kịmịama Jehovah karịmịnị yọbị, ebiyeama á laamụ yọ kimọmịnị bara kị tọnmịnị. Ị́mịnị kpọ asịyaị-pesi ka emiaba, Jehovah karịmịnị yọbị ebiyeama ị́ laagha fa bara kị ị́mọ tọnmịnị a? Kẹnị asịyai-pesi a emi bịnaowei Gene gbaamị: “Jehovah karịmịnị yọbị ị bụọmọ zụa yeama mịẹgha bara kị ịmọ tọnmị. Ịmọ mọ́ sụọpaa asịyaị-pesibo oge-ama tei, teiama-kẹrị, bá sụụ vidio game-ama kpọ teinmịnị, anịduonị ámịnị pọwẹị pọwẹị k’emi bara kị ịmọ tọnmị, ịmịnị ba ine ifiesẹ kọn yetolumọyọ mọ bá egberigbaayọ mọ bẹtịbị ka múmịnị.” Bei iroro yebị tebara ka kị Gene gbele ma o? Ụ gbaa amọ “ịmịnị tiri laadaba ámọ mọ́ sụọ ánị mịẹmịnị yebo mịẹmị bá warị laadaba Jehovah karịmịnị kịmị ka paadẹ,” omịnị mọkpọ gbaamị, “bịsẹ yọbị dọlọ pọwẹị akị ị pịrịmị. Anịa bịsẹ pọwẹịbị timi alagha. Anịduonị ịmịnị bo ine gbeinmọ-koromọdẹ Bible gesiibo kẹrị-iroromị bá ine adụdụsẹ kọn Jehovah karịmụ bara tọnpẹlẹmị. Bịsẹ ifie duobosẹ, Jehovah ine tẹẹbịbịbo parụmịnị bara ịmọ ẹrịmị.”

20. Omịnị teeki gbinipẹlẹ agbẹị-emi a o?

²⁰ Psalm fun gẹẹ oweibị numu tuun Jehovah pịrịmị: “Pọwẹị ị́ sẹlẹ akị iné warị ma bodẹ kịmịbị laa.” (Ps. 65:4) Joshua kpọ gbaamị: “Ịmọ ine warịbolou otubo mọ Jehovah kị karịmịnị,” pebidá wo kpọ bịsẹ kpekẹnị bara kị gbinipẹlẹ—Josh. 24:15.