Peibolou Nana Angel-otubo Dimịẹ

1-2. (a) Omịnị tebara ka kị angel-otubo mọ bẹbẹ paaemị a o? (b) Wo mọ angel-otubo mọ tebara ka kị lei-emi a o?

JEHOVAH ị́ tịịn gesii ma bo ifiemị, ómịnị ị́ tịịn ụ karịmịnị biin kịmịama waribolou ka sụọmị, peịbolou nana biin angelbo kpọ sụọemi. (Dan. 7:​9, 10) Angel-otubo wo mọ kẹrị iroromịnị bị, ámịnị wo mọ mọ́ bẹbẹ paaemi bara kpọ wo ịkịọụ bọọ sụọ a paaemi. Gbaamaba, Jehovah angelbo tẹmẹwẹrị aladẹ kị kịmị awọụ tẹmẹmị. (Job 38:​4, 7) Ámịnị kụrọ nana wo dẹịn-emi, ámịnị yalịyalị bá sei gbelegha bara k’emi. Sei bolou kị wo zii duonị omịnị laa ánị emibara paagha.—Luke 9:26.

² Anịa, biin bẹbẹpaa yọama emi bara kị, biin lei-emi yọama kpọ emi. Gbaamaba, angelbo Jehovah ebi inyenrinbụọbo dimịẹ a paaemi bara kị, omịnị kpọ Jehovah ebi inyenrinbụọbo dimịẹ a paaemi. Angel-otubo iroro tọn angọ pịrịmụ fomuun nana wẹrịemi bara kị, omịnị kpọ iroro tọn angọ pịrịmụ fomuun nana wẹrịemi. Angel-otubo ẹrẹ-ama, bẹbẹ inyenrinbụọama bá, wẹnịmịnị fịrịama kpọ nana wẹrịemi bara kị, wo kpọ ẹrẹ-ama, bẹbẹ inyenrinbụọama bá, wẹnịmịnị fịrịama kpọ nana wẹrịemi. Bá ámịnị Ọkpọnanaowei karị agbẹị-emi bara kị, wọ kpọ Ọkpọnanaowei karị agbẹị-emi.—1Pet. 1:12.

3. Omịnị te ka kị peibolou nana angel-otubo duo tolumọ akị ma o?

³ Omịnị angel-otubo mọ lei-emi yọama paaemi duonị, ánị ebi mịẹdịayebo ebibara wo kụrọmọ a paaemi. Anịduonị, omịnị biin yeama ka kị angelbo duo tolumọ akị a paaemi. Bei egberitịbịbị, omịnị peibolou nana angel-otubo angọ-iyerimọ, kịmịotu tarị, ye-ine, bá itu mịẹ yalịyalịmịnị baramị wo mọ kẹrị ẹrẹteimịnị.

ANGEL-OTUBO ANGỌ-IYERIMỌ MỊNỊ

4. (a) Angel-otubo tebara ka kị angọ-iyerimọ inyenrinbụọ mịẹdịamịnị a o? (b) Tetuu kị duonị ámịnị angọ-iyerimọmịnị a o? (Psalm 89:7)

⁴ Bei peibolou nana angelbo angọ-iyerimọ inyenrinbụọ nana wẹrịemi. Ámịnị kịlịkịlị, kụrọnana, bá ebibara fịrị wẹnịmịnị kị gbaa kpọ ámịnị angọ-iyerimọ Jehovah gbaa bara kị peiwẹrị ye mịẹmịnị. (Ps. 103:20) Jehovah akị á pịrị wẹrịemi fịrịbo ámọ wẹnịmịnị ifiebị, ámịnị fịrị mị akị angọ dụbamọgha, bá ámịnị dụba kịmịawọụ dẹịn-emi kụrọ nana wẹrịemi bara kpọ mịẹdịagha. Kịmị kị tokoni akị á pịrịgha kpọ ámịnị pọwẹịtimi Ọkpọnanaowei fịrị wẹnịmịnị.a (Gen. 32:​24, 29; 2Ki. 19:35) Ámịnị Jehovah laaemi tokoni bị akịgha. Tetuu kị duonị angel-otubo angọ-iyerimọmịnị a o? Tuubị ámịnị Jehovah tarị bá ụ didụbamọ wẹrịemi.— Psalm 89:7 goo.

5. Angel-owei bị John zezemọ ifiebị, tebara ka kị angọ-iyerimọ emi bara mịẹdịa ma o? (Foto kpọ dii.)

⁵ Wo wẹrị angel-otubo kọkọ angọ iyerimọmịnị bara mịẹdịa wẹrịemi bara ditụa. Kụraị 96 C.E. mị, ẹrẹ tịịngha angel-owei bụnụgha dawaị duo yeama akị fịrịmọpaaowei John dịamị. (Rev. 1:1) John bụnụgha dawaị mị ẹrị yebo gbelemọ yọbị teeki mịẹ ma o? John angel-owei karị dọụmị. Anịa, peibolou nana angel-owei mị bọụgha, ụ gbaamị: “Angọ dii! Benebene mịẹkụmọ! Wosẹ odubo otuama. Ịmịnị odubowei ka paa ị́ mọ iné bịnaotubo mọ pịrịemi . . . Ọkpọnanaowei kị karị!” (Rev. 19:10) Beị kọkọ angọ-iyerimọ parụbịbị! Angel-owei mị tokoni akị angọ pịrị dọụgha. Ómịnị ifie famọgha bara Jehovah bẹtịbị kị karị agbẹị-emi bara gbaa John pịrịmị. Ómịnị yelaa Jehovah dẹịn-emi bara kpọ mịẹgha. Angel-owei bị Jehovah karịtimị aladẹ bá kụrọ nana John dẹịn-emi kị gbaa kpọ, Ómịnị angọ-iyerimọ wẹrị gbaa amọ, wosẹ odubo otuama. Angel-owei mị John iroroye kẹrịmọ-tịẹmọ bara kị mịẹ kpọ, ómịnị John darịmọgha. Ómịnị bọụbọụ bara ka kị ụ mọ mọ́ ẹrẹmị. John wó ẹrị yebo kị duonị wó karị dọụtimi bara angel-owei mọ nimimị.

6. Omịnị tebara ka kị angel-otubo angọ iyerịmọ-inyenrinbụọ dimịẹmịnị a o?

⁶ Omịnị tebara ka kị angel-otubo angọ-iyerimọ inyenrinbụọ dịmịẹ mịẹmịnị a o? Omịnị angel-otubo bara angọ dụbamọgha bá tokoni dọụgha bara ka kị Jehovah kọn wo pịrị wẹrịemi fịrị wẹnịmịnị. (1Cor. 4:7) Bịsẹ yọ bụọmọ kpọ, omịnị Jehovah karịtimi aladẹ bá itu bọọ wẹnịfịrị kị nana wẹrịemị kị gbaa kpọ akị angọ serimọ kụmọ. Ị́mịnị fịrịwẹnị Jehovah kị pịrịmịnị ifiesẹ, ị́mịnị kị zaụ dẹịn-emi bara ka kị angọ mịẹ. (Luke 9:48) Angelbo mịẹ bara bị, wo kpọ fịrịwẹnị zịnịotu pịrị kị dọụmịnị. Omịnị kị yelaa dẹịn-emi bara kọn angọ mịẹkụmọ.

7. Omịnị kịmị zezemọ anịghakpọ kịmị iroroye kẹrịmọ-tịẹmọ dọụmịnị ifiesẹ tebara ka kị angọ-iyerimọmịnị a o?

⁷ Omịnị kịmị kẹrịmọ-tịẹmọ anịghakpọ zezemọye kọn wo bịnaotu anịghakpọ wo tọbọụ pịrị dọụmịnịsẹ—angọ-iyerimọ agbẹị-emi. Omịnị zezemọye pịrịmịnị ifiesẹ tịẹkụrọmịnị. Anịa John mọ ẹrẹ angel-owei baramị, omịnị tịẹkụrọemi kị gbaa kpọ ụbọ mịẹ suusụọ kụmọ. Omịnị ebi zịnịotu dẹịngha inyenrinbụọ nana daba, baratụa wo pịrịwẹrị didụbamọ bá tarị nana bara akị zẹzẹmọye pịrịmịnị.—Col. 4:6.

ANGEL-OTUBO TARỊ NANA WẸRỊEMI

8. (a) Luke 15:10 gbaa bara didaba, angel-otubo tebara ka kị kịmịotu tarị wẹrịemi bara mịẹdịamịnị a o? (b) Angel-otubo tebara ka kị baratụa egberigbaa fịrị pịrịmịnị a o? (Bọlọụ foto kpọ dii.)

⁸ Angel-otubo wo ifie nanagha bara fa, bá omịnị ye a paagha bara akị wo dimọgha. Ámịnị wo tarị wẹrịemi. Kịmị boloudei daba, ámịnị pọwẹịmịnị. Gbaamaba, kịmị Jehovah ghọ barasin wẹrị waị bo ụ karị daba, ámịnị pọweị kụrọmọmịnị. (Luke 15:10 goo.) Angel-otubo kpọ angọtụa Daabụọ ebịegberi gbaa fịrị wẹnịmịnị. (Rev. 14:6) Ámịnị wẹnị mú kịmịotu mọ ẹrẹteigha kị gbaa kpọ, ámịnị baratụa egberi gbaamịnị kịmịbo pịrịwẹrị mú egberi bọọ dịsẹnana emi otubo mọ ẹrẹteimịnị. Jehovah wó yalịyalị tẹmẹ mọ bá zịnị ụwọụama kpọ akị baratụa wo pịrịwẹrị dịsẹnana wẹrịemi otubo dọụ ẹrịmịnị, anịduonị omịnị angel-otubo baratụa wo pịrịwẹrị mú laadẹ kịmị nimiwẹrị ẹrẹ tịịngha paagha fa. (Acts 16:​6, 7) Bịsẹ bara kị gbaa kpọ, Jehovah mọkpọ angel-otubo akị baratụa wo pịrịwẹrị egberigbaa fịrị wẹnịmịnị. Omịnị egberigbaa fịrị wẹnịmịnị ifiesẹ, angel-otubo wo mọ mọ́ emị eti wo mọ nana wẹrịemi.—“Ánị Tẹẹbịbịbo Parụmị” ekpedi dii.b

9. Omịnị tebara ka kị angel-otubo tarị nana inyenrinbụọ dimịẹmịnị a o?

⁹ Omịnị tebara ka kị angel-otubo nana wẹrịemi tarị dimịẹmịnị a? Itu duo kọnsiin wẹrịemi kịmị waị bodẹ daba, omịnị kpọ angel-otubo bara pọwẹịmịnị. Omịnị bịna-ụbọ tarị wẹrịemi bara mịẹdịa, bá ụbọ waị bo Jehovah karị yọbị wo mịẹ pọwẹịmịnị bara kpọ mịẹdịa. (Luke 15:​4-7; 2Cor. 2:​6-8) Omịnị kpọ angel-otubo bara, wo kụrọsẹ akị angọtụa egberigbaa fịrị wẹnị. (Eccl. 11:6) Angel-otubo baratụa wo pịrịwẹrị egberigbaa fịrị wẹnịmịnị baramị, wo kpọ baratụa wo bịnaotubo pịrịwẹrị egberigbaa fịrị wẹnị. Gbaamaba, omịnị laa ifie mịẹpaamọ wẹrị aya egberigbaa kịmị mọ wẹnị a paaemi a? Omịnị baratụa itu-kosuotu pịrị a paaemi a, anịghakpọ angọ kụrọgha bịnaotu barịwẹrị egberigbaayọ amú a paaemi a?

10. Omịnị te ka kị Sara paamọye duo tolumọ akị ma o?

¹⁰ Wo angọbo ba wo bụọmọwẹrị wo tọnyọ mịẹghaba? Omịnị mọkpọ aya ụwọụama dọụwẹrị angel-otubo sụọmọ egberigbaa fịrị wẹnị a paaemi. Wo wẹrị Sara paamọye ditụa,c India k’emi bịnaraụ. Amịnị sia kụraị kọn ụwọụpẹlẹfịrị wẹnịmị, anịa Sara dọọntimi ba laa seritịẹ kpọ paagha. Amịnị ba pọwẹịgha. Ania ánị tẹmẹ-anga bịnaotubo baratụa á pịrịmị bá ifiemọsẹ Bible goo angọ pịrịyọ kpọ baratụa á pịrịwẹrị, amịnị waị pọwẹị nanamị. Gbaamịnị yọsẹ, amịnị aya ụwọụama mịẹpaamọ wẹrị egberigbaa fịrị wẹnịmị. Amịnị ba laa tẹtẹtimi letter gẹẹgha yọ duonị, telephone bẹtịbị ka kị egberi gbaamị. Amịnị telephone duo ánị return visitbo tịịnwẹrị, bịsẹ otubo kpọ ba zịnị Bible tolumọ dọụmịnị kịmị gbaa á pịrịmị, Bịnaotubo baratụa á pịrịwẹrị laa telephone duo zịnị otumọ Bible tolumọ timimị. Teeki tuu bọọ paa ma o? Zụa agọnọwei-ama bụọ ifiemị, Sara 70 kịmịama mọ Bible tolumọmị—amịnị bẹtịbị laa bịsẹ kịmịbo mọ Bible tolumọ siingha fa duonị! Amịnị zụa kịmịama dịẹpaamọ akị itu bọọ zịnịotu kpọ pịrịmị. Á mọ mọ́ Bible tolumọmịnị kịmịbo biinyaị yetolumọyọ kpọ bomịnị. Angel-otubo Sara timi timi bịnaotụama kụrọmọwẹrị egberigbaa fịrị wẹnịmịnị yọbị á mịẹ pọwẹịmọmịnị!

ANGEL OTUBO YE-INE INYENRINBỤỌ MỊẸDỊAMỊNỊ

11. Peibolou nana angel-otubo tebara ka kị ye-ine inyenrinbụọ mịẹdịamịnị a o?

¹¹ Bei peibolou nana angel-otubo ye-ine inyenrinbụọ mịẹdịamịnị. Ámịnị kịrịịgha ụgụlapẹlẹ mọ bá sei inyenrinbụọama mọ inetimi biin kụraịama kị baịdẹ. Peibolou nana angelbo, Satan mọ zịnị biin Jehovah karịtimi angel-ama mọ, tịbịkụrọ Jehovah pịrị bara kpọ ẹrịmị. (Gen. 3:1; 6:​1, 2; Jude 6) Bible kẹnị peibolou nana angel-owei kẹnị kụrọnana seitẹmẹ mọ sụụtimi biin erein-ama laa bara kpọ gbaamị. (Dan. 10:13) Bịsẹ yọ bụọmọ kpọ, Angel-otubo biingha kịmịama kị bo Jehovah karịmịnị bara kpọ ẹrịmịnị. Bịsẹ bara kị paa kpọ, bei angọ-iyerimọ angelbo pọwẹịtimi Jehovah karịmịnị. Ámịnị, Ọkpọnanaowei agbẹị ifie laadaba kịrịịgha ụgụla kọnsiinmụ bara nimi wẹrịemi

12. Teeki baratụa wo pịrịwẹrị ye-inemịnị a o?

¹² Omịnị tebara ka kị angel-otubo angọ-iyerimọ inyenrinbụọ dimịẹmịnị a o? Angelbo paamọ baramị, wo kpọ kịrịịgha ụgụla mọ penimọyeama mọ wo laa kpọ paaemi. Omịnị kpọ angel-otubo mịẹ bara kị mịẹmịnị, eti akị Ọkpọnanaowei a tụamịnị. Jehovah agbẹị ifie laadaba bolousei inyenrinbụọ serisiin mịnị. Peibolou nana angelbo ye-ine baramị, omịnị kpọ “ebi fịrị wẹnịmụ yọmị dẹịnsụọ kụmọ.” (Gal. 6:9) Ọkpọnanaowei baratụa wo pịrịwẹrị inemịnị bara gbaa wẹrịemi. (1Cor. 10:13) Omịnị tẹẹ Jehovah pịrịdá, ómịnị yalịyalị tẹmẹ kọn wo pịrị, anịkị omịnị laa etipou bá pọwẹị kpọ nanadẹ. (Gal. 5:22; Col. 1:11) Anịa kịmịama ị́ penimọ daba, ị́ tebara kị mịẹmịnị a o? Eti akị Jehovah atụadá, malafakụmọ. Jehovah ifiebosẹ baratụa wo pịrịmịnị.—Heb. 13:6.

ANGEL-OTUBO WO BARỊỊ ITU MỊẸ YALỊYALỊMỊNỊ

13. Bei kunumọ ereinbo angel-otubo te yelaa fịrị kị nana wẹrịemi a? (Matthew 13:​47-49)

¹³ Mị kunumọ ereinbo, Jehovah yelaa fịrị kọn angel-otubo pịrị wẹnịmịnị. (Matthew 13:​47-49. goo) Kiriogbosẹ biin kịmịama kị wo gbaamịnị egberima dịsẹnana wẹrịemi. Zụaotu egberi kẹrịakị wẹrị bo gesii bara Jehovah karimịnị, zụa ba Jehovah karịgha. Mị bọlọụmị, Jehovah angel-otubo ka kị “bolousei otubo mọ bá bolou ebi otubo mọ pumọmịnị.” Anịduonị, angelbo kpọ itu mịẹ yalịyalịmụ yobị fịrị nana wẹrịemi. Anịa wo mọ mọ́ kẹnịsụọmọ Jehovah karịtimi kịmị ba Jehovah karịgha ifiesẹ, bịsẹ ụbọmị ba laa waị bogha fa bara gbaagha. Bịsẹ yọ bụọmọ kpọ itumị benebene bụụdọọnyeama nanagha fa bara kpọ gbaagha. Anịa, angel-otubo ifiebosẹ angọtụa fịrịwẹnị wẹrị itu mịẹ yalịyalị tịmịmụ bara wo mọ nimi wẹrịemi.

14-15. Omịnị kpọ tebara ka kị angel-otubo dimịẹ wẹrị itu mịẹ yalịyalị timimịnị a o? (Foto kpọ dii.)

¹⁴ Omịnị tebara ka kị angel-otubo dimịẹ wẹrị itu mịẹ yalịyalịmịnị a o? Omịnị kpọ wo kụrọyọsẹ mịẹdá itumị yalịyalị timimịnị. Gbaamịnị barasẹ, omịnị wo adụdụbo kekeremịnị. Bịsẹ bara mịẹmụ yọ duonị, omịnị ebi ikie-ama kị kẹrịmịnị bá wo mọ Jehovah mọ nana wẹrịemi ikie seimọ a paaemi yesẹ kịlẹ. (Ps. 101:3) Omịnị baratụa wo bịnaotubo kpọ pịrịwẹrị ánị nana wẹrịemi peibolou kẹrị kụrọmọmịnị. Gbaamaba, bịna ụbọ kụrọ sei mịẹdaba, omịnị teeki mịẹ agbẹị-emi a o? Omịnị bịna-ụbọ tarị wẹrịemi duonị, omịnị ụbọ kụrọmọ wẹrị mú itu-kosuotubo laa dá paaye gbaa á pịrịmụ bara mịẹmịnị. Bịna-ụbọmị mú dọụgha ifiesẹ, omịnị mú gbaa á pịrịmịnị. Tẹmẹ-anga bọọ suusụọdẹ bịna ụbọ kịalị tẹmẹ-anga baratụapịrịye nana agbẹị-emi!—Jas. 5:​14, 15.

¹⁵ Zụa kụrọ sei mịẹdẹ kịmịama kọn itu duo kọnsiinmịnị. Bịsẹ bara paa daba, omịnị ba ụbọ mọ “yemịẹ gbeleigha.”d (1Cor. 5:​9-13) Bịsẹ bara mịẹdaba itu kị mịẹ yalịyalịmịnị. Bịsẹ yọ bụọmọ kpọ, omịnị itu duo kọnsiindẹ otubo mọ ẹrẹgha yọmị, omịnị ebi ka kị á mịẹmịnị. Ụbọ mọ ẹrẹgha yọbị baratụa ụbọ pịrịwẹrị waị Jehovah dọụbo kpọ paaemi. Ụbọ kọkọ waị bo daba, omịnị kpọ Jehovah mọ bá angel-otubo mọ sụọmọwẹrị pọwẹị nanamịnị.—Luke 15:7.

16. Ị́mịnị kpọ te ụwọụama ka kị angel-otubo dimịẹ a paaemi a o?

¹⁶ Omịnị tọrụ akị angel-otubo ẹrịgha, anịa laa ánị emibara nimi, bá á mọ mọ́ fịrị wẹnị gbeleimịnị yọbị dụba fomuun kị wo laaemi! Pebidá wosẹ ánị ebi inyenrinbụọbo dimịẹ: ánị angọ-iyerimọ bara mọ, kịmịotu tarị bara mọ, ye-ine bara mọ, bá itu mịẹ yalịyalịmịnị bara mọ dimịẹ. Wosẹ kọkọ peibolou nana angel-otubo dimịẹ daba, omịnị kpọ Jehovah warịbolou otuama ka paatimi bẹseri bẹseri laamịnị.