Ị́mịnị Kpọ Iné Bọlọụ Tolumọ Nimi Gesiibo Duo Yetolumọ Akị A Paaemi A?

1. Ị́mịnị bọlọụ Bible duo gesii tolumọ nimi ifiemị, tebara ka kị ị́ gbele ma o?

WO BỌLỌỤ Bible duo tolumọ nimi gesiibo wo ụndụbo deimị. Gbaamaba, Ọkpọnanaowei ẹrẹ Jehovah bara wo mọ nimimị, omịnị mịẹdẹ kị wó ikie-otuama paamụ bara mịẹmị. (Isa. 42:8) Fịịdẹ-otu gbelemọ gesiimị wo mọ tolumọ nimibị, omịnị ba wo tarị wẹrịemi fịịdẹ otubo ụyafịmịnị malafagha. (Eccl. 9:10) Bá omịnị Ọkpọnanaowei Paradise kiikoromọ bara tolumọ nimi ifiebị, omịnị ba bọlọụ a paamọye duonị kpekpekpekpe malafagha. Omịnị inyenrintimi 70 anịghakpọ 80 years baịdaba fịịmụ malafagha, anịa inyenrintimi bẹseri bẹseri laamụ ukiemọye nanamị.—Ps. 37:29; 90:10.

2. Omịnị 2Peter 1:​12,13 didaba, tebara kị tẹmẹanga ma kasụọdẹ otu kpọ ánị bọlọụ tolumọ gesiibo duo arere nana a paaemi o?

² Omịnị bọlọụ Bible duo tolumọ nimi gesiibo kọn yelaagha bara mịẹ kụmọ. Christtuuduo-otubo “gesii ma bọlọụ bụọmịnị” ifie kị fịrịmọpaa-owei Peter wo maamụ karamọ fun gẹẹ á pịrịmị (2Peter 1:​12, 13 goo.) Bịsẹ ifiemị, ámịnị itu bolou bọọ tẹmẹanga akpotuama nanamị, anị ikpe kịmị tolumọ kịmịama bá Ọkpọnanaowei nimigha kịmịama paamị. (2Pet. 2:​1-3) Bịnaotubo mị bụụdọọnyebo kilemụ yọ duonị Peter á kụrọmọmị. Peter tebara kị mịẹ ma o? Ómịnị ánị bọlọụ tolumọdẹ gesiibo kọn ánị ukiemọmị. Bịsẹ yebo kị baratụa á pịrịwẹrị peibolou ma tịẹ kụrọtimi duu laamịnị

3. Tetuu kị duonị Christtuuduo-otubosẹ ánị bọlọụ tolumọ nimidẹ gesiibo waị mọ ditụa agbẹị-emi a o? Tọnmọdịaye gbaa.

³ Omịnị tẹmẹanga ma kasụọmịnịmị, omịnị Bible duo aya tolumọ yeama nanamịnị. Akị tọnmọdaba: Fịyaị tụọdị wẹrịemi kịmị mọ bá tụọdịkagha kịmị mọ kpekẹnị yeama kọn fịyaị tụọdaba, fịyaị tụọdị wẹrịemi ụbọmị bịsẹ kpekẹnị fịyaị tụọ yebo kọn zịnị ịmbẹlẹ bẹbẹpaa fịyaị-ama tụọ a paaemị. Bịsẹ bara kị, Jehovah karịtimi aladẹ otubo Bible yọ duo biin yeama tolumọ akị, aya Bible tolumọmịnị otubo dẹịn-emi. Omịnị benibile bụọmọdẹ kị gbaa kpọ, wo Bible duo tolumọdẹ yebo kọn tịẹkiri ma tụa wo ụndụbo a inyerindaba, omịnị laa aya yeama tolumọ akị paaemi. Wo wẹrị baratụa kasụọdẹ Christtuuduo-otubo pịrịwẹrị tolumọ bụọmọdẹ yebo duo yetolumọ akị a paaemi tara ụwọụama ditụa.

JEHOVAH KỊ YEBOSẸ TẸMẸMỊ

4. Jehovah kị yebosẹ tẹmẹ barabị wo mọ nimi yọbị tebara ka kị wo gbeledẹ a o?

⁴ “Ọkpọnanaowei kị yebosẹ tẹmẹmị.” (Heb. 3:4) Kiriogbo mọ bá kiriogbo ma ụndụ nana wẹrịemi yebosẹ tẹmẹ ụbọ mị kịlịkịlị bá kụrọ nana wẹrịemi bara wo mo nimi wẹrịemi. Ómịnị kị wo tẹmemị, anịduonị, ómịnị ebibara wo nimi wẹrịemi. Zịnị ye mọkpọ emi, ómịnị wo kekeremịnị. Ebi wo pịrịemi yebo kpọ ómịnị mọ nimi wẹrịemi. Jehovah kị bei yebosẹ tẹmẹ bara wo mọ nimi yọbị, wo ụndụbo dei yọama mịẹpaamọdẹ, bá pọwẹị kpọ nanadẹ.

5. Te gesii kị baratụa wo pịrịwẹrị angọ-iyerimọ inyerinbụọ nanamịnị a o? (Isaiah 45:​9-12)

⁵ Jehovah yebosẹ tẹmẹ gesiibị wo mọ nimi yọbị, angọ-iyerimọ bara ka kị wo tolumọdẹ. Gbaamaba Job, Jehovah tẹmẹ yebo gbelemọ yọbị agbẹịgha iroroye nana ifiemị, Jehovah ómịnị kị yebosẹ tẹmẹ bara ka kị Job ukiemọmị. (Job 38:​1-4) Bei baratụa Job pịrịwẹrị nimi amọ, Ọkpọnanaowei ụwọụbo dụba akị kịmị-awọụ ụwọụbo dẹịn-emi bara nimimị. Bei egberi gbelemọ yọbị, bụrụowei Isaiah gẹẹmị: “Atọụ gbaa akị ye tẹmẹmịnị owei pịrị amọ: ‘Teeki ị́mọ tẹmẹmịnị abara kọn ụ bii a paaemi?’”— Isaiah 45:​9-12 goo.

6. Omịnị te ifie ka Jehovah kị dụba dẹịn-emi Ọkpọnanaowei bara nimi agbẹị-emi a o? (Fotobo kpọ dii.)

⁶ Kịmị ye mịẹ dọụmịnị anịa ụbọmị Jehovah karịtimi aladaba, Jehovah mọ wó Egberi mọ a sẹsẹrẹmụ bara dii a, ómịnị wó eti kọn wó bẹtịbị nimiye ka tụa kpọ paaemi. (Job 37:​23, 24) Ọkpọnanaowei kị dụba dẹịn-emi bá kịlịkịlị nimiye kpọ nana wẹrịemi bara kẹrị irorodaba, baratụa ụ pịrịwẹrị angọ-iyerimọ bá Jehovah ye-iroromịnị barabị dụba akị wó ye-iroromịnị bara dẹịn-emi bara nimimịnị. (Isa. 40:22; 55:​8, 9)

7. Jehovah ogbomị dei yọama mịẹ ifiemị Rahela teeki mịẹwẹrị dei yọbo kẹrịakị ma o?

⁷ Rahela, Slovenia kị inyenrinmịnị bịna-araụ, amịnị Ọkpọnanaowei kị yebosẹ tẹmẹ bara kẹrị iroromịnị yọbị, baratụa á pịrịwẹrị ogbomị dei yọama kị paa kpọ kẹrịakịmị. Á gbaamị: “Zụa ifiema, bọlọụdamịnị otubo gbaamịnị egberibo kẹrịakịmụ yọbị bọụbọụ ị pịrịgha. Gbaamaba, ịmịnị 2023 Governing Body Mịẹnimimọye #8 dii bụọmọdẹ kpọ, bịnaowei epori tụawẹrị bo ẹrẹegberi pịrị ifie kpọ ị mịẹ tamamamị. Anịduonị Jehovah baratụa ị pịrịwẹrị deiyọ kẹrịakị bara ịmọ tẹẹmị.” Jehovah kị agọnọ mọ kiri mọ temẹ wẹrịemi duonị, ómịnị kụrọ nanawẹrị wó ogbo daa apaaemi bara Rahela mọ nimimị. Ị́mịnị kpọ Jehovah ogbomị aya tolumọ yeama anịghakpọ akị yemịẹmịnị bara deidaba, deiyọ kẹrịakịmụ yọbị bọụbọụ ị́ pịrịgha kpọ paaemi, peibidá angọ-iyerimọdá yebosẹ tẹmẹoweimị nana wẹrịemi kụrọ mọ kịlịkịlị-nimiye mọ kẹrị iroro.—Rom. 11:​33-36.

ỌKPỌNANAOWEI ỤYA BỤỌMỌ WẸRỊ PAAMỊNỊ TUUMỊ

8. Ọkpọnanaowei ụya bụọmọ wẹrị paamịnị tuubị wo mọ nimi yọbị, tebara ka kị wo barịdẹ a o?

⁸ Tetuu kị duonị Ọkpọnanaowei ụya bụọmọ wẹrị paamịnị a o? Zụaotu naa kọn mị biibịbị parụmụ bara nimigha duonị boloukọn Ọkpọnanaowei pịrịmịnị, bá Ọkpọnanaowei benebene fa bara kpọ irorodẹ! (Prov. 19:3) Anịa, Adam duo bo wo laa-emi sei mọ bá tẹịgha inyerinbụọ mọ kị ụya mịẹpaamọmịnị, Ọkpọnanaowei duo bogha bara ị́mọ tolumọ nimidẹ. Ị́mịnị mọkpọ Ọkpọnanaowei etipou yọkị duonị biin kịmịama fomuun nana wẹrị bo ụ nimi bá ánị fịmịnị ụyabo kpọ kọnsinmụ bara kpọ nimidẹ. (2Pet. 3:​9, 15) Mị gesiibo nimi yọbị ị́ kụrọmọdẹ bá ị́ mịẹ Ọkpọnanaowei mọ kpọ naịn-dẹịndẹ.

9. Omịnị te ifie kị Jehovah ụya bụọmọ wẹrị paamịnị tuubo kẹrị ukie agbẹị-emi a o?

⁹ Omịnị Jehovah ụyafị inyenrinbụọ kọnsinmụ ifie korumịnịmị, omịnị etipou agbẹị-emi bara kpọ nimidẹ. Anịa, omịnị anịghakpọ wo tarị wẹrịemi kịmị kụrọ inyenrinbụọ asụọ, kịrịịgha ụgụla-pẹlẹ bá nana wẹrịemi yeama fadaba, tetuu kị duonị Jehovah ifie famọgha bara baratụa wo pịrịgha bara wo mọ iroro kpọ paaemi. (Hab. 1:​2, 3) Bịsẹ iroro yebo wo ịkịọụ duo sụọdaba, Jehovah ụ karịmịnị-otubo kpọ bụọmọ wẹrị ụyafịmịnị yọmị kẹrị iroro, bịsẹ yọmị baratụa wo pịrịmịnị.a (Ps. 34:19) Omịnị Jehovah wo laamịnị bụụdọọnyebosẹ kọnsinmụ ifie kẹrị iroro.

10. Anne yin fịị ifiemị teeki baratụa á pịrị wẹrị ine ma o?

¹⁰ Ọkpọnanaowei ụya bụọmọ wẹrị paamịnị tuubị wo mọ nimidaba baratụa wo pịrịwẹrị ụya inemịnị. Anne, amịnị Mayotte, India emi abadị tụọ ka timi inyenrinmịnị, á gbaamị: “Ị yin zụa kụraịama bụọdẹ ifie fịị yọmị ị mịẹ eneni kẹrịmị. Anịa, ịmịnị ifiebosẹ Jehovah ụya mịẹpaamọgha bara kọn angọ ukiemọmịnị. Ómịnị ụya kọnsin bá wo tarị wẹrị fịịdẹ-otubo tịịn seribomụ yọ dọụ kụrọmọ wẹrịemi bara ịmọ nimi wẹrịemi. Bei yebo kẹrị iroromịnị yọbị ị mịẹ dọọ nana bá ị kụrọmọmị.”

11. Jehovah ụya bụọmọ wẹrị paamịnị tuubị tebara ka kị baratụa wo pịrị wẹrị angọtụa egberi gbaamịnị a o?

¹¹ Jehovah ụya bụọmọ wẹrị paaamịnị tuubị wo mọ nimi yọbị baratụa wo pịrịwẹrị angọtụa egberigbaa fịrị wẹnịmịnị. Sei mịẹmịnị otubo sei a barasin wẹrị bo zụọbụọmọye nanamụ yọkị duonị Jehovah etipoumịnị bara Peter mọ gbaasin dẹmị, ómịnị mọkpọ gbaamị: “Ámịnị ánị timi agbẹị-emi bara kẹrị iroro bá mịẹdẹkị yalịyalị inyenrinbụọ nana bá Ọkpọnanaowei kẹrị kụrọmọmụ bara kpọ kẹrị iroro.” (2Pet. 3:11) Egberigbaa fịrị kpọ anị kẹnị ụwọụ nẹ omịnị “Ọkpọnanaowei kẹrị kụrọmọ wẹrịemi “ bara mịẹdịamịnị. Wo kpọ Ọkpọnanaowei bara, kịmịotu tarị-emi. Bá ámịnị kpọ ayakpọ duo suo bara kị wo mọ dọụmịnị. Jehovah etipoutimi ụ karịmụ fomuun kọn iné ete bọọ emi kịmịbo pịrịdẹ. Omịnị Jehovah sụọmọ mị ụndụ zụọ fịrị wẹnị wẹrị baratụa biin kịmịama pịrịwẹrị bo Jehovah karịmịnị yọbị, opu fommun kị wo laaemi!—1Cor. 3:9.

OMỊNỊ “KUNUMỌ EREINBO” K’EMI

12. Omịnị “kunumọ ereinbo” ka inyenrinmịnị bara nimi yọbị, tebara ka wo eti mịẹ kụrọmọdẹ a o?

¹² Bible mị “kunumọ ereinbo” laadaba, kịmịawọụ timimụ bara gbaa wẹrịemi. (2Tim. 3:​1-5) Wo etemị emibaramị wo mọ didaba, mị bụrụ egberimị paabeinmịnị. Kịmịawọụ inyenrinbụọbo sei bọlọụ ka múmịnị bara wo mọ ẹrịmịnị, bịsẹ yọmị baratụa wo pịrịwẹrị wo kọn Bible ma nana wẹrịemi eti mịẹ kụrọmọ bọlọụ dẹịnmịnị.—2Tim. 3:​13-15.

13. Jesus Luke 12:​15-21 gbaa wẹrịemi tọnmọdịaye didaba, omịnị te biibịbịama ka kị angọ bii a paaemi a o?

¹³ Omịnị kunumọ ereinbo ka inyenrinmịnị bara nimi yọbị baratụa wo pịrịwẹrị yelaadẹịn yebo ka kị bọlọụdamịnị. Bịsẹ yọ gbelemọ yọbị wo wẹrị Jesus Luke 12:​15-21. (goo.) bọọ gbaa wẹrịemi egberi ditụa. Tetuu kị duonị “ye-irorogha” kịmị akị pẹrẹowei tịịn ma o? Ómịnị yelaa yebo kọn bọlọụdagha yọkị duonị Jesus bịsẹ bara gbaamị. Ómịnị “biin yeama bẹnịmọ angọ pịrịmịnị anịa Ọkpọnanaowei tọrụ yọmị kẹnịye kpọ fa,” ómịnị wo ifie kọn yelaa yeama mịẹgha. Anịduonị Ọkpọnanaowei gbaa ụ pịrịmị: “Bei deinmị iné ụndụmị ámọ kọn yọ a bomịnị.” Wo ifie kpọ, akpọ famụ ereinmị naịn-dẹịnmịnịmị, omịnị wo angọbo bii a paaemi: ‘ịmịnị kpọ yelaa yebo ka kị bọlọụdamịnị a? Ịmịnị baratụa ine awọụbo pịrịwẹrị tẹmẹanga mịẹmụ yeama sẹlẹ angọ pịrịmịnị? Ịmịnị ine kụrọ mọ, ine ifie mọ, bá nana wẹrịemi sịlịbo mọ, kọn angọ kị mịẹ pẹrẹmọ dọụmịnị a, anịghakpọ akị fịrị wẹnị Jehovah kị pịrịmịnị a?’

14. Miki paamọye didaba, tetuu kị duonị omịnị kunumọ ereinbo k’emi bara kẹrị ukie agbẹị-emi a o ?

¹⁴ Omịnị kunumọ ereinbo ka inyenrinmịnị bara nimi yọmị baratụa wo pịrịwẹrị ebi yeama sẹlẹ angọ pịrịmịnị. Bịsẹ bara kị paa Miki tịịnmịnị bịna-araụ pịrịmị. Á gbaamị: “Ịmịnị school duo paa ifiemị, nama-ama emibara tolumọ dịsẹ nanamị. Bá ụwọụpẹlẹ fịrị wẹnị wẹrị egberigbaa otu dọụ wẹrịemi yọ mú egberigbaa dịsẹ kpọ nanamị. Anịa kasụọdẹ ikie-otuama, ịmịnị kẹnị ifie laa mị maa yebosẹ kẹrị mịẹ a paagha fa, anịduonị ịmịnị ebibara yebị kẹrị iroro bara ámọ gbaamị. Akpọmị alaghatimi famụ bara kpọ ámịnị mọ kọn ine ukiemọmị. Anịa, ayakpọ laadaba, ịmịnị namabo emibara tolumọ timi bẹseri bẹseri kị laamịnị. Anịduonị, ịmịnị ine ifiesẹ akịgha fa fịrị sẹlẹ angọ pịrịmị. Bịsẹ fịrịmị ị bụọmọ wẹrị beinmo beinmọ ụwọụ pẹlẹ fịrị wẹnịmị, bá tuu ifie laamị Ecuador ibemị, egberigbaa otu dọụ wẹrịemi yọ a mú egberigbaamị.” Mị tịẹkirịmị, Miki mọ á yei mọ bịsẹ ibe ma timi itu dii fịrị kị wẹnịmịnị

15. Kịmịotu naa ebiegberi kẹrị akịgha kị gbaa kpọ James paamọ yebị te ka kị wo tolumọ ma o? (Fotobo kpọ dii.)

¹⁵ Kịmịotu tịẹkiri kị wo gbaamịnị ebiegberi kẹrịakịgha kpọ, suusuo kụmọ. Ámịnị dei a paaemi. Wo wẹrị Jesus bịnaowei James paamọye ditụa. Jesus sọụpaatimi ifie mọ, Messiah a paa ifie mọ, bá kiriogbo ma dụbadẹịn kịmị tolumọ owei a paa ifie kpọ, ómịnị mọ ẹrịmị. Bịsẹ bara kị paa kpọ, James wo tuuduo-owei a paagha. Jesus fịịyọ duo seridẹ kị James wo tuuduo-owei a paamị bá angọtụa kụrọmọmị!b (John 7:5; Gal. 2:9) Anịduonị wo warịbolou-otubo naa gesii bọọ dịsẹ nana wẹrị kẹrị akịgha kị gbaa kpọ, daabụọ egberi kọn á mọmó ẹrẹmụ yọbị suusụọ kụmọ. Ukie omịnị kunumọ ereinbo ka emi duonị, egberi gbaa fịrịmị yelaa fa k’emi. Ị́ gbaa á pịrịmịnị egberibo tuu ifie ka ánị adụdụ bọọ sụọ kpọ paaemi, kaanghaba opu akpotu paamịnị ifiebị.c

JEHOVAH KỌN WO UKIEMỌMỊNỊ YEBO TỌRỤKẸRỊYỌ NANA

16. Jehovah kọn wo ukiemọdẹ yebo tebara ka kị baratụa wo pịrịdẹ a o ? (“Bible Gesii Kọn Á Tolumọ” ekpedi kpọ dii)

¹⁶ Jehovah ogbo mịẹpaamọ wẹrịemi zụa yeama mịẹ akị naa wo nimidẹ gesiibo nimigha otubo kị pịrị wẹrịemi. Gbaamaba, amabẹnịmọ egberibo mọ, jw.org emi zụa vidioama mọ, egberitịbịama mọ, bá fun-ama kpọ. Bịsẹ bara kị gbaa kpọ, wosẹ mị yebo duo arere nanamịnị. Bei yebo wo kọn Jehovah a nana wẹrịemi tarị mịe kụrọmọ dẹịnmịnị, bá wo kọn Bible ma nana wẹrịemi eti kpọ mịẹ kụrọmọ dẹịnmịnị, mị yebo baratụa wo pịrịwẹrị ebibara Bible gesii kọn zịnịotu tolumọmịnị.—Ps. 19:7.

17. Ị́mịnị te ifieama kị iné bọlọụ tolumọ Bible gesiibo kẹrị ukie agbẹị-emi o?

¹⁷ Omịnị Jehovah karịtimi biin kụraịama kị baịdẹ kpọ, omịnị Bible duo aya gesii nimidaba wo mịẹ pọwẹịmịnị. Anịa, omịnị bọlọụ tolumọ wẹrị bo Jehovah iserị-otu a paa gesiibo didụbamọ wẹrịemi. Ị́mịnị Jehovah ogbo gbaa bara dii ye mịẹmụ bara dii a iné bẹtịbị nimiye ka sẹsẹrẹmụ dadiye bo ị́ laadaba, ogbomị daamịnị ụbọmị ukie, anị wo Ọkpọnanaowei Jehovah, ómịnị kị kịlịkịlị bá dụbadẹịn ye tẹmẹowei. Omịnị anịghakpọ wo tarị wẹrịemi kịmị ụyafịmịnị ifiesẹ, etipou bara Jehovah ụya bụọmọ wẹrị paamịnị tuu kẹrị ukie. Omịnị wo ifie mọ, wo nana yebo mọ kọn fịrị wẹnịmụ bara iroromịnịsẹ, kunumọ ereinbo kị laade, bá yelaa-deịn yebo ka kị bọlọụdá agbẹị-emi bara ukie. Pebidá Jehovah kọn wo ukiemọmịnị yebo wo kụrọmọ bá wo mịẹ kịlịkịlị ụ karịtimi tuu laa.