TOLUMỌYE 65
Esther Anị Kịmịbo Zụọbụọmọmị
Esther Jew-ere, amịnị Persia ibe bọọ Shushan ama ka inyenrintimi mị. Biin kụraịama bụọdẹ ifiemị, Nebuchadnezzar Jerusalem bọọ Esther mọ bá anị warị-otubo mọ kẹrị-akịmị. Esther daụ bịnaowei tọbọụ Modecai, kị a kekere paamọmị. Ómịnị odubo-gban Persia ama Pẹrẹ, Ahasuerus kị pịrịtimi mị.
Pẹrẹ Ahasuerus zịnị ere nana dọụtimi duonị, wó odubo-otubo ama bọọ ebidẹịn-emi erebo akị ụ yarịmị. Esther kpọ ámịnị mọ kọn ụ yarịmị. Pẹrẹ bị Esther kị sẹlẹ akị queen a tụamị. Mordecai Esther Jew-ere bara gbaa kịmị pịrị kụmọ bara gbaa a pịrịmị.
Haman angọserimọ owei kị pẹrẹ warị bọọ fịrịwẹnịtimi otubosẹ tịbị a timi mị. Kịmịsẹ tịbị-oboimọ ụ pịrị kị ómịnị mọ dọụtimi mị. Anịa Mordecai tịbị-oboimọ ụ pịrịgha. Anịduonị ómịnị Modecai baa dọụmị. Modecai Jew-owei bara Haman mọ nimi ifiemị, ómịnị ụ baamụ iroro tọnmị. Ómịnị gbaa pẹrẹ pịrịmị: ‘Jew-otubo bolousei kụrọmọemi, anịduonị; ị́mịnị á baa agbẹị-emi.’ Ahasuerus gbaa ụ pịrịmị: ‘Iné mịẹmụyesẹ mịẹ,’ bá oloko tụamụ kụrọ kpọ akị ụ pịrịmị. Anịduonị, Haman Adar agọnọweimị 13 karamọ baịma Jew-otubosẹ baamụ oloko tụamị. Jehovah wó mịẹtimi yebị ẹrịmị.
Bịsẹ timitimi oloko tụadẹ bara Esther mọ nimigha. Anịduonị, Mordecai oloko gẹẹwẹrịemi fun bọọ kẹnị fịrịmọ Esther yarịwẹrị gbaa a pịrịmị: ‘Mú pẹrẹ mọ ẹrẹ.’ Esther gbaa Mordecai pịrịmị: ‘Pẹrẹ bị kịmị tịịnghatimi kịmị sụọmú ụ laa daba, pẹrẹ bị bịsẹ ụbọ baa kị baamịnị. Timi 30 erein-ama bụọdẹ kị ịmịnị mú pẹrẹ bị ẹrị a paaemi! Mọabịkpọ ịmịnị mú pẹrẹ laamịnị. Ómịnị wó akọlọ paamọ ị pịrị daba ịmịnị fịịgha fa. Anịa ómịnị wó akọlọ paamọ ị pịrịghaba ịmịnị fịị mịnị.’
Esther sụọmú pẹrẹ laamị. Pẹrẹ bị anị ẹrị ifiebị, ómịnị wó akọlọ paamọ a pịrịmị. Amịnị mú ụ laa ifiemị, ómịnị a biimị: ‘Esther, teeki ị mọ mịẹ ị́ pịrị kị ị́ mọ dọụmịnị a o?’ Amịnị ụ parụmị: ‘Ị́ mọ Haman mọ bo fịyaị-fị kị ị mọ dọụwẹrịemi.’ Ámịnị fịyaị-fịmịnị ifiemị, Esther waị mọkpọ ámịnị bo zịnị ifiea fịyaị-fị bara gbaa á pịrịmị. Ámịnị maamụkaramọ ifie bọọ fịyaị-fịtimi mị, pẹrẹ mị a biimị: ‘Teeki ị mọ mịẹ ị́ pịrị a?’ Amịnị gbaa ụ pịrịmị: ‘Kẹnị ụbọ ị mọ ine kịmịbo mọ baa dọụmịnị. Sisei wo zụọbụọmọ.’ Pẹrẹ bị Esther biimị: ‘Te ụbọ kị ị́ baa dọụmịnị nị?’ Amịnị gbaa ụ pịrịmị: ‘Bolousei owei Haman kị ị baa dọụmịnị.’ Ahasuerus boloukọn kụrọmọ duonị, ómịnị kịmịotu fịrịmọ Haman baamị.
Anịa kẹnị ụbọ kpọ Haman tụa oloko mị kọnsin a paagha, pẹrẹ kpọ bịsẹ kụrọ nanagha. Anịduonị pẹrẹ bị Mordecai akị pẹrẹ warị bọọ emi yelaa otubosẹ a tịbị a tụamị. Bá aya oloko tụamụ kụrọ kpọ akị ụ pịrịmị. Kịmịotu Jew-otubo mọ sụụyọ a bodaba ámịnị laa á mọ mọ́ sụụ a paaemi oloko Mordecai mọ tụamị. Adar agọnọwei bọọ 13 karamọ baịmị, Jew-otubo ánị egiren-otubo dẹịnmọmị. Bịsẹ ifie duomúsẹ ámịnị kụraịbosẹ bịsẹ erein bọọ ogeteitimi mị.
“Ine tịbị duonị, ámịnị á kọn mú ibe daa-otu mọ bá pẹrẹ-ama mọ tọrụyọ a tịẹmọmịnị, ámịnị ánị tọrụyọ mọ bá ibebo tọrụyọma iseritịẹ ị pịrịmịnị.”—Matthew 10:18