Jesus Indidọụ-otuama Paamọmị

Jesus fịrịmọpaa-otubo paamọsin-wẹrị alaaghatimi Peter Galilee Abadịma indidọụ yọ amúmị. Thomas, James, John, bá zịnị tuuduo-otuama kpọ ụ mọ mọ́ múmị. Ámịnị deinsẹ akị indidọụmị, anịa ámịnị kẹnị indi kpọ baagha.

Pekei laa ifiebị, kẹnị owei abadị-aka bọọ tịẹ-emi bara ámịnị mọ ẹrịmị. Ómịnị bịsẹ yọ bọọ tịẹtimi á biimị: ‘Ámịnị indi baadẹ a?’ Ámịnị ụ parụmị: “Omịnị naa indi baagha!” Ómịnị gbaa á pịrịmị: “Ánị ariri anịghakpọ dií kọn amabara anga bọọ tẹịnmọ.” Ámịnị bịsẹ bara mịẹ ifiemị, biin indi-ama ariri bọọ kẹrịmị. Anịduonị ariri kpụn arụ bọọ saịmụ yọbị kụrọ á pịrịmị. Bịsẹ tịẹkiri mị, Jesus kị abadị-aka bọọ tịẹ-emi bara John mọ nimi mị. Anịduonị ómịnị gbaamị: “Ánị wo Nanaowei!” Peter ifie famọgha bara desi beni bọọ korowẹrị oki abadị-aka bọọ múmị. Kọọ tuuduo-otubo kpọ ifie famọgha bara arụ yọụ abadị-aka bọọ múmị.

Ámịnị bo abadị-aka laa ifiemị, indi mọ breadị mọ fẹnị-bụrọ a gbana-emi bara ẹrịmị. Ámịnị kpọ ánị indibo a zụa yaị kọnbo kọọ indibo gbelemọ bara Jesus mọ gbaa á pịrịmị. Ómịnị bá gbaa á pịrịmị: ‘Bo fịyaị-fị.’

Ámịnị fịyaị-fịsin ifiemị, Jesus, Peter biimị: ‘Ị́mịnị ị tarị akị indidọụ fịrị dẹịn-emi a?’ Peter gbaamị: ‘Iin, Nanaowei, ị́mịnị kpọ bịsẹbara nimiwẹrịemi.’ Jesus bá gbaamị: ‘Bịsẹbara-aba ine anịnabo gbalị.’ Jesus waị mọkpọ ụ biimị: ‘Peter, ị́mịnị ị tarịwẹrịemi?’ Peter gbaa ụ pịrịmị: ‘Nanaowei, ịmịnị ị́ tarịwẹrịemi bara ị́mịnị kpọ mọ nimiwẹrịemi.’ Jesus gbaa ụ pịrịmị: “Ine kala anịnabo kekere.” Jesus tarụkaramọ ifiema ụ bii ifiemị, yemị Peter gbele kụrọmọ duonị, Peter gbaa ụ pịrịmị: ‘Nanaowei, ị́mịnị yebosẹ kị nimiwẹrịemi. Ịmịnị ị́ tarịwẹrịemi bara ị́mịnị mọ nimiwẹrịemi.’ Jesus gbaa ụ pịrịmị: “Ine kala anịnabo gbalị.” Jesus mọkpọ gbaa Peter pịrịmị: “Pẹlẹgha bara ine tuuduo.”