Ọkpọnanaowei Dọụbara Mịẹ Omoni-oweimị

Jacob awọụbo Joseph bụọ daba tuupẹlẹ-owei laadẹ. Joseph bọlọụ-otubo a daụ Joseph kị tarị dẹịn-emi bara nimimị. Bịsẹ yemị tebara ka kị á gbele bara kị ị́ mọ tọn nị? Ámịnị Joseph a fịọnkẹrị bá ụ golumị. Joseph dawaịmị, ómịnị dawaịbo gbaa wó bịnaotubo pịrịmị. Ámịnị kẹnịbaị tịbị-oboimọ Joseph pịrị mịnị kị dawaị mị mọ gbaamịnị bara kị Joseph bịnaotubo mọ tọnmị. Anịduonị, ámịnị ụ golu kụrọmọ dẹịnmị!

Kẹnị erein, Joseph bịnaotubo Shechem ama mọ naịn emi yọ a timi anịna gbalịtimi mị. Jacob, Joseph fịrịmọ wó bịnaotubo dii a múmị. Ámịnị alaa yọ duo Joseph bomịnị bara ẹrị ifiemị, ámịnị gbaa zọzọ pịrịmị: ‘Dawaịmịnị owei mị bomịnị. Wo ụ báa!’ Ámịnị Joseph akị olumu-kụrọmọemi ogugu a gbeintụamị. Anịa Judah gbaamị: ‘Ụ báa kụmọ! Wó ụ kọn omoni a yẹrịpaamọ.’ Anịduonị, ámịnị 20 silver sịlị ka kị Joseph yẹrịpaamọ Egypt á mútimi Midianite fọụtubo otu pịrịmị.

Joseph bịnaotubo obori asịịn akị Joseph coat siriwẹrị arú fịrịmọ mú a daụ yarịwẹrị a daụ bii mị: ‘Bei iné tọbọụ arú a?’ Jacob arú bị ẹrị ifiemị, kụrọ nama kị Joseph báadẹ bara kị iroromị. Yemị Jacob dọọn kụrọmọmị. Anịduonị, kẹnị ụbọ kpọ ụ kụrọmọ a paagha.

Egypt laa ifiemị, Joseph fẹị otubo waị Joseph yẹrị akị Egypt bọọ kẹnị opu-owei pịrịmị, bịsẹ owei ẹrẹbị Potiphar. Mọabịkpọ Jehovah Joseph mọ timimị. Joseph ebibara fịrị wẹnịmịnị bara Potiphar mọ dọụ ẹrịmị, anịduonị, ómịnị eti akị Joseph a tụamị. Timi kẹnị ifie laamị, Potiphar wó warị bọọ emi yebosẹ akị Joseph bara a tụamị.

Potiphar taa Joseph di-ebi emi bá angọ kpọ kụrọ emi bara dọụ ẹrịmị. Amịnị ereinbosẹ Joseph a mọ mọ́ bụnụ bara gbaa Joseph pịrịtimimị. Joseph teeki mịẹ mịnị a o? Ómịnị a mọ mọ́ bụnụgha. Ụ gbaamị: ‘Ị́mịnị ị́ mọ mọ́ bụnụgha fa! Bei ye mịẹmụ yọbị kịrịịgha. Ị́mịnị ine nanaowei taa, ine nanaowei mị eti akị in’a tụa wẹrịemi. Ịmịnị ị́ mọ mọ́ bụnụdaba ịmịnị seimịẹ Ọkpọnanaowei a bụọ mịnị!’

Kẹnị erein laa ifiemị Potiphar taa Joseph kẹrịpou wẹrị ụ mọ mọ́ bụnụ dọụmị. Amịnị wó bịdẹ kẹrịpou mị anịa Joseph baịntẹịmị. Potiphar bo warị laa ifiebị, Joseph a kẹrịpou wẹrị a mọ mọ́ bụnụ dọụtimi bara amịnị mọ gbaa akị a yei Potiphar pịrịmị. Amịnị ikpe egberi kị gbaa Potiphar pịrịmị. Potiphar boloukọn kụrọmọmị, anịduonị, ómịnị Joseph akị ikoli-warị a kaịmị. Mọabịkpọ Jehovah benebene Joseph baragha.