Balaam Ịkịtịkịtị (Donkey) Bị Ẹrẹmị

Israel-otubo bou bọọ timi 40 kụraịama baịdẹ. Ámịnị biin kụrọ ibe-ama dẹịnmọdẹ. Ámịnị bo Moab, anị Jordan Tọrụ mọ naịn emi yọ laa ifiemị, kikoromọ wẹrị ogbo duo sụọmụ ifie laadẹ. Balak, Moab Pẹrẹ mị, Israel-otubo wó ama kpọ kẹrịakịmụ malafamị. Anịduonị, ómịnị Balaam tịịn Moab bọọ Israel-otu weriyọ a bomị.

Anịa Jehovah gbaa Balaam pịrịmị: ‘Ị́mịnị benebene weribịbị kọn Israel-otubo pịrị kụmọ.’ Anịduonị Balaam mú bụọgha. Pẹrẹ-owei Balak maamụkaramọ ifie a ụ tịịnmị, bá wó dọụdẹ yesẹ akị ụ pịrịmụ bara gbaamị. Mọabịkpọ Balaam bụọgha. Ọkpọnanaowei gbaamị: ‘Ị́mịnị mú a paaemi, anịa Ị gbaa ị́ pịrịmụ yebo bẹtịbị kị ị́mịnị mọ gbaa mịnị.’

Balaam wó ịkịtịkịtị bọọ lei wẹrị Moab tamụ anga bọọ múmị. Jehovah Isael-otubo werikụmọ bara gbaa ụ pịrịmị, anịa ómịnị Israel-otubo werimụ bara kị tọnpẹlẹwẹrị múmị. Jehovah angel-owei ụwọụ bọọ tara ifie ụ paamọmị. Balaam angel-owei bị ẹrịgha, anịa wó ịkịtịkịtị bị angel-owei mị ẹrịmị. Anịduonị, ịkịtịkịtị mị ụwọụ duo serii bou duo sụọmị. Maamụkaramọ ifie mị, ịkịtịkịtị bị Balaam bụọ kọn okuta-ama kọn mịẹ wẹrịemi warị akpakpa faamụmị. Kunumọ bị ịkịtịkịtị bị ụwọụ okolobiri bọọ korobụnụmị. Tara ifiebosẹ Balaam ogbolo akị ịkịtịkịtị faamụmị.

Tarụkaramọ ifie bụọdẹmị, Jehovah ịkịtịkịtị mịẹ ẹrẹmị. Ịkịtịkịtị bị Balaam biimị: ‘Tetuu kị duonị ị́mịnị ị faamọmịnị a o?’ Balaam gbaamị: ‘Ị́mịnị ị mịẹ ayẹbẹ kịmị bara kị paamịnị. Agbọdọ ine bara a timiwẹrị a, ịmịnị ị́ baadẹ.’ Ịkịtịkịtị mị gbaamị: ‘Ịmịnị biin kụraịama ka ị́ sibe yọụdẹ, ịmịnị mọ mịẹdẹ wẹrị ma?’

Jehovah Balaam mịẹ wẹrị angel bị ẹrịmị. Angel-owei bị gbaamị: ‘Ị́mịnị weribịbị kọn Israel-otubo pịrịkụmọ bara Jehovah mọ gbaa ị́ pịrịmị.’ Balaam gbaamị: ‘Ịmịnị mịẹkirimị, ịmịnị waị warị a mú mịnị.’ Anịa angel-owei mị gbaa ụ pịrịmị: ‘Ị́mịnị Moab a mú a paaemi, anịa Jehovah gbaa ị́ pịrịmụ yebo bẹtịbị kị ị́mịnị mọ gbaa mịnị.’

Balaam bei paa yebo duo ye tolumọ akị ma? Balaam kẹnị ye kpọ tolumọ akịgha. Bịsẹ ifie bụọdẹmị, Balaam tara ifiesẹ weribịbị kọn Israel-otubo pịrị dọụmị, anịa tara ifiebosẹ Jehovah Balaam mịẹwẹrị tarịama ka kị Israel-otubo pịrịmị. Timi kẹnị ifie laamị, Israel-otubo Moab ibe mọ sụụwẹrị Balaam baamị. Balaam, bọlọụsẹ Jehovah gbaaye kị peiwẹrị a, ebimụtimi bara ị́ mọ tọngha?