Jehovah Joshua Sẹlẹmị

Moses, Israel ibe daatimi biin kụraịama bụọdẹmị, wó fịịmụ ifie bo naịnmị. Jehovah gbaa ụ pịrịmị: ‘Ị́mịnị Israel-otubo akị Kikoromọ wẹrịemi Ogbo bọọ sụọgha fa. Mọabịkpọ ịmịnị ị́ bụọmọ wẹrị Ogbo bị ẹrị mịnị.’ Zịnị kịmị sẹlẹ akị Israel-otubo daa bara Moses mọ gbaa Jehovah pịrịmị. Jehovah gbaa ụ pịrịmị: ‘Mú Joshua laadá ómịnị kị sẹlẹdẹ bara gbaa ụ pịrị.’

Moses ómịnị alaghatimi fịị mịnị, bá Jehovah Joshua kị sẹlẹwẹrị Israel-otubo daa mú Kikoromọ wẹrịemi Ogbo bọọ sụọ mịnị bara gbaa á pịrịmị. Moses bá gbaa Joshua pịrịmị: ‘Malafakụmọ. Jehovah ị́ barị mịnị.’ Bịsẹ yọ bụọbị, Moses Nebo Ogun agọnọ bọọ múmị, Jehovah bịsẹ yọ bọọ Wó kikoromọ akị Abraham, Isaac, bá Jacob pịrị wẹrị Ogbo bị akị Moses dịamị. Moses 120 kụraịama kị baịwẹrị fịịmị.

Jehovah gbaa Joshua pịrịmị: ‘Jordan Tọrụ bẹịndá, Canaan ama duo sụọ. Ịmịnị baratụa Moses pịrị bara bị Ịmịnị baratụa ị́ kpọ pịrị mịnị. Ereinbosẹ ine Olokobo goo. Malafakụmọ. Kịlịkịlị. Mú Ịmịnị akị ị́ pịrịwẹrịemi fịrị wẹnị.’

Joshua maa kịmị fịrịmọ Jericho ibe bọọ tuudọụ yọ a múmị. Barịị tolumọmụ yọbị omịnị paa yebị dọụ ẹrị mịnị. Ámịnị waịbo mị, Canaan duo sụọmụ ifiebị laadẹ bara ámịnị mọ gbaamị. Barịị baịmị, kịmịsẹ anị yebo sibe bara Joshua mọ gbaamị. Ámịnị Jordan Tọrụ bọọ múmịnị mị, avụọ ekpedi sibe wẹrịemi ịkịan-kụn otubo kị bọlọụ bọọ timi bara Joshua mọ gbaamị. Tọrụ beni mị dụba kụrọmọmị. Anịa ịkịan-kụn otubo bụọkiribị beni gbelebị, beni bị iyerimị! Ịkịan-kụn otubo wẹnịmú tọrụ okolo bọọ tịẹtimi Israel-otubo tọrụ bẹịnsiinmị. Bei tamama yebị Jehovah Red Sea bọọ mịẹ yebị akị ánị ukiemọ bara ị́ mọ tọnmị?

Biin kụraịama bụọdẹbị, Israel-otubo Kikoromọ wẹrị Ogbo laamị. Ámịnị warịama kẹrịmị, bá ánị dọụyesẹ gboromị. Ámịnị biin fịyaịama mọ bá beinyaị tụa tịn-ama mọ gboromị. Anị kị duonị, bọụn mọ bá milk mọ tẹịn-mịnị ogbo akị yọbị tịịnmị.