Noah Ark Mị

Timi kẹnị ifie laamị, kịmịawọụ kiriogbo bọọ biin mị. Kiriogbo bọọ timi kịmịbo biin kịmịama seiye-seiye kị mịẹtimimị. Agọnọ bọọ timi angel-otubo kpọ, zụa sei angel-ama ka paamị. Ámịnị agọnọ bọọ barasiin wẹrị kiriogbo bọọ bomị. Ámịnị kiriogbo bọọ bo tuubị ị́ mọ nimimị? Ámịnị kịmịawọụ angọ tụadá, ereama nanamụ kị duonị, kiriogbo bọọ bomị.

Angel-otubo mọ bá angel-otubo nana erebo mọ, owei-awọụama ziimị. Bịsẹ awọụbo kụrọ nana kụrọmọmị, anịduonị, ámịnị kịmịotu penimọ kụrọmọmị. Ámịnị seiye-seiye ka kị kịmịotu mịẹtimimị. Jehovah á bụọmọ wẹrị ánị mịẹtimi seibo mịẹ bọlọụ amú dọụgha duonị, ómịnị opubeni akị seiyaị mịẹ otubosẹ baa siinmị.

Anịa kẹnị owei bẹbẹ paamị. Ómịnị Jehovah tarịmị. Noah kị wó ẹrẹ. Ómịnị ere-nana wẹrịmị, bá tara owei-awọụama kpọ zii wẹrịmị. Shem, Ham, bá Japheth kị wó awọụ ẹrẹbo. Wó awọụbosẹ kpọ ereama nana wẹrịmị. Noah mọ wó ziituu mọ Opubeni bọọ sụọfịị Jehovah mọ dọụgha duonị, ómịnị Noah fịrịmọ wẹrị ark kaịmị. Ark mị opu epkedi, ark mị beni a ofoinmịnị. Jehovah namabo kpọ zụọbụọmọ dọụmịnị duonị, Noah fịrịmọ wẹrị biin nama-ama kpọ akị ark bọọ saịmị.

Noah ifie famọgha bara ark kaịmị. Noah mọ wó ziituu mọ, 50 timitimi kụraị-ama ka kị ark kaịmị. Noah mọ wó ziituu mọ Jehovah gbaabara ka kị ark kaịmị. Bịsẹ ifiebị, Noah Opubeni bomịnị bara gbaa akị kịmịotubo pịrịmị. Anịa kẹnị ụbọ kpọ ụ peigha.

Timi kẹnị ifie laamị, ark bọọ leimụ ifie laamị. Barịị yọbị wo paa bara bị ẹrịmịnị.