Jehovah Etipou Bara Akị Jonah Mọ Inyenrinmị

Nineveh, Assyria ibema timi ama. Anịa, Nineveh ama bọọ timi kịmịbo bolousei kụrọmọmị. Jonah mú gbaa Nineveh otubo pịrịdá ámịnị boloudei má ánị mịẹmịnị seibo a barasin bara Jehovah mọ gbaa Jonah pịrịmị. Anịa Jonah Tarshish a múmịnị abadị-arụ ka leiwẹrị zịnị anga amúmị.

Abadị-arụ bị abadị-tọrụ bọọ emi bị, kẹnị kụrọ kimé paamị. Anịduonị, arụ yọụtimi otubo bo malafakụrọmọ mị. Ámịnị tẹẹ ánị orubo pịrị bá á biimị: ‘Tetuu kị duonị bei yebị paamịnị a o?’ Jonah gbaa á pịrịmị: ‘Ịmịnị, Jehovah ị fịrịmọ ịsọmụ duo baịntẹịmịnị kị duonị, bei yebị paamịnị. Ị kọn abadị-tọrụ bọọ gbeinmọ koromọdaba, kimémị pẹlẹmịnị.’ Arụ yọụtimi otubo Jonah kọn gbeinmọ koromọ dọụgha timi mị. Anịa ómịnị bụọgha. Ámịnị ụ gbeinmọ koromọ ifiemị, kimé paakị pẹlẹmị.

Jonah fịịmụ bara kị tọn wẹrịmị. Ómịnị abadị bọọ bile sụọmúmịnị mị, ómịnị tẹẹ Jehovah yarịmị. Jehovah kẹnị opu indi fịrịmọ mú Jonah mẹnẹmị. Anịa indi mị Jonah baagha. Jonah indi biribolouma tẹẹmị: ‘Ifiemọsẹ ịmịnị iné gbaaye kị mịẹmịnị.’ Jehovah indi biribolou bọọ Jonah kekerewẹrị tara erein laamị, má indi mịẹ ịkparị-emi ogbo amú wó agbọ paamọmị.

Jehovah Jonah zụọbụọmọdẹ duonị, ómịnị bá Nineveh á múmọ agbẹịgha o? Bịsẹbaragha. Jehovah mọkpọ waị Jonah fịrịmọ Nineveh a múmị. Bei ifiemị, Jonah, Jehovah gbaa bara kị mịẹmị. Ómịnị mú gbaa bịsẹ bolousei-otubo pịrịmị: ‘Erein a maasii (40) kị kọọ, Nineveh gbeingọgọlọmịnị.’ Anịa kẹnị ye paamị—Nineveh otubo wó gbaa egberi peiwẹrị ánị mịẹtimi seiyebo a barasinmị. Nineveh pẹrẹ bị gbaa wó kịmịbo pịrịmị: ‘Kịmịsẹsẹ Ọkpọnanaowei tẹẹ, má boloudei. Kaanghaba ómịnị wo dieniniwẹrị wo gbeingọgọlọgha fa.’ Jehovah Niniveh-otubo boloudeidẹ bara ẹrị duonị ómịnị Nineveh gbeingọgọlọgha.

Ama gbeingọgọlọgha duonị Jonah boloukọn kụrọmọmị. Iroro dii: Jehovah etipou má dienini akị Jonah a nanamị, anịa Jonah Nineveh-otubo dieninigha. Ómịnị ungu tịntuu ka mú tịtẹtimi wó andẹ-seimọmị. Anịa tịn bị fịị ifiemị, Jonah boloukọnmị. Anịduonị Jehovah gbaa ụ pịrịmị: ‘Bei tịn kị iné tọrụ bọọ yelaa akị Nineveh-otubo dẹịn-emi. Ịmịnị á dienini kị duonị Nineveh-otubo tẹịmị.’ Jehovah teeki mịẹgaan dọụtimi ma o? Nineveh-otubo opubara ka kị yelaa akị tịn dẹịn-emi.